Tuku lakpuwankgo latamanin xlakata oración
«Akxni ktlawa oración, kakxilha pi Dios akxtum kintawi, pi kimakgachipanit chu kimpulalin akxni ni kkatsi tuku naktlawa» (MARÍA).
«Kimpuskat nilh xlakata xkgalhi cáncer nema makgapalalh 13 kata. Klakapastaka pi ankgalhin xaktlawani oración Dios, chu xakmakgkatsi pi xʼakxilha kintapatin. Xakmakgkatsi takaksni» (RAÚL).
«Oración akgtum tamaskiwin nema Dios kinkamaxkinitan» (ARNE).
Xpalakatakan María, Raúl, Arne chu lhuwa atanu latamanin, oración akgtum lanka tamaskiwin. Akxni tlawakgo oración, makgkatsikgo pi tlan tachuwinankgo Dios, tlan paxtikatsinikgo chu tlan skinikgo xtamakgtay. Liwana katsikgo pi tuku wan Biblia xlakata tlawanikan oración Dios xaxlikana: «Lipawanaw pi tlan naskiniyaw kaxatukawa, pero chuna la xtalakaskin chu xla kinkakgaxmatniyan» (1 Juan 5:14).
Pero lhuwa latamanin tuwa makgkatsikgo nakanajlakgo tuku wan Biblia xlakata oración. Steve kinkalitachuwinanan tuku lakpuwan: «Akxni xakkgalhi 17 kata, kgalhtutu kiʼamigos nikgolh: chatum nilh xlakata xputlaw lanilh tuku nitlan chu achatiy muxtukgolh». ¿Tuku tlawalh Steve? «Ktlawanilh oración Dios chu kkgalhskilh tuku xlakata chuna kaʼakgspulalh kiʼamigos, pero ni kinkgalhtilh. Wa xlakata klakpuwa: “¿Limakwan tlawakan oración?”». Lhuwa latamanin nachuna makgkatsikgonit chu na lakpuwankgonit komo xlikana limakwan tlawakan oración.
Pero wi atanu tuku xlakata latamanin lakpuwankgo pi nitu litaxtu tlawakan oración. Makgapitsi wankgo pi, xlakata Dios putum katsi, lakgapasa kintaʼakglhuwitkan chu katsi tuku maklakaskinaw. Wa xlakata lakpuwankgo: «¿Tuku xlakata nawaniyaw tuku kinkaʼakgspulayan?».
Amakgapitsin lakpuwankgo pi Dios ni kakgaxmatniputun xʼoracioneskan xlakata tuku nitlan tlawakgonit makgasa. Jenny wan: «Tuku lu nitlan wa pi kmakgkatsi pi nitu klitaxtu. Ktlawanit tuku lu nitlan klimakgkatsi, wa xlakata liwana kkatsi pi ni kilakgchan nakinkgaxmatni Dios».
¿Chu wix tuku lakpuwana? ¿Minit kilhtamaku chuna lakpuwanita? Komo chuna, lu nalipaxuwaya pi Biblia tlan namaxkiyan takgalhtin nema maklakaskina. Tlan nalipawana tuku wan Biblia xlakata oración. * Namakgtayayan nakgalhtiya umakgolh takgalhskinin:
-
¿Xlikana Dios kgaxmata oraciones?
-
¿Tuku xlakata ni kgalhti makgapitsi oraciones?
-
¿La kilitlawatkan kioracioneskan xlakata nakinkakgaxmatniyan?
-
¿La tlan namakgtayayan oración?
^ párr. 9 Anta kBiblia tekgsaw oraciones nema tlawakgolh lhuwa xlakskujnin Dios, chu makgapitsi oraciones nema tlawalh Jesús. Anta kTatsokgni xaHebreo, nema lilakgapaskan Antiguo Testamento, talhkatawilanit liwaka 150 oraciones.
