Tuku katsiputunkgo tiku likgalhtawakgakgo
¿Tuku xasasti kinkalitachuwinankan kʼartículo «Katamasantujlilh mintukuwani», nema xmin krevista Makatsinina xla junio kata 2020, xlakata xtukuwani Jehová chu xlakata nalitasiya pi wa lakgchan namapakgsinan?
Kʼuma artículo katsiniw pi tuku tlakg xlakaskinka xlitalakkaxtlawat wa pi natamasantujli xtukuwani Jehová: anta makgtanuma pi nalitasiya pi kajwatiya Jehová tlakg xatlan Mapakgsina chu na anta makgtanuma pi akinin latamanin nalimasiyayaw komo ni makgxtakgaw Jehová, chu uma lu xlakaskinka.
¿Pero tuku xlakata wanaw pi tuku tlakg xlakaskinka wa pi namasantujlikan xtukuwani Jehová? Kaʼakxilhwi pulaktutu tuku xlakata.
Satanás maxkajwilh xtukuwani Dios kjardín xaʼEdén, chu chuntiya tlawama asta la uku.
Pulana, anta kjardín xaʼEdén, Satanás maxkajwilh xtukuwani Jehová. Tuku Satanás kgalhskilh Eva maʼakgatekgsninalh pi Dios ni lakgalhamanan chu pi tuku xkaskininit natlawakgo nila xmakgantaxtikan. Alistalh, Satanás wa pi ni xlikana tuku Jehová xkawaninit chu chuna chatum akgsanina limaxtulh. Akxni chuna wa, maxkajwilh xtukuwani Jehová. Ama kilhtamaku «Akgskgawini» litaxtulh, nema wamputun «tiku maxkajwi xatlan xtukuwani achatum» (Juan 8:44). Xlakata Eva kanajlalh xtaʼakgsanin Satanás, nialh kgalhakgaxmatli Dios, chu chuna talalakatawakalh xTamapakgsin (Gén. 3:1-6). La uku, Satanás chuntiya maxkajwima xtukuwani Dios; xtaʼakgsanin kamalakpuwani latamanin pi Jehová nitlan likatsi. Chu latamanin tiku kanajlakgo xtaʼakgsanin ni kgalhakgaxmatkgo Jehová. Xlakskujnin Dios lu nitlan limakgkatsikgo akxni akxilhkgo pi maxkajwikanit xasanto xtukuwani Jehová. Wa uma tuku tlawanit pi naʼanan lhuwa tapatin chu tuku nitlan kkakilhtamaku.
Xlipulaktiy, xlakata Jehová lakaskin pi putum xtamalakatsukin tlan katawilakgolh, liwana lakkaxwilinit nakgalhmakgtaya chu namasantujli xtukuwani. Wa uma tuku tlakg xlakaskinka liʼakxilha. Wa xlakata wan: «Naksantujtlawa xalanka kintukuwani» (Ezeq. 36:23). Kʼoración nema Jesús kamasiyanilh kstalaninanin, wa: «Katamasantujlilh mintukuwani». Chuna limasiyalh pi wa uma tuku tlakg xlakaskinka kiliskinatkan kʼoración (Mat. 6:9). Biblia makglhuwa kinkamasiyaniyan pi lu xlakaskinka namalankiyaw xtukuwani Jehová. Wa umakgolh makgapitsi liʼakxilhtit: «Kamaxkitit Jehová lilanka nema lakgchan xtukuwani» (1 Crón. 16:29; Sal. 96:8). «Kakilhtlinitit lanka xtukuwani» (Sal. 66:2). «Nakmalanki mintukuwani putum kilhtamaku» (Sal. 86:12). Nachuna, makgtum akxni Jehová chuwinancha lata kʼakgapun, Jesús xwi ktemplo xalak Jerusalén chu skinilh xTlat: «Kamalanki mintukuwani». Jehová kgalhtilh: «Kmalankinit chu amakgtum nakmalankipara» (Juan 12:28). a
Xlipulaktutu, xtalakaskin Jehová wa pi xasanto xtukuwani kamalankika putum kilhtamaku. Kalilakpuwaw la xlilakaskinka nawan xtukuwani Jehová akxni sputnita nawan xTamapakgsin Cristo xaʼAkgtum Mil Kata, akxni titaxtunita nawan xaʼawatiya taputsan. ¿Tuku nalakpuwankgo latamanin chu ángeles xlakata xtukuwani Jehová? Xlakata nakatsiyaw, kalichuwinamparaw pulaktiy tuku makgtanuma xlakata tuku limaxkajwikanit xtukuwani Jehová: nalitasiya komo latamanin ni makgxtakgkgo Jehová chu nalitasiya pi kajwatiya xla tlakg xatlan mapakgsina. Nialh katitalakaskilh nakaliʼakxilhkan latamanin komo ni makgxtakgkgo Dios. ¿Tuku xlakata? Xlakata ama kilhtamaku nialh katikgalhikgolh talakgalhin chu titaxtukgonita nawan xaʼawatiya taputsan. Tlan nalatamakgo putum kilhtamaku. Na liwana litasiyanita nawan pi kajwatiya Jehová tlakg xatlan mapakgsina chu wa lakgchan namapakgsinan, wa xlakata nialh katiʼanalh tapapitsit. Putum tiku nalatamakgo uma kilhtamaku, lata ángeles chu latamanin, namakgamakglhtinankgo pi kajwatiya Jehová lakgchan namapakgsinan. Pero ¿tuku nala xpalakata xtukuwani Jehová?
Xtukuwani tasantujlinita nawan chu nialh katiʼanalh taʼakgsanin nema namaxkajwi. Pero xtukuwani Jehová chuntiya kaks nakamalakawani putum kskujnin, lata tiku nalatamakgo kKatiyatni chu kʼakgapun. ¿Tuku xlakata? Xlakata naʼakxilhkgo pi Jehová chuntiya natlawa tuku kaks malakawaninan. Akgtum liʼakxilhtit, xlakata Jesús namaspitni Tamapakgsin xTlat, «Dios xmapakgsina nalitaxtu putum tuku anan» (1 Cor. 15:28). Alistalh, tiku nalatamakgo kKatiyatni «xkamanan Dios nalitaxtukgo, xlakata nakgalhikgo lakgtaxtut nema kgalhi kakni» (Rom. 8:21). Chu Jehová namakgantaxti xtalakaskin pi putum xfamilia makxtum natawila, lata xkamanan tiku nalatamakgo kʼakgapun chu xkamanan xalak Katiyatni (Efes. 1:10).
¿Chu tuku namakgkatsikgo xfamilia Jehová akxni nakgantaxtukgo putum uma? Putum tiku nalatamakgo kʼakgapun chu tiku nalatamakgo kKatiyatni lu namalankiputunkgo xastlan xtukuwani Jehová. Salmista David tsokgwililh: «Kamalankika Jehová Dios […]. Kamalankika lanka xtukuwani putum kilhtamaku» (Sal. 72:18, 19). Xlakata nalatamayaw putum kilhtamaku, lhuwa tuku nakatsinitilhayaw xlakata Jehová nema natlawa pi namalankiputunaw xtukuwani.
Xtukuwani Jehová kinkamasiyaniyan la likatsi. Wa xlakata akxni lilakpuwanaw xtukuwani, tunkun lakapastakaw xtapaxkit (1 Juan 4:8). Putum kilhtamaku nalakapastakaw pi kinkamalakatsukin xlakata kinkapaxkiyan, pi mastalh talakgmaxtut xlakata kinkapaxkiyan chu wa tapaxkit tuku makgpuwantinilh nalimasiya pi xla xaʼakgstitum Mapakgsina. Chu naʼakxilhaw la Jehová nakasikulunatlawa xtamalakatsukin xlakata kapaxki. Putum kilhtamaku naʼanan tuku natlawa pi tlakg natalakatsuwiniyaw kinTlatkan xalak akgapun chu pi nakilhtliniputunaw xlakata namalankiyaw xtukuwani (Sal. 73:28).
a Nachuna, Biblia kinkawaniyan tuku tlawa Jehová «xpalakata xtukuwani». Akgtum liʼakxilhtit, kapulalin, kamakgtaya, kalakgmaxtu chu katapati xkachikin xpalakata xtukuwani (Sal. 23:3; 31:3; 79:9; 106:8; 143:11).
