1, 2. 1) ¿Tuku tatalakxtumi uma xalixkajni kakilhtamaku chu chixku tiku amaka makgnikan? (Kaʼakxilhti xapulana dibujo). 2) Akxni uma kakilhtamaku namalakgsputukan, ¿la namakgkatsikgo putum tiku wilakgolh kKatiyatni chu k’akgapun?

KALILAKPUWANTI uma tuku la. Anta kpulachin tlawama chatum makgnina tiku lu lixkajni likatsi chu kuenta tlawamakgolh policías tiku pixlanka wankgo: «¡Tlawama chatum chixku tiku ninita!». ¿Tuku xlakata chuna wanikgo tiku tanuma kpulachin komo staknanku chu ni tatatla? Xlakata uma chixku wanikanita pi namakgnikan chu atsinu tsankga xlakata chuna natlawakan. Xlakata uma, xtachuna la komo xninita * (kaʼakxilhti nota).

² Uma kakilhtamaku nema wilaw xtachuna la tiku manukanit kpulachin chu atsinu tsankga namakgnikan. Biblia lichuwinan pi uma kakilhtamaku natitaxtu o nalakgsputa (1 Juan 2:17). Jehová lakkaxwilinita pi nialh makgas namasputu uma kakilhtamaku chu chuna nala. Pero ni tatalakxtumi uma xlisputni uma kakilhtamaku  chu la namakgnikan uma makgnina. Max makgapitsin nalakpuwankgo pi tiku namakgnikan ni liwana lakputsananika chu ni lakaskinkgo pi chuna natlawakan (Deut. 32:4). Xlisputni uma kakilhtamaku ni katimakgapalalh. Akxni nachin, putum tiku wilakgolh k’akgapun chu kKatiyatni nawankgo pi xtakgastakyawan Jehová lu tlan. ¡Lu tlan namakgkatsikgo!

3. ¿Tuku akgtati ta’akglhuwit namasputukan akxni namin xTamapakgsin Dios?

³ ¿Tuku nialh katiʼanalh akxni uma kakilhtamaku namalakgsputukan? Putum tuku ni xatlan nema titaxtuyaw kkilatamatkan nialh makgas namasputukan. Uma tamakatsinin tatalakxtumi «yuma xatlan tamakatsinin xla tapakgsin» (Mat. 24:14). K’uma artículo nalichuwinanaw akgtati ta’akglhuwit nema nalakgsputkgo akxni namin xTamapakgsin Dios. Wa uma: latamanin tiku lixkajni likatsikgo, tiku ni xa’akgstitum tuku tlawakgo, tuku ni xa’akgstitum chu tuku ni xatlan. Akxni nalilakpuwanaw umakgolh ta’akglhuwit, nakatsiyaw la kinkamakgapatinanan, tuku natlawa Jehová xlakata nalakkaxtlawa chu tuku xlakgxokgo nawili.

4. ¿La kinkamakgapatinanan tuku tlawakgo tiku lixkajni likatsikgo?

⁴ ¿La kinkamakgapatinanan? Apóstol Pablo wa: «Xaʼawatiya kilhtamaku lu tuwa nawan». Chu nachuna wampa pi latamanin tlakg lixkajni x’amakgolh likatsikgo (2 Tim. 3:1-5, 13). ¿Xlikana pi akxilhaw la kgantaxtuma umakgolh tuku xtalichuwinanit pi x’ama la? Lhuwa akinin lipatinanaw kaj xpalakata tiku makgninanin o latamanin tiku lixkajni likatsikgo chu tiku lakgati makglhuwinan, tiku kalakgmakgankgo amakgapitsin xlakata la tasiyakgo. Makgapitsi latamanin nipara matsekgkgo tuku nitlan tlawakgo. Amakgapitsi limasiyakgo pi kamakgtayaputunkgo latamanin, pero kxtapuwankan katlawaniputunkgo tuku nitlan. Maski nina kinkatlawanikanan tuku nitlan, kinkamakgapatinanan tuku nitlan tlawakgo latamanin. ¿Ni xlikana pi nitlan limakgkatsiyaw tuku nitlan katlawanikan laktsu kamanan, tiku linkgoya kata chu tiku nila x’akstukan tamakgtayakgo? Wilakgolh latamanin tiku likatsikgo la animales o asta la demonios (Sant. 3:15). Pero Biblia kinkamaxkiyan takgalhkgalhin.

5. 1) ¿Tuku talakgpalit kgalhikgo latamanin tiku nitlan likatsikgo? 2) ¿Tuku naka’akgspula latamanin tiku ni talakgpaliputunkgo?

⁵ ¿Tuku natlawa Jehová? La uku, Jehová maxki talakaskin latamanin pi nalakgpalikgo xlatamatkan tiku lixkajni likatsikgo (Is. 55:7). Maski uma kakilhtamaku nialh makgas namasputukan, latamanin tiku nitlan likatsikgo nina kalakputsananikan. Pero, ¿tuku naka’akgspula tiku ni talakgpalikgo chu tatayakgo uma kakilhtamaku asta akxni natsuku lanka takatsanajwat? Dios wanit pi nakamalakgsputu kKatiyatni (kalikgalhtawakga Salmo 37:10). Lhuwa latamanin katsinikgonit matsekgkgo tuku nitlan tlawakgo chu ankgalhin tlawakgo tuku lakaskinkgo (Job 21:7, 9). Pero Biblia kinkamalakapastakayan pi xlakgastapu Dios «akxilhma xtiji chixku, chu putum xtatukit xla akxilhma. Ni anan niku kapukswa chu nipara mastalenkg nema tlan nalitatsekgkgo tiku tlawakgo tuku ni xatlan» (Job 34:21, 22). Wa xlakata niti la natatsekgni Dios. Xla akxilha putum tuku tlawakgo tiku nitlan likatsikgo. Akxni titaxtunita nawan Armagedón, uma nialhtu wi nawan. Nikxni katika’akxilhparakgow (Sal. 37:12-15).

6. ¿Tiku nalatamakgo akxni nakamalakgsputukan latamanin tiku nitlan likatsikgo, chu tuku xlakata uma lu tlan tamakatsin?

 ⁶ ¿Tiku nalatamakgo akxni nakamalakgsputukan latamanin tiku nitlan likatsikgo? Jehová malaknu: «Tiku tlan likatsikgo wa nakamaxkikan katiyatni, chu xlikana lu lipaxuw natawilakgo». Chu na wampara: «Tiku xa’akgstitum xlakan nawan katiyatni, chu putum kilhtamaku nalatamakgo anta» (Sal. 37:11, 29, SXP). ¿Tiku «tlan likatsikgo» chu tiku «xa’akgstitum»? Tiku tlan likatsikgo wa tiku taktujukgo chu katsinikgo xlakata Jehová chu kgalhakgaxmatkgo. Nachuna kawanikan pi xa’akgstitum xlakata tlawaputunkgo tuku wan Dios pi tlan. Uku kkakilhtamaku, tlakg anan tiku nitlan likatsikgo nixawa tiku tlan likatsikgo. Xasasti kakilhtamaku nema Dios malaknu kaj tiku tlan likatsikgo chu xa’akgstitum wa nalatamakgo. Umakgolh akgtum paraíso natlawakgo Katiyatni.

7. ¿La kinkamakgapatinanan tuku tlawakgo mapakgsinanin tiku akgskgawinankgo la uku?

⁷ ¿La kinkalaktlawayan tuku tlawakgo mapakgsinanin tiku akgskgawinankgo? Lhuwa tuku nitlan lama kkakilhtamaku, ni xkuentajkan latamanin wata xkuentajkan mapakgsinanin tiku akgskgawinankgo. Wilakgolh takanajla nema ka’akgskgawikgo millones latamanin. Ni wankgo tuku xaxlikana xlakata Dios chu xlakata takgalhkgalhin xlakata Katiyatni chu xlakata latamanin. Nachuna masiyakgo pi nila lipawankan Biblia. Nachuna mapakgsinanin tiku akgskgawinantlajakgo, tlawakgo pi ka’analh guerra chu latlawanikan tuku nitlan kaj xlakata tanu la tasiya xcolorkan. Umakgolh mapakgsinanin nitlan kalikatsinikgo tiku nitu kgalhikgo chu nila akstu tamakgtayakgo. Nachuna, la titaxtutilha kilhtamaku tlakg lhuwa tuku kgalhikgo chu kaj makgapitsi tiku tlan kalikatsinikgo o akgskgawinantlajakgo. Wilakgolh laklanka empresas nema tlakg lhuwa tuku kgalhiputunkgo chu nitlan tuku tlawanimakgolh Katiyatni chu lakxtlawamakgolh tuku anan, xlakata lhuwa tuku nakgalhikgo. Xlikana, mapakgsinanin tiku akgskgawinankgo xkuentajkan xlakata anan lhuwa tapatin.

8. Chuna la wan Biblia, ¿tuku naka’akgspula mapakgsinanin tiku lakpuwankgo pi lu lakgtliwakga?

⁸ ¿Tuku natlawa Jehová? Lanka takatsanajwat natsuku akxni mapakgsinanin natalatlawakgo putum ni xaxlikana takanajla. Biblia limapakuwi la chatum tiku sta xmakni nema wanikan xaLanka Babilonia (Rev. 17:1, 2, 16; 18:1-4). Umakgolh tamakxtumit xla takanajla namalakgsputukan putum kilhtamaku. Pero, ¿tuku naka’akgspula mapakgsinanin tiku akgskgawinankgo? Biblia wan pi uma mapakgsinanin lu lakgtliwakga, xtachuna la laklanka sipi chu la islas (kalikgalhtawakga Revelación 6:14). Pero nachuna lichuwinan pi mapakgsinanin chu tiku ni tatayakgo xTamapakgsin Dios nakamalakgsputukan. Uma nala akxni kgalhsputmaja nawan lanka takatsanajwat (Jer. 25:31-33). Nialh kati’analh mapakgsinanin tiku akgskgawinankgo.

9. ¿Tuku xlakata liwana katsiyaw pi xasasti katiyatni liwana natalakkaxtawila?

⁹ ¿Tuku xlakgxokgo natawila mapakgsinanin tiku akgskgawinankgo? ¿Natawilaku akgtum tamakxtumit kKatiyatni akxni titaxtunita nawan Armagedón? Biblia wan: «Likgalhkgalhiyaw xasasti akgapun, chu xasasti tiyat, xtachuna lantla nkinkawaninitan mpi namin ntani ntatlawa ntalulokgtat» (2 Ped. 3:13). Xamakgan akgapun wa mapakgsinanin tiku akgskgawinantlajakgo. Chu xamakgan katiyatni wa latamanin tiku ka’akgchipakgonit.  ¿Tuku xlakgxokgo natawila akxni nakamalakgsputukan? Wa «xasasti akgapun, chu xasasti tiyat». Xasasti akgapun wa xasasti mapakgsina. Uma tamapakgsin wa xTamapakgsin Dios, tiku namapakgsinan wa Jesucristo chu 144,000. Xasasti katiyatni wa latamanin tiku nakamapakgsi xTamapakgsin Dios. Jesús chu tiku natamapakgsinankgo liwana nalimasiyakgo la likatsi Jehová, tiku lakgati tuku xa’akgstitum (1 Cor. 14:33). Wa xlakata «xasasti tiyat» lu tlan la natalakkaxtawila. Lakchixkuwin tiku wi tuku nalakgatayakgo wa tiku tlan likatsikgo chu wa nakapulalin Jesús chu 144,000 (Sal. 45:16). Kalilakapastakwi la nawan latamat akxni nialh kati’analh mapakgsinanin tiku akgskgawinankgo. Uma kaj akgtum tamakxtumit nema akxtum natawila chu nikxni kati’akgskgawinankgolh.

10. 1) ¿Tuku nitlan talhuwinit niku wila? 2) ¿La laktlawayan tuku nitlan wix chu mi familia?

¹⁰ ¿La kinkalaktlawayan tuku nitlan? Lamaw niku anan lhuwa talakgalhin xlakata talakgxtumit nema ni xlitatlawat, tuku ni xa’akgstitum chu lu lakluku la likatsikgo. Uma kakilhtamaku tuku lilakgastanankgo tlawa pi tlan katasiyalh, chu uma tlawa pi nalakxtlawakgo xlimapakgsin Jehová xlakata tuku tlan chu tuku nitlan (Is. 5:20). Chu natlatni xliskujatkan xlakata nakuentajtlawakgo xkamanankan xlakata ni nakapasa tuku nixatlan. Xlikana, putum kstalaninanin Cristo kiliskujatkan xlakata nakuentajtlawayaw la talalinaw Jehová k’uma kakilhtamaku niku ni kgalhakgaxmatkan xlimapakgsin Dios.

11. ¿Tuku katsiniyaw xlakata tuku tlawalh Jehová anta kSodoma chu kGomorra?

¹¹ ¿Tuku natlawa Jehová? Kalilakapastakwi tuku tlawalh Jehová akxni akxilhli tuku nitlan xlama kSodoma chu kGomorra (kalikgalhtawakga 2 Pedro 2:6-8). Lot chatum chixku tiku tlan xlikatsi, xla chu familia xlipatinankgo xlakata tuku nitlan xtlawakgo latamanin. Dios malakgsputulh putum ama kachikinin xlakata x’anan tuku nitlan. Pero nachuna tlawalh xlakata kaj «xali’ukxilhtit litlawanikgolh» wa tuku aku namin, kamasiyanima tiku nitlan likatsikgo xlakata nakatsikgo tuku nakalakgmin. Chuna la Jehová masputulh talismanin xlakata talakgxtumit nema ni xlitatlawat xalamakgasa, nachuna natlawa la uku akxni namin malakgsputu uma lixkajni kakilhtamaku.

12. ¿Tuku wix natlawaputuna akxni nialh katiʼanalh tuku nixatlan?

¹² ¿Tuku xlakgxokgo nawan tuku nitlan? Anta kParaíso lhuwa tuku xatlan natlawayaw. Akgtum li’akxilhtit, natlawayaw pi Katiyatni akgtum paraíso nawan chu nakaxtlawayaw chiki niku natawilayaw chu xla kifamiliajkan. Chu nakamakgamakglhtinanaw lhuwa millones tiku nalakastakwanankgo chu nakamasiyaniyaw xlakata Jehová chu putum tuku tlawanit (Is. 65:21, 22; Hech. 24:15). Lhuwa tuku natlawayaw nema nakinkamakgapaxuwayan chu namalanki Jehová.

13. ¿Tuku nitlan kitaxtunit xlakata talakatakin nema lalh anta kjardín xa’Edén?

¹³ ¿La kinkalaktlawayan? La uku lu nitlan la wilaw xlakata tiku nitlan likatsikgo chu xlakata mapakgsinanin tiku akgskgawinankgo. Kimputumkan kinkalaktlawayan ta’akglhuwit la guerra, talimaxkget, talaksakpaxkit, tajatat o linin. Uma ta’akglhuwit lakatsukulh xlakata Satanás, Adán chu Eva talalakatawakakgolh Jehová. Chu kimputumkan lipatinanaw xlakata lakatakinankgolh.

14. ¿Tuku natlawa Jehová xlakata tuku nitlan wi kkakilhtamaku?

 ¹⁴ ¿Tuku natlawa Jehová? Kalilakpuwaw makgapitsi tuku Jehová malaknu xlakata namasputu tuku nitlan anan kkakilhtamaku. Namasputu guerras (kalikgalhtawakga Salmo 46:8, 9). Namasputu tajatat (Is. 33:24). Putum kilhtamaku namasputu linin (Is. 25:8). Chu namasputu talimaxkget (Sal. 72:12-16). Jehová namasputu putum tuku kinkamakgapatinanan. Asta namasputu tuku nitlan tlawama Satanás chu x’demonios (Efes. 2:2).

15. ¿Tuku ni katiʼanalh akxni titaxtunita nawan Armagedón?

¹⁵ Kalilakpuwanti la nalatamayaw kkakilhtamaku niku nialh kati’analh guerras, tajatat nipara linin. Ni katiʼanalh soldados, tuku limakgninankan nipara tuku na kalilakapastakkan tiku nikgo k’guerras. Ni katilakaskiw hospitales, makuchinanin, niku kawilikan tiku nikgonita chu nipara niku kamaknukan ninin. Chu komo ni kati’analh tiku lixkajni likatsikgo, ni katitalakaskilh policías, nipara alarmas nema makatsininan pi wi lama. Max ni katimaklakaskiw tuku nalimalakchuwakan malakcha. Putum tuku kinkamakgapatinan namasputukan.

16, 17. 1) ¿La namakgkatsikgo tiku lamakgolhku nawan akxni natitaxtu Armagedón? Kawili akgtum li’akxilhtit. 2) ¿Tuku natlawayaw xlakata nalakgtaxtuyaw k’uma kakilhtamaku?

¹⁶ ¿La namakgkatsiyaw akxni nialh tu kintikamakgapatinan? Lu tuwa lilakpuwankan. Lhuwa kilhtamaku nitlan la latamanitaw max ni kuenta tlawanitaw la kinkamakgapatinanan. Akgtum li’akxilhtit, max latamanin tiku lakatsu wilakgolh kcarretera lismanikgonit la makasanankgo putlaw. Chu latamanin tiku lakatsu wilakgolh niku makgankan basura max lismanikgonit la lixkajni kakankala. Pero komo la makasanan putlaw chu la kakankala niku wi basura xlakgsputli, max stlan xmakgkatsikgolh. kChuna namakgkatsiyaw akxni Jehová namasputu putum tuku nitlan kinkamakgapatinanan.

¹⁷ ¿Tuku xlakgxokgo natawila tapatin nema wi la uku? Salmo 37:11 wan pi kilhtamaku nema aku mima «xlikana lu lipaxuw natawilakgo». ¿Ni xlikana pi lipaxuwayaw akxni katsiyaw pi Jehová wa uma tuku lakaskin kimpalakatakan? Uma katuwa wilaw, katlawaw tuku matlaniyaw xlakata lakatsu natawilaniyaw Jehová chu xkachikin. Takgalhkgalhin nema kgalhiyaw xlakata kilhtamaku nema aku mima lu xlakaskinka, wa xlakata chuntiya kalilakpuwaw. Ka’akxilhwi la komo xlikana wi, chu kalixakgatlikgow amakgapitsin (1 Tim. 4:15, 16; 1 Ped. 3:15). Komo chuna natlawayaw, nalakgtaxtuyaw k’uma xakalixkajni kakilhtamaku chu putum kilhtamaku napaxuwayaw.