Putum akinin xkaman Adán. Uma wamputun pi akgtum familia litaxtuyaw. Maski talakaskin pi putum tiku xalak familia nalapaxkikgo chu nalalimasiyanikgo kakni, kkakilhtamaku ni lalimasiyanikan uma tapaxkit. Pero Dios ni lakaskin pi ni nalalimasiyanikan tapaxkit.

«Kapaxki mintalataman xtachuna la akstu paxkikana» (LEVÍTICO 19:18).

«Kapaxkitit mintalatlawanakan» (MATEO 5:44).

Tuku lichuwinan 1 Corintios 13:4-7 kinkamasiyaniyan la nalimasiyayaw tapaxkit.

Tapaxkit lu kgalhkgalhinan chu tlan likatsi.

Kalilakpuwanti uma. ¿La makgkatsiya akxni wi tiku kgalhkgalhinan chu tlan likatsi, chu ni sitsi akxni tlawaya tuku nitlan?

Tapaxkit ni lakgsitsinan.

Kalilakpuwanti uma. ¿La makgatsiya akxni wi tiku lakgkatsalakanan o ni lipawanan?

Tapaxkit ni kajwatiya putsa tuku xla tlan nakitaxtuni.

Kalilakpuwanti uma. ¿La makgkatsiya akxni wi tiku maxki kakni tuku wana chu ni putum kilhtamaku tlawaputun tuku lakaskin?

Tapaxkit ni lakapastaktawila tuku nitlan tlawanika.

Kalilakpuwanti uma. Dios katapatiputun tiku makgxtakgkgo xtalakgalhinkan. «Ni putum kilhtamaku kintikamalakapastakan tuku nitlan tlawanitaw, chu ni putum kilhtamaku kintikasitsinin» (Salmo 103:9). Lu xtapalh liʼakxilhaw akxni kinkatapatiyan tiku nitlan mamakgkatsiniw. Wa xlakata, talakaskin pi na nakatapatiyaw tiku nitlan kinkamamakgkatsiniyan (Salmo 86:5).

Tapaxkit ni lipaxuwa tuku ni xaʼakgstitum.

Kalilakpuwanti uma. Akxni kinkaʼakgspulayan tuku nitlan, ni lakaskinaw pi wi tiku nakinkalipaxuwayan. Wa xlakata ni lipaxuwayaw akxni amakgapitsin patinankgo, maski xlakan nitlan kinkalikatsinikgonitan.

Komo lakaskinaw pi Dios kakinkasikulunatlawan, talakaskin nakapaxkiyaw amakgapitsin maski tanu tanu kata kgalhikgo, tanu tanu xkachikinkan o xtakanajlakan. Pulaktum la tlan nakalimasiyaniyaw tapaxkit amakgapitsin wa pi nakamakgtayayaw tiku maklakaskinkgo tamakgtay.