1, 2. 1) ¿Tuku wankgolh Elifaz chu Bildad xlakata la lakpuwan Dios akxni skujnaniyaw? 2) ¿Tuku wa Jehová xlakata tuku wankgolh uma lakchixkuwin?

MAKGASATA kilhtamaku, kgalhtutu lakchixkuwin kitachuwinankgolh chatum chixku tiku ni xmakgxtakga Dios xwanikan Job. Chatum xwanikan Elifaz. Xla tlawanilh Job umakgolh xlakaskinka takgalhskinin: «¿Tlan chatum chixku naskujnani Dios, chu xlakata putum tiku kgalhi liskgalala tlan naskujnani? ¿Tlan lipaxuwa tiku kgalhi xliputum litliwakga pi wix xaʼakgstitum, o xlakata natlawaya tuku tlan anta kmintiji?» (Job 22:1-3). Elifaz liwana xkatsi pi ni chuna. Chu achatum chixku tiku na tachuwinalh Job wanikan Bildad. Xla wanilh Job pi Dios nila akgstitum kali’akxilha latamanin (kalikgalhtawakga Job 25:4).

² Elifaz chu Bildad xtlawaputunkgo pi Job xlakpuwa pi lata kskujnanima Dios nitu xlitaxtu. Xtlawaputunkgo pi xkanajlalh pi kxlakatin Dios nitu litaxtuyaw kaj xtachuna la tantum aktsu luwa (Job 4:19; 25:6). Max tlan xlakpuwaw pi ni laktlankajwa xkamakgkatsikan umakgolh lakchixkuwin (Job 22:29).  Xlikana pi akinin laktsu tasiyayaw kxlakatin Jehová xlakata xla tlakg lanka. Akxni lakaminachaw kx’okgspun sipi o k’akgtum ventana xla avión, akxilhaw pi akinin laktsu chu nitu litaxtuyaw. Pero, ¿chuna akxilha Jehová putum tuku tlawayaw xlakata naskujnaniyaw chu xlakata tatayayaw xTamapakgsin? Nichuna. Jehová kawanilh Elifaz, Bildad chu Zofar pi tuku xwankgonit kaj ta’akgsanin. Alistalh Dios wa pi xlipaxuwa pi Job kskujnanilh chu limapakuwilh «kiskujni» (Job 42:7, 8). Wa xlakata tlan nawanaw pi latamanin tlan skujnaniyaw Dios maski makglakgalhinanin akinin.

3. ¿Tuku wa Elihú xlakata la skujnaniyaw Dios, chu tuku xwamputun?

³ Chatum kgawasa wanikan Elihú xkgaxmatma tuku xlichuwinamakgo Job chu kgalhtutu lakchixkuwin. Akxni masputukgolh xtakgalhchuwinkan, Elihú kgalhskilh Job xlakata Jehová: «Komo xlikana katsiya, ¿tuku maxkiya, o tuku makglhtinan kmimakan mimpalakata?» (Job 35:7). ¿Xwamputun Elihú pi putum tuku tlawayaw xlakata naskujnaniyaw Dios nitu litaxtu? Ni. Jehová ni stakyawalh Elihú, la komo ama kgalhtutu lakchixkuwin. Tuku xwamputun Elihú wa pi Jehová ni maklakaskin pi nakakninaniyaw. Xlikana, xla nitu maklakaskin kimpalakatakan. Putum tuku natlawayaw, nila katitlawalh pi tlakg lhuwa tuku nakgalhi chu nipara tlakg tliwakga nawan. Nachuna, putum lakwan tayat nema kgalhiyaw chu tuku matlaniyaw wa Dios kinkamaxkin, chu xla akxilha la limaklakaskinaw.

4. ¿La makgkatsi Jehová akxni tlawayaw tuku tlan xpalakata amakgapitsin?

⁴ Akxni kalimasiyaniyaw tapaxkit nema ni makgxtakgnan xlakskujnin Jehová, xla kuentajtlawa. Xla akxilha tuku tlawayaw xpalakata xlakskujni xtachuna la wa tlawanimaw. Proverbios 19:17 wan: «Wantiku makgtaya tiku nitu kgalhi, masakwanima Jehová, chu Wa nalakgxokgoni». Akxni kalimasiyaniyaw talakgalhaman amakgapitsin, Jehová akxilha. Maski xla xMalakatsukina tuku anan, makgkatsi pi kalaklini latamanin tiku tlan kalikatsinikgo amakgapitsin, chu kinkalixokgoniyan lhuwa tasikulunalin. Wa xKgawasa Dios kinkamasiyanin pi chuna (kalikgalhtawakga Lucas 14:13, 14).

5. ¿Tuku takgalhskinin nakgalhtiyaw?

⁵ Makgasa kilhtamaku, Jehová wanilh palakachuwina Isaías pi xlichuwinalh xtukuwani (Is. 6:8-10). Xla tapaxuwan makgamakglhtinalh chu wa: «¡Unu kwi! Akit kakimalakgacha». La uku, Jehová kamaxki talakaskin kskujnin tiku ni makgxtakgkgo pi akxtum kataskujkgolh. Lhuwa latamanin nachuna limasiyakgo tayat la Isaías. Skujnaniputunkgo Jehová, kaj xanikuta niku nakawanikan chu maski lu tuwa. Pero max wi tiku lakpuwanitaw uma: «Kpaxtikatsini  Jehová xlakata kimaxki talakaskin nakskujnani. Pero, ¿xlikana xlakaskinka tuku akit naktlawa? ¿Ni katitlawalh Jehová uma taskujut maski ni nakskujnani?». Kakgalhtiw umakgolh takgalhskinin xlakata tuku ka’akgspulalh chatiy xlakskujnin Jehová xala makgasa tiku xkawanikan Débora chu Barac.

6. ¿Tuku xlakata xsoldados Jabín xtasiya pi tlan xʼakgchipakgolh israelitas?

⁶ Barac chatum xpulalina soldado xwanit xalak Israel, chu Débora palakachuwina xwanit. Liwaka akgpuxam kata, israelitas lu kamakgapatinalh chatum mapakgsina tiku xwanikan Jabín. Xsoldados Jabín lu lakluku xwankgonit chu nitlan xkalikatsinikgo israelitas, tiku xlamakgo klaktsu kachikinin chu ni xtaxtukgo kxchikkan. Xsoldados Jabín xkgalhikgo 900 putlaw xla guerra nema xkgalhikgo hoces xla likan. Pero israelitas ni xkgalhikgo tuku xlitalatlawanankgolh o xlitamakgtayakgolh (Juec. 4:1-3, 13; 5:6-8) * (kaʼakxilhti nota).

7, 8. 1) ¿Tuku xapulana tastakyaw maxkilh Jehová Barac? 2) ¿La makgatlajakgolh israelitas ksoldados Jabín? (Kaʼakxilhti xapulana dibujo).

⁷ Xsoldados Jabín lu lakgtliwakga xtasiyakgo, pero israelitas ni lakgtliwakga xtasiyakgo chu kaj lakapala xka’akgchipaka. Jehová maklakaskilh palakachuwina Débora, xlakata nawani Barac tuku natlawa: «Kapit ksipi Tabor, chu kalipi 10,000 lakchixkuwin xla xkamanan Neftalí chu xla xkamanan Zabulón. Chu nakliminiyan niku xakaxtum kCisón, Sísara xapuxku ksoldados Jabín, chu putlaw nema linkan k’guerra chu latamanin, xlikana nakmakamaxkiyan kmimakan» (Juec. 4:4-7).

⁸ Makatsininanka, chu 10,000 lakchixkuwin tiku xʼamputunkgo tamakxtumikgolh ksipi Tabor (kalikgalhtawakga Jueces 4:14-16). ¿Kamakgtayalh Jehová israelitas? Chuna. Lu lanka sen milh chu kaputlunin wa niku xlama guerra. Uma kamakgtayalh israelitas. Barac makgat kaputsastalanilh ksoldados Sísara liwaka 24 kilómetros asta chankgolh kachikin niku wanikan Haróset. Max anta ktiji, xputlaw Sísara lakgtsankgatayalh kkaputlunin. Taxtulh chu lakapala alh kZaananim, niku max lakatsu xwi kachikin Quedes. Anta Sísara alh tatsekga kxchik chatum puskat xwanikan Jael. Sísara lu xtlakgwanit chu lhtatalh. Akxni klhtatama, Jael ni pekualh chu makgnilh (Juec. 4:17-21). ¡Jehová kamakgatlajalh xtalatlawananin israelitas! * (kaʼakxilhti nota).

9. ¿Tuku katsiniyaw kJueces 5:20, 21 xlakata guerra nema tatlawaka Sísara?

⁹ Tlakg kakatsiniw tuku lalh xlakata tuku lichuwinan Jueces kcapítulo 4 chu 5. Jueces 5:20, 21 wan: «Lata k’akgapun staku talachipakgolh Sísara, chuna, lata niku liwana kalakkaxwilikanit talatlawakgolh. Tlanka chuchut nema minacha kCisón kalilh». ¿Wamputun pi ángeles makgtayakgolh Israel xlakata tlan natlajanankgo, o wamputun pi taktakgolh staku? Biblia  ni kinkawaniyan. Tlan nalakpuwanaw pi wa Jehová tiku kalakgmaxtulh xkachikin chu tlawalh pi lhuwa ksenalh ama kilhtamaku xlakata 900 xputlawkan nema xlitlawakgo guerra nila lakapala xtasuwikgolh. Ni chatum lata 10,000, tlan xwa pi kaj xlakata xlakan xtlajanankgonit. Anta kJueces 4:14, 15 makgtutu wan pi wa Jehová tiku kamakgtayalh israelitas natlajanankgo.

10, 11. 1) ¿Tiku Meroz? 2) ¿Tuku xlakata limawakaka tuku nitlan?

¹⁰ Kalichuwinaw tuku lu xlakaskinka. Akxni israelitas tlajanankgolh, Débora chu Barac kilhtlinikgolh Jehová. Kilhtlikgolh: «Lu nitlan tuku kalimawakaka Meroz, chuna wa x’ángel Jehová, lu nitlan tuku kakalimawakatit latamanin, xlakata ni putsakgolh xtamakgtay Jehová, xlakata xlitamakgtayakgolh Jehová chu tiku kgalhikgo litliwakga» (Juec. 5:23).

¹¹ ¿Tuku wamputun Meroz? Ni liwana katsiyaw. Max xlakata tuku nitlan limawakaka, Meroz putuminika lakgsputli. Max Meroz akgtum kachikin xwanit chu latamanin ni tatayakgolh Barac akxni tlawalh guerra. Xlakata 10,000 tiku xatapaxuwan x’amakgolh katatlawakgo guerra cananeos, uma wamputun pi latamanin tiku xkatapakgsini Meroz kgaxmatkgolh akxni skinkgolh tamakgtay. O max Meroz akgtum kachikin anta niku alh Sísara akxni xtsalanima Barac. Max latamanin xalak Meroz tlan xchipakgolh Sísara pero nichuna tlawakgolh. Kalilakpuwanti la latamanin x’akxilhmakgolh la xtsalama Sísara xlakata xlatamat. Tlan wi tuku xtlawakgolh xlakata xtatayakgolh Jehová. Komo chuna xtitlawakgolh, xtimakglhtinankgolh tasikulunalin. Akxni xlakan wi tuku tlan xtlawakgolh xpalakata Jehová, ni chuna tlawakgolh. Max latamanin xalak Meroz ni chuna xlikatsikgo la Jael, xlakata xla ni pekualh (Juec. 5:24-27).

12. 1) ¿Tuku ni xtatalakxtumi la xlikatsikgo latamanin nema talichuwinan kJueces 5:9, 10? 2) ¿La kinkamakgtayayan uma?

¹² Anta kJueces 5:9, 10 akxilhaw pi 10,000 tiku xatapaxuwan x’ankgonit ni xtatalakxtumikgo tiku ni chuna tlawakgolh. Débora chu Barac kamakgpuwantinikgolh «tiku pulalinkgo soldados k’Israel, wantiku xatapaxuwan tamastanikgolh kachikin». Ni xtatalakxtumikgo “tiku xkgetawilakgo asnas nema xakgaspininijwa chu smukukujwa”, nema laktlankajwa xkamakgkatsikan chu ni xmakgtayanamputunkgo. Biblia wan pi umakgolh latamanin katamalakxtumikan xtachuna la tiku xtawilakgo «kxalakswan likatlapan» chu “tiku lamakgolh kkatijin”. Uma wamputun, xlipaxuwakgo lu tlan latamat. Wata ni xtachuna tiku xatapaxuwan makgtayakgolh Barac xlakata ta’ankgolh k’guerra ksipi Tabor chu kxakaxtum kCisón. Tiku ni amputunkgolh kawanika: «¡Kalilakpuwantit!». Xlikgaxmatatkan chu xlilakpuwankgolh tuku tasikulunalin xmakglhtinankgolh komo xtapaxuwan xmakgtayakgolh Jehová. La uku nachuna  akinin kililakpuwanatkan la akxilhaw xtaskujut Jehová.

13. ¿La xlakpuwankgo xtribus Rubén, Dan chu Aser chu ni chuna la Zabulón chu Neftalí?

¹³ Umakgolh 10,000 tiku xatapaxuwan makgtayanankgolh xlakan tlan akxilhkgolh Jehová pi wa Lanka Mapakgsina. Tlan xlitachuwinankgolh amakgapitsin «tuku xa’akgstitum nema tlawa Jehová» (Juec. 5:11). Pero, xtribus Rubén, Dan chu Aser tlakg xlilakgaputsakgo tuku lhuwa xtapalh xkgalhikgo la xborregoskan, xbarcoskan chu anta niku xchinkgo barcos, chu ni wa makgtayakgolh xtaskujut Jehová (Juec. 5:15-17). Pero, ni putum tribus xla Israel chuna xwankgonit. Xtribus Zabulón chu Neftalí «lakgmakgalh xlatamat asta kalinin» xlakata namakgtayakgo Débora chu Barac (Juec. 5:18). Wi tuku lu xlakaskinka kinkamasiyaniyan xlakata tuku tanu tanu tlawakgolh israelitas akxni xtalakaskin xmakgtayanankgolh.

14. ¿La limasiyayaw pi tatayayaw Jehová la uku?

¹⁴ La uku, ni tlawayaw guerra xlakata natatayayaw Jehová. Wata makgtayananaw natalichuwinan Dios chu ni pekuanaw. La uku tlakg talakaskin tiku xatapaxuwan naskujnanikgo Jehová. Millones natalan, lakpuskatin, lakchixkuwin chu kamanan, makgtayanankgo xlakata natalichuwinan Dios. Akgtum li’akxilhtit, lhuwa tiku precursores, skujkgo kBetel, makgtlawakgo Pukgalhtawakga, o xtapaxuwan makgtayanankgo klaklanka tamakxtumit. Makgapitsi lakgkgolotsin kamakgtayakgo Comités de Enlace con los Hospitales chu lakkaxwilikgo laklanka tamakxtumit. Liwana katsiyaw pi Jehová xlakaskinka akxilha kintaskujutkan chu ankgalhin nalakapastaka (Heb. 6:10).

15. ¿La tlan nakatsiyaw pi nitu taxlajwanima la lakskujnaniyaw Jehová?

¹⁵ Kililakpuwanatkan la akxilhaw xatapaxuwan  makgtayanankan. Tlan natakgalhskinaw: «¿Kmasta talakaskin pi amakgapitsin tlakg natlawakgo taskujut? ¿Tlakg klilakgaputsa lhuwa tuku nakkgalhi nixawa nakskujnani Jehová? O ¿nachuna ktlawama la xli’akxilhtit Barac, Débora, Jael chu 10,000 tiku xatapaxuwan makgtayanankgolh, akxni naklimaklakaskin tuku kkgalhi xlakata nakskujnani Jehová? ¿Klakapastakma nakan atanu kachikin o país xlakata tlakg naktlaja tumin chu tlakg tlan naktawila? Komo chuna klakpuwama, ¿ktlawaninita oración Jehová xlakata tuku klaksaknit naktlawa chu la nakalaktlawa kifamilia chu congregación?» * (kaʼakxilhti nota).

16. Maski Jehová putum kgalhi, ¿tuku tlan namaxkiyaw?

¹⁶ Jehová kinkamaxkiman talakaskin pi namakgtayananaw kxTamapakgsin. Lata kxkilhtamaku Adán chu Eva, Satanás lakaskin pi latamanin ni natatayakgo Jehová. Pero akxni tatayayaw xTamapakgsin Jehová, limasiyaniyaw Satanás pi wa Jehová tatayayaw. Takanajla nema kgalhiniyaw kinkamakgpuwantiniyan xlakata tlakg naskujnaniyaw Jehová. Uma lu makgapaxuwa Jehová (Prov. 23:15, 16). Dios tlan nalimaklakaskin xlakata ni makgxtakgaw chu kgalhakgaxmataw xlakata nalikgalhti Satanás (Prov. 27:11). Komo nakgalhakgaxmataw Jehová, uma lu lhuwa xtapalh akxilha chu lu makgapaxuwa.

17. ¿Tuku kinkamasiyaniyan Jueces 5:31 xlakata tuku nala kilhtamaku nema aku mima?

¹⁷ Nialh makgas kKatiyatni putum latamanin nalakaskinkgo xTamapakgsin Jehová. Xlikana pi lakaskinaw pi kamilh uma kilhtamaku. Makgkatsiyaw chuna la Débora chu Barac, tiku kilhtlikgolh: «Kalakgsputli putum mintalatlawananin, oh Jehová, chu tiku paxkikgoyan xtachuna kawa la akxni chichini tliwakga makgxkgakganan» (Juec. 5:31). Uma chuna nala akxni Jehová namalakgsputu xalixkajni xkakilhtamaku Satanás. Akxni natsuku Armagedón, Jehová ni kintikaskinin pi namakgtayayaw akxni namalakgsputu xtalatlawananin. Wata kinkawanikanan: «Kaks katayatit chu ka’akxilhtit la Jehová nakalakgmaxtuyan» (2 Crón. 20:17). Pero la uku kgalhiyaw talakgalhaman natatayayaw xTamapakgsin Jehová xliputum kinakujkan chu ni napekuanaw.

18. ¿La kamakgtaya amakgapitsin pi akinin xatapaxuwan makgtayananaw?

¹⁸ Akxni tlawakgolh guerra, Débora chu Barac, wa kilhtlinikgolh Jehová xlakata kamakgtayalh chu ni wa latamanin. Wankgolh: «Xlakata xatapaxuwan makgtayanankgolh kachikin, katamalankilh Jehová» (Juec. 5:1, 2). Nachuna, akxni naskujnaniyaw Jehová lakaskinaw pi amakgapitsin kalitamakgtayakgolh chu chuna namalankikgo Jehová.