XLIKALANKA Katiyatni, lhuwa natalan kamaxkika talakgalhaman lakgkgolotsin chu siervos ministeriales nalitaxtukgo. Komo wix na maxkika uma talakgalhaman, max lu lipaxuwaya.

Max tsinu pekuana, pero nitu kapuwanti, lu chuna titaxtukan. Chatum kgawasa wanikan Jason kgolotsin litaxtu kcongregación, lichuwinan: «Akxni kimaxkika uma talakgalhaman, klakpuwa pi nila xakama makgantaxti uma taskujut». Moisés chu Jeremías nachuna makgkatsikgolh pi nila xʼamakgolh makgantaxtikgo taskujut nema Jehová kalakgayawalh (Éx. 4:10; Jer. 1:6). ¿Nachuna makgkatsiya? ¿Tuku tlan natlawaya xlakata nialh chuna namakgkatsiya chu tlan namakgantaxtiya tuku lakgayawaka? Kaʼakxilhwi xliʼakxilhtit Timoteo (Hech. 16:1-3).

Max Timoteo xkgalhi akgpuxam kata akxni Pablo wanilh pi xtaʼalh niku xʼan lichuwinan Dios. Max pulana xmakgkatsi pi nila xʼama makgantaxti chu max tuwa xmakgkatsi tuku lakgayawaka kcongregación (1 Tim. 4:11, 12; 2 Tim. 1:1, 2, 7). Pero akgkaw kata alistalh, Pablo kawanilh natalan xalak Filipos: «Kimpalakata, klakpuwan pi xpalakata kimalanakan Jesucristo tlan nakkamalakgachaniyan Timoteo, [...]. Xlakata ni ki’anani atanu xtachuna la xla, tiku lu xlikana kuentajtlawa tuku mimpalakatakan» (Filip. 2:19, 20).

¿La litaxtulh Timoteo chatum tlan kgolotsin? Kaʼakxilhwi pulakchaxan tuku tlan kinkamasiyaniyan.

1. Lu xkalilakgaputsa amakgapitsin. Pablo kawanilh natalan xalak Filipos pi Timoteo lu xkalilakgaputsa (Filip. 2:20). Chuna, Timoteo lu xkalilakgaputsa amakgapitsin. Xkamatliwakglhniputunkgo xtakanajlakan chu lhuwa tuku xtlawaputun xpalakatakan.

William, chatum kgolotsin tiku kgalhi liwaka akgpuxam kata lata liskujma la kgolotsin, kamaxki uma tastakyaw tiku wi tuku kalakgayawakanit kcongregación: «Tlan kakalikatsini natalan. Kuenta katlawa tuku maklakaskinkgo chu ni kajwatiya kalilakgaputsa tuku natalakkaxtlawa kcongregación». Ni chuna kalitaxtuw la tiku matlawani autobús, xla kajwatiya lilakgaputsa xlakata sokgku nachan niku xlichanat nixawa nakamawakakgo latamanin.

2. Pulana wililh tuku xla xtakanajla. Akxni lichuwinalh xtayat Timoteo, Pablo lichuwinalh: «Xlakata putum amakgapitsin putsamakgo tuku xlakan lakaskinkgo ni wa tuku xla Cristo Jesús» (Filip. 2:21). Pablo xwi kRoma akxni tsokgli uma tachuwin chu natalan tiku anta xwilakgolh kajwatiya xlilakgaputsakgo tuku xpalakatakan. Asta xlakpuwankgo pi ni xtalakaskin tlakg naliskujkgo akxni naskujnanikgo Dios. Pero Timoteo ni chuna xtlawa. Akxni xʼakxilha pi tlan tlakg kskujnanilh Dios, xtlawa chuna la Isaías, tiku lichuwinalh: «¡Unu kwi! Akit kakimalakgacha» (Is. 6:8).

¿Tuku tlan natlawaya xlakata tlan namakgantaxtiya tuku lakgayat kcongregación chu tuku tlawaya kmilatamat? Pulana, kaʼakxilhti tuku tlakg xlakaskinka. Pablo lichuwinalh pi talakaskin nakatsiyaw «tuku tlakg xlakaskinka» (Filip. 1:10). Tlakg xlakaskinka ka’akxilhti tuku Dios wan pi xlakaskinka. Xlipulaktiy, kalakkaxwili minkilhtamaku. Kalakgmakganti tuku makglhtiyan kilhtamaku chu litliwakga. Pablo maxkilh uma tastakyaw Timoteo: «Wa xlakata katsalani tuku lakaskinkgo  tiku lakgkgawasanku, pero kakataputsa xaʼakgstitum, takanajla, tapaxkit, takaksni» (2 Tim. 2:22).

3. Lhuwa skujli xlakata Jehová. Pablo kamalakapastakalh filipenses: «Wampi wa xtalakapastakna lakgapasninitantit [Timoteo] mpi xtachuna nchatum xakam kxatlat, nkintaliskujnit kxatlan tamakatsinin» (Filip. 2:22). Timoteo ni xalhkitit xwanit. Xla chu Pablo lhuwa skujkgolh chu uma tlawalh pi lu tlan xlatalalinkgolh.

Lhuwa anan taskujut kxkachikin Dios, taskujut nema naliminiyan tapaxuwan chu tlan nakatalalipina natalan. Wa xlakata kaliskujti ankgalhin «nalistaka[...] kxtaskujut nkimPuchinakan» (1 Cor. 15:58).

4. Liskujli tuku katsinilh. Pablo tsokgnanilh Timoteo: «[Wix putum tlawanita] nkintamasiyun, chu nkintalataman, chu xpalakata ntu nchuna klitlawama, chu nkintakanajla, chu nkintapaxuwanaliyan, chu nkintapaxkit, chu lantla kkgalhiy nkintakgpuwantin» (2 Tim. 3:10). Xlakata Timoteo liskujli tuku katsinilh, tlan lakgatayalh taskujut kcongregación (1 Cor. 4:17).

¿Wi chatum tala tiku tliwakga xtakanajla chu lakpuwana pi tlan namakgtayayan? Komo ni, ¿tuku xlakata ni putsaya tiku tlan namakgtayayan? Tom, tiku akglhuwata kata kgolotsin litaxtu, lakapastaka: «Chatum tala tiku lhuwata kata kgolotsin xlitaxtu lu xkililakgaputsa chu kimakgalhtawakgena litaxtulh. Ankgalhin xakskini tastakyaw chu xaktlawa tuku xkiwani. Uma kimakgtayalh xlakata ni nakpekuan».

5. Chuntiya liskujli xlakata namatliwakglha xtakanajla. Pablo wanilh Timoteo pi ankgalhin «[xlatamalh] chuna la lakaskin Dios» (1 Tim. 4:7). Chatum tiku kgosnan kgalhi tiku mamakgatawakga, pero na talakaskin pi x’akstu namakgatawakga. Pablo wanilh Timoteo: «Kalikgalhtawakganikgo xTachuwin Dios nchixkuwin, chu nastakyawakgoya, chu namasiyunikgoya [...]. Kalakpuwanti xlakata uma; wa tuku tlakg kaliskujti, xlakata putum na’akxilhkgo pi tatliwakglhma mintakanajla» (1 Tim. 4:13-15).

Na talakaskin chuntiya nakatsinitilhaya. Ni kamasta talakaskin pi mintakanajla antiya natamakgxtakga. Kaliskujti xlakata nalitamakgtayaya tastakyaw nema kinkamaxkiyan xkachikin Dios. Kuenta natlawaya xlakata ni akstu nalipawankana. Ni nalakpuwana pi xlakata lhuwa tuku katsiniya tlan nalakkaxtlawaya akgtum taʼakglhuwit maski ni liwana nalakputsananiya. Chuna la Timoteo, kuenta natlawakana chu nachuna tuku masiyaya (1 Tim. 4:16).

6. Lipawa pi x’espíritu Jehová napulalin. Taskujut nema lakgayawaka Timoteo, Pablo wanilh pi xlimakilh «spiritu santo» (2 Tim. 1:14). Xlakata «namaki» xtaskujut o nakuentajtlawa, xtalakaskin pi Timoteo nalipawan pi espíritu santo x’ama pulalin.

Donald, tiku akglhuwata kata liskujma la kgolotsin, lichuwinan: «Natalan tiku wi tuku lakgayakgolh kcongregación lhuwa xtapalh na’akxilhkgo chu kuenta natlawakgo la talalinkgo Dios. Chuna tlakg tliwakga natawila xtakanajlakan. Komo naskinkgo espíritu santo chu nakgalhikgo lakwan tayat, akgtum tasikulunalin nalitaxtukgo xlakata xnatalan» (Sal. 84:7; 1 Ped. 4:11).

Tlan tasiya pi natalan tiku nina makgas lakgayakgo taskujut kcongregación, chuna la wix, chuntiya matliwakglhmakgolh xtakanajlakan. Jason tiku pulana lichuwinaw, wan: «Lhuwa tuku kkatsininit lata lhuwata kata kliskujma la kgolotsin, chu la uku nialh kpekuan. Xlikana klipaxuwa taskujut nema klakgaya chu k’akxilha la akgtum talakgalhaman».

Chu wix, ¿chuntiya namatliwakglha mintakanajla? Kaliskujti xlakata nastalaniya xli’akxilhtit Timoteo. Chuna nalitaxtuya la akgtum tasikulunalin anta kxkachikin Jehová.