Kalilakpuwanti la xwa latamat komo ni x’analh Chichini. Xlakata anan Chichini, kiwi kgalhikgo xtuwan, kxanat, xtawakat chu xtalhtsi. Na tlawa pi xtankgaxekg akgatum kiwi nachuwatiya chuchut, nema makan asta kxtuwan chu alistalh laktaxtupara.

Sen akgtum lu xlakaskinka xtamaskiwin Dios. Xlakata senan, katiyatni makgalananan. Dios kinkamaxkiyan sen, xtamakgalan tiyat chu lhuwa liwat, chu tlawa pi uma lu nalipaxuwayaw.

Lhuwa natlatni lilakgaputsakgo xlakata natekgskgo liwat chu lhakgat nema maklakaskin xfamilia. Biblia wan: «Kaukxilhtit laktsu [tsiktsi] xala kʼakgapun, ni chananankgoy, na ni xkganankgoy, na ni mpala makikgoy xlananatkan kxpumakinkan; [pero] minTlatkan xala kʼakgapun mawikgoy. ¿[Ni] xaliwaka lu xtapalh wixin ni xawa xlakan?» (Mateo 6:25, 26).

«Kaʼakxilhtit chuna la stakkgo xanat xalak kapukuxtun. [...] kkawaniyan pi nipara Salomón tiku lhuwa lilanka xkgalhi lhakganalh chuna la xlakan. Wa xlakata, komo Dios chuna kamalhakgani xanat [...], ¿ni katikamalhakganin wixin?» (Mateo 6:28-30, La Biblia. Traducción del Nuevo Mundo, TNM).

Chuna la Dios kinkamaxkiyan liwat chu lhakgat, na tlan nakinkamakgtayayan nakgalhiyaw atanu tuku maklakaskinaw. Akxni liskujaw xlakata natlawayaw tuku Dios lakgati, xla sikulunatlawa tuku tlawayaw xlakata natekgsaw liwat o tlan nakinkamakgtayayan natekgsaw akgtum taskujut xlakata tlan natamawayaw tuku maklakaskinaw (Mateo 6:32, 33).

Akxni lilakpuwanaw Chichini, sen, laktsu tsiktsi chu xanat, ¿ni xlikana pi putum uma tlawa pi tlakg napaxkiyaw Dios? Kʼatanu artículo naʼakxilhaw la katachuwinanit latamanin kiMalakatsukinakan.