1-3. 1) ¿La likatsiyaw pi kstalaninanin Cristo putum kilhtamaku lu xlakaskinka akxilhkgonit tamakxtumit? (Kaʼakxilhti xapulana dibujo). 2) ¿Tuku nalichuwinanaw kʼuma artículo?

AKXNI Corinna xkgalhi 17 kata xtse manuka kpulachin chu makgat linka xlakata xtlawalh palha taskujut. Alistalh Corinna na linka kSiberia, lhuwa mil kilómetros xlimakgat lata niku xwi xchik. Anta tsukuka maskujukan niku xkakuentajtlawakan animales chu xchananankan chu likatsinika la tiku kaj skujni. Xmin kilhtamaku fuerza xmaskujukan kkalakgwan niku lu xlonkgnan chu ni lu xtatlapanit. Maski chuna, Corinna chu achatum tala tsumat lakkaxwilikgolh naʼankgo ktamakxtumit nema xtlawakan kʼakgtum congregación nema makgat xwi niku kskujkgo.

² Xchatiykan taxtukgolh kakgotanun chu tlawankgolh 25 kilómetros asta niku xwi tren. Corinna wa: «Tren taxtulh kamakgtiy tsisa, chu akgchaxan hora makgapalalh. Akxni ktaktaw, ktlawaw 10 kilómetros asta niku xtamakxtumikan». Corinna lu lipaxuwalh xlakata alh. Xla wa: «Ktamakxtumit klikgalhtawakgaw Makatsinina chu kkilhtliniw Jehová. Uma tuku  ktlawaw lu kinkamakgapaxuwan chu matliwakglhli kintakanajlakan». Titaxtulh akgtutu kilhtamaku taspitparakgolh niku kskujkgo. Chu tiku xkamaskuju nikxni katsilh pi xtaxtukgonit.

³ Kskujnin Dios putum kilhtamaku lu xlakaskinka akxilhkgonit tamakxtumit. Akgtum liʼakxilhtit, xapulana kstalaninanin Cristo lu xlakgatikgo tamakxtumikgo xlakata nakakninanikgo Jehová chu nakatsinikgo xpalakata (Hech. 2:42). Xlikana pi kimputumkan lakgatiyaw anaw ktamakxtumit. Pero max makgapitsi tuwa kinkakitaxtuniyan naʼanaw kputum tamakxtumit. Max kiliskujatkan lhuwa horas, lhuwa tuku kilitlawatkan o lu tlakgwanitaw. ¿Tuku nakinkamakgtayayan naʼanaw kputum kintamakxtumitkan? ^[1] (Kaʼakxilhti nota niku kgalhsputa artículo). ¿La nakamakgpuwantiniyaw tiku kalimakgalhtawakgemaw Biblia chu amakgapitsi xlakata ni namakgxtakgkgo kintamakxtumitkan? Kʼuma artículo naʼakxilhaw pi akxni anaw ktamakxtumit, 1) lu litamakgtayayaw, 2) kamakgtaya amakgapitsin, chu 3) makgapaxuwa Jehová ^[2] (kaʼakxilhti nota niku kgalhsputa artículo).

4. ¿La kinkamakgtayayan tamakxtumit tlakg tlan nalakgapasaw Jehová?

⁴ Ktamakxtumit kinkamasiyanikanan. Tamakxtumit kinkamakgtayayan tlakg tlan nalakgapasaw Jehová. ¿La chuna kitaxtu? Akgtum liʼakxilhtit, akxni talikgalhtawakgalh libro ¿Tuku xlikana masiyay Biblia? kTakgalhtawakga nema takilhtinit kBiblia kCongregación. ¿Tuku xmakgkatsiyaw akxni xlichuwinanaw xtayat Dios chu xkgaxmataw la xʼakxilhkgo natalan? Xlikana pi tlakg xpaxkiyaw Jehová. Nachuna, xlakata liwana kgaxmataw taʼakgchuwin, liʼakxilhtit nema matitaxtikan chu textos xalak Biblia nema kalikgalhtawakgayaw, tlakg katsiniyaw xlakata Biblia (Neh. 8:8). Chu akgatunu semana katsiniyaw tuku lu xlakaskinka akxni likgalhtawakgayaw kBiblia tuku lakgchan chu alistalh kgaxmataw xtakgalhtinkan kinatalankan.

5. ¿La makgtayanitan tamakxtumit akxni lichuwinana Dios chu nalilatapaya kmilatamat tuku katsininita kBiblia?

⁵ Tamakxtumit kinkamasiyaniyan nalilatamayaw tuku katsiniyaw kBiblia (1 Tes. 4:9, 10). Akgtum liʼakxilhtit, max milh kilhtamaku likgalhtawakgaw akgtum artículo xla Makatsinina nema kinkamakgpuwantinin tlakg naskujnaniyaw Jehová, tlakg tlan natlawayaw kioracioneskan o natapatiyaw tala tiku nitlan kinkamamakgkatsinin. Chu ktamakxtumit nema kgalhiyaw kxitat semana katsiniyaw la nalichuwinanaw Dios chu nakamasiyaniyaw amakgapitsin xaxlikana xalak Biblia (Mat. 28:19, 20).

6. ¿La kinkamakgpuwantiniyan chu la kinkamatliwakglhan kintamakxtumitkan?

⁶ Tamakxtumit kinkamakgpuwantiniyan. Xkakilhtamaku Satanás tlawaputun pi nialh tliwakga natawila kintakanajlakan chu kinkamaxlajwaniputunan. Pero kintamakxtumitkan  kinkamakgpuwantiniyan chu kinkamatliwakglhan xlakata chuntiya naskujnaniyaw Jehová (kalikgalhtawakga Hechos 15:30-32). Makglhuwa anta lichuwinanaw la kgantaxtunit tuku Biblia wan pi xʼama la. Uma kinkamakgtayayan tlakg liwana nakanajlayaw pi Jehová namakgantaxti putum tuku wanit. Nachuna, natalan kinkamakgpuwantinikgoyan akxni mastakgo xtaʼakgchuwinkan chu matitaxtikgo liʼakxilhtit, pero nachuna akxni mastakgo xtakgalhtinkan chu xliputum xnakujkan kilhtlinikgo Jehová (1 Cor. 14:26). Pulaktum tuku na kinkamakgpuwantiniyan wa nakatachuwinanaw akxni nina tsuku chu akxni sputnita tamakxtumit, xlakata akxilhaw pi kgalhiyaw lhuwa amigos tiku kinkapaxkikgoyan (1 Cor. 16:17, 18).

7. ¿Tuku xlakata lu xlakaskinka naʼanaw kkintamakxtumitkan?

⁷ Ktamakxtumit Dios kinkalimakgtayayan xʼespíritu santo. Jesús maklakaskin xʼespíritu santo Dios xlakata nakapulalin congregaciones. Xla wa pi kakgaxmatwi «wa ntu wanikgoy spiritu [...] nkanajlanin» (Apocalipsis [Revelación] 2:7). Espíritu santo tlan kinkamakgtayayan xlakata ni natlawayaw tuku nitlan tlawaputunaw, ni napekuanaw akxni nalichuwinanaw Dios chu natlawayaw tuku tlan. Wa xlakata lu xlakaskinka pi natlawayaw tuku matlaniyaw xlakata ankgalhin naʼanaw ktamakxtumit. Chuna Dios nakinkalimakgtayayan xʼespíritu santo.

8. ¿La kamakgtaya amakgapitsi akxni kinkaʼakxilhkgoyan ktamakxtumit chu kgaxmatkgo kintakgalhtinkan chu kilhtliyaw? (Na kaʼakxilhti recuadro « Tlakg tlan makgkatsi akxni taspita kxchik»).

⁸ Ktamakxtumit tlan kalimasiyaniyaw kinatalankan pi kapaxkiyaw. Lhuwa natalan tayanimakgo tuku lu tuwa. Apóstol Pablo tsokgli: «Kalakputsaw la nalamakgtayayaw kinchatunukan» (Heb. 10:24, 25, TNM). Pablo xwamputun pi nalamakgtayayaw kinchatunukan. Pulaktum la tlan natlawayaw uma wa akxni natamakxtumiyaw xlakata nalamakgpuwantiniyaw. Akxni anaw ktamakxtumit kalimasiyaniyaw natalan pi akxtum katatawilaputunaw, katachuwinamputunaw chu  katsiputunaw la makgkatsikgo. Na kamakgpuwantiniyaw akxni mastayaw kintakgalhtinkan chu akxni xliputum kinakujkan kilhtliniyaw Jehová (Col. 3:16).

9, 10. 1) Kawanti tuku xlakata xtachuwin Jesús kJuan 10:16 kinkamakgtayayan naʼakgatekgsaw pi xlakaskinka naʼanaw ktamakxtumit. 2) Komo anaw ktamakxtumit, ¿la litamakgtayakgo natalan tiku xfamiliajkan ni xtatayananin Jehová?

⁹ Akxni anaw ktamakxtumit makgtayananaw makxtum natawila congregación (kalikgalhtawakga Juan 10:16). Jesús wa pi xla litaxtu la tiku kakuentajtlawa borregos chu kstalaninanin litaxtukgo la kgamputum xborregos. Kgamputum borregos putum kilhtamaku akxtum wilakgolh chu stalanikgo xkuentajtlawanakan. Komo tantiy borregos wilakgolh kʼakgtum kgastin, tantiy borregos wilakgolh niku kaxtum chu tantum borrego alakatanu wi, nila nawanaw pi umakgolh tankitsis borregos watiya kgamputum. Nachuna, komo kaj kgamputum wamputunaw chu stalaniputunaw kaj chatum mapuchwayanina, putum kilhtamaku kiliʼanatkan ktamakxtumit xlakata makxtum nakatatawilayaw kinatalankan.

¹⁰ Kintamakxtumitkan kinkamakgtayayan makxtum natawilayaw chu nalitaxtuyaw la akgtum familia tiku lapaxkikgo (Sal. 133:1). Makgapitsi natalan xnatlatnikan o xnatalankan nialh kapaxkikgonit xlakata xtatayananin Jehová litaxtukgolh. Pero Jesús kawanilh pi xʼama kamaxki akgtum familia nema xʼama kapaxki chu xʼama kakuentajtlawa (Mar. 10:29, 30). Komo chuntiya anaw ktamakxtumit, umakgolh natalan tlan kinkaʼakxilhkgoyan la xnatlatnikan o xnatalankan chu natatliwakglhkgo. Komo nalilakpuwanaw uma, fuerza natlawayaw naʼanaw kputum kintamakxtumitkan.

11. ¿La kinkamakgtayayan tamakxtumit xlakata namaxkiyaw Jehová tuku lakgchan?

¹¹ Ktamakxtumit maxkiyaw Jehová tuku lakgchan. Xlakata Jehová kinkamalakatsukin, lakgchan napaxtikatsiniyaw, namaxkiyaw kakni chu namalankiyaw (kalikgalhtawakga Apocalipsis 7:12). Tlawayaw uma kkintamakxtumitkan akxni tlawayaw oración, kilhtliniyaw chu lichuwinanaw. Lanka talakgalhaman kgalhiyaw akgatunu semana xlakata kakninaniyaw Jehová.

12. ¿La makgkatsi Jehová akxni kgaxmataw xlimapakgsin xlakata naʼanaw ktamakxtumit?

¹² Xlakata wa Jehová tiku kinkatlawan, na lakgchan nakgalhakgaxmataw. Kinkalimapakgsiyan pi natamakxtumiyaw putum kilhtamaku, tlakg chuna natlawayaw xlakata talakatsuwima xlisputni. Jehová lu paxuwa akxni kgalhakgaxmataw uma limapakgsin (1 Juan 3:22). Xla katsi la liskujaw xlakata naʼanaw ktamakxtumit chu lhuwa xtapalh akxilha (Heb. 6:10).

13, 14. ¿La kinkamakgtayayan tamakxtumit nakatalakatsuwiniyaw Jehová chu Jesús?

¹³ Akxni tamakxtumiyaw, limasiyayaw pi tlakg lakgtalakatsuwiputunaw Jehová chu xKgawasa. Kkintamakxtumitkan likgalhtawakgayaw Biblia chu katsiniyaw tuku kinkaskiniyan Jehová (Is. 30:20, 21). Asta latamanin tiku ni skujnanikgo Jehová chu minkgo kkintamakxtumitkan liwana katsikgo pi wa kinkapulaliman (1 Cor. 14:23-25). Xlakata Jehová lipulalin tamakxtumit xʼespíritu santo, xla kinkamaxkiyan tuku kinkamasiyanikanan. Wa xlakata akxni anaw kkintamakxtumitkan, tlan nakgaxmatniyaw Dios chu namakgkatsiyaw la xlilanka tapaxkit kinkakgalhiniyan. Komo naʼanaw tlakg natalakatsuwiniyaw.

¹⁴ Wa Jesús tiku pulalin congregación. Xla wa: «Anta ntani wilakgo chatuy, su kgalhtutu ntastokgkgonit kkintukuwini, anta nkit kwi kxlakgstipan» (Mat. 18:20). Biblia na masiya pi Jesús «lama kxlakgstipan» congregaciones (Apoc. 1:20–2:1). Uma kilhchanima pi xla kapulalin. Wa xlakata, akxni anaw ktamakxtumit, tlakg talakatsuwiniyaw Jesús. Liwana tasiya pi Jehová chu Jesús kinkatawilakgon chu kinkamatliwakglhan akxni wilaw ktamakxtumit. ¿La lakpuwana pi makgkatsi akxni fuerza tlawayaw xlakata natalakatsuwiniyaw Jehová chu xKgawasa?

15. ¿Tuku limasiyaniyaw Jehová akxni anaw ktamakxtumit?

¹⁵ Akxni anaw ktamakxtumit, limasiyaniyaw Jehová pi kgalhakgaxmatputunaw. Xla ni fuerza tlawa nakgalhakgaxmataw xlimapakgsin xlakata natamakxtumiyaw (Is. 43:23). Wa xlakata, komo kkintaskujutkan kimpuxkukan kinkaskiniyan pi lu naskujaw chu nialhla naʼanaw kputum kintamakxtumitkan, ¿tuku natlawayaw? ¿Tuku natlawayaw komo mapakgsina kinkawaniyan pi komo natamakxtumiyaw, kilixokgotkan multa, nakinkamanukanan kpulachin o atanu tuku tlakg nitlan nakinkatlawanikanan?  ¿Tuku natlawayaw komo namin kilhtamaku atanu tuku natlawaputunaw chu ni naʼanaw ktamakxtumit? Kililaksakatkan tuku natlawayaw (Hech. 5:29). Komo nakgalhakgaxmataw Jehová, chu naʼanaw ktamakxtumit nalimasiyaniyaw pi paxkiyaw chu kanajlayaw pi xla lakgchan nakinkawaniyan tuku natlawayaw (Rom. 6:17). Uma natlawa pi Jehová napaxuwa (Prov. 27:11).

16, 17. 1) ¿Tuku xlakata katsiyaw pi xapulana kstalaninanin Cristo lu xlakaskinka xʼakxilhkgo tamakxtumit? 2) ¿La xakxilha kintamakxtumitkan tala George Gangas?

¹⁶ Akxni xtitaxtunita paskua xla Pentecostés kata 33, kstalaninanin Cristo «ankgalhin tliwakglh xwilakgo kxtakanajlakan ntu xmasiyunikgoy ntalakgachanin, chu ktamakxtumit» (Hech. 2:42). Uma wamputun, chuntiya tamakxtumikgolh xlakata nakakninanikgo Jehová. Chu chuntiya tamakxtumikgolh maski xkaputsastalanikgolh mapakgsina xalak Roma chu judíos tiku xpulalinkgo takanajla. Tuwa kakitaxtunilh, pero tlawakgolh putum tuku xmatlanikgo xlakata chuntiya xtamakxtumikgolh.

¹⁷ La uku, kskujnanin Jehová na lu paxtikatsininanaw xlakata tlan tamakxtumiyaw. Kalichuwinaw xliʼakxilhtit tala George Gangas, uma tala na makgtapakgsilh Lakgkgolotsin tiku Pulalinankgo xTatayananin Jehová liwaka 22 kata. Xla wa pi lu xmakgpuwantini akxni xkatatamakxtumi xnatalan chu xpalakata xlitaxtu «pulaktum tuku tlakg xlipaxuwa kxlatamat». Akxni xmatlani, lu xlakgati pulana xchan kpukgalhtawakga chu na xaʼawatiya xtaxtu. Lu xmakgapaxuwa nakatachuwinan natalan wa xlakata wa: «Akxni akxtum kkatawi, kmakgkatsi la komo kkinchik kkatawi kifamilia, kʼakgtum paraíso xaʼespiritual». Chu na wa pi tuku tlakg xlakaskinka xakxilha wa nakatatamakxtumi xnatalan.

18. 1) ¿La akxilha kintamakxtumitkan? 2) ¿Tuku liwana lakkaxwilinita natlawaya?

¹⁸ Chu wix, ¿nachuna makgkatsiya la tala Gangas? Komo chuna, chuntiya katlawa putum tuku matlaniya xlakata akxtum nakatatawilaya minatalan ktamakxtumit, maski namin kilhtamaku tuwa nakitaxtuniyan. Kalimasiyani Jehová pi makgkatsiya la mapakgsina David, tiku wa pi lu xpaxuwa akxni xʼan niku xkakninani Jehová (Sal. 26:8).