Dios kawanilh: «Kilhtamaku akxni nawaya, xlikana pi naniya» (Génesis 2:17). Komo Adán malakatsukika xlakata xkgololh chu xnilh, uma tuku wanika ni xlakaskinka xwanit. Adán xkatsi pi komo ni xwalh xtawakat uma kiwi, ni xnilh.

Adán chu Eva tlan ni xwakgolh xtawakat uma kiwi, xlakata kjardín xwilakgo lhuwa kiwi nema xmastakgo xtawakat chu tlan xwakgolh (Génesis 2:9). Komo ni xwakgolh xtawakat uma kiwi, xkgalhakgaxmatkgolh tiku kamaxkilh latamat, chu xlimasiyakgolh pi kajwatiya Dios xlakgchan xkawanilh tuku xlitlawatkan xwanit.

Xlakata nakatsiyaw tuku xlakata Adán chu Eva nikgolh, talakaskin naʼakxilhaw tuku lalh makgasa, nema kinkamakgapatinaman la uku. Satanás, chatum ángel tiku nitlan likatsi, maklakaskilh tantum luwa xlakata nawan akgtum taʼakgsanin. Biblia wan: «Chu luwa tlakg skgalala litaxtulh xliputum animales xalak kakiwin nema Jehová Dios xkatlawanit. Wa xlakata wanilh puskat: “¿Xlikana Dios kawanin pi ni nawayatit xtawakat putum kiwi nema yakgolh kjardín?”» (Génesis 3:1).

Eva kgalhtilh: «Xtawakat kiwi nema yakgolh kjardín tlan kwayaw. Pero xlakata xtawakat kiwi nema wi kxitat jardín, Dios wanit: “Ni miliwatkan, ni, ni milixamatkan, xlakata ni naniyatit”». Chu luwa wanilh: «Ni katinitit. Xlakata Dios katsi pi kilhtamaku akxni nawayatit xtawakat, natalakki milakgastapukan chu la Dios nawanatit, nalakgapasatit tuku tlan chu tuku nixatlan». Chuna Satanás wa pi Jehová xaʼakgsanina chu pi xkamatsekgnima tuku tlan (Génesis 3:2-5).

Eva kanajlalh. Kaks akxilhli kiwi. Stlan xtasiya... stonkgli xmakan, puxli xtawakat chu tsukulh wa. Biblia wan tuku lalh alistalh: «Alistalh na maxkilh xchixku, chu xla tsukulh wa» (Génesis 3:6).

¡Max lu lilipuwa Jehová akxni akxilhli pi xkamanan tiku lu xkapaxki ni kgalhakgaxmatkgolh! ¿Tuku tlawalh? Jehová wanilh Adán: «Nawaya kaxtalanchu pero pulana naxunuya asta akxni nataspitparaya kkatiyatni, xlakata anta tiyaka. Xlakata pokgxni wix chu kpokgxni napimparaya» (Génesis 3:17-19). Chu chuna lalh, «kilhtamaku nema latamalh Adán kichalh akgnajatsa ciento puxamakaw kata chu nilh» (Génesis 5:5). Akxni Adán nilh, ni alh kʼakgapun chu nipara alakatanu. Akxni Jehová nina xlimalakatsuki pokgxni, Adán nitu xlama, chu akxni nilh, pokgxni wampa, uma wamputun pi nialh latamalh. ¡Lu nitlan!

Akxni nialh kgalhakgaxmatkgolh Dios, Adán chu Eva lakgalhinankgolh chu nialhla putum kilhtamaku xlatamakgolh. Lata uma kilhtamaku xmaknikan tsukulh talakgpali: makglakgalhinanin litaxtukgolh. Pero tuku tlawakgolh ni kajwatiya xlakan lipatinankgolh; kamatitaxtinikgolh talakgalhin putum xkamanankan. Romanos 5:12 wan: «Ntsukulh ntalakgalhin nkatuxawat nkaj xpalakata nchatum nchixku, pus wa linin nkitaxtunilh ntalakgalhin; cha nchu linin, chuna nkgalhikgolh xlipaks nchixkuwin sampi paks lakgalhinankgolh».

Biblia wan pi linin xtachuna la maktum lhakgat nema litamakgchikgonit putum kachikinin chu xtachuna talakgastawan tuku litatlapakgonit putum kachikinin (Isaías 25:7). Uma litamakgchin xtachuna puklhni nema makgninan chu nila tsalanikan. Chuna, «xpalakata Adán putum nimakgolh» (1 Corintios 15:22, TNM). Pero takgalhskinin nema taxtuyacha xtachuna tuku xʼakstu kgalhskinka Pablo: «¿Tiku nakimalakgtaxti k’uma makni nema tlawama pi nakni?». ¿Wi tiku tlan nakinkalakgmaxtuyan? (Romanos 7:24, TNM).