DIOS ni xlakaskin pi xlatamaw chuna la lamaw la uku. Xla xlakaskin pi kKatiyatni xlitatsamalh latamanin tiku xmaxkikgolh kakni xlimapakgsin, xlitamakgtayakgolh xtastakyaw chu xlimasiyakgolh xalakwan tayat nema xla kgalhi. Xlakaskin pi xlatamakgolh niku xʼanalh takaksni, xkgalhikgolh xfamiliajkan nema xpaxuwakgolh, xlakgapaskgolh tuku ni xlakgapaskgo chu akgtum paraíso xtlawakgolh Katiyatni.

• «Masputu guerra kxlitilanka katiyatni» (Salmo 46:9).

• Chilha «nkilhtamaku [...] akxni namalakgsputuya wa nti lakglakgalhikgoy nkatuxawat» (Apocalipsis 11:18).

• «Ni chatum lataman nawan: “Ktatatlay”» (Isaías 33:24).

• «Tiku kkalaksaknit putum kilhtamaku namaklakaskinkgo xtaskujutkan nema litlawakgonit xmakankan» (Isaías 65:22).

¿La nakgantaxtu uma tuku wankanit pi nala? Dios lakgayawanit xKgawasa, Jesús, Mapakgsina nalitaxtu kʼakgtum xatlan tamapakgsin nema natawilayacha kʼakgapun chu namapakgsinan kxlikalanka Katiyatni. Biblia limapakuwi xTamapakgsin Dios (Daniel 2:44). Na wan xlakata Jesús: «[Dios] namaxki xlaktawilh [...] chu xTamapakgsin nikxni katilakgsputli» (Lucas 1:32, 33, TNM).

Akxni latamalh kKatiyatni, Jesús tlawalh lhuwa milagros xlakata nalimasiya pi akxni namapakgsinan, latamanin nakgalhikgo tlakg tlan latamat.

• Mapaksalh kaxatukawa tajatat, chuna limasiyalh pi tlan namasputu putum tajatat (Mateo 9:35).

• Makaksalh unisen, chuna limasiyalh pi tlan kamapakgsi tuku anan kkakilhtamaku (Marcos 4:36-39).

• Kamawilh lhuwa latamanin, chuna liwana limasiyalh pi tlan nakinkamaxkiyan tuku maklakaskinaw (Marcos 6:41-44).

• Vino limaxtulh chuchut niku xtamakgaxtokgmaka, chuna limasiyalh pi akxni namapakgsinan nalipaxuwayaw latamat (Juan 2:7-11).

¿Tuku militlawat xlakata nalipaxuwaya tuku Dios lakpuwanit nakamaxki tiku paxkikgo? Wi akgtum tiji nema milistalanit. Biblia wan pi uma akgtum «tiji [...] nema linan klatamat» chu ni lhuwa tiku tekgskgo (Mateo 7:14, TNM).

¿Tuku kilhchanima tiji nema linan klatamat? Uma tiji kilhchanima putum tuku Dios lakaskin natlawayaw. Xla kinkawaniyan: «Akit, Jehová, akit miDios, Tiku masiyaniyan xlakata tlan nakitaxtuniyan, Tiku pulalinan ktiji niku militlawanat»  (Isaías 48:17). Komo nastalaniya uma tastakyaw tlakg tlan nalatapaya.

Jesús wa: «Kit wa ntiji, chu wa xlikanaj chu wa latamat» (Juan 14:6). Komo nakanajlaniyaw xtamasiy Jesús chu nastalaniyaw xliʼakxilhtit, natlawa pi natalakatsuwiniyaw Dios chu pi kilatamatkan tlakg tlan nawan.

¿La tlan natekgsa uma tiji? Maski anan lhuwa takanajla o tiji, Jesús wa: «Ni xlipaks wa nti nkiwaniy: Tlati, Tlati, natanuy kxtapakgsin akgapun, wampi xman wa wanti xtlawalh xtalakaskin nkinTlat wanti wi nak akgapun» (Mateo 7:21). Na wa: «Wa xatawakat nalilakgapaskgoyatit» (Mateo 7:16). Biblia tlan namakgtayayan nakatsiya tuku xaxlikana takanajla (Juan 17:17).

¿Tuku militlawat xlakata tlan napina kʼuma tiji? Mililakgapasat tiku kinkamaxkinitan latamat. Milikatsit tiku uma, tuku wanikan, la likatsi, tuku tlawama chu tuku lakaskin natlawayaw. *

Dios ni kajwatiya lakaskin kaskujwi, kawayaw, kapaxuwaw chu kakgalhiw familia. Xla lakaskin pi kalakgapaswi chu tlan katalaliw. Akxni kgalhakgaxmataw limasiyaniyaw pi paxkiyaw. Jesús wa: «Uma kilhchanima latamat nema ni kgalhi xlisputni komo nalakgapaskgoyan, kajwatiya xaxlikana Dios» (Juan 17:3, TNM).

Xlakata namakgapaxuwaya xaxlikana Dios, max wi tuku mililakgpalit. Max tuwa takgaxmata, pero komo napina kʼuma tiji nakitaxtu xtachuna la wi niku pimpat, kaj pulaktum tuku militlawat xlakata namatsukiya uma. Komo kgalhiya takgalhskinin xlakata Dios, kaskinti akgtum takgalhtawakga xalak Biblia kkisitiojkan xla Internet, jw.org. Xtatayananin Jehová xatapaxuwan nakkalakgapaxialhnanan hora chu niku wix matlaniya.