Chuna la akxilhnitaw asta la uku, xlakata latamanin kgalhiputunkgo akgtum tlan latamat lipawankgo tlan takgalhtawakga, tumin, pi lhkawilikanita tuku nakinkaʼakgspulayan chu tlan likatsikgo. Pero uma xtachuna akxni lipawankan maktum mapa nema ni liwana masiya niku chipimputuna. Pero uma ni wamputun pi ni anan tuku tlan nalipawanaw xlakata nakgalhiyaw tlan latamat kkilhtamaku nema aku mima.

Akxni wi tuku laksakputunaw, ankgalhin kgalhskinaw tiku tlakg katsi o tlakg lhuwa kata latamanit nixawa akinin. Wa xlakata, komo kgalhiputunaw akgtum tlakg tlan latamat, tlakg tlan kitaxtu nalipawanaw xtastakyaw tiku tlakg skgalala chu tlakg lhuwata kilhtamaku latamanit nixawa akinin. Uma tastakyaw tlan natekgsaw kmaktum libro nema titaxtunita max 3,500 kata lata tsukuka tsokgwilikan. Wa Biblia lichuwinamaw.

¿Tuku xlakata tlan nalipawana Biblia? Xlakata tiku matsokgninalh wa tlakg xaskgalala tiku lama kkakilhtamaku. Xla «Kgolotsin tiku makgasa la lama», «tiku ni kgalhilh lakatsukut chu ni kgalhi lisputni» (Daniel 7:9; Salmo 90:2). Xla «xMalakatsukina akgapun, xaxlikana Dios, tiku malakatsukilh katiyatni» (Isaías 45:18). Chu kinkawaniyan xtukuwani: Jehová (Salmo 83:18).

Xlakata Biblia wa matsokgninalh tiku kaMalakatsukinit putum latamanin, ni masiya pi akgtum kachikin o xcolorkan latamanin tlakg tlan nixawa amakgapitsin. Xtastakyaw putum kilhtamaku makgtayananit chu kamakgtayanit latamanin xalak putum kachikinin. Wa libro nema tamatitaxtinit tlakg klhuwa tachuwin chu nema tlakg tamakgpitsinit kxlikalanka katiyatni. * Wa xlakata, putum latamanin ni tuwa akgatekgskgo chu tlan kapulalin kxlatamatkan. Wa uma tuku wan Biblia:

«Dios ni laksakpaxkinan, wata kputum kachikinin, tiku pekuani chu tlawa tuku xaʼakgstitum xla makgamakglhtinan» (HECHOS 10:34, 35).

Chuna la chatum tlan tlat kapaxki chu kamakgtaya xkamanan, Jehová chatum xapaxkina Tlat tiku maklakaskin xTachuwin, Biblia, xlakata nakinkamakgtayayan (2 Timoteo 3:16). Wix tlan nalipawana xTachuwin Dios. Xlakata xla kinkamalakatsukin, katsi tuku tlan kimpalakatakan.

¿Tuku militlawat xlakata nakgalhiya latamat chuna la uma? Kʼartículo nema stala naʼakxilha.