Palakachuwina Moisés lichuwinalh pi Dios nakinkasikulunatlawayan komo nakgalhakgaxmataw xlimapakgsin (Deuteronomio 10:13; 11:27). Ni kgalhakgaxmataw Dios kaj xlakata pekuaniyaw pi nakinkamalakgaxokgeyan. Xla kgalhi laktlan tayat, chu wa xlakata paxkiyaw. Chu xlakata paxkiyaw, kgalhakgaxmataw chu ni tlawaputunaw tuku namakgalipuwan. «Xlakata wa uma tuku kilhchanima paxkikan Dios: nakgalhakgaxmataw xlimapakgsin; chu xlimapakgsin ni akgtum takuka» (1 Juan 5:3, TNM).

Pero ¿tuku tasikulunalin namakglhtinanaw komo nakgalhakgaxmataw Dios? Kaʼakxilhwi pulaktiy.

«Akit, Jehová, akit miDios, tiku masiyaniyan xlakata tlan nakitaxtuniyan, tiku pulalinan ktiji niku militlawanat» (ISAÍAS 48:17).

Jehová Dios, kiMalakatsukinakan, kinkalakgapasan chu kinkapulalinan. Komo lakaskinaw pi xtastakyaw nakinkamakgtayayan tlan tuku nalaksakaw, talakaskin nalakputsananiyaw kxaSanto Tatsokgni tuku lakaskin Dios natlawayaw chu nalilatamayaw.

«[Lipaxuw] lamakgo wanti nkaxmatkgoy xtachuwin Dios, chu na makikgoy kxnakujkan» (LUCAS 11:28).

La uku, lhuwa latamanin tiku kgalhakgaxmatkgo xTachuwin Dios xlikana paxuwakgo. Kaʼakxilhwi akgtum liʼakxilhtit: chatum chixku xalak España tiku lakapala ksitsi, nitlan xkalikatsini amakgapitsin chu nachuna xpuskat. Akgtum kilhtamaku likgalhtawakgalh tuku tsokgli palakachuwina Moisés xlakata la tlan xlikatsi José, xkgawasa Jacob. José stamakganka la chatum skujni chu tamaknuka kpulachin maski nitu xtlawanit. Maski chuna, chuntiya tlan xlikatsi, ni lakapala ksitsi chu xalakgalhamanina xwanit (Génesis, capítulos 37 asta 45). Chixku xalak España lichuwinalh: «Akxni klilakpuwa xliʼakxilhtit José kimakgpuwantinilh tlan naklikatsi, naklakgalhamaninan chu nakmachokgo tuku ktlawaputun. Chu tuku tlan kitaxtulh, wa pi la uku xatapaxuwan wi kifamilia».

Anta kxaSanto Tatsokgni tekgsaw tlakg lhuwa tastakyaw xlakata la nakalikatsiniyaw amakgapitsin. Tlakg kaʼakxilhwi xlakata uma kʼartículo nema stala.