«Komo wi tuku naskiniyatit xaTlat, xla nakamaxkiyan kkintukuwani» (Juan 16:23).

Tuku lichuwinalh Jesús kinkamasiyaniyan pi Jehová lakaskin pi wa katlawaniw oración, chu ni namaklakaskinaw imágenes, santos, ángeles o natlawaniyaw oración kifamiliajkan tiku nikgonita, chu lakaskin katlawaw oración kxtukuwani Jesucristo. Akxni chuna tlawayaw, limasiyaniyaw Dios pi kanajlayaw pi xla kinkakgaxmatniyan xlakata tuku Jesús tlawalh. Jesús wa: «Kaj kimpalakata tlan lakgankan xaTlat» (Juan 14:6).

«Kawilitit kxlakatin putum tuku wi kminakujkan» (Salmo 62:8).

Akxni tlawaniyaw oración Jehová, kilitachuwinatkan xtachuna la xtachuwinaw chatum tlat tiku lu kinkapaxkiyan. Ni kaj kakalikgalhtawakgaw oraciones kmaktum libro o watiya tuku katsiyaw wanaw, wata xliputum kinakujkan katachuwinaw Dios chu kalimasiyaniw kakni.

«Tlan naskiniyaw kaxatukawa, pero chuna la xtalakaskin chu xla kinkakgaxmatniyan» (1 Juan 5:14).

Anta kBiblia, Dios kinkawaniyan tuku natlawa kimpalakatakan chu tuku lakaskin katlawaw akinin. Xlakata xla namakgamakglhtinan kioracioneskan, kilitlawanitkan oración «chuna la xtalakaskin». Xlakata chuna natlawayaw, talakaskin nalikgalhtawakgayaw Biblia, chu chuna tlakg nalakgapasaw. Chuna xla nakinkakgaxmatniyan.

Kaskiw tuku maklakaskinaw. Tlan naskiniyaw Dios pi kakinkamakgtayan natekgsaw tuku maklakaskinaw chuna la liwat, lhakgat chu niku tlan natawilayaw. Nachuna tlan naskiniyaw pi kakinkamakgtayan tlan tuku nalaksakaw chu pi kakinkamaxkin litliwakga xlakata tlan natayaniyaw tuku tuwa natitaxtuyaw. Nachuna, tlan natasaskiniyaw pi kakinkatapatin, pi tlakg kakinkamaxkin takanajla chu kakinkakuentajtlawan (Lucas 11:3, 4, 13; Santiago 1:5, 17).

Kakapalakaskiw amakgapitsin. Tlat tiku lu tlan likatsi lakaskin pi xkamanan kalapaxkikgolh. Jehová wa kinTlatkan chu, wa xlakata, lakaskin pi kalakuentajtlawaw. Lu tlan pi napalakaskinaw tiku tamakgaxtokgaw, kilakkamanankan, kifamiliajkan chu kiʼamigoskan. Santiago lichuwinalh: «Kalapalakaskintit kʼoración» (Santiago 5:16).

Kamastaw tapaxtikatsinit. Biblia wan pi kiMalakatsukinakan lhuwa tuku tlan tlawalh xpalakatakan amakgapitsin: «Kamaxkin sen xalak akgapun chu kilhtamaku akxni lu makgalanankan, kalimakgalhkgasan liwat chu kalimatsamanin tapaxuwan minakujkan» (Hechos 14:17). Komo nalilakpuwanaw putum tuku Dios tlawanit kimpalakatakan, lu napaxtikatsiniputunaw. Pero, nachuna kilimasiyanitkan pi paxtikatsiniyaw akxni kgalhakgaxmataw xlimapakgsin (Colosenses 3:15).

Lakgachunin max nataxlajwaniyaw komo ni lakapala kinkakgalhtikanan kioracionkan. ¿Wamputun pi Dios ni kinkalilakgaputsayan? ¡Nichuna! Kaʼakxilhwi makgapitsi tuku kinkalimasiyaniyan pi lakgachunin kajwatiya talakaskin chuntiya natlawayaw oración.

Kxapulana artículo lichuwinaw Steve. Xla chuntiya kinkawaniyan: «Komo ni xaktitlawalh oración, max nila xaktayanilh». ¿Tuku makgtayalh? Xla tsukulh likgalhtawakga Biblia chu katsinilh pi makglhuwa xlitlawat xwanit oración. Steve wan: «Kpaxtikatsini Dios xlakata xtamakgtaykan chu tapaxkit nema kinkalimasiyanikgon kiʼamigoskan. La uku lu kpaxuwa».

¿Chu tuku nawanaw xpalakata Jenny, tiku xmakgkatsi pi ni xlakgchan pi Dios xkgaxmatnilh? Xla wan: «Akxni lu nitlan tuku xaktitaxtuma, ktasaskinilh Dios pi xkimakgtayalh nakʼakgatekgsaw tuku xlakata chuna xakmakgkatsi». ¿La makgtayalh oración? «Xlakata xaktachuwinan Dios kimakgtayalh akstu nakiʼakxilhkan chuna la xla kiʼakxilha. Kakxilhli pi asta akxni kinaku nitlan kimamakgkatsini, Dios ni kimakgxtakga. Na kimakgtayalh ni naktaxlajwani». ¿Tuku kitaxtulh? «Oración kimakgtayanit nakakxilha Jehová la chatum amigo, xapaxkina Tlat, chu Dios tiku ni makgxtakgnan. Xla ankgalhin akxtum nakintatawila chu nikxni kintimakgxtakgli komo nakliskuja naktlawa tuku lakaskin».

Kaʼakxilhwi tuku titaxtulh Isabel. Akxni xʼama kgalhi kskgata, makuchinanin wanikgolh pi kskgata xʼama kgalhi tajatat nema ni xmaxkilh talakaskin wi tuku natlawa. Uma lu nitlan mamakgkatsinilh. Asta wi tiku wanilh pi xmakgalh kskgata. Xla wan: «Kmakgkatsilh pi xakkama lakgni takatsanajwat». ¿Tuku tlawalh? «Makglhuwa ktlawanilh oración Dios xlakata xkimakgtayalh». Chu alh kilhtamaku lakachilh xkgawasa tiku limapakuwilh Gerard, chu xlikana xtatatla. ¿Makgkatsi Isabel pi Dios kgalhtilh xʼoraciones? ¡Chuna! ¿La kgalhtilh xʼoraciones? «Liwaka 14 kata, kinkgawasa Gerad wa tlakg xatlan tasikulunalin kmakglhtinanit. Lu kimakgapaxuwa pi kinkgawasa lu lipaxuwa xlatamat maski tatatla, chu uma wa xtakgalhtin kioraciones».

Umakgolh tachuwin kinkamalakapastakayan tuku wa salmista: «Wix nakakgaxpatniya tuku tasaskinikgoyan tiku tlan likatsikgo, oh, Jehová. Namatliwakglha xnakujkan chu lu nakakuentajtlawaya» (Salmo 10:17). ¿Nixlikana pi lu xlakaskinka chuntiya natlawayaw oración?

Anta kBiblia min lhuwa oraciones nema tlawalh Jesús. Oración nema tlakg lakgapaskan wa tuku kamasiyanilh xtamakgalhtawakgen. ¿Tuku kinkamasiyaniyan uma oración?