TUKU WI KXMAKNI | ¿TLAN KITAXTU NI AKGSKGAWINANKAN?
¿Wilakgolhku tiku ni akgskgawinankgo?
Hitoshi kskuja departamento xla contabilidad niku mastakan taskujut kJapón. Akgtum kilhtamaku, akxni xakxilhmakgolh cuentas, xmalana wanilh pi ni putum kawililh. Pero Hitoshi wanilh pi nila chuna xtlawa xlakata tuku xkatsininit kBiblia. Wa xlakata, xmalana wanilh pi xʼama makglhti xtaskujut chu alistalh makgantaxtilh.
Titaxtulh papaʼ, Hitoshi lu xlipuwan xlakata ni xtekgsa akgtum taskujut niku ni xtalakaskin naʼakgskgawinan. Akgtum liʼakxilhtit, niku tlawanika takgalhskinin xlakata namaxkikan taskujut, Hitoshi wa pi ni xʼama akgskgawinan. Tiku xtlawanima takgalhskinin wanilh: «¡Lu tanu la kapastaknana!». Xfamilia chu xʼamigos xwanikgo pi ni kxlajwanalh, pero xla nialh liwana xkatsi komo tlan xwanit ni naʼakgskgawinan. Xla wan: «Ktsukulh kiʼakstu kinkgalhskinkan komo tlanku nakwan pi ni xakʼakgskgawinan».
Tuku akgspulalh Hitoshi limasiya pi ni putum latamanin tlan akxilhkgo ni akgskgawinankan. Asta makgapitsi nitlan kakitaxtuni, chu tiku kgalhikgo negocios. Anta kSudáfrica, chatum puskat wa: «Kkintaskujut wilakgolh tiku akgskgawinankgo. Chu lu tlawaputunkgo pi nachuna nalikatsiya».
Taʼakgskgawin wa tuku tlakg lhuwa anan uku. Kʼakgtum tuku lakputsananka lata titaxtunita kata psicólogo Robert Feldman xla Universidad de Massachusetts, akxilhli pi 60% latamanin akgskgawinankgo makgtum lata kgalhchuwinamakgolh akgkaw minuto. Makuchina Feldman wa: «Uma lu kaks kinkamalakawanin. Ni xaklakpuwanaw pi taʼakgsanin lu xtalakgatuminit kxlatamatkan latamanin chali chali». ¿Tuku xlakata, maski putum xkajnikgo taʼakgsanin, lu talakgatuminit?
¿Tuku xlakata talakgatuminit, taʼakgskgawin, takgalhan chu atanu la laʼakgskgawikan? ¿Tuku kakitaxtuni latamanin xlakata akgskgawinankgo? Chu tuku tlakg xlakaskinka, ¿tuku tlan natlawayaw xlakata ni naʼakgskgawinanaw?
