¿Na chuna lakpuwana? Putum akinin max makglhuwa katuwa tuku titaxtuyaw o max xʼamaw tamamaxaniyaw. Pero tuku natlawayaw akxni titaxtuyaw tuku kinkamatlawiyan naʼakgsaninanaw, nalitasiya la likatsiyaw. Akgtum liʼakxilhtit, komo lakaskinaw pi tlan nakinkaʼakxilhkgoyan amakgapitsin, max nawanaw pi xtalakaskin tuku nitlan tlawaw. Pero akxni katsikan tuku xaxlikana, nalitayayaw tuku nitlan nakitaxtu xlakata akgsaninaw. Kaʼakxilhwi makgapitsi tuku nitlan kitaxtu.

Xlakata kinkalipawankanan tlawa pi tlan nalatalalinaw putum kilhtamaku. Pero uma ni lakapala chuna kitaxtu. Chuna kitaxtu akxni latamanin lhuwa kilhtamaku akxtum titaxtukgo, lawanikgo tuku xaxlikana akxni latachuwinankgo chu ni lalakgsitsinikgo. Tuku nitlan wa pi maski kaj akgtum taʼakgsanin, o atanu, laktlawa la latalalinkan. Akxni chuna kitaxtu, lu tuwa lakanajlaniparakan.

¿Akgskgawinitan tiku lu tlan talalipina? Komo chuna, max lu lipuwanti, o asta makgkatsi pi akgskgawika, chu taʼakgatekgsa tuku xlakata chuna makgkatsi. Uma limasiya pi taʼakgsanin laktlawa asta tiku lu tlan latalalinkgo.

Makgalhtawakgena Robert Innes, xla Economía xalak Universidad xla California, lakputsananinalh, chu akxilhli pi «taʼakgsanin lamapasikan». La akgtum virus: akxni tlakg lhuwa kilhtamaku natalalinaw tiku akgskgawinan, akinin nachuna naʼakgskgawinanaw.

¿Tuku tlan natlawayaw xlakata ni nakinkamapasikanan? Biblia tlan nakinkamakgtayayan. Kawaniyan pi kaʼakxilhti tastakyaw xalak Biblia.