Uma kilhtamaku talakatsuwima akgtum «lanka unisen». Jesús limapakuwilh «ntlanka takatsanajwat» (Mateo 24:21). Chu maski nila tsalaniyaw uma lanka unisen, tlan naputsayaw niku natatsekgaw. ¿Tuku kilitlawatkan?

Anta kTaʼakgchuwin xalak Sipi, Jesús lichuwinalh uma: «Chuntiya, pulana kaputsatit xTamapakgsin chu tuku xaʼakgstitum akxilha Dios» (Mateo 6:33, TNM). ¿Tuku wamputun uma?

«Chuntiya, pulana kaputsatit xTamapakgsin». Uma wamputun pi xTamapakgsin Dios tlakg xlakaskinka xliwanat nixawa atanu (Mateo 6:25, 32, 33). ¿Tuku xlakata chuna kililakpuwanatkan? Xlakata latamanin nila lakkaxtlawayaw taʼakglhuwit xalak kakilhtamaku. Kajwatiya Dios tlan chuna natlawa.

Chuntiya kaputsatit «tuku xaʼakgstitum akxilha Dios». Uma wamputun pi naliskujaw nakgalhakgaxmataw xlimapakgsin chu xtastakyaw Dios. ¿Tuku xlakata? Xlakata nitlan kintikakitaxtunin komo kiʼakstukan nalaksakaw tuku tlan chu tuku nitlan (Proverbios 16:25). Pero komo nakgalhakgaxmataw xlimapakgsin Jehová, namakgapaxuwayaw, chu ni kajwatiya uma, na tlan nakinkakitaxtuniyan (Isaías 48:17, 18).

¿Tuku xlakata Jesús wa: «Chuntiya, pulana kaputsatit xTamapakgsin chu tuku xaʼakgstitum akxilha Dios»? Xlakata xla wa pi makgapitsi max nialh kuenta xtlawakgolh chu xlakpuwankgolh pi komo xtlajakgolh lhuwa tumin tlan xtawilakgolh. Amakgapitsi lu x’amakgo lilakgaputsakgo xlakata xkgalhikgolh tuku xmaklakaskinkgolh chu nialh x’amakgo  kgalhikgo kilhtamaku xlakata xputsakgolh xTamapakgsin Dios (Mateo 6:19-21, 25-32).

Pero Jesús malaknulh pi tiku natatayakgo xTamapakgsin Dios nakgalhikgo putum tuku maklakaskinkgo la uku chu kkilhtamaku nema aku mima nakgalhikgo tlakg lhuwa tasikulunalin (Mateo 6:33).

Maski xapulana kstalaninanin Jesús, pulana wilikgolh xTamapakgsin Dios chu tuku xa’akgstitum, ni akxilhkgolh pi ksputli tapatin. Pero tekgskgolh xaxlikana putatsekgni. ¿La tlawakgolh uma?

Xlakata kgalhakgaxmatkgolh xlimapakgsin Dios, kamakgtayalh ni nakgalhikgo taʼakglhuwit nema xkgalhikgo tiku ni xkgalhakgaxmatkgo Jehová. Xlakata xkanajlakgo pi xTamapakgsin Dios xʼama min, kamakgtayalh natayanikgo tuku tuwa titaxtukgolh. Chu Dios kamaxkilh «ntlanka litliwakga» xlakata xtayanikgolh (2 Corintios 4:7-9).

Kstalaninanin Cristo tiku xlamakgo kxapulana siglo kgalhakgaxmatkgolh xlimapakgsin Jesús pi pulana xwilikgolh xTamapakgsin Dios. Lichuwinankgolh xalakwan tamakatsin xlakata Tamapakgsin niku xlakan xlamakgolh (Colosenses 1:23). ¿Wi tiku tlawa uma taskujut la uku?

Chuna, xtatayananin Jehová katsikgo pi nialh lhuwa kilhtamaku tsankga xlakata xTamapakgsin Dios namasputu uma kakilhtamaku. Wa xlakata liskujkgo xlakata namakgantaxtikgo uma tuku wa Jesús: «Taliakgchuwinanit nawan xlikatlanka nkatuxawat yuma xatlan tamakatsinin xla [Tamapakgsin]; lakimpi paks nakgaxmatkgoy yuma ntalulokgtat xlipaks akgmakgat chixkuwin; akxniku nchu nachin xlikgatsputni nkatuxawat» (Mateo 24:14).

¿Tuku natlawaya wix akxni nakgaxpata uma xatlan tamakatsinin? Kkamaʼakgpuwantiniyan natlawaya tuku tlawakgolh tiku xlamakgo kxapulana siglo kkachikin Berea nema xtapakgsi kMacedonia. Akxni kgaxmatkgolh xalakwan tamakatsin xla Tamapakgsin nema xlichuwinama apóstol Pablo, xatapaxuwan «ntimakgamakglhtinankgolh» tamakatsin, lakputsananikgolh «ntatsokgnun» xlakata xkatsikgolh komo xlikana tuku xkgaxmatkgonit chu lilatamakgolh (Hechos 17:11, 12).

Wix na tlan chuna natlawaya. Komo pulana naputsaya xTamapakgsin Dios chu tuku xaʼakgstitum, natekgsa putatsekgni chu tamakgtay la uku, chu kilhtamaku nema aku mima, nalipaxuwaya takaksni putum kilhtamaku chu nitu katilipekuanti.