1. ¿La kamaxkilh Jehová takgpuwantin chu takgalhkgalhin xkamanan Adán?

LATA akxni latamanin kgalhikgolh talakgalhin, Jehová limasiyanit pi xla chatum Dios tiku makgpuwantininan. Akxni makglakgalhinankgolh Adán chu Eva, Jehová wi tuku lichuwinalh nema akxni x’akgatekgsnikgolh xkamakgpuwantinilh chu xkamaxkilh takgalhkgalhin xkamanan Adán. Uma tuku lichuwinanka tatekgsa k’Génesis 3:15, niku lichuwinan pi namalakgsputu Satanás chu putum tuku nitlan tlawanit (1 Juan 3:8; Rev. 12:9).

2. ¿La makgpuwantinilh Jehová Noé?

² Noé xlama kkakilhtamaku niku latamanin ni xkgalhakgaxmatkgo Dios chu kajwatiya xfamilia tiku xkakninanikgo Jehová. Akxni akxilhli pi kaniwa niku xlama talachipat chu talakgxtumit xalimaxana, max xlakpuwa pi nialhla tuku xtlawaka  kxpalakatakan latamanin (Gén. 6:4, 5, 11; Jud. 6). Pero Jehová maxkilh litliwakga nema xmaklakaskin xlakata chuntiya ni namakgxtakga (Gén. 6:9). Wanilh pi x’ama masputu ama nixatlan kakilhtamaku, nachuna wanilh tuku xlitlawat xwanit xlakata xfamilia xlakgtaxtulh (Gén. 6:13-18). Uma max lu makgpuwantinilh.

3. ¿La makgpuwantinilh Jehová Josué? (Kaʼakxilhti xapulana dibujo).

³ Makgapitsi kata alistalh, Josué lakgayawaka taskujut xlakata nakamakgtaya israelitas natanukgoyacha kKatiyatni nema xkamalaknunikanit. Xlakata tlan chuna xtlawalh, xtalakaskin nakatalatlawa lakgtliwakga soldados tiku anta lakatsu xlamakgolh. Josué xpekuama chu Jehová xkatsi tuku xlakata. Wa xlakata malakgachalh Moisés xlakata namakgpuwantini. Wanilh: «Chu kalakgayawa Josué chu kamakgpuwantini chu kamatliwakglhti, xlakata wa tiku namapatakutni uma kachikin chu wa tiku natlawa pi uma kachikin namakglhtinan tiyat nema naʼakxilha» (Deut. 3:28). Nachuna Jehová makgpuwantinilh Josué akxni wanilh uma tachuwin: «¿Ni kmapakgsinitan akit? Ni nataxlajwaniya chu tliwakga kawanti. Ni lhpipakg kalat chu ni kapekuanti, xlakata Jehová miDios tawilan anta niku napina» (Jos. 1:1, 9).

4, 5. 1) ¿La kamakgpuwantinilh Jehová xkachikin xala makgasa? 2) ¿La makgpuwantinilh Jehová xKgawasa?

⁴ Jehová ni kaj makgapitsi xlakskujnin kamakgpuwantinilh, wata putum tiku anta xwilakgo. Akgtum li’akxilhtit, xlakata xkatsi pi judíos x’amakgolh lakaskinkgo takgtsiyajni akxni xkachilinka kBabilonia, kawanilh uma tachuwin: «Ni kapekuanti, xlakata akit ktawilan. Ni anu anu kalakapi, xlakata akit mi Dios. Xlikana akit nakmatliwakglhan. Lu xlikana akit nakmakgtayayan. Chuna, lu xlikana akit naklimatliwakglhan kimpakgastakat xla xaʼakgstitum» (Is. 41:10). Xapulana kstalaninanin Cristo nachuna ni xpekuankgo chu nachuna akinin la uku (kalikgalhtawakga 2 Corintios 1:3, 4).

⁵ Jehová nachuna makgpuwantinilh xKgawasa, Jesús. Akxni tamunulh, kgaxmatli akgtum tachuwin k’akgapun: «Wa yuma nkinkam nti lu[...] kpaxkiy, wa nti lu[...] klimakgapaxuwakan» (Mat. 3:17). Xlikana pi umakgolh tachuwin lu matliwakglhi akxni xlichuwinan xTachuwin xTlat.

6. ¿Tuku kinkamakgpuwantiniyan natlawayaw parábola xla talentos?

⁶ Jesús tlawalh chuna la xTlat. Ka’akxilhwi akgtum li’akxilhtit. Anta kxparábola xla talentos, kamakgpuwantinilh kstalaninanin chuntiya naskujnanikgo Jehová chu ni namakgxtakgkgo. Uma tuku lichuwinalh, malana wanilh chatunu xatalipaw xlakskujnin: «Lu[...] tlan, tlan skujni; makgantaxtinita mintaskujut. Kaj tsinu ntaskujut kmaxkin, na masputu, wampi tlakg lhuwa nchu ntu nakliyawayan; na katapaxuwa nchu mimalana» (Mat. 25:21, 23).

7. 1) ¿La kamakgpuwantinilh Jesús x’apóstoles? 2) ¿La makgpuwantinilh Pedro?

⁷ Jesús ankgalhin kamakgpuwantinilh x’apóstoles maski akxni wi tuku nitlan xtlawakgo. Akgtum li’akxilhtit, xlalimakglhuwikgo tiku tlakg xlakaskinka xlitaxtu. Pero Jesús tapaxuwan xkamalakapastaka pi nataktujukgo chu la komo lakskujnin nalitaxtukgo xchatunukan, chu ni napuxkun nalitaxtukgo (Luc. 22:24-26). Pedro makglhuwa makgalipuwa Jesús (Mat. 16:21-23; 26:31-35, 75). Pero Jesús ni lakgmakgalh, wata makgpuwantinilh chu nachuna wanilh pi xkamakgpuwantinilh xnatalan (Juan 21:16).

8. ¿Tuku kawanilh Ezequías xnapuxkun soldados chu amakgapitsi latamanin xlakata nakamakgpuwantini?

⁸ Akxni nina xmin Jesús kKatiyatni chu xmastalh akgtum tlan li’akxilhtit, xlakskujnin Dios xkatsikgoya pi lu xlakaskinka nakamakgpuwantinikan amakgapitsin. Ka’akxilhwi tuku tlawalh mapakgsina Ezequías. Akxni asirios xkamakgapekuamakgo judíos, kamamakxtumilh xnapuxkun soldados chu amakgapitsi latamanin chu kawanilh tachuwin nema kamakgpuwantinilh (kalikgalhtawakga 2 Crónicas 32:6-8).

9. ¿Tuku tlan nakatsiniyaw xlakata Job akxni namastayaw takgpuwantin?

⁹ Kalichuwinaw tuku titaxtulh Job. Xla lu xlipuwan, pero tiku xmakgpuwantiniputunkgo kaj makgalipuwankgolh xlakata nitlan tachuwin wanikgolh. Maski chuna, xla kamasiyanilh la nakamakgpuwantinikgo amakgapitsin. Kawanilh pi komo chuna xtatakgskgolh tuku xtitaxtuma, xla xkamakgpuwantinilh chu tlan xkamamakgkatsinilh (Job 16:1-5). Alistalh wa Elihú chu Jehová tiku makgpuwantinikgolh Job (Job 33:24, 25; 36:1, 11; 42:7, 10).

10, 11. 1) ¿Tuku xlakata xtalakaskin namakgpuwantinikan xtsumat Jefté? 2) ¿Tiku na talakaskin nakamakgpuwantiniyaw chu nakawaniyaw lakwan tachuwin la uku?

¹⁰ Xtsumat Jefté na xlakaskin namaxkikan takgpuwantin. Uma juez x’ama katalatlawa ammonitas. Malaknunilh Jehová pi komo xmaxkilh talakaskin natlajanan, tiku pulana xmakgamakglhtinalh akxni xkitaspitli x’ama lakskuja ktabernáculo. Chuna, tiku pulana taxtucha akxni taspitli wa xtsumat. Jefté lu lilipuwa xlakata ni xkgalhi atanu kamanan. Pero makgantaxtilh xtachuwin chu malakgachalh xtsumat kSiló xlakata nalakskuja ktabernáculo xliputum xlatamat (Juec. 11:30-35).

¹¹ Uma lu tuwa makgkatsilh Jefté, pero xtsumat max tlakg tuwa makgkatsilh. Maski chuna, xla tlawalh tuku xtlat xmalaknunit (Juec. 11:36, 37). Nila x’ama tamakgaxtokga, ni kgalhilh kamanan chu x’ama lakgsputa xtukuwani chu tuku xkgalhi xtlat. Xlikana pi lu xtalakaskin pi xmakgpuwantinika. Biblia lichuwinan: «Chu xla xatapaxuwan alh lakskuja k’Israel: Akgatunu kata laktsuman xalak Israel x’ankgo makgpuwantinikgo xtsumat Jefté tiku galaadita, makgtati akgatunu kata» (Juec. 11:39, 40). La uku kilhtamaku, kstalaninanin Cristo tiku nina tamakgaxtokgkgo chu lilakgaputsakgo tuku xla Jehová na talakaskin nakamakgpuwantiniyaw chu nakawaniyaw lakwan tachuwin (1 Cor. 7:32-35).

12, 13. ¿La kamakgpuwantinilh Pedro xnatalan?

¹² Katsisni akxni nina xniy Jesús, wanilh apóstol Pedro: «Simón, Simón, ka’ukxilhti. Wa Satanás skinit ntalakaskin nakalaktsikiyan xtachuna lantla ntlawakan ntrigo. Wampi wix nti kpalakaskinitan kki’oración lakimpi ni namakgatsankgaya mintakanajla. Akxni nchu wix [nataspita], tliwakglh kawilikgo minatalan» (Luc. 22:31, 32).

¹³ Pedro litaxtulh la kgantum talayaw kcongregación xalak pulana siglo (Gál. 2:9). Xlakata ni pekualh anta kPentecostés chu chuntiyaku ni pekualh alistalh, uma kamakgpuwantinilh xnatalan. Akxni lhuwata kata la kskujnaninit Jehová katsokgnanilh chu kawanilh: «Wa yuma kkaliyaniyan [tatsokgni] lantla nkaj tsinu kkaxakgatlilakanachan, kkastakyawayan, chu na kkamalulokgniyan mpi wa yuma ntachuwin wa masiyukgoy ntu luwa wa xlipaxkatsinit Dios, wa nkalilatapatit» (1 Ped. 5:12). Xcarta Pedro  lu kamakgpuwantinilh natalan chuna la titaxtutilhalh kilhtamaku. Chu la uku chuntiya lakaskinaw uma takgpuwantin xlakata chuntiya kgalhkgalhimaw xtamalaknun Jehová (2 Ped. 3:13).

14, 15. ¿Tuku xlakata chuntiyaku kamakgpuwantini natalan tuku tsokgli apóstol Juan chuna la titaxtutilhanit kilhtamaku?

¹⁴ Atanu tiku na kamakgtayalh congregación xalak pulana siglo wa apóstol Juan. Xlakata lu tlan tuku tsokgwililh xlakata xtaskujut Jesús, kamakgpuwantininit lhuwa kstalaninanin chuna la titataxtutilhanit kilhtamaku asta la uku. Akgtum li’akxilhtit, evangelio nema tsokgli kaj xman anta lichuwinan pi Jesús lichuwinalh pi kstalaninanin x’amakgolh litalakgapaskgo tapaxkit (kalikgalhtawakga Juan 13:34, 35).

¹⁵ Maktutu xcarta lichuwinan lhuwa laktlan xtamasiy. Akgtum li’akxilhtit, akxni lu nitlan limakgkatsiyaw kintalakgalhinkan, ¿nixlikana pi tlan limakgkatsiyaw akxni likgalhtawakgayaw pi xkgalhni Jesús «nkinkalichakganiyan xlipaks nkintalakgalhinkan»? (1 Juan 1:7). Chu komo chuntiya nitlan limakgkatsiyaw tuku nitlan tlawanitaw, ¿nixlikana pi tlan limakgkatsiyaw akxni likgalhtawakgayaw pi tlakg «ntlanka Dios, nixawa nkintapuwankan»? (1 Juan 3:20). Kaj xman wa Juan tiku tsokgli pi «Dios tapaxkit» (1 Juan 4:8, 16). Xlipulaktiy chu xlipulaktutu xcartas, kawani lakwan tachuwin natalan tiku «stalanimakgo ntalulokgtat» (2 Juan 4; 3 Juan 3, 4).

16, 17. ¿La kamakgpuwantinilh apóstol Pablo xapulana kstalaninanin Cristo?

¹⁶ Tiku max tlakg kamakgpuwanitilh xnatalan wa Pablo. Akxni max aku xtsukumakgolh kstalaninanin Cristo, makgapitsi apóstoles anta xwilakgolh kJerusalén, niku xwilakgolh lakgkgolotsin tiku xkapulalinkgo (Hech. 8:14; 15:2). Kstalaninanin Cristo xalak Judea xkalixakgatlikgo latamanin xlakata Jesús,  xlakata talismanin nema xwi kJudea, kajwatiya xkakninanikgo chatum Dios. Pero apóstol Pablo makglhtinalh espíritu santo xlakata nakalixakgatlikgo xlakata xtachuwin Jesús latamanin tiku lhuwa dioses xkakninanikgo (Gál. 2:7-9; 1 Tim. 2:7).

¹⁷ Pablo latamalh lakgatum kachikin nema la uku wanikan Turquía, k’Italia chu Grecia chu wililh congregaciones kxlakgstipankan tiku ni judíos. Umakgolh kstalaninanin Cristo lu xtalakaskin pi xkamakgpuwantinika xlakata xkaputsastalanima «tiku xlitachikikan» (1 Tes. 2:14). Kkata 50 natalan xalak Tesalónica kamalakgachanika carta, Pablo kawanilh: «Xali’ankgalhin kmaxkiyaw mpaxkatsinit Dios xlipaks wixin mimpalakatakan, na xali’ankgalhin kkamapakuwiyan kkioracionkan. Na ni anan xtamaktat kkalakapastakan kxlakatin Dios, chu na kinTlatkan xpalakata ntu limalakastukatit mintakanajlakan, chu xpalakata ntu litlawayatit mintapaxkitkan, chu lantla ntliwakglh kgalhiyatit ntakgalhkgalhitin» (1 Tes. 1:2, 3). Nachuna kamaxkilh uma limapakgsin: «Chuntiya kalamakgtayatit minchatunukan chu kalamatliwakglhtit minchatunukan» (1 Tes. 5:11).

18. ¿Tiku kamaklakaskilh Jehová xlakata namakgpuwantinikan Felipe?

¹⁸ Kxapulana siglo, Jehová kamaklakaskilh lakgkgolotsin tiku xpulalinankgo xlakata nakamakgpuwantinikgo putum kstalaninanin Cristo, nachuna tiku xpulalinkgo congregaciones. Akxni Felipe kalixakgatlilh xlakata Jesús tiku samaritanos, lakgkgolotsin lu makgtayakgolh. Chuna, kamalakgachalh chatiy tiku xmakgpulalinankgo xlakata kskinikgolh Jehová pi tiku xalaksasti kstalaninanin Cristo xmakglhtinankgolh espíritu santo (Hech. 8:5, 14-17). Xlikana pi uma tamakgtay lu makgpuwantinilh Felipe chu tiku kstalaninanin Cristo xlitaxtukgonit.

19. ¿La makgkatsikgolh xapulana kstalaninanin Cristo akxni makglhtinankgolh xcarta lakgkgolotsin tiku xpulalinankgo?

¹⁹ Alistalh, kakgalhskinka lakgkgolotsin tiku xpulalinankgo komo tiku ni judíos xwankgonit xtalakaskin nakacircuncidarlikan, chuna la xwan xlimapakgsi Moisés xlakata tiku judíos (Hech. 15:1, 2). Umakgolh lakgkgolotsin skinikgolh Jehová x’espíritu santo, lakputsananikgolh Biblia chu alistalh lakkaxwilikgolh pi nialh xlakaskinka xwanit. Xlakata namakatsininankgo, tsokgkgolh maktum carta chu kamalakgachanikgolh congregaciones. Akxni kstalaninanin Cristo likgalhtawakgakgolh, «lipaxuwakgolh xlakata tlan kamamakgkatsinika» (Hech. 15:27-32).

20. 1) ¿La kamakgpuwantini la uku Lakgkgolotsin tiku Pulalinkgo xTatayananin Jehová natalan xlikalanka Katiyatni? 2) ¿Tuku nalichuwinanaw k’atanu artículo?

²⁰ La uku, Lakgkgolotsin tiku Pulalinkgo xTatayananin Jehová kamakgpuwantini tiku wilakgolh kBetel, tiku putum kilhtamaku skujnanimakgolh Jehová, chu putum natalan tiku xaxlikana kstalaninanin Cristo. Chuna la kxapulana siglo, putum lipaxuwayaw pi kinkamakgpuwantinikgoyan. Nachuna kkata 2015 Lakgkgolotsin tiku Pulalinkgo xTatayananin Jehová makgpitsikgolh folleto Kalakgtaspitti Jehová xlakata nakamakgpuwantinikan latamanin xlikalanka Katiyatni pi kalakgtaspitkgolh Jehová. Pero, ¿kaj xman wa umakgolh natalan tiku namakglhkatikgo Jehová chu nakamakgpuwantinikgo amakgapitsin? Nalichuwinanaw k’atanu artículo.