Dios malaknunilh palakachuwina Abrahán pi «putum kachikinin xalak katiyatni» xʼamaka kasikulunatlawakan xpalakata chatum tiku xʼama min kxfamilia (Génesis 22:18). ¿Tuku xlichuwinama?

Atsinu ni takgatsi akgtiy milh kata, Dios maxkilh litliwakga Jesús xlakata natlawa milagros. Umakgolh milagros limasiyalh pi tuku Dios xmalaknuninit Abrahán xlakata nakasikulunatlawa putum kachikinin xʼama kgantaxtu xpalakata Jesús, tiku xminacha kxfamilia Abrahán (Gálatas 3:14).

Milagros nema tlawalh Jesús kamakgtayalh latamanin nakatsikgo pi wa palakachuwina tiku Dios xlaksaknit xlakata nakasikulunatlawakan latamanin. Na limasiyakgolh la xʼama limaklakaskin Dios Jesús kkilhtamaku nema aku mima xlakata nakinkasikulunatlawayan putum kilhtamaku. Kaʼakxilhwi la limasiyakgo umakgolh milagros makgapitsi xtayat Jesús.

Xapaxkina xwanit chu kamapaksalh tiku xtatatlakgo.

Akgtum kilhtamaku, chatum chixku tiku xkgalhi lepra tasaskinilh Jesús pi komo xla xlakaskilh, tlan xmapaksalh. Jesús xamalh chu wanilh: «Klakaskin». Uma kilhtamaku tunkun paksli (Marcos 1:40-42).

Lhuwa tuku xmasta chu kamawilh tiku xtsinksmakgolh.

Jesús ni xlakaskin pi latamanin xpatinankgolh xlakata ni xkgalhikgo liwat. Tlawalh akgtum milagro akxni malhuwilh kaxtalanchu chu skiti xlakata nakamawi lhuwa latamanin, chu ni kaj makgtum chuna tlawalh (Mateo 14:17-21; 15:32-38). Putum latamanin liwana wayankgolh chu asta akgataxtulh lhuwa liwat.

Xalakgalhamanina xwanit chu kamalakastakwanilh tiku xnikgonita.

Akxni akxilhli pi chatum puskat tiku xninita chixku nilh kaj xachastum xkgawasa chu xla niti xʼama kuentajtlawa, Jesús «lakgalhamalh» chu malakastakwanilh kgawasa (Lucas 7:12-15).