Xtukuwani. Xla wan: «Akit Jehová. Wa uma kintukuwani» (Isaías 42:8). Anta kBiblia, xtukuwani Dios min max akgtujun mil xlimakglit. Pero klhuwa Biblia nema kamatitaxtikanit kʼatanu tachuwin lakgpalikgonit xtukuwani Dios chu kajwatiya wilikgonit Malana. Dios lakaskin pi wix xʼamigo kawanti, wa xlakata lakaskin kamapakuwi (Salmo 105:1).

Tuku lilakgapaskan. Anta kBiblia, pulaklhuwa tuku Jehová lilakgapaskan, la Dios, Tiku kgalhi putum litliwakga, Malakatsukina, Tlat, Malana chu tiku Lakgchan namapakgsinan. Anta kBiblia na natekgsaw lhuwa oraciones nema tlawanika Dios chu latamanin maklakaskinkgolh tuku lilakgapaskan chu xtukuwani, Jehová (Daniel 9:4).

 La tasiya Dios. Dios chatum espíritu chu nila akxilhkan (Juan 4:24). Biblia wan pi «wa Dios, ti ni aukxilha» (Juan 1:18). Biblia na kinkawaniyan pi Dios na makgkatsi. Tuku tlawayaw tlan namakgapaxuwa xnaku o namakgalipuwan (Salmo 78:40, 41; Proverbios 27:11).

Xalaktlan xtayat. Dios ni kalaksakpaxki latamanin, maski tanu tanu xkilhtsukutkan o xkachikinkan (Hechos 10:34, 35). Na lakgalhamaninan, kgalhkgalhinan, ankgalhin paxkinan, chu ankgalhin wan tuku xaxlikana (Éxodo 34:6, 7). Pero xlipaks xtayat nema kgalhi, pulaktati tlakg limasiya.

Litliwakga. Wa «Dios Tiku kgalhi xliputum litliwakga». Uma wamputun pi tlan namakgantaxti putum tuku malaknu (Génesis 17:1).

Liskgalala. Ni anan atanu tiku tlakg skgalala nixawa Dios. Wa xlakata, Biblia wan pi «kajwatiya Dios xaskgalala» (Romanos 16:27, Traducción del Nuevo Mundo, TNM).

Taʼakgstitumilit. Dios ankgalhin tlawa tuku xaʼakgstitum. «Lu tlan putum» tuku tlawa chu nikxni «tlawa tuku ni xaʼakgstitum» (Deuteronomio 32:4).

Tapaxkit. Biblia wan pi «Dios, tapaxkit» (1 Juan 4:8). Dios ni kajwatiya limasiya tapaxkit, wata tapaxkit litaxtu. Xliputum tuku tlawa chuna tlawa xlakata paxkinan, chu uma tipalhuwa la kinkamakgtayayan.

La katalalin latamanin. Dios wa xapaxkina kinTlatkan xalak akgapun (Mateo 6:9). Komo kanajlaniyaw, tlan xʼamigos nalitaxtuyaw (Salmo 25:14). Xla lu kinkalilakgaputsayan, wa xlakata lakaskin natlawaniyaw oración xlakata natalakatsuwiniyaw chu nawaniyaw putum kintaʼakglhuwitkan (Santiago 4:8; 1 Pedro 5:7).

Jesús ni wa Dios. Jesús xachastum xlakata niti makgtayalh Dios akxni Malakatsukilh Jesús. Wa xlakata kBiblia wanikan xKgawasa Dios (Juan 20:31). Jehová malakatsukilh Jesús, xapuxku xKgawasa. Alistalh limapakuwilh «skujni xapuxku» chu maklakaskilh xlakata xmalakatsukilh putum tuku anan kkakilhtamaku chu putum tiku staknankgo (Proverbios 8:30, 31; Colosenses 1:15, 16).

 Jesús nikxni wa pi xla Dios. Wata Jesús wa: «Sampi wa nkit kminiyacha [Dios], na wa nkimalakgachalh» (Juan 7:29). Akxni xtachuwinama chatum kstalanina, Jesús limapakuwilh Jehová, «kinTlat tiku na minTlatkan chu kiDios tiku na miDioskan» (Juan 20:17, TNM). Akxni nilh, Jehová malakastakwanilh xlakata xlatamalh kʼakgapun, xtawilalh kxpakgastakat chu maxkilh limapakgsin (Mateo 28:18; Hechos 2:32, 33).

Jesucristo tlan namakgtayayan natalakatsuwiniya Dios

Kilachi kKatiyatni xlakata xkinkamasiyanin la likatsi xTlat. Wa uma tuku Jehová lichuwinalh xlakata Jesús: «Wa yuma nkinKam nti lu[...] kpaxkiy, wa nkakgaxpatnitit» (Marcos 9:7). Jesús wa tiku tlakg liwana lakgapasa Dios. Xla wa: «Tini katsiy wanti xaTlat, wampi xman wa nkatsiy xaKam, chu xman nalakgapasa wa nti xmasiyuniputulh xaKam» (Lucas 10:22).

Liwana limasiya xtayat Dios. Jesús liwana limasiyalh la likatsi xTlat, chu wa xlakata wa: «Wa nti nkiukxilhnita, ukxilhnita xaTlat» (Juan 14:9). Xlakata tuku xwan chu tuku xtlawa, Jesús kamakgtayalh latamanin xtalakatsuwinikgolh Dios xlakata kamasiyanilh la xkapaxki xTlat. Jesús wa: «Kit wa ntiji, chu wa xlikanaj, chu wa latamat; ti ni katilakgalh xaTlat lapi ni kit nkimpalakata» (Juan 14:6). Na wampa: «Xaxlikana xkakninanin Dios nalikakninanikgo xaTlat espíritu chu xaxlikana, xlakata xaTlat kaputsama tiku chuna kakninaniputunkgo» (Juan 4:23, TNM). ¡Kaj kalilakpuwanti! Jehová kaputsama latamanin la wix, latamanin tiku katsiputunkgo tuku xaxlikana.