1-3. 1) ¿La tatekgskgo la uku putum kamanan chu tuku tlan natamalakxtumiyaw? (Kaʼakxilhti xapulana dibujo). 2) ¿Tuku tlan natlawakgo kamanan tiku kstalaninanin Cristo xlakata tlan natitaxtukgo uma taʼakglhuwit?

KALILAKPUWANTI pi makgat niku napina k’autobús xlakata wi tuku xlakaskinka nalakgpina. Pero max akxni nachipina niku taxtukgo putlaw max lilakgaputsaya la xlilhuwa autobuses chu latamanin wilakgo. Pero, wix liwana lakpuwana niku napina chu tawakaya k’autobús nema nalinan niku pimpat. Xlikana, ni katitawaka k’autobús nema lakatanu nalinan.

² Kilatamatkan xtachuna la komo wi niku amaw, chu kamanan xtachuna la latamanin tiku wilakgo niku kgalhkgalhikan autobuses. Komo lhuwa tuku talakaskin nalaksakkgo kxlatamatkan, max lakgachunin lu lilakgaputsakgo. Pero komo xlikana lilakpuwankgonit tuku tlawaputunkgo, tlakg ni tuwa nakakitaxtuni natlawakgo tuku lakpuwankgo.

³ Uma artículo nakamakgpuwantini kamanan pi kajwatiya naliskujkgo namakgapaxuwakgo Jehová. Uma kilhchanima pi nalilakpuwankgo tuku lakpuwan Jehová xlakata xlatamatkan, la komo  takgalhtawakga, taskujut chu familia. Nachuna, kilhchanima naliskujaw tlakg naskujnaniyaw Jehová. Kamanan tiku skujnanimakgo Jehová tlan liwana nakatsikgo pi nakasikulunatlawakan chu tlan nakakitaxtuni kxlatamatkan (kalikgalhtawakga Proverbios 16:3).

4. ¿Tuku nalichuwinanaw k’uma artículo?

⁴ Naliskuja xlakata tlakg naskujnaniya Jehová lu tlan tuku nalaksaka. ¿Tuku xlakata? K’uma artículo nalichuwinanaw pulaktutu. Pulaktiy nema pulana nalichuwinanaw namasiyaniyan pi komo chuna natlawaya namakgtayayan tlakg tlan natalalipina. Chu xlipulaktutu, namasiyaniyan tuku nalitamakgtayaya komo naliskuja xlakata kajku kgawasa wix.

5. ¿Kalichuwinanti pulaktum tuku xlakata tlakg naskujnaniya Jehová?

⁵ Pulaktum tuku xlakata tlakg naskujnaniya Jehová wa pi nalimasiyaniya pi lu paxtikatsiniya xtapaxkit chu putum tuku tlawanit mimpalakata. Chatum kskujni Dios tsokgli: «Oh Dios, snun tlan paxkatlikatsinikana mililanka». Chu wampa: «Xlakata lhuwa laklanka taskujut tlawanita kilakatakan. Oh Dios, snun kpaxuwa akxni klakapastaka tu tlawanita» (Sal. 92:1, 4). Kgawasa, kalilakpuwanti putum tuku Jehová maxkinitan: latamat, maxkinitan talakaskin nalakgapasa, Biblia, congregación chu akgtum tlan takgalhkgalhin. Komo pulana wiliya tuku xla mintakanajla, ni kajwatiya nalimasiyaniya Jehová pi paxtikatsiniya, wata nachuna lu tlan x’amigo nalitaxtuya.

6. 1) ¿La namakgtayayan natalalipina Jehová komo nalakkaxwiliya tlakg naskujnaniya? 2) ¿Tuku tlan naliskujkgo laktsu kamanan?

⁶ Xlipulaktiy tuku xlakata, Jehová akxilha lhuwa tuku tlan tlawaya akxni lu liskuja xlakata tlakg naskujnaniya. Chu uma namatliwakglha la talalipina. Apóstol Pablo liwana lichuwinalh uma: «Dios, makgantaxtina, na ni katipatsankgalh paks ntu ntlawanitantit, chu mintaskujutkan xla tapaxkit wa ntu wixin masiyunitantit kxtukuwini» (Heb. 6:10). Putum kamanan wi tuku tlan naliskujkgo. Kalichuwinaw umakgolh li’akxilhtit. Christine xkgalhi akgkaw kata akxni ankgalhin tsukulh likgalhtawakga biografías xla xtatayananin Jehová tiku ni makgxtakgkgo. Toby xkgalhi akgkutiy kata akxni lakpuwa pi nalikgalhtawakga maktuminika Biblia akxni la nina xtamunu. Maxim xkgalhi akgkawitu kata chu xtala Noemi akgkaw kata akxni tamunukgolh. Wa xlakata, xchatiykan tsukukgolh lilakgaputsakgo xlakata na’ankgo skujkgo kBetel. Xlakata chuntiya nalakapastakkgo, mawakakgolh kxpatsaps chiki maktum solicitud xla Betel. Chu mimpalakata, ¿tlan nalilakpuwana nema wix xlakaskinka akxilha chu naliskuja xlakata tlan nalakgchipina? (kalikgalhtawakga Filipenses 1:10, 11).

7, 8. 1) ¿Tuku xlakata nalakkaxwiliya tuku natlawaya tlakg ni tuwa namakgkatsiya nalaksaka tuku natlawaya? 2) ¿Tuku xlakata chatum tsumat laksakli ni na’an k’universidad?

⁷ Ka’akxilhwi xlipulaktutu tuku xlakata nalakkaxwiliya tuku natlawaya. Akxni kajku kgawasa wix, talakaskin nalaksaka komo tlakg nakgalhtawakgaya, niku naskuja chu atanu tuku nalilakgaputsaya. Akxni wi tuku nalaksaka xtachuna la komo nalaksaka tiji niku napina. Pero komo wix katsiya niku napina tlakg ni tuwa katimakgkatsi nalaksaka niku napina. Xtachuna la uma, komo wix liwana lakapastaknita tuku natlawaya, tlakg ni tuwa katimakgkatsi nalaksaka tuku natlawaya. Proverbios 21:5 lichuwinan, komo wi tiku liwana lakkaxwili tuku tlawa, xlikana pi tlan nakitaxtuni. Komo la uku nalakkaxwiliya tuku natlawaya chu wa tuku tlan nalaksaka natlawaya, kaj ni makgas natsukuya litamakgtayaya. Wa uma tuku titaxtulh chatum tsumat wanikan Damaris akxni wi tuku xlakaskinka xlilaksakat xwanit.

⁸ Damaris lu xkatsini akxni masputulh xtakgalhtawakga, chu malaknunika akgtum beca xlakata nakgalhtawakga k’universidad. Pero wata laksakli naskuja k’akgtum banco. ¿Tuku  xlakata? Xla lichuwinan: «Ankgalhin xaklilakpuwanit nakliskuja la precursora. Chu wa xlakata xtalakaskin nakputsa akgtum taskujut niku ni lhuwa kilhtamaku xakskujli. Komo tlakg xakkgalhtawakgalh lhuwa tumin xaktlajalh, pero max xtalakaskilh pi lhuwa kilhtamaku xakskujli». La uku, Damaris liwakaya akgpuxam kata liskujma la precursora. ¿Lakpuwan pi nitlan tuku laksakli akxni kajku tsumat xwanit? Xlikana pi ni. Lichuwinan: «Anta kbanco lakxtum kkatala tiku abogados, tiku tlawakgo tuku akit xaktlawalh komo tlakg xakkgalhtawakgalh. Pero lhuwa tiku ni lipaxuwakgo xtaskujutkan. Lu kpaxtikatsini xlakata klaksakli precursora nakwan chu la uku nitu klilakgaputsa, nachuna lu klipaxuwanit putum uma kilhtamaku xlakata kskujnanima Jehová».

9. ¿Tuku xlakata talakaskin nakawaniyaw lakwan tachuwin kamanan?

⁹ Congregaciones xlikalanka Katiyatni, wilakgolh lhuwa mil kamanan tiku talakaskin nakawaniyaw lakwan tachuwin xlakata xliputum xnakujkan skujnanimakgolh Jehová chu kajwatiya lilakgaputsakgo naskujnanikgo. Xlikana, lu lipaxuwakgo xlatamatkan. Pero nachuna katsinikgo tlawakgo tuku kinkawaniyan Jehová, la komo xlakata takgalhtawakga, taskujut chu familia. Mapakgsina Salomón mastalh tastakyaw pi xliputum kinakujkan nalipawanaw Jehová. Nachuna lichuwinalh: «Xliputum mintiji kuentajkatlawani, chu xla namatsaja mintiji» (Prov. 3:5, 6). Jehová, lhuwa xtapalh kali’akxilha kamanan tiku kstalaninanin Cristo. Xla lu kapaxki, wa xlakata kakuentajtlawa, kapulalin chu kasikulunatlawa.

10. 1) ¿Tuku xlakata nalichuwinana Dios wa uma tuku na lu xlakaskinka? 2) ¿Tuku namakgtayayan tlakg tlan nakitaxtuniyan akxni nalichuwinana Dios?

¹⁰ Komo chatum kgawasa liskujputun xlakata namakgapaxuwa Jehová, kuenta xlitlawat pi ankgalhin nalichuwinan xtachuwin Dios. Jesucristo lichuwinalh pi uma taskujut lu xlakaskinka xlitatlawat la uku: «Xapulh xlakaskinka naliʼakgchuwinanikgokan xatlan tamakatsin» (Mar. 13:10). Chuna la akxilha, nalichuwinana xtachuwin Dios wa uma tuku na lu xlakaskinka. Wa xlakata, ¿lakapastaknitata xlakata tlakg nalichuwinana Dios o naliskuja la precursor? Pero ¿tuku natlawaya komo ni lu lipaxuwaya akxni lichuwinana Dios? Chu ¿tuku namakgtayayan tlakg tlan nakitaxtuniyan akxni nalichuwinana Dios? Katlawa uma pulaktiy tuku ni lu tuwa: liwana kalakkaxwili tuku nawana chu ankgalhin kalixakgatlikgo amakgapitsi tuku katsiya. Max kaks nalilakawana akxni na’akxilha pi nalipaxuwaya.

11, 12. 1) ¿Tuku tlan natlawakgo kamanan xlakata tlan nalichuwinankgo xtakanajlakan? 2) ¿Tuku tlawalh chatum kgawasa xlakata nalichuwinan xla Jehová anta k’escuela?

¹¹ Pulana, kalilakpuwanti la nakgalhtiya akgtum takgalhskinin nema max natlawanikgoyan mincompañeros xalak escuela, la komo tuku xlakata kanajlaniya Dios. Anta ksitio jw.org limin makgpitsi tuku nakamakgtaya kamanan xlakata tlan namastakgo akgtum takgalhtin. Katanu k’sección ENSEÑANZAS BÍBLICAS > JÓVENES > PONLO POR ESCRITO. Anta natekgsa maktum kapsnat niku tlan natsokgwiliya tuku lakpuwana nema wanikan «¿Qué razones tengo para creer en Dios?». Uma kapsnat namakgtayayan nalakkaxwiliya xatakgalhtin. Nachuna, limin akgtutu texto nema tlan namaklakaskina akxni nalichuwinana: Hebreos 3:4, Romanos 1:20 chu Salmo 139:14. K’uma sección, nachuna natekgsa amakgapitsi kapsnat nema tlan nalimaklakaskina xlakata nakgalhtiya amakgapitsin takgalhskinin (kalikgalhtawakga 1 Pedro 3:15).

¹² Akxni nakgalhiya kilhtamaku, tlan nakawaniya mincompañeros pi katanukgolh kpágina xla jw.org. Wa uma tuku tlawalh Luca k’escuela akxni xlichuwinamaka makgpitsi takanajla. Xla akxilhli pi libro xlichuwinan makgpitsi tuku  ni xaxlikana xlakata xtatayananin Jehová. Maski xpekuama, skinilh talakaskin makgalhtawakgana xlakata nalichuwinan pi tuku wan libro ni xlikana. Lichuwinalh xlakata xtakanajla kxlakatin putum xcompañeros chu nachuna kamasiyanilh kisitiojkan xla Internet. Makgalhtawakgana kawanilh pi tarea nema xtlawakgolh wa x’akxilhkgolh video xla La natamakgtayaya maski ni nakgaxinana. Luca lu tlan makgkatsilh xlakata xlichuwinanit xla Jehová.

13. ¿Tuku xlakata nikxni nataxlajwaniya akxni natitaxtuya taʼakglhuwit?

¹³ Ni kataxlajwani komo max natitaxtuya taʼakglhuwit xlakata namakgantaxtiya tuku lakpuwanita. Chuntiya kaliskujti (2 Tim. 4:2). Wa uma tuku tlawalh Katharina. Akxni xkgalhi akgkutujun kata, lakpuwa pi nakalixakgatli xtachuwin Dios putum xcompañeros tiku xkataskuja. Chatum tiku xtaskuja makglhuwa nitlan tuku wanilh, pero xla ni pekualh. Xlakata tlan tayat xkgalhi atanu xcompañero tiku wanikan Hans lu kaks malakawanilh. Alistalh, Hans tsukulh likgalhtawakga kilikgalhtawakgakan, makglhtinalh akgtum takgalhtawakga xalak Biblia chu tamunulh. Katharina ni xkatsi uma xlakata lakatanu niku x’anit latama. Akgkututu kata alistalh anta xwi kPukgalhtawakga xla xtatayananin Jehová niku xwilakgo xfamilia chu kaks lilakawa akxni akxilhli pi Hans wa xʼama masta taʼakgchuwin ktamakxtumit. Uma chuna lalh xlakata nikxni pekualh la xkalixakgatli xtachuwin Dios xcompañeros.

14, 15. 1) ¿Tuku kuenta natlawaya akxni amakgapitsin namatlawiputunkgoyan tuku nitlan? 2) ¿Tuku natlawaya xlakata amakgapitsin ni namatlawikgoyan tuku nitlan?

¹⁴ Uma artículo makgpuwantiniyan pi lu naliskuja xlakata namakgapaxuwaya Jehová chu nalakkaxwiliya tlakg naskujniya. Max amakgapitsi kamanan tiku na watiya kata kgalhikgo la wix ankgalhin paxuwakgo chu max nawanikgoyan pi nachuna katlawa. Chuna la natitaxtu kilhtamaku nalitasiya komo xlikana liskujpat tuku lakkaxwilinita. Ni kamasta talakaskin pi tuku namatlawiputunkgoyan amakgapitsin natlawa pi nialh kuenta natlawaya. Kalakapastakti liʼakxilhtit xlakata niku taxtukgo autobuses. Xlikana pi niti katitawakalh kʼakgtum autobús kaj xlakata akxilha pi tiku anta wakakgolh paxuwamakgo.

¹⁵ Pulaklhuwa tuku tlan natlawaya xlakata  amakgapitsi kamanan ni namatlawikgoyan tuku nitlan. Akgtum liʼakxilhtit, katamakgatlini tuku natlawa pi max natlawaputuna tuku nitlan (Prov. 22:3). Chu kalilakpuwanti tuku lu nitlan nakitaxtu komo natlawaya tuku nitlan (Gál. 6:7). Atanu tuku namakgtayayan wa pi komo nalakapastaka pi lakaskina xtamakgtaykan amakgapitsin. Komo nataktujuya, tapaxuwan namakgamakglhtinana tastakyaw nema namaxkikgoyan minatlatni chu amakgapitsi natalan tiku lhuwata tuku katsinikgo (kalikgalhtawakga 1 Pedro 5:5, 6).

16. Kalichuwinanti akgtum liʼakxilhtit nema masiya pi xlakaskinka nataktujuya.

¹⁶ Kaʼakxilhwi tuku titaxtulh chatum kgawasa wanikan Christoph, tiku taktujulh chu makglhtinalh tastakyaw nema maxkika. Akxni nina makgas xtamununit, tsukulh an kgimnasio. Anta, amakgapitsi kamanan wanikgolh pi xmakgtanulh kʼakgtum club xla takgaman. Xla litachuwinalh chatum kgolotsin xlakata uma, chu xla wanilh pi pulana xlakapastakli tuku nitlan nakitaxtu, la komo xlakata lu nalatlajaputuna. Maski chuna, Christoph makgtanulh. Titaxtulh kilhtamaku, katsilh pi ama takgaman lu nitlan xwanit chu katuwa xwili xlatamat. Kalitachuwinalh uma amakgapitsi lakgkgolotsin chu maxkikgolh tastakyaw nema takilhtinit kBiblia. Xla lichuwinan: «Jehová kamaklakaskilh natalan xlakata nakimaxkikgo lakwan tastakyaw. Maski titaxtulh kilhtamaku, alistalh kkakgalhakgaxmatli». ¿Wix taktujuya xlakata nakgaxpata tastakyaw nema namaxkikana?

17, 18. 1) ¿Tuku lakaskin Jehová xlakata kamanan? 2) ¿Tuku natlawaya xlakata alistalh tlan nalimakgkatsiya tuku nalaksaka? Kalichuwinanti akgtum liʼakxilhtit.

¹⁷ Jehová waniyan: «Kapaxuwa kgawasa xlakata kgawasaku wix, chu kapaxuwalh minaku xlakata kajku stakpat» (Ecl. 11:9). Jehová lakaskin pi wix napaxuwaya. Kʼuma artículo akxilhnitaw pi xlakata napaxuwaya kajwatiya nalilakpuwana naskujnaniya Jehová chu ankgalhin wa naskiniya xtamakgtay tuku natlawaya. Komo la uku nalakkaxwiliya uma, kaj ni makgas natsukuya akxilha la Jehová napulalinan, namakgtayayan chu nasikulunatlawayan. Kalilakpuwanti putum lakwan tastakyaw nema maxkiyan kBiblia chu kakgaxpatti umakgolh tachuwin: «Kalakapastakti lu xaTlan mi Malakatsukina la uku akxni kgawasaku wix» (Ecl. 12:1, nota).

¹⁸ Kgawasa nawana ni makgas makgapala. Lakapala titaxtu kilhtamaku. Lu nitlan, pero lhuwa tiku laklankata nitlan limakgkatsikgo xlakata akxni lakgkgawasanku xwankgonit ni liskujkgolh xlakata tlakg naskujnanikgo Jehová, o kaj nitu lakkaxwilikgolh natlawakgo kxlatamatkan, uma na ni makgapaxuwanan. Pero kamanan tiku liskujkgo tlakg naskujnanikgo Jehová lu napaxuwakgo akxni laklankata nawankgo. Chuna makgkatsi la uku Mirjana. Akxni tsumatku xwanit, lu xkatsini xkgamanan chu wanika namakgkgamanan kJuegos Olímpicos xla Invierno. Pero xla laksakli naskujnani Jehová putum kilhtamaku. Titaxtunita 30 kata, xla chu xchixku chuntiya skujnanimakgolh Dios putum kilhtamaku. Xla wan: «Lu nalakgapaskana, nakgalhiya litliwakga chu natlajaya lhuwa tumin kaj ni makgas makgapala chu kaj nitu litaxtu. Tuku tlakg xlakaskinka wa naskujnaniya Dios chu nakamakgtayaya amakgapitsin nalakgapaskgo».

19. ¿Tuku tlan kitaxtu komo nalakkaxwiliya tlakg naskujnaniya Jehová?

¹⁹ Kamanan tiku skujnanimakgolh Dios kalakgchan nakawaniyaw lakwan tachuwin xlakata kajwatiya liskujkgo tlakg naskujnanikgo Jehová maski titaxtukgo lhuwa taʼakglhuwit. Lu liskujkgo xlakata tlakg naskujnanikgo Jehová, xlakata tlakg xlakaskinka nalichuwinankgo Dios chu xlakata ni mastakgo talakaskin pi tuku xalak kakilhtamaku nakamatlawi tuku nitlan. Kgawasa, liwana kakatsi pi tuku liskujpat ni kaj chuna katiwa chu kakatsi pi amakgapitsin natalan paxkikgoyan chu namakgtayakgoyan. Komo ankgalhin naskiniya xtamakgtay Jehová tlan nakitaxtuniyan kmilatamat.