• Dios xʼama laksaka. «Akit klaksaknita ti lanka Rey nakliwilij, [...] y akit nakmaxkiyan ixliwakg tachixkuwit nima talamana nak kakilhtamakuj, y mila nawan wakg ti talamana» xlikalanka katiyatni (Salmo 2:6, 8, Salmos Ixtatlincan Ti Talipawan Dios, SXP).

• Xʼama makglhtinan xtamapakgsin David. «Chatum aktsu kgawasa lakachilh, chatum aktsu kgawasa kinkamaxkikanitan [...]. Xtamapakgsin chu takaksni ni katisputli kxpumapakgsin David chu kxtamapakgsin xlakata liwana natalakkaxwili» (Isaías 9:6, 7).

• Xʼama lakachin kBelén. «Chu wix, Belén [...] anta nalakachin tiku namapakgsinan [...], xlilanka natalakgapasa xlikalanka Katiyatni» (Miqueas 5:2, 4).

• Xʼamaka lakgmakgankan chu xʼamaka makgnikan. «Lakgmakganka chu liʼakxilhka la chatum tiku ni xkgalhi xtapalh [...] lakgxtokgowakaka xlakata kintalakgalhinkan; limapatinika xlakata tuku nitlan tlawanitaw» (Isaías 53:3, 5).

• Xʼama lakastakwanan chu xʼamaka malankikan. «Porque katsi xlakata kilistakni ni akgxtakgwilipat nak kalinin, na ni mastapat kilhtamakuj, xlakata akit ti klipawanitan, namasa kimakni nak tawaxni. [...] Kanikxniwa lan nakmakglhkatsi nak mimpaxtun» (Salmo 16:10, 11, SXP).

Kajwatiya tiku chuna litalakgapasa putum uma tuku lichuwinaw wa Jesucristo. Asta chatum ángel makatsinilh xtse, María: «Namaxkiy nkimPuchinakan Dios xlimapakgsin David xtlat. [...] Xlimapakgsin, niukxni katikgalhilh xlisputni» (Lucas 1:31-33).

Jesús ni mapakgsinalh akxni xlama kKatiyatni. Pero nakamapakgsi latamanin lata kʼakgapun akxni namapakgsinan kxTamapakgsin Dios. ¿Tuku xlakata wa tlakg xatlan Mapakgsina? Kaʼakxilhwi tuku tlawalh akxni xlama kKatiyatni.

•   Jesús kalilakgaputsalh latamanin. Kamakgtayalh lakchixkuwin chu lakpuskatin, kamanan chu tiku xlinkgoya kata. Ni xlakaskinka xʼakxilha niku xala xwankgonit chu komo xkgalhikgo tumin o ni (Mateo 9:36; Marcos 10:16). Akxni tiku xkgalhi lepra wanilh: «Lapi xlakaskinti, tlan nakimapaksaya», Jesús lakgalhamalh chu mapaksalh (Marcos 1:40-42).

• Jesús kinkamasiyanin la namakgapaxuwayaw Dios. Xla wa: «Ni lay lakgachixkuwiyatit Dios, chu wa ntumin». Na lichuwinalh pi talakaskin nakalikatsiniyaw amakgapitsin chuna la lakaskinaw kakinkalikatsinikan, akgtum tastakyaw nema lilakgapaskan Regla de Oro. Nachuna, kinkamasiyanin pi Dios ni kajwatiya akxilha tuku tlawayaw na akxilha tuku lakpuwanaw chu tuku makgkatsiyaw. Wa xlakata, talakaskin kuenta natlawayaw tuku wi kkinakujkan xlakata namakgapaxuwayaw Dios (Mateo 5:28; 6:24; 7:12). Jesús lichuwinalh pi komo xlikana paxuwaputunaw, talakaskin nakatsiyaw tuku Dios lakaskin katlawaw chu natlawayaw (Lucas 11:28).

• Jesús kinkamasiyanin tuku kilhchanima paxkinankan. Tuku xwan chu tuku xtlawa xlakgchan xnakujkan latamanin. Biblia wan: “Lhuwa latamanin kaks xlilakawankgo chuna la xmasiya, xlakata xmasiya chuna la tiku xkgalhi limapakgsin” (Mateo 7:28, 29, Traducción del Nuevo Mundo, TNM). Akgtum liʼakxilhtit, kalimapakgsilh: «Kapaxkitit mintalatlawanakan». Chu xla kapalakaskilh kxʼoración tiku tlawakgolh pi xmakgnika: «Tataj, kamatsankgananikgo, sampi ni katsikgoy ntu ntlawakgoy» (Mateo 5:44; Lucas 23:34).

Jesús wa tlakg xatlan Mapakgsina. Xla tlan mapakgsina nalitaxtu, kinkapaxkiyan chu kinkamakgtayaputunan. Pero ¿tuku kilhtamaku natsuku mapakgsinan?