Kʼartículo nema titaxtulh, lichuwinaw tuku Jesús lichuwinalh pi xʼama lay. Uma tuku lama nema xlichuwinankanita limasiya pi xTamapakgsin Dios wilikanita k’akgapun chu Jesucristo wa xMapakgsina.

Biblia wan pi tuku pulana tlawalh Jesús akxni tsukulh mapakgsinan wa pi tamakxtulh Satanás chu xdemonios k’akgapun. La uku xlakan kajwatiya kKatiyatni tlawakgo tuku nitlan, chu wa uma pulaktum tuku xlakata lu nitlan wi kakilhtamaku lata kkata 1914 (Apocalipsis 12:7, 9).

Maski kakilhtamaku lu nitlan wi, Jesús xMapakgsina xTamapakgsin Dios, lhuwa tuku tlan tlawanit xpalakata latamanin. Xla pulalima taskujut nema xlichuwinanit pi x’amaka tlawakan, chu uma taskujut kamakgtayanit millones latamanin nalakgapaskgo xtastakyaw Biblia chu nalilatamakgo (Isaías 2:2-4). Umakgolh latamanin katsinikgonit na’akxilhkgo taskujut chuna la xlilat, tlakg tlan wilakgo xfamiliajkan chu lipaxuwakgo tuku kgalhikgo pero ni malakatsalikgo. Biblia kamakgtaya tlakg tlan nalinkgo xlatamatkan chu nakgalhikgo tayat nema Dios lakaskin pi kakgalhikgolh tiku natapakgsinikgo xTamapakgsin.

Maski Jesús mapakgsinamaja k’akgapun, latamanin chuntiyaku mapakgsinamakgo kKatiyatni. Pero Dios wanilh Jesús: «Kakamapakgsi ti tasitsiniyan» (Salmo 110:2). Nialh makgas, Jesús nakamasputu putum xtalamakgasitsin chu namasputu taʼakglhuwit nema lilakgaputsakgo tiku kgalhakgaxmatputunkgo Dios.

Wa uma tuku natlawa xTamapakgsin Dios:

• Nakamasputu nixaxlikana takanajla. Biblia tamalakxtumi nixaxlikana takanajla chatum puskat tiku sta xmakni tiku nialh makgas namasputukan. Wa xlakata, takanajla nema masiyakgonit taʼakgsanin xlakata Dios chu tlawanit pi nitlan natawilakgo latamanin, nialh katianankgolh. Lhuwa latamanin kaks nalilakawankgo akxni namasputukan (Apocalipsis 17:15, 16).

• Nakamasputu xtamapakgsin latamanin. Wa xTamapakgsin Dios namasputu putum xtamapakgsin latamanin (Apocalipsis 19:15, 17, 18).

• Nakamasputu tiku nitlan likatsikgo. ¿Tuku nakaʼakgspula tiku tlawakgo tuku nitlan chu ni kgalhakgaxmatputunkgo Dios? «Tiku nitlan likatsikgo, nakamasputukan kkatiyatni» (Proverbios 2:22).

• Nakamasputu Satanás chu xdemonios. Satanás chu xdemonios nialhla “katikaʼakgskgawikgolh ntachixkuwitat” (Apocalipsis 20:3, 10).

¿Chu tuku nakaʼakgspula latamanin tiku latamaputunkgo akxni namapakgsinan xTamapakgsin Dios?

Lata kʼakgapun, Jesucristo tlakg lhuwa tuku natlawa nixawa tuku tlawanit chatum mapakgsina xalak katiyatni. Nachuna, namakgtayakgo 144,000 mapakgsinanin tiku kalaksakkanit kkatiyatni (Apocalipsis 5:9, 10; 14:1, 3). Natlawa pi kakgantaxtulh xtalakaskin Dios kKatiyatni. ¿Tuku natlawa xTamapakgsin Dios xpalakata latamanin?

• Namasputu tajatat chu linin. «Ni chatum lataman nawan: “Ktatatlay”» chu «na nialh katiʼanalh linin» (Isaías 33:24; Apocalipsis 21:4).

• Nalimin xaxlikana takaksni chu nitu katimakgapekuanalh. «Xtakaksni [minkamanan] lhuwa nawan» chu «chatunu chatunu natawila xtampin xakiwi xʼuvas chu xtampin xhiguera, chu ni katiʼanalh tiku nakamakgapekuan» (Isaías 54:13; Miqueas 4:4).

• Namasta taskujut nema nalipaxuwayaw. «Tiku kkalaksaknit putum kilhtamaku namaklakaskinkgo xtaskujutkan nema litlawakgonit xmakankan. Nituku katilitlakgwankgolh» (Isaías 65:22, 23).

• Namapanu tuku laktlawa katiyatni. «Desierto chu xakaskajni tiyat lu napaxuwakgo, chu niku xakaxtum nema kaskawaw napaxuwa chu naxana la akgatum xanat» (Isaías 35:1).

• Nakamasiyani latamanin tuku xlitlawatkan xlakata putum kilhtamaku nalatamakgo. «Wa cha yuma liwi latamat wa ntu xaliankgalhin, mpi nalakgapaskgoyan wix [chatum] Dios xatalulokgtat chu Jesucristo, wa nti wix malakgachanita» (Juan 17:3).

Dios lakaskin pi wix kalipaxuwa uma tasikulunalin (Isaías 48:18). Kʼartículo nema mima naʼakxilha tuku tlan natlawaya la uku xlakata tlan nalipaxuwaya kilhtamaku nema aku mima.