1, 2. 1) ¿Tuku xlakata latamanin tiku xlamakgolh akxni xlama Pablo xlilakgaputsakgo xlakata xkamaxkika talakaskin natlawakgo tuku xlakaskinkgo? 2) Chuna la wan Pablo, ¿tiku xlikana masta lakgtaxtut?

TIKU xlamakgolh kRoma lu xlipaxuwakgo xlakata xtatayakgo limapakgsin, tuku xa’akgstitum chu xkamaxkikgo talakaskin amakgapitsin natlawakgo tuku xlakaskinkgolh. Pero uma xlitliwakga chu xtatlankit uma kachikin tlan kgantaxtulh xlakata taskujut nema tlawakgolh lakskujnin. Milh kilhtamaku akxni atsinu ni xkgatsi itat lakskujnin xlitaxtukgo tiku anta xlamakgolh. Xlikana pi latamanin lu xlilakgaputsakgo xlakata lu xkamaskujukan chu xlakata tlan xtlawakgolh tuku xlakaskinkgolh, nachuna kstalaninanin Cristo tiku anta xlamakgo.

² Apóstol Pablo lhuwa tuku tsokgwililh xlakata tlan natlawayaw tuku lakaskinaw. Pero tuku xlakpuwan nixtachuna tuku xlakpuwankgo latamanin, la komo xlakkaxtlawakgo limapakgsin xlakata política. Pablo chu amakgapitsin kstalaninanin Cristo xliskujkgo nakamakgtayakgo latamanin nakatsinikgo xlakata xTamapakgsin Dios chu xlakata talakgmaxtut nema tlawalh Jesús. Pablo kamasiyanilh xnatalan Tiku xlikana masta lakgtaxtut. Akgtum  li’akxilhtit, anta kxlimaktiy xcarta liwana kawanilh kstalaninanin Cristo xalak Corinto: «Ntani anan kspiritu nkimPuchinakan, ki’akstu nkuentajkan ntu natlawaputunaw» (2 Cor. 3:17).

3, 4. 1) ¿Tuku lichuwinalh Pablo 2 Corintios 3:15, 16 akxni nina xlichuwinan versículo 17? 2) ¿Tuku kilitlawatkan xlakata tlan nalipaxuwayaw lakgtaxtut nema masta Jehová?

³ Watiya uma carta nema kamalakgachanika corintios, Pablo nina makgas xlichuwinanit tuku titaxtulh Moisés akxni taktalh ksipi Sinaí xlakata kitachuwinalh x’ángel Jehová. Chu kxlakan xmaxkgakgenan. Akxni israelitas akxilhkgolh, lu pekuankgolh wa xlakata xla litalakgatlapalh lhakgat (Éx. 34:29, 30, 33; 2 Cor. 3:7, 13). Pablo lichuwinalh pi akxni wi tiku lakgtaspita Jehová ama lataman mapanu lhakgat kxlakan (2 Cor. 3:16). ¿Tuku xkilhchanima?

⁴ Chuna la katsiw kʼartículo nema titaxtulh, kajwatiya Jehová tiku tlan tlawa tuku lakaskin xlakata wa Malakatsukilh putum tuku anan. Wa xlakata tlan nawanaw pi anan lakgtaxtut kxlakatin niku wi xʼespíritu. Chu xlakata tlan nalipaxuwayaw chu nalitamakgtayayaw lakgtaxtut talakaskin tlan natalalinaw Jehová. Israelitas tiku xlamakgolh kxakaskakni tiyat ni liwana akxilhkgolh tuku Jehová tlawalh xpalakatakan. Kitaxtulh la komo kxtalakapastaknikan chu kxnakujkan xlitatlapanit maktum lhakgat. Kajwatiya xlakan xtlawaputunkgo tuku xlakan xlakaskinkgo (Heb. 3:8-10).

5. 1) ¿Tukuya lakgtaxtut kinkamaxkiyan xʼespíritu Jehová? 2) ¿Tuku likatsiyaw pi na tlan nalipaxuwa lakgtaxtut nema Jehová masta tiku skujni litaxtu o tanuma kpulachin? 3) ¿Tuku nalichuwinanaw?

⁵ Lakgtaxtut nema masta xʼespíritu Jehová tlakg tlan nixawa tuku masta kakilhtamaku. Xʼespíritu Jehová kinkalakgmaxtuyan nialh kskujnin nalitaxtuyaw talakgalhin chu linin, nachuna kinkalakgmaxtuyan knixaxlikana takanajla chu xtalismanin. Wa uma tuku ni kgalhikgo latamanin (Rom. 6:23; 8:2). Wa uma xatlan lakgtaxtut. Tlan lipaxuwakgo tiku skujnin litaxtukgo o tiku tanumakgo kpulachin (Gén. 39:20-23). Wa uma tuku titaxtulh tala Nancy Yuen chu tala Harold King. Xlakan xtanumakgolh kpulachin akglhuwa kata xlakata xtakanajlakan. Tlan naʼakxilhaw xlakata xlatamatkan kcanal JW Broadcasting (VIDEOS > ENTREVISTAS Y EXPERIENCIAS > SE ENFRENTAN A PRUEBAS). Pero kalichuwinaw uma: la limasiyayaw pi lhuwa xtapalh akxilhaw lakgtaxtut chu la tlan liwana nalaksakaw tuku natlawayaw.

6. ¿La limasiyakgolh israelitas pi ni lhuwa xtapalh xʼakxilhkgo xlakata Jehová kalakgmaxtulh?

⁶ Akxni wi tiku kinkamaxkiyan akgtum tamaskiwin lu paxtikatsiniyaw. Jehová kamaskiwilh lakgtaxtut israelitas akxni katamakxtulh kʼEgipto. ¿Tuku tlawakgolh? Nina makgas la xkalakgmaxtukanit xlakata skujnin xlitaxtukgo, tsukukgolh lakapastakkgo liwat chu tuku xlikgotnankgo kʼEgipto, ni xlakgatikgo tuku Jehová xkamaxki. Asta tsukukgolh wankgo pi xtaspitputunkgo kʼEgipto. Xlakan tlakg lhuwa xtapalh xʼakxilhkgo skiti, pepinos, sandías, puerros, cebollas chu axux nixawa tapaxuwan kskujnanikgolh Jehová. Ni kaks lilakawanaw pi xla lu katasitsilh (Núm. 11:5, 6, 10; 14:3, 4). Uma wi tuku lu xlakaskinka kinkamasiyaniyan.

7. 1) ¿La lilatamalh Pablo tastakyaw nema lichuwinan 2 Corintios 6:1? 2) ¿La tlan nachuna natlawayaw?

⁷ Apóstol Pablo kamakgpuwantinilh kstalaninanin Cristo pi lhuwa xtapalh xliʼakxilhkgolh lakgtaxtut nema kinkamaxkinitan xpalakata xKgawasa (kalikgalhtawakga 2 Corintios 6:1). Kalilakapastakwi la xmakgkatsi  Pablo xlakata skujni xlitaxtuni talakgalhin chu linin. Pero xla lilatamalh tastakyaw nema lichuwinalh: «¡Kpaxtikatsini Dios xlakata kililakgmaxtulh kiMalanakan Jesucristo!». ¿Tuku xlakata? Xla lichuwinalh: «Sampi wa xlimapakgsin spíritu santo ntu mastay latamat kJesucristo, kimalakgtaxtinit kxlimapakgsin ntalakgalhin, chu linin» (Rom. 7:24, 25; 8:2). Akinin nachuna lhuwa xtapalh naʼakxilhaw pi Jehová kinkalakgmaxtunitan ktalakgalhin chu klinin. Xlakata talakgmaxtut, tlan tapaxuwan naskujnaniyaw Jehová xlakata tlan natawila kintalakapastaknikan (Sal. 40:8).

8, 9. 1) ¿Tuku tastakyaw mastalh apóstol Pedro xlakata la limaklakaskinaw tuku Jehová kinkamaxkinitan? 2) ¿Tuku tuwa titaxtuyaw la uku?

⁸ Ni kajwatiya napaxtikatsininanaw, nachuna kuenta natlawayaw xlakata ni kaj akglakgwa nalimaklakaskinaw tuku Jehová kinkamaxkinitan. Apóstol Pedro kinkawanin pi nikxni nalakpuwanaw pi tlan natlawayaw tuku nixatlan xlakata Jehová kinkamaxkiyan talakaskin natlawayaw tuku lakaskinaw (kalikgalhtawakga 1 Pedro 2:16). Uma tastakyaw kinkamalakapastakayan tuku tlawakgolh israelitas anta kxakaskakni tiyat. La uku, chuntiya xlakaskinka kimpalakatakan, asta max tlakg xlakaskinka. Satanás chu xkakilhtamaku lhuwa tuku malaknukgo nema lakglilakgatit, la lhakgat, liwat chu tuku likgotnankan, lilakgastan, chu lhuwa tuku atanu. Tiku stanankgo kamaklakaskinkgo latamanin tiku tlan tasiyakgo xlakata nakanajlayaw pi talakaskin natamawayaw tuku max ni lu xlakaskinka. Lu ni tuwa nakanajlayaw uma chu max lakapala nitlan nalimaklakaskinaw tuku Jehová kinkamaxkinitan.

⁹ Xtastakyaw Pedro na kinkamakgtayayan tuku tlakg xlakaskinka nalaksakaw kkilatamatkan, la takgalhtawakga chu taskujut. Akgtum liʼakxilhtit, kamanan lu kamakgpuwantinikan kʼescuela xlakata nakgalhtawakgakgo kʼuniversidad. Kamakanajlikan pi takgalhtawakga nakamaxki talakaskin nakgalhikgo taskujut niku lhuwa tumin natlajakgo. Kamasiyanikan pi tlakg tlan kaxokgonikan kxtaskujutkan tiku kgalhtawakgakgolh kʼuniversidad nixawa tiku ni anta kgalhtawakgakgolh. Putum uma max lu nalakgatikgo kamanan, tiku wi tuku xlakaskinka nalaksakkgo natlawakgo kxlatamatkan. ¿Tuku xlilakapastakatkan kamanan chu xnatlatnikan?

10. ¿Tuku kuenta natlawayaw akxni nalaksakaw tuku lu xlakaskinka kkilatamatkan?

¹⁰ Lhuwa latamanin kanajlakgo pi xlakata chatunu laksaka tuku natlawa kxlatamat, tlan nalaksakkgo tuku nalakaskinkgo komo nakamaxki talakaskin xtalakapastaknikan. Max nalilakpuwankgo tuku Pablo kawanilh corintios xlakata liwat: «¿Tuku xlakata nakililakputsanani xtalakapastakni atanu lataman xlakata tuku klaksaka naktlaway?» (1 Cor. 10:29). Xlikana pi akinin tlan nalaksakaw niku nakgalhtawakgayaw chu tuku naliskujaw kkilatamatkan. Pero kililakapastakatkan pi nila putum tlawayaw tuku akinin lakaskinaw chu tuku nalaksakaw max alistalh nitlan nakitaxtu. Wa xlakata, Pablo lichuwinalh: «Paks klikgalhiy ntiji naktlaway, wampi ni paks kimininiy. Paks klikgalhiy ntiji naktlaway, wampi ni paks kimakgtayay kkintakanajla» (1 Cor. 10:23). Uma kinkamakgtayayan naʼakgatekgsaw pi tuku tlawaputunaw ni wa tlakg xlakaskinka akxni wi tuku nalaksakaw.

11. ¿Tuku xlakata Jehová kinkalakgmaxtunitan?

¹¹ Akxni Pedro kinkawanin pi liwana nalaksakaw tuku natlawayaw, lichuwinalh pi xlakata chuna natlawayaw, talakaskin «kskujnin  Dios» nalitaxtuyaw. Wa xlakata Jehová kinkalakgmaxtun xpalakata Jesús ktalakgalhin chu klinin xlakata namakamaxkiyaw putum kilatamatkan chu naskujnaniyaw.

12. ¿Tuku lu tlan liʼakxilhtit kinkamaxkikgon Noé chu xfamilia?

¹² ¿La tlan liwana nalaksakaw tuku natlawayaw chu ni xlakskujnin nalitaxtuyaw tuku xalak kakilhtamaku? Talakaskin pi pulana nawiliyaw tuku xla kintakanajlakan (Gál. 5:16). Kaʼakxilhwi xliʼakxilhtit Noé chu xfamilia. Maski xlamakgolh niku latamanin xtlawakgo talakgxtumit xalimaxana chu xlatalatlawakgo, ni mastakgolh talakaskin pi nachuna xtlawakgolh tuku nitlan. ¿La tlawakgolh? Xlakata lu xliskujmakgolh tuku Jehová xkawaninit: natlawakgo arca, namakikgo xliwatkan chu xla animales chu na xkalitachuwinalh latamanin xlisputni ama kakilhtamaku. Biblia wan: «Noé tsukulh tlawa chuna la xwaninit Dios. Tlawalh chuna la xwanikanit» (Gén. 6:22). Chu tlan tuku kitaxtulh xlakata Noé chu xfamilia lakgtaxtukgolh (Heb. 11:7).

13. ¿Tuku taskujut kinkamaxkinitan Jehová?

¹³ ¿Tuku taskujut kinkamaxkinitan Jehová? Akinin liwana katsiyaw pi kinkamaxkinitan taskujut nalichuwinanaw xtachuwin (kalikgalhtawakga Lucas 4:18, 19). La uku, Satanás kamalakgatsinit lhuwa latamanin chu kskujnin litaxtukgo tuku xalak kakilhtamaku (2 Cor. 4:4). Akinin kgalhiyaw talakgalhaman pi nastalaniyaw xliʼakxilhtit Jesús chu nakamakgtayayaw umakgolh latamanin nalakgapaskgo chu naskujnanikgo Jehová, Dios tiku masta lakgtaxtut (Mat. 28:19, 20). Max tuwa namakgkatsiyaw chuna natlawayaw. Kmakgapitsi países, latamanin laksakpaxkinankgo chu asta lu lixkajni likatsikgo. Takgalhskinin nema nakinkatlawanikanan wa komo tlan nalimaklakaskinaw tuku Jehová kinkamaxkinitan xlakata tlakg namakgtayananaw kxTamapakgsin.

14, 15. ¿Tuku lakkaxwilikgonit lhuwa xlakskujnin Jehová? (Kaʼakxilhti xapulana dibujo).

¹⁴ Lu kinkamakgpuwantiniyan akxni akxilhaw pi lhuwa xlakskujnin Jehová akgatekgskgonit  pi xlisputni uma kakilhtamaku lu lakatsuwa wi, wa xlakata lakkaxwilikgonit pi ni lhuwa tuku nakgalhikgo xlakata naskujnanikgo Jehová putum kilhtamaku (1 Cor. 9:19, 23). Makgapitsi anta wilakgolh kxcongregacioneskan, chu amakgapitsi ankgonit makgtayanankgo niku tlakg talakaskin tamakgtay xlakata nalichuwinankan Dios. Uma akgkitsis kata nema titaxtunit lichuwinanka pi liwaka 250,000 natalan tsukukgolh skujnanikgo Jehová putum kilhtamaku. Chu la uku liwaka 1,100,000 natalan skujnanimakgolh Jehová putum kilhtamaku. ¡Lu tlan kitaxtu akxni liwana laksakaw tuku natlawayaw xlakata naskujnaniyaw Jehová! (Sal. 110:3).

¹⁵ ¿Tuku kamakgtayanit umakgolh natalan chuna natlawakgo? Kaʼakxilhwi xliʼakxilhtitkan John chu Judith. Uma 30 kata nema titaxtunit klakalhuwa países makgtayanankgonit. Lakapastakkgo pi akxni tsukulh Escuela xla Precursores kkata 1977, xkamakgpuwantinikan precursores xlakata tlan xʼankgolh makgtayanankgo niku tlakg talakaskin tiku nalichuwinankgo Dios. John lichuwinan pi makglhuwa lakgpalilh xtaskujut xlakata ni lhuwa tuku nakgalhi chu chuntiya tlan naskujnani Jehová. Titaxtulh kilhtamaku ankgolh lichuwinankgo Dios kʼalakatanu país. Anta katsinikgolh pi tlan natayaniya tuku tuwa komo natlawaniya oración Jehová chu nalipawana, la komo nakatsiniya atanu tachuwin, talismanin o xlakata lu lhkaknan o lu lonkgnan. ¿Tuku lakpuwankgo xlakata la skujnanikgonit Jehová? John wan: «Kmakgkatsi pi kmakgtlawama akgtum taskujut nema lu tlan. Kakxilha Jehová pi xlikana lama, chuna la chatum tlat xapaxkina. La uku liwana kʼakgatekgsa tuku kilhchanima Santiago 4:8, niku wan: “Katalakatsuwinitit Dios chu xla nakatalakatsuwiniyan”. Ktekgsli tuku xakputsama: latamat nema limin tapaxuwan chu tuku tlan kimamakgkatsini».

16. ¿La limaklakaskinkgonit makgapitsi natalan tuku Jehová kinkamaxkinitan, pi liwana nalaksakaw tuku natlawayaw?

¹⁶ Tuku titaxtukgo makgapitsi natalan ni kamaxki talakaskin naskujnanikgo Jehová putum kilhtamaku. Pero lhuwa tiku lakkaxwilikgo xkilhtamakujkan xlakata namakgtayanankgo niku tlawakan Pukgalhtawakga xlikalanka Katiyatni. Akgtum li’akxilhtit, liwaka 27,000 natalan makgtayanankgolh akxni tlawaka niku pulalinkan taskujut xla xtatayananin Jehová k’Warwick (Nueva York). Makgapitsi makgtayanankgolh akgtiy semana, makgapitsi akglhuwa papa’ chu makgapitsi akgtum kata o liwaka. Lhuwa tiku makgxtakgkgolh tuku xliskujmakgolh xlakata namakgtayanankgo. Putum kinkawilinikgon akgtum tlan li’akxilhtit xlakata la nalimaklakaskinaw tuku Jehová kinkamaxkinitan, xlakata tlan namalankiyaw chu nakakninaniyaw.

17. ¿Tuku nakamaxkikan kkilhtamaku nema aku mima tiku liwana limaklakaskinkgo tuku nalaksakkgo natlawakgo, nema Dios masta?

¹⁷ Lu paxtikatsiniyaw Jehová xlakata lakgapasaw chu lipaxuwayaw xlakata kinkamaxkiyan talakaskin nakakninaniyaw. Tuku nalaksakaw kalitasiyalh pi lhuwa xtapalh akxilhaw tuku kinkamaxkinitan. Liwana kalimaklakaskiw xlakata naskujnaniyaw Jehová chu ni kaj akglakgwa tuku natlawayaw. Komo chuna natlawayaw, liwana nakatsiyaw pi Jehová nakinkamaxkiyan tuku malaknunit kxTachuwin: «Ntamalakatsukun nalakgtaxtunikgoy yuma ntu ntliwakglh kgalhikgoy lantla ankgalhin sputtilhay, lakimpi makxtum natalipaxuwakgoy xlakgskgatan Dios wa yuma lilakgatit ntalakgtaxtun ntu namin» (Rom. 8:21).