Felisa: Kstakli kʼEspaña kʼakgtum familia nema ni xkgalhi tumin. Kifamilia católica xwanit, chu lu xkanajlakgo. Kgalhakututu xalak kifamilia sacerdotes xwankgonit chu skujnanikgolh sikulan. Xtapuxnimat kintse sacerdote xwanit chu xmasiya kʼakgtum escuela católica. Akxni xninita, papa Juan Pablo II wa pi tlan xmaxkika kakni. Kintlat kskuja niku xtlawakan likan, chu kintse kskuja kkapukuxtun. Akinin kgalhatsayan kamanan xakwanitaw chu akit xapuxku xaklitaxtu.

Akxni akgkutiy kata xakkgalhi tsukulh guerra kʼEspaña. Akxni sputli guerra kintlat manuka kpulachin xlakata mapakgsina ni lakgatilh tuku xlakpuwan xlakata política. Lu tuwa kitaxtunilh kintse nakinkamaxkiyan taway kimputumkan. Wa xlakata kamalakgachalh kconvento kkachikin wanikan Bilbao kgalhtutu kinatalan tiku tlakg laktsujku xwankgonit, Araceli, Lauri, chu Ramoni. Anta kinatalan xkgalhikgolh xtawaykan.

Araceli: Akxni kinkamalakgachakan kconvento xakkgalhi 14 kata, Lauri xkgalhi 12 chu Ramoni xkgalhi 10. Lu xaklakapastakaw kifamiliajkan. Kʼama convento, xakkaxakayaw. Akgtiy kata alistalh, kinkamalakgachakan kʼakgtum tlakg xalanka convento kZaragoza niku xkakuentajtlawakan tiku xlinkgoya kata. Kilikaxakatkan xwanit niku xtlawakan taway, chu lu xkinkamakgatlakgwanan.

Felisa: Akxni kinatalan ankgolh kconvento xalak Zaragoza, kintse chu kinkuku, tiku sacerdote xwanit, na kimalakgachakgolh. Nialh xlakaskinkgo  xkimputsalh chatum kgawasa tiku xkilakgati. Lu klipaxuwalh pi xakama titaxtu kilhtamaku kconvento, xlakata xakpaxki Dios. Xakan ksikulan chali chali, chu asta misionera xakwamputun la chatum kintapuxnimat tiku xwi kʼAfrica.

Kconvento nitlan xakmakgkatsi xlakata nila xaktlawa tuku xaklakpuwanit. Monjas ni kimakgpuwantinikgolh nakskujnani Dios kʼatanu país, chuna la akit xaklakaskin. Wa xlakata akgtum kata alistalh ktaspitpa kkinchik xlakata xakkuentajtlawalh kinkuku, tiku sacerdote xwanit. Xakmakgtayanan xakkuentajtlawalh chiki, chu putum kakgotanun akxtum xaktlawayaw oración xla rosario. Lu xaklakgati likaxtlawanan xanat ksikulan chu xakkamalhakgani imágenes la María chu santos.

Araceli: Akxni xakwi kZaragoza, ktlawalh xapulana votos nema xtalakaskin xlakata monja xaklitaxtulh. Alistalh monjas lakapastakkgolh nialh akxtum xkinkawilikgon kinatalan chu akit. Wa xlakata kimalakgachakgolh kconvento xalak Madrid chu Lauri xalak Valencia. Ramoni tamakgxtakgli kZaragoza. Anta kMadrid, ktlawalh xliʼakgtiy votos xlakata monja xaklitaxtulh. Lhuwa latamanin xminkgo tamakgxtakgkgo kconvento, kgalhtawakgananin chu tiku xlinkgoya kata. Wa xlakata lhuwa taskujut xʼanan. Akit xakskuja kxpumakuchin convento.

Akxni nina monja xakwanit, xaklakpuwan pi lhuwa kilhtamaku xakama limaxtu xlakata xaklikgalhtawakgalh chu xaklakputsananilh Biblia. Pero lu nitlan klimakgkatsilh. Niti xmaklakaskin Biblia o xlichuwinan Dios o Jesús. Kkatsinilh tsinu latín, klakputsananilh xlatamatkan santos chu xakkakninani María. Pero tlakg lhuwa kilhtamaku xaklimaxtuniyaw taskujut.

Ktsukulh lu klilipuwan. Xaklakpuwan pi tlakg tlan xwa xaktlajalh tumin xlakata xakmakgtayalh kifamilia nixawa xakskujli kconvento xlakata atanu tiku xmakglhtinankgolh tumin. Wa xlakata ktachuwinalh tiku xpulalin convento xlakata xakwanilh pi nialh anta xaktawilaputun. Pero kilakgachinulh. Xlakpuwan pi uma xʼama lakgpali kintapuwan.

Monjas kimaxkikgolh talakaskin naktaxtu, pero akxni katsikgolh pi chuntiya xaktaxtuputun, kilakgachinuparakgolh. Akxni makgtutu chuna xtlawakgonit, wankgolh pi tlan xakalh komo xaktsokgli uma: «Kama taxtu xlakata kskujnaniputun Satanás nixawa Dios». Nila xakkanajla. Xlikana xakamputun, pero ni xakama tsokga uma. Xaʼawatiya, kkawanilh pi xaktachuwinamputun chatum sacerdote, chu kwanilh putum tuku xlanit. Xla skinilh obispo komo tlan xkimalakgachapa kZaragoza. Akxni nina lhuwa papaʼ anta xakwi, kimaxkika talakaskin naktaxtu. Ni xlimakgas, Lauri chu Ramoni na taxtukgolh.

Felisa: Titaxtulh kilhtamaku ktamakgaxtokgli chu kkalh latama kCantabria, akgtum kachikin xalak España. Chuntiya xakan ksikulan. Akgtum domingo ksikulan, sacerdote lu ksitsinit chu pixlanka wa: «¡Kaʼakxilhtit uma libro!». Kinkamasiyanin libro La verdad que lleva a vida eterna. Xla wa: «Komo wi tiku kamaxkinitan maktum la uma, kakimaxkitit o kamakgantit».

Akit ni xakkgalhi ama libro, pero xaklakaskin maktum. Ni xlimakgas, chatiy lakpuskatin minkgolh kkinchik. Xtatayananin Jehová xwankgonit, chu kiwanikgolh komo xaklakaskin uma libro. Klikgalhtawakgalh ama katsisni. Akxni lakpuskatin taspitkgolh, kinkgalhskinkgolh komo xakkgalhtawakgaputun Biblia, chu kkawanilh pi tlan.

Ankgalhin xakmakgapaxuwaputun Dios. Wa xlakata akxni kkatsinilh xaxlikana xlakata Jehová, lu ktsukulh paxki. Xakkalitachuwinamputun putum latamanin. Ktamunulh kkata 1973. Akxni xakmatlani, xaklitachuwinan kifamilia xlakata Biblia. Pero putum xkiwanikgo pi ni xaxlikana xwanit tuku xakkanajla, tlakg chuna xkiwani kintala Araceli.

Araceli: Xlakata nitlan xkilikatsinikanit kconvento, xaksitsinit chu ni xaklipaxuwa takanajla nema xakkgalhi. Pero chuntiya xakan ksikulan domingos, chu chali chali xaktlawa oración xla rosario. Chuntiya xakʼakgatekgsputun Biblia, chu xakskini Dios xkimakgtayalh. Alistalh Felisa kiwanilh tuku xkatsininit. Xlakata lu xlipaxuwa tuku xkatsinima, klakpuwa pi xakgwitinit. Akit nitlan xakakxilha tuku xkiwanima.

Alistalh, ktaspitli kMadrid xlakata xakskujli chu alistalh ktamakgaxtokgli. Titaxtulh kilhtamaku, kkakxilhli pi tiku chali chali xʼankgo ksikulan ni xmakgantaxtikgo tuku Jesús xmasiyanit. Wa xlakata nialh kkalh ksikulan. Nialh kkakanajlanilh santos chu tuku limakgapatinankan kpupatin, chu ni xakkanajla pi sacerdote tlan xmatsankgenanan talakgalhin. Asta kkamakgalh putum imágenes nema xakkgalhi. Ni xakkatsi komo tlan xwanit tuku xaktlawama. Lu nitlan xaklimakgkatsi, pero chuntiya xakskini Dios: «Klakgapasputunan. ¡Kakimakgtaya!». Klakapastaka pi xtatayananin Jehová makglhuwa  kilakgminkgolh kkinchik, pero nikxni kkamakgamakglhtinalh. Nialh xaklipawankgo takanajla.

Kintala Lauri xlama kFrancia, chu Ramoni xlama kʼEspaña. Max kkata 1980, tsukukgolh katalikgalhtawakgakgo Biblia xtatayananin Jehová. Liwana xakkatsi pi, chuna la Felisa, na kaj xkaʼakgskgawimaka. Alistalh, klakgapasli Angelines, chatum kintalakatsu, chu lu tlan klatalaliw. Xla na xtatayana Jehová xwanit. Angelines chu xchixku makglhuwa kinkgalhskinkgolh komo xakkatsiniputun xlakata Biblia. Akit xakkawani pi ni xakkatsiputun xlakata takanajla, pero akxilhkgolh pi xakkatsiputun xlakata Biblia. Alistalh kkawanilh: «Lu tlan. Akxtum nalikgalhtawakgayaw Biblia kajwatiya komo tlan nakmaklakaskin kiBiblia». Xakkgalhi maktum Biblia Nácar-Colunga.

Felisa: Akxni ktamunulh kkata 1973, xʼanan max 70 xtatayananin Jehová kSantander, xcápital Cantabria. Talakaskilh lu makgat xakkaw xlakata nakkalitachuwinanaw Dios latamanin xalak makgapitsi laktsu kachikinin. Wa xlakata xakkanaw kʼautobús chu alistalh klaktsu putlaw.

Chuna la titaxtunit kilhtamaku, lhuwa tiku kkamasiyaninit xlakata Biblia. Lhuwa católicos xwankgonit, chu 11 tamunukgolh. Talakaskinit nakkgalhkgalhinan. Xtachuna la akit, talakaskilh kilhtamaku xlakata xkatsikgolh pi tuku xkanajlakgo ni xaxlikana xwanit. Xakkatsi pi kajwatiya Biblia chu xʼespíritu santo Jehová tlan wi tiku namakgtaya xlakata nalakgpali xtapuwan chu naʼakgatekgsa xaxlikana (Heb. 4:12). Kinchixku tiku policia xwanit, tamunulh kkata 1979, chu kintse tsukulh likgalhtawakga Biblia akxni nina xni.

Araceli: Akxni ktsukulh katalikgalhtawakga Biblia xtatayananin Jehová, xaklakpuwan pi nila xakkalipawa. Pero chuna la titaxtutilhalh kilhtamaku, nialh chuna klakpuwa. Xtatayananin Jehová ni kajwatiya masiyakgo tuku wan Biblia, na makgantaxtikgo tuku masiya. Takanajla nema kkgalhini Jehová chu Biblia, tsukulh staka chu tlakg kpaxuwalh. Makgapitsi kintalakatsu akxilhkgolh uma tuku xaklakgpalinit chu kiwanikgolh: «Araceli, ¡chuntiya katlawanti ktiji nema laksaknita!».

Klakapastaka pi xakwani Jehová: «Paxtikatsinilh Jehová, xlakata ni kimakgxtakgti chu makglhuwa kimaxki talakaskin naktekgsa tuku xakputsama: xaxlikana takatsin xalak Biblia». Na kskinilh kintala Felisa xkintapatilh xlakata tuku nitlan xakwaninit. Lata amacha kilhtamaku, nialh klatataʼakglhuwiyaw, wata klipaxuwayaw naklichuwinanaw Biblia. Ktamunulh kkata 1989, akxni xakkgalhi 61 kata.

Felisa: La uku kgalhi 91 kata chu ninita kinchixku. Nialhla kskujnani Dios chuna la makgasa, pero chuntiya klikgalhtawakga Biblia chali chali, chu akxni kmatlani kkan ktamakxtumit chu kkan klichuwinan Dios.

Araceli: Klakgati kalitachuwinan Jehová putum sacerdotes chu monjas tiku kkatekgsa, max xlakata na monja xakwanit. Makgapitsi lu tlan kkatakgalhchuwinanit, chu amakgapitsi makglhtinankgonit libros chu revistas. Tlakg klakapastaka chatum sacerdote. Akxni makglhuwata xaktachuwinanit, xla wa pi tlan xʼakxilha tuku xakwanima. Chu kiwanilh: «¿Pero tuku naktlawa uku akxni klina kata? ¿Tuku nawankgo tiku ankgo ksikulan chu kifamilia?». Akit kkgalhtilh: «¿Tuku nawan Dios?». Xla xkatsi pi xlikana tuku xakwanima, chu kakxilhli pi lilipuwa. Pero xtasiya pi xpekuan, wa xlakata ni xtalakgpaliputun.

Putum kilhtamaku naklakapastaka akxni kinchixku kiwanilh pi xkintaʼamputun ktamakxtumit. Xla xkgalhi liwaka 80 kata akxni alh kxapulana tamakxtumit, chu lata amacha kilhtamaku nipara makgtum makgatsankgalh. Xla likgalhtawakgalh Biblia chu tsukulh lichuwinan Dios. Lu xatapaxuwan klakapastaka akxni kinchatiykan xaklichuwinanaw Dios. Nilh akgtiy papaʼ akxni nina xchan kilhtamaku natamunu.

Felisa: Akxni ktsukulh skujnani Jehová, kgalhtutu laktsujku kinatalan xkilakatayakgo. Pero alistalh, na makglhtinankgolh xaxlikana. Uma pulaktum tuku tlakg xatlan nema ktitaxtulh. Alistalh, akxtum xakwilaw chu tlan akxtum klichuwinaw kiDioskan, Jehová, chu xTachuwin. Xaʼawatiya tlan akxtum kkakninaniw Jehová. *