Akglhuwa mil kata, tajatat kamakgnilh lhuwa latamanin xlakata niti xkatsi xtakgalhtin uma takgalhskinin. Chuna la titaxtulh kilhtamaku, científicos katsikgolh xaxlikana. Katsikgolh pi laktsu gérmenes, la virus chu bacterias, tlawa pi kaʼanalh lhuwa tajatat. Xlakata katsikanit uma, makgtayananit ni lu natatatlakan chu nakatsikan la nakuchikan pulaklhuwa tajatat, chu uma tlawa pi lhuwa latamanin tlakg makgas nalatamakgo chu ni lu natatatlakgo.

Pero ¿tuku tlan nawanaw xpalakata amakgapitsi xlakaskinka takgalhskinin? ¿Lakpuwana pi komo nakatsiya xtakgalhtin umakgolh takgalhskinin nalakgpali milatamat?

• ¿Tiku Dios?

• ¿Tiku Jesucristo?

• ¿Tuku xTamapakgsin Dios?

• ¿La nawan kilatamatkan kkilhtamaku nema aku mima?

Lhuwa millón latamanin tekgskgonit xtakgalhtin umakgolh takgalhskinin, chu tlakg tlan wi xlatamatkan. Xtakgalhtin umakgolh takgalhskinin na tlan namakgtayayan.

Xlakata la uku tuwa katsikan tuku xaxlikana chu tuku kaj taʼakgsanin, max miʼakstu kgalhskinkana komo tlan tekgskan xaxlikana. ¿Tuku xlakata?

Lhuwa latamanin ni lipawankgo tuku wankgo mapakgsinanin, empresas chu tuku lichuwinankan knoticias. Nila katsikgo komo xlikana tuku lichuwinamaka o kaj xtapuwankan latamanin, o komo kaj tsinu xlikana o putuminika taʼakgsanin. Kʼuma kakilhtamaku niku ni lalipawankan chu ni liwana lamakatsinikan, latamanin ni kajwatiya ni lipawankgo la lichuwinamaka tuku lalh, wata ni kanajlakgo komo xlikana lalh tuku lichuwinamaka.

Maski chuna, wix tlan natekgsa xaxlikana takgalhtin xla takgalhskinin nema tlakg xlakaskinka. ¿La natlawaya? Chuna la akxni putsaya xtakgalhtin atanu takgalhskinin nema ni lu xlakaskinka.

Chali chali putsayaw tuku xaxlikana. Akgtum liʼakxilhtit, Jessica kuentajtlawa pi tuku tamawa ni kgalhi maní (cacahuate). Xla wan: «Kintsumat nila wa nipara tsinu tuku kgalhi maní xlakata max asta xlakgnilh. Wa xlakata, akxni ktamawa tuku wakan, liwana klikgalhtawakga xmakni xlakata nakakxilha tuku kgalhi. Alistalh tlakg kputsanan chu asta ktachuwinan fabrica xlakata liwana nakkatsi komo xlikana ni kgalhi maní tuku ktamawama. Na kputsanan niku lichuwinankan komo uma fabrica xlikana kuentajtlawa akxni lakkaxtlawa liwat nema stay».

Max wix ni chali chali miliputsat tuku xaxlikana xlakata taway la tlawa Jessica, pero tlan namaklakaskina tuku xla tlawa xlakata natekgsa xtakgalhtin atanu takgalhskinin:

• Wi tuku nakatsiya.

• Tlakg naputsanana.

• Naputsanana niku nawanikana tuku xaxlikana.

Uma namakgtayayan natekgsa xtakgalhtin takgalhskinin nema tlakg xlakaskinka. Kaʼakxilhwi la natlawaya.

Xlakata Jessica xtekgsli xtakgalhtin tlakg xlakaskinka takgalhskinin nema anan klatamat, tlawalh chuna la tlawa akxni putsanan komo liwat nema tamawama ni kgalhi maní. Xla wan: «Xlakata liwana klikgalhtawakga Biblia chu liwana kputsanan, kimakgtayanit nakkatsi tuku xlikana masiya Biblia». Lhuwa millón latamanin nachuna tlawakgonit la Jessica chu katsikgonit tuku wan Biblia xlakata umakgolh takgalhskinin:

• ¿Tuku xlakata lamaw?

• ¿Tuku kinkaʼakgspulayan akxni niyaw?

• ¿Tuku xlakata anan lhuwa tapatin?

• ¿Tuku tlawama Dios xlakata namasputu tapatin?

• ¿La tlan xatapaxuwan natawila familia?

Wix na tlan natekgsa xaxlikana xtakgalhtin umakgolh takgalhskinin chu atanu komo nalikgalhtawakgaya Biblia chu tlakg naputsanana kwww.pr418.com.