Lata kamalakatsukika latamanin, kiMalakatsukinakan kamaklakaskinit ángeles chu palakachuwinanin xlakata nakatachuwinan latamanin. Nachuna, lakpuwa namatsokgwilininan xtamakatsinin chu xtamalaknun. Dios kinkamalaknuniyan pi kkilhtamaku nema aku mima lu napaxuwayaw, pero max nalakpuwanaw: «¿Niku tatekgsa umakgolh tamalaknun?».

Xtamakatsinin Dios wi kxaSanto Tatsokgni (2 Timoteo 3:16). ¿La kamaklakaskilh Dios xpalakachuwinanin xlakata xtsokgwilikgolh xtamakatsinin? Dios wililh xtapuwan anta kxtalakapastaknikan umakgolh lakchixkuwin xlakata xlakan xtsokgwilikgolh xtalakapastakni (2 Pedro 1:21). Kawiliw akgtum li’akxilhtit, komo chatum empresario nawani ksecretario pi katsokgli maktum carta, ni katilakpuwaw pi tuku wan kcarta wa xtalakapastakni secretario, wata wa xtalakapastakni empresario. Nachuna, maski Dios kamaklakaskilh lakchixkuwin xlakata natsokgwilikgo xtamakatsinin, wa xtalakapastakni Dios tuku lichuwinankgo xaSanto Tatsokgni.

Xtamakatsinin Dios lu xlakaskinka, wa xlakata xla lakaskin pi putum latamanin tlan nalikgalhtawakgakgo chu na’akgatekgsnikgo. La uku, putum latamanin xalak «laklanka kachikin chu tribu chu tachuwin chu kachikin» tlan nakgaxmatkgo «lakwan tamakatsinin» nema masta Dios (Apocalipsis 14:6, TNM). Xlakata xtamakgtay Dios, xTachuwin tamatitaxtinit kliwaka akgtutu mil tanu tanu tachuwin xamaktuminika o maski ni takgatsi, nixawa atanu libro.