¿Tuku kinkamasiyanikgoyan palakachuwinanin xlakata Dios?
Makgasata, Dios kamaklakaskilh palakachuwinanin xlakata nakamaxki latamanin lu xlakaskinka tamakatsinin. ¿Kinkawaniyan umakgolh tamakatsinin tuku kilitlawatkan xlakata Dios nakinkasikulunatlawayan? Chuna. Kaʼakxilhwi tuku kinkamasiyaniyan tuku lichuwinankgolh kgalhtutu xpalakachuwinanin Dios.
ABRAHÁN
Dios ni laksakpaxkinan chu kasikulunatlawaputun putum latamanin.
Dios malaknunilh palakachuwina Abrahán: «Mimpalakata nalitasikulunatlawakgo putum familias xalak katiyatni» (Génesis 12:3).
¿Tuku kinkamasiyaniyan? Pi Dios lu kinkapaxkiyan chu kasikulunatlawaputun putum familias (lakchixkuwin, lakpuskatin chu laktsu kamanan) tiku kgalhakgaxmatkgo.
MOISÉS
Dios lu xalakgalhamanina chu kasikulunatlawa tiku liskujkgo xlakata tlakg nalakgapaskgo.
Dios Tiku kgalhi putum litliwakga maxkilh palakachuwina Moisés limakgatliwakga xlakata tlan natlawa milagros. Maski chuna, Moisés skinilh Dios: «Kakimasiyani mintiji xlakata tlan naklakgapasan chu chuntiya tlan naki’akxilha» (Éxodo 33:13). Dios tlan akxilhli tuku skinilh Moisés chu sikulunatlawalh akxni maxkilh liskgalala, chu makgtayalh nalakgapasa la likatsi chu tuku tlawa. Akgtum li’akxilhtit, Moisés katsilh pi Malakatsukina chatum «Dios xalakgalhamana chu tlan likatsi» (Éxodo 34:6, 7).
¿Tuku kinkamasiyaniyan? Pi Dios nakinkasikulunatlawayan kimputumkan (lakchixkuwin, lakpuskatin chu laktsu kamanan) komo naliskujaw xlakata tlakg nalakgapasaw. Anta kxTachuwin, xla kinkawaniyan la kilikakninanitkan chu pi lu kinkasikulunatlawaputunan.
JESÚS
Jesús lu xalakgalhamanina xwanit chu kamapaksalh tipalhuwa tajatat.
Dios nakinkasikulunatlawayan putum kilhtamaku komo nakatsiniyaw tuku tlawalh chu tuku masiyalh Jesús.
Biblia lhuwa tuku lichuwinan xlakata xlatamat chu tuku masiyalh Jesús. Dios maxkilh litliwakga Jesús xlakata natlawa milagros, kamapaksalh tiku nila xlakawanankgo, tiku nila xkgaxmatkgo chu tiku nila xtlawankgo. Chu asta kamalakastakwanilh tiku xnikgonita. Chuna Jesús limasiyalh tuku tlan natlawa Dios kimpalakatakan kkilhtamaku nema aku mima. Xla kinkawanin tuku kilitlawatkan xlakata tlan namakglhtinanaw umakgolh tasikulunalin: «Wa uma kilhchanima latamat nema ni kgalhi xlisputni: pi nalakgapaskgoyan wix, xaxlikana Dios, chu tiku malakgachanita, Jesucristo» (Juan 17:3, TNM).
Jesús lu xalakgalhamanina xwanit chu lu tlan xlikatsi. Lakchixkuwin chu lakpuskatin tiku tanu tanu kata xkgalhikgo makgamakglhtinankgolh tuku wa Jesús: «Katlawatit chuna la akit, xlakata akit ni xaluku chu ktaktuju, komo chuna natlawayatit natatliwakglhatit» (Mateo 11:29, TNM). Jesús nichuna kalikatsinilh lakpuskatin chuna la xlikatsikgo lakchixkuwin, xla tlan kalikatsinilh, kamaxkilh kakni chu limasiyalh pi xtapalh xkaʼakxilha.
¿Tuku kinkamasiyaniyan? Pi Jesús lu xkapaxki latamanin chu kinkawilinin lu xatlan liʼakxilhtit xlakata la nalalikatsiniyaw chatunu chatunu.
JESÚS NI WA DIOS
KxaSanto Tatsokgni talichuwinan pi «kaj chatum Dios anan» chu pi Jesucristo xlakskujni xwanit chu lu xtaktuju (1 Corintios 8:6, TNM). Jesús liwana lichuwinalh pi Dios tlakg lanka nixawa xla chu Dios wa tiku makamilh kKatiyatni (Juan 11:41, 42; 14:28). *
^ párr. 17 Komo tlakg katsiputuna xlakata Jesucristo, kaʼakxilhti secciones 8 chu 9 xla folleto La fe verdadera, la puerta a una vida feliz, nema wi kʼInternet www.pr418.com.
