Dios kinkamaxkinitan lu xatlan tamaskiwin: tlan natachuwinanaw chu nawaniyaw tuku makgkatsiyaw. Palakachuwina David wanilh Dios: «Wix kgaxpata oración. Wakg tachixkuwit xala kaniniwa, natalakgminan» (Salmo 65:2, Salmos Ixtatlincan ti Talipawan Dios, SXP). Pero ¿la kilitlawatkan oración xlakata Dios nakinkakgaxmatniyan chu nakinkasikulunatlawayan?

Salmo 62:8 wan pi kawaniw Dios “tuku lakaskin kinakujkan”. Akxni tlawaniyaw oración Dios, tlan nawaniyaw putum tuku makgkatsiyaw. Dios Tiku kgalhi putum litliwakga lu xlakaskinka akxilha oraciones nema tlawaniyaw xliputum kinakujkan.

Maski Dios lhuwa tuku lilakgapaskan, kaj akgtum tukuwani kgalhi. «Akit Jehová. Wa uma kintukuwani» (Isaías 42:8). Xtukuwani Dios, Jehová, akgtujun mil la xlimakglhuwa min kxaSanto Tatsokgni. Lhuwa palakachuwinanin maklakaskinkgolh xtukuwani Dios akxni xtachuwinankgo. Palakachuwina Abrahán wa: «Jehová, [...] katlawa litlan, kimaxki talakaskin chuntiya [naktachuwinanan]» (Génesis 18:30). Akinin na kilimaklakaskinatkan xtukuwani Dios, Jehová, akxni natlawaniyaw oración.

Dios akgatekgsa tuku lakpuwanaw chu tuku makgkatsiyaw maski tanu tanu kintachuwinkan. Anta kxTachuwin kinkawaniyan: «Dios, ni [laksakpaxkinan] kxlakgstipan chixkuwin; wampi kaxani kawa xala, wa nti mpikuaniy Dios, chu na wa ntu xlilat ntu ntlaway, tlan [makgamakglhtinan]» (Hechos 10:34, 35).

Pero xlakata Dios tlan nakinkasikulunatlawayan, ni kajwatiya talakaskin natlawaniyaw oración. Kʼatanu artículos naʼakxilhaw tuku atanu kilitlawatkan.