1, 2. ¿Tuku tuwa titaxtukgo Jefté chu xtsumat?

CHATUM chixku taspitma kxchik akxni tlajananita kʼguerra. Akxni xtsumat akxilha, lu paxuwa, asta kilhtli chu tantli akxni an paxtokga. Pero tuku alistalh wan chu tlawa xtlat kaks malakawani. Lakxtita klhakgat xlakata nalimasiya pi lu nitlan makgkatsi chu alistalh pixlanka wan: «¡Ay, kintsumat!». Litachuwinan pi wi tuku malaknuninit Jehová. Xlakata ama tamalaknun, xla nikxni natamakgaxtokga chu nila nakgalhi kamanan. ¿La kgalhti xtlat? Tunkun wani xtlat pi kamakgantaxtilh tuku wanit. Chuna la kgalhtinan uma tsumat limasiya pi kanajla pi Jehová nikxni naskini tuku nitlan (Juec. 11:34-37). Akxni ama chixku akxilha pi xtsumat lhuwa takanajla kgalhi, lu lipaxuwa. Liwana katsi pi xtsumat lu makgapaxuwa Jehová xlakata chuna la kgalhi xtayat.

² Uma chixku xwanikan Jefté. Xla chu xtsumat lu xlipawankgo Jehová chu xlipawankgo akxni wi tuku xtlawakgo. Asta  akxni tuwa tuku xtitaxtukgo kxlatamatkan limasiyakgolh pi xkgalhikgo takanajla. Xlakaskinkgo pi xkasikulunatlawakgolh Jehová, wa xlakata tlawakgolh tuku xtalakaskilh.

3. ¿Tuku kinkamasiyaniyan xliʼakxilhtit Jefté chu xtsumat?

³ Min kilhtamaku tuwa tamakgkatsi nakgalhiniyaw takanajla Jehová. Komo chuntiya kgalhiputunaw uma, kilikuentajtlawatkan xliputum kilitliwakgakan (Jud. 3). Wa xlakata, kʼuma artículo nalichuwinanaw Jefté chu xtsumat. Naʼakxilhaw la limasiyakgolh takanajla akxni kgalhikgolh taʼakglhuwit.

4, 5. 1) ¿Tuku xlitlawatkan xwanit israelitas akxni xtanukgolh ktiyat nema xʼamaka kamaxkikan? 2) Chuna la wan Salmo 106, ¿tuku lanikgolh israelitas xlakata ni kgalhakgaxmatnankgolh?

⁴ Chali chali Jefté chu xtsumat xʼakxilhkgo la nitlan xkakitaxtuni israelitas xlakata ni xkgalhakgaxmatkgo Jehová. Max xtitaxtunita 300 kata, akxni israelitas xʼamakgo tanukgo ktiyat nema xʼamaka kamaxkikan, Jehová kalimapakgsilh pi xmakgnikgolh putum latamanin tiku xkakninanikgo ni xaxlikana dioses. Pero xlakan nichuna tlawakgolh (Deut. 7:1-4). Lhuwa asta tsukukgolh kakninanikgo ni xaxlikana dioses chu asta xtlawakgo talakgxtumit xalimaxana, chuna la xtlawakgo tiku xalak Canaán (kalikgalhtawakga Salmo 106:34-39).

⁵ Xlakata ni kgalhakgaxmatnankgolh, Dios ni kamakgtayalh israelitas akxni xkatlawanikgo tuku nitlan xtalamakgasitsinkan (Juec. 2:1-3, 11-15; Sal. 106:40-43). Max tuwa xmakgkatsikgo familias tiku xpaxkikgo Jehová xlakata nalimasiyakgo takanajla kʼama kilhtamaku. Pero Biblia lichuwinan makgapitsi israelitas tiku xmakgapaxuwaputunkgo Jehová. Makgapitsi tiku chuna xtlawaputunkgo wa Jefté chu xtsumat, chuna la Elqaná, Ana chu Samuel (1 Sam. 1:20-28; 2:26).

6. ¿Tuku lu tlawaputunkgo latamanin xala uku chu tuku kilitlawatkan?

⁶ La uku, lhuwa latamanin likatsikgo la latamanin xalak Canaán. Lhuwa tlawaputunkgo talakgxtumit xalimaxana, lachipat chu kgalhiputunkgo tumin. Pero Jehová kinkawaniyan pi kuentajkilitlawatkan. Kinkamakgtayaputunan xlakata ni natlawayaw tuku nitlan, chuna la xkamakgtayaputun israelitas. ¿Tuku kinkamasiyaniyan nitlan xliʼakxilhtitkan israelitas? (1 Cor. 10:6-11). Chuntiya kaliskujwi xlakata ni nakgalhiyaw kintayatkan la xalak kakilhtamaku (Rom. 12:2).

7. 1) ¿Tuku tlawanikgolh Jefté tiku xalak xkachikin? 2) ¿Tuku tlawalh Jefté?

⁷ Kxkilhtamaku Jefté, xtalamakgasitsin israelitas katlawanikgolh tuku nitlan xlakata ni kgalhakgaxmatkgolh Jehová (Juec. 10:7, 8). Jefté ni kajwatiya xkatakgalhi taʼakglhuwit tiku ni xkakninanikgo Jehová, na xkatakgalhi taʼakglhuwit xnatalan chu lakgkgolotsin xalak Israel. Jefté lu xmakgasitsikgo xnatalan chu xlakgsitsilakanikgo tuku xkgalhi. Wa xlakata xafuerza tamakxtuka ktiyat nema xtapakgsini (Juec. 11:1-3). Pero ni kalisitsinilh. ¿La likatsiyaw? Akxni lakgkgolotsin xalak Israel skinikgolh pi xkamakgtayalh, xla xatapaxuwan kamakgtayalh  (Juec. 11:4-11). ¿Tuku xlakata xatapaxuwan makgtayanalh?

8, 9. 1) ¿Tuku tastakyaw max makgtayalh Jefté nema xtatsokgtawilanit kxlimapakgsin Moisés? 2) ¿Tuku tlakg xlakaskinka xakxilha Jefté?

⁸ Jefté lu tlan soldado xwanit chu liwana xkatsi xkilhtsukut kachikin Israel chu xlimapakgsin Moisés. Akxni xlilakpuwan la Jehová kalikatsini xkachikin, katsinilh tuku tlan chu tuku nitlan (Juec. 11:12-27). Wa uma tuku maklakaskilh kxlatamat akxni wi tuku xtlawaputun. Xla liwana xkatsi pi Jehová ni lakaskin pi kskujnin nalamalakgaxokge, wata nalapaxkikgo xchatunukan. Nachuna, katsinilh klimapakgsin la nakalikatsini amakgapitsin, asta tiku ni xakxilhputunkgo (kalikgalhtawakga Éxodo 23:5 chu Levítico 19:17, 18).

⁹ Max tuku na makgtayalh Jefté wa xliʼakxilhtit José. Max xkatsi pi José kalakgalhamalh xnatalan maski xlakan ni xpaxkikgo (Gén. 37:4; 45:4, 5). Max Jefté lilakpuwa uma liʼakxilhtit, wa xlakata chuna tlawalh la xlakaskin Jehová. Max Jefté lu patinalh xlakata tuku xtlawanikgonit xnatalan. Pero ni lu xlakaskinka akxilhli tuku xmakgkatsi. Tlakg xlakaskinka xakxilha natataya Jehová chu xkachikin (Juec. 11:9). Jefté xlimasiyaniputun xtakanajla Jehová. Wa xlakata Dios sikulunatlawalh chu putum xkachikin (Heb. 11:32, 33).

10. ¿La kinkamakgtayayan Biblia xlakata nalimasiyayaw pi kstalaninanin Cristo akinin?

¹⁰ ¿La nachuna natlawayaw la tlawalh Jefté? Kalilakpuwaw uma: ¿tuku xtlawaw komo chatum tala nitlan nakinkamamakgkatsiniyan o nakinkatlawaniyan tuku nitlan? Chuna natlawayaw la Jefté, namaklakaskinaw tastakyaw nema limin Biblia akxni wi tuku natlawaputunaw. Maski nitlan nalimakgkatsiyaw chuntiya kaskujnaniw Jehová. Na chuntiya naʼanaw ktamakxtumit chu chuntiya akxtum nakatalayaw natalan. Wata kakgalhakgaxmatwi Jehová. Uma nakinkamakgtayayan akxni natitaxtuyaw tuku tuwa chu tlan liʼakxilhtit nalitaxtuyaw (Rom. 12:20, 21; Col. 3:13).

11, 12. 1) ¿Tuku malaknulh Jefté? 2) ¿Tuku xlitlawat xwanit xlakata xmakgantaxtilh tuku xmalaknunit?

¹¹ Jefté xkatsi pi xmaklakaskin xtamakgtay Dios xlakata nakatlaja xtalamakgasitsin. Wa xlakata wi tuku malaknunilh Jehová (kaʼakxilhti recuadro «¿Tuku kilhchanima?»). Wanilh pi komo xmakgtayalh natlajanan xʼama makamaxki la xalhkun tamakamastan xapulana tiku xmakgamakglhtinalh akxni xkitaspitli kʼguerra (Juec. 11:30, 31). ¿Tuku xwamputun?

¹² Jefté ni xwamputun pi xʼama makgni tiku xapulana xtaxtucha kxchik akxni xmakgamakglhtinalh. ¿La likatsiyaw? Xlakata Jefté xkatsi pi Jehová ni xlakgati namakgnikan chatum lataman (Deut. 18:9, 10). Kxkilhtamaku israelitas, akgtum tamakamastan xlitaxtu la akgtum tamaskiwin nema xmaxkikan Jehová (kaʼakxilhti recuadro  «¿Tuku kilhchanima?»). Wa xlakata akxni Jefté wanilh Jehová pi xʼama maxki tamakamastan, xwaniputun pi xʼama maxki chatum lataman tiku kskujnanilh kxtabernáculo putum kxlatamat. Jehová tlan tlawalh tuku wanilh Jefté chu makgtayalh natlajanan (Juec. 11:32, 33). Pero ¿tiku xʼama makamasta Jefté la akgtum tamaskiwin?

13, 14. ¿Tuku kinkamasiyaniyan tuku wan Jueces 11:35 xlakata xtakanajla Jefté?

¹³ Chuna la lichuwinaw kxapulana párrafo kʼuma artículo, tiku xapulana alh paxtokga wa xtsumat tiku kaj chatum xwanit chu tiku lu xpaxki. ¿Tuku xʼama tlawa Jefté? ¿Xʼama makgantaxti tuku xwaninit Jehová? ¿Xʼama maxki xtsumat xlakata kskujnanilh ktabernáculo xliputum xlatamat?

¹⁴ Akxni chuna titaxtulh, max Jefté tlawalh tuku xkatsininit kxlimapakgsin Dios. Max lakapastakli limapakgsin niku xkawani israelitas pi wa xlimaxkitkan tuku tlakg xatlan xkgalhikgo (Éx. 23:19). Max na lakapastakli pi komo wi tuku xmalaknuninit Jehová, limapakgsin xwan: «Ni xlilakgmakganat tuku wanit. Xlitlawat putum tuku lichuwinanit» (Núm. 30:2). Wa xlakata chuna xlitlawat xwanit la Ana, tiku max na watiya kilhtamaku latamalh. Jefté xlimakgantaxtit xwanit tuku xmalaknunit, maski xkatsi pi tuwa xʼama kitaxtuni chu nachuna xtsumat. Xlakata xtsumat xʼama skuja ktabernáculo xliputum kxlatamat nila xʼama tamakgaxtokga chu nila xʼama kgalhi kamanan. Uma wamputun pi Jefté niti xkgalhilh tiku xʼama makgamakglhtinan xtiyat (Juec. 11:34). Maski chuna, Jefté wa: «Akit wi tuku kwaninit Jehová pi naktlawa chu nila ni nakmakgantaxti» (Juec. 11:35). Umakgolh tachuwin limasiya pi Jefté tliwakga xkgalhi xtakanajla. Jehová makgamakglhtinalh tamakamastan nema tlawanilh chu sikulunatlawalh. ¿Nachuna xtikgalhiw lhuwa takanajla la Jefté?

15. ¿Tuku malaknunitaw lhuwa akinin chu la nalimasiyayaw pi makgantaxtiyaw?

 ¹⁵ Akxni tamakamastaniw Jehová, waniw pi tlakg xlakaskinka xʼamaw akxilhaw natlawayaw xtalakaskin. Xkatsiyaw pi xʼama min kilhtamaku tuwa xʼamaw makgkatsiyaw. Pero ¿tuku tlawayaw akxni Jehová kinkaskiniyan natlawayaw tuku ni lakgatiyaw? Komo kgalhiyaw takanajla la Jefté, nalimasiyayaw akxni namakgantaxtiyaw tuku waniw chu xatapaxuwan nakgalhakgaxmatnanaw. Xtasikulunalin Dios tlakg lanka ni xawa tuku namakamastayaw (Mal. 3:10). Chu ¿tuku lanilh xtsumat Jefté? ¿Tuku wa akxni katsilh tuku xmalaknunit xtlat?

16. ¿Tuku wa xtsumat Jefté akxni katsilh tuku xmalaknunit xtlat? (Kaʼakxilhti xapulana dibujo).

¹⁶ Tuku Jefté malaknunilh Jehová tanu ni xawa tuku Ana malaknulh. Xla malaknulh pi xʼama makamasta xkgawasa xlakata kskujli ktabernáculo la nazareo (1 Sam. 1:11) (kaʼakxilhti recuadro «¿Tuku kilhchanima?»). Nazareos tlan xtamakgaxtokgkgo chu tlan xkgalhikgo kamanan. Pero xtsumat Jefté nila chuna xtlawalh, xlakata xtlat xliputuminika makamastalh la akgtum xalhkun tamakamastan (Juec. 11:37-40). Kalilakpuwaw uma: xlitaxtu xtsumat chatum pulalina kʼIsrael, wa xlakata tlan xtatamakgaxtokgli tiku tlakg xatlan kgawasa xwanit kputum país. Pero wata kskujni Dios litaxtulh ktabernáculo. ¿Tuku wa? Wanilh xtlat tuku limasiyalh pi tlakg xlakaskinka xakxilha naskujnani Dios: «Katlawa kimpalakata la wanita» (Juec. 11:36). Xlakata naskujnani Jehová, uma tsumat ni tamakgaxtokgli chu ni kgalhilh kamanan. ¿La nachuna natlawayaw?

17. 1) ¿La natlawayaw xlakata nalimasiyayaw takanajla la Jefté chu xtsumat? 2) ¿Tuku xlakata makgpuwantiniyan tuku wan Hebreos 6:10-12?

¹⁷ ¿La natlawayaw la Jefté chu xtsumat? La uku, miles xTatayananin Jehová lakgkgawasan chu laktsuman lakkaxwilikgo ni tunkun natamakgaxtokgkgo chu ni nakgalhikgo kamanan. ¿Tuku xlakata? Xlakata tlakg naskujnanikgo Jehová. Lhuwa natalan tiku linkgoya kata na limakgxtakgkgo kilhtamaku nema tlan xkalimaxtunikgolh xkamanan o xnatanatni. ¿Tuku  xlakata? Xlakata lakapastakkgonit namaxkikgo Jehová xkilhtamakujkan chu xlitliwakgakan. Makgapitsi makgtlawakgo niku tamakxtumiyaw. Makgapitsi ankgo kʼEscuela xla Tiku lichuwinankgo xTamapakgsin Dios chu ankgo kʼakgtum congregación niku tlakg talakaskin tiku nalichuwinankgo Dios. Chu amakgapitsin lakkaxwilikgo tlakg nalichuwinankgo Dios kilhtamaku akxni talakapastaka akxni tinilh Cristo. Jehová putum kilhtamaku nalakapastaka tuku umakgolh natalan tlawakgo xlakata lu paxkikgo (kalikgalhtawakga Hebreos 6:10-12). ¿Chu wix? ¿Wi tuku xatapaxuwan limakgxtakgputuna xlakata tlakg naskujnaniya Jehová?

18, 19. 1) ¿Tuku kinkamasiyaninitan Jefté chu xtsumat? 2) ¿La natlawayaw la tlawakgolh?

¹⁸ Lhuwa tuku kinkamasiyaniyan xliʼakxilhtit Jefté chu xtsumat. Jefté mastalh talakaskin napulalin Jehová akxni wi tuku xlilaksakat xwanit kxlatamat. Ni mastalh talakaskin pi latamanin tiku xlamakgo kxkilhtamaku xmatlawikgolh tuku nitlan. Akxni amakgapitsin nitlan mamakgkatsinikgolh limasiyalh takanajla. Chu akxni makgapitsi ni kgalhakgaxmatkgolh Dios, xla chu xtsumat limasiyakgolh pi tliwakga xkgalhikgo xtakanajlakan. Jehová sikulunatlawalh Jefté chu xtsumat xlakata wi tuku xatapaxuwan limakgxtakgkgolh. Nachuna, kalimaklakaskilh xlakata xkamakgtayalh amakgapitsin na kskujnanikgolh.

¹⁹ Biblia wan: «Chuna katlawatit la tiku kgalhikgo takanajla chu xlakata kgalhkgalhinankgo makglhtinankgo tuku wankanit namastakan» (Heb. 6:12, TNM). Wa xlakata, nachuna katlawaw la Jefté chu xtsumat chu putum kilhtamaku kalimasiyaw pi tliwakga wi kintakanajlakan. Kalakapastakwi pi Jehová kamakgamakglhtinan tiku kanajlanikgo.