Makgapitsi latamanin katsiputunkgo komo wi tuku lakgpalinikanit xaSanto Tatsokgni. Palakachuwina Isaías lichuwinalh pi xtamakatsinin Dios «putum kilhtamaku makgapala» (Isaías 40:8). ¿La tlan liwana nakatsiyaw pi xtamalaknun Dios nitu lakgpalikanit?

Dios kgalhi limakgatliwakga xlakata xTachuwin putum kilhtamaku namakgapala chu nitu nalakgpalinikan. Makgasata, akxni libros xalak Biblia kamakan xkatsokgxtukan, tiku xtsokgxtukgo xputlekgekgo akgatunu letra xlakata nitu xmaliwakanikgolh, nitu xlakgpalinikgolh chu nitu xmakglhtikgolh. Pero xlakata putum akinin makglakgalhinanin, makgapitsi tiku tsokgxtukgolh Biblia wi tuku tsinu nitlan tlawakgolh, pero ni lakgpalikgolh tuku lichuwinan.

Anan lhuwa copias xla Tatsokgni xalak Biblia xala makgasa. Komo kmaktum copia natekgskan pi wi tuku tsinu talakgpali, tlan nakatamalakxtumikan atanu copias xlakata nakatsikan komo kaj nitlan tsokgxtukanit (komo tlakg katsiputuna, katanu kjw.org chu kalikgalhtawakga artículo «¿Se ha cambiado o manipulado la Biblia?»).

Akgtum liʼakxilhtit, kalilakpuwaw xamakgan tatsokgni nema kalilakgapaskan Rollos del mar Muerto, nema katekgska kkata 1947 kmakgapitsi lhuku lakatsu kmar Muerto, nema tekgskgolh beduinos (árabes tiku latapulikgo kdesierto). Umakgolh xamakgan tatsokgni limin makgapitsi textos xla xaSanto Tatsokgni chu liwakaya akgtiy mil kata lata tsokgwilika. Tiku lakputsananikgo tatsokgni tamalakxtumikgolh umakgolh rollos xaSanto Tatsokgni nema kgalhiyaw la uku. ¿Tuku katsikgolh?

Umakgolh tiku lakputsananikgo tatsokgni lichuwinankgolh pi tuku tatsokgtawilanit kxTachuwin Dios nema kgalhiyaw la uku watiya tuku lichuwinan xapulana tatsokgni. * Tuku lakputsananikanit xamakgan tatsokgni limasiya pi tuku likgalhtawakgayaw la uku kxaSanto Tatsokgni xlikana wa tuku matsokgninalh Dios. Xlikana pi Dios tlawanit pi xTachuwin natawila asta la uku.

Wa xlakata tlan liwana nakatsiyaw pi tuku likgalhtawakgayaw kxTachuwin Dios xaxlikana. Xlakata uma, kaʼakxilhwi tuku kinkamasiyanikgoyan palakachuwinanin xlakata Dios.