Xlikana pi akxni kinkatlawanikanan tuku nitlan, lu sitsiyaw, pero Dios ni lakaskin natamakgapuspitnanaw. Wata kinkamakgpuwantiniyan nakgalhkgalhiyaw asta akxni xla wi tuku natlawa, xlakata malaknunit pi nialh makgas namasputu tuku ni xaʼakgstitum (Salmo 37:7, 10).

Akxni tamakgapuspitnanaw tlawayaw pi chuntiya naʼanan tasitsi. Wa xlakata, komo wi tiku wanin tuku nitlan mamakgkatsinin, ni katamakgapuspitti. Kamachokgo mintasitsi chu katakaksti. Min kilhtamaku, tlakg tlan kitaxtu nialh lakapastakkan (Proverbios 19:11). Atanu kilhtamaku, max tlakg tlan nakitaxtu nalakkaxtlawaputunkan taʼakglhuwit. Akgtum liʼakxilhtit, komo tlawanikanti tuku nitlan, max nalaksaka natalakgsiyaya chu napina kxlakatin mapakgsinanin.

¿Chu komo naʼakxilha pi nila lakatitum lakkaxtlawakan taʼakglhuwit? ¿O komo tlawanita putum tuku talakaskin xlakata lakatitum nalakkaxtlawaya taʼakglhuwit? Maski chuna, ni katamakgapuspitti, komo chuna natlawaya max namaliwakiya taʼakglhuwit. Kamachokgo tasitsi. Kakatsini nalipawana pi Dios nalakkaxtlawa taʼakglhuwit. Anta kSalmo 37:3-5 wan: «Kalipawanti chu xla namakgtayayan».