¿Kgaxmata Dios kioracioneskan?
¿Minit kilhtamaku lakpuwanita komo Dios kgaxmata akxni tlawaniya oración? Komo chuna, ni miʼakstu chuna makgkatsiya. Lhuwa latamanin skinikgonit tamakgtay Dios akxni kgalhikgo taʼakglhuwit. Pero xtaʼakglhuwitkan nitu lakgsputnit. ¿Uma wamputun pi Dios ni kgaxmata kioracioneskan? Nichuna. Biblia liwana kinkawaniyan pi Dios kinkakgaxmatniyan akxni tlawaniyaw oración chuna la xla lakaskin. Kaʼakxilhwi tuku wan.
DIOS XLIKANA KINKAKGAXMATNIYAN
«Wix Tiku kgaxmata oración, nalakgminkgoyan putum latamanin» (Salmo 65:2).
Makgapitsin latamanin tlawakgo oración xlakata kamakgtaya tlakg tlan namakgkatsikgo, maski ni kanajlakgo komo wi tiku kakgaxmatni. Pero oración ni kajwatiya tlan kinkamamakgkatsiniyan akxni kgalhiyaw akgtum taʼakglhuwit. Biblia liwana kinkawaniyan pi «Jehová * lakatsu katawi putum tiku kilhanimakgo, putum tiku xlikana putsakgo [...], kgaxmata akxni tasaskinikgo tamakgtay» (Salmo 145:18, 19).
Wa xlakata, tlan liwana nakatsiyaw pi Jehová kgaxmata xʼoracioneskan tiku kakninanikgo. Xla kinkawaniyan: «Wixin nakinkilhpiniyatit, nakintlawaniyatit oración, chu akit nakkakgaxmatniyan» (Jeremías 29:12).
DIOS LAKASKIN PI KATLAWANI ORACIÓN
«Chuntiya katlawatit oración» (Romanos 12:12).
Biblia kinkawaniyan pi ankgalhin katlawaw oración chu putum kilhtamaku. Liwana tasiya pi Jehová lakaskin katlawaniw oración (Mateo 26:41; Efesios 6:18).
¿Tuku xlakata Dios lakaskin pi wix natlawaniya oración? Kalilakpuwanti uma: ¿nixlikana pi chatum tlat lakaskin pi aktsu xkgawasa naskini tamakgtay? Max xatlat katsi tuku maklakaskin chu tuku makgkatsi aktsu xkgawasa, pero akxni kgaxmata xtachuwin, xatlat akxilha pi xkgawasa lipawan chu paxki. Xtachuna la uma, akxni tlawaniyaw oración Jehová, limasiyaniyaw pi lipawanaw chu pi lakgtalakatsuwiputunaw (Proverbios 15:8; Santiago 4:8).
DIOS XLIKANA LILAKGAPUTSAYAN
«Kawilitit putum mintalakgaputsitkan kxmakan xlakata xla kalilakgaputsayan» (1 Pedro 5:7).
Dios lakaskin pi katlawaniw oración xlakata kinkapaxkiyan chu kinkalilakgaputsayan. Liwana katsi tuku taʼakglhuwit kgalhiyaw chu kinkamakgtayaputunan.
Mapakgsina David putum kxlatamat skinilh Jehová pi xmakgtayalh, chu xlitachuwinan tuku xlakpuwan chu tuku xmakgkatsi (Salmo 23:1-6). ¿La xʼakxilha Dios David? Lu xpaxki chu xkgaxmata putum xʼoraciones (Hechos 13:22). Nachuna, Dios kinkakgaxmatniyan xlakata kinkalilakgaputsayan.
«KPAXKI JEHOVÁ XLAKATA XLA KINKGAXMATNI»
Tekgsaw umakgolh tachuwin kʼakgtum salmo xalak Biblia. Tiku tsokgwililh liwana xkatsi pi Jehová xkgaxmata xʼoraciones, chu uma lu makgtayalh. Xmakgkatsi pi tlakg lakatsu xwilanilh Dios chu xkgalhi litliwakga xlakata natayani tuku tuwa titaxtukan klatamat (Salmo 116:1-9).
Komo liwana katsiyaw pi Dios kinkakgaxmatniyan, ankgalhin natlawaniyaw oración. Kaʼakxilhwi tuku titaxtulh Pedro tiku lama kxnorte España. Xkgawasa tiku xkgalhi 19 kata nilh niku lhuwa titaxtukgo putlaw. Akxni lu tuwa tuku titaxtulh, Pedro wanilh Dios la xmakgkatsi chu makglhuwa skinilh pi xmakgoxamixilh chu xmakgtayalh. ¿Tuku lalh? Xla wan: «Jehová kgalhtilh kioraciones. Kamaklakaskilh xlakskujnin xlakata nakinkamakgoxamixiyan chu nakinkamakgtayayan akit chu kimpuskat».
Min kilhtamaku xtamakgtaykan chu xtapaxkitkan kiʼamigoskan wa xtakgalhtin kioracioneskan.
Maski xlikana pi oraciones ni maspitnipa xkgawasa, lu makgtayalh Pedro chu putum xfamilia. Xpuskat, María del Carmen, lakapastaka: «Oraciones kimakgtayalh naktayani kintalakgaputsit. Xakkatsi pi Jehová xkiʼakgatekgsni, xlakata akxni xaktlawani oración lu skaya xakmakgkatsi chu xakkgalhi takaksni».
Biblia chu tuku titaxtukgonit lhuwa latamanin kinkamasiyaniyan pi Dios kgaxmata kioracioneskan. Pero Dios ni kgalhti putum oraciones. ¿Tuku xlakata?
^ párr. 5 Jehová wa xtukuwani Dios (Salmo 83:18).
