Texto xahebreo pulaktiy tlan matitaxtikan k’atanu tachuwin. Wa xlakata, nalichuwinanaw tuku xlakata chuna tlawaka:

1. Xlakata la talikgalhtawakga chu la talakkaxtawilanit. Xlakata natakgatekgsni tuku wan versículos 12 asta 15 chu amakgapitsi versículos xla uma capítulo, talakaskin liwana nalilakpuwankan kxapulana tachuwin nema nawilikan kversículo 12, uma tachuwin xahebreo ascher. Uma tachuwin pulaklhuwa la tamatitaxti k’atanu tachuwin. Akgtum li’akxilhtit, tlan takgatekgsni la komo wi «tiku» o «tuku» lichuwinamaka. La uku tamaklakaskin tachuwin «tuku», chu takgatekgsni pi tiku lixkajni likatsikgo nema lichuwinan kxapulana versículos wa tiku lichuwinankgo tuku xalaktlan nema lichuwinan versículos 12 asta 14. Pero ascher na kilhchanima tuku kitaxtu, wa xlakata tlan tamatitaxti la komo «wa xlakata», «nachuna» o «alistalh». Wa xlakata, krevisión xla kata 2013 xa’inglés chu k’amakgapitsi biblias, uma tachuwin matitaxtikan la komo then («wa xlakata»).

2. Tatalakxtumi putum tuku wan amakgapitsi versículos xla Salmo 144. Akxni maklakaskinkan kversículo 12 tachuwin then («wa xlakata»), takgatekgsa pi tuku xalaktlan nema lichuwinan kversículos 12 asta 14 wa lipaxuwakgo tiku xa’akgstitum likatsikgo, tiku kversículo 11 kskinikgo Dios pi kakalakgmaxtulh kxlakgstipankan tiku nitlan likatsikgo. Uma talakgpalit na tatalakxtumi versículo 15. Nachuna, tachuwin «tapaxuwan» nema makgtiy talichuwinan takgatekgsa pi watiya tlan xkitaxtunimakgolh tiku tlan xlikatsikgo. Wa xlakata, pulaktiy nema lichuwinan pi kachikin nema paxuwa watiya: «[kachikin] ti talipawan xastakna Dios wanikan Jehová». Na kalakapastakwi xamakgan tatsokgni hebreo ni xkgalhi comillas chu ni para atanu signo xla puntuación. Chuna, xlakata nakatsiyaw tuku xlikana kilhchanima, tiku matitaxtikgo k’atanu tachuwin kuenta xlitlawatkan la xtsokgnankan ktachuwin hebreo, tuku lichuwinan amakgapitsi versículos xla uma capítulo chu atanu texto nema tatalakxtumi.

3. Tatalakxtumi atanu textos xalak Biblia niku lichuwinan xtasikulunalin Dios nema nakamaxki xlakskujnin tiku ni makgxtakgkgo. Xlakata talakgpalilh la xtamatitaxti uma tachuwin ascher, anta kSalmo 144 la uku takgatekgsni la xlikana David xkanajla pi Dios x’ama kalakgmaxtu kachikin Israel, x’ama lisikulunatlawa tapaxuwan chu tlan takgalhkgalhin (Lev. 26:9, 10; Deut. 7:13; Sal. 128:1-6). Akgtum li’akxilhtit, Deuteronomio 28:4 wan: «Naksikulunatlawa minkamanan tiku nalakachinkgo chu tiyat nema kgalhiya, nachuna mi animales, xalakgskgata mi wakax chu mi borregos». Xlikana, akxni xmapakgsinama Salomón, xkgawasa David, kachikin kgalhilh takaksni chu tlan kakitaxtunilh chuna la nikxni chuna xlanit. Makgapitsi tuku lalh k’uma tamapakgsin limasiya la natawila xtamapakgsin Mesías (1 Rey. 4:20, 21; Sal. 72:1-20).

Chuna la akxilhwi, revisión 2013 xa’inglés nema lichuwinan Salmo 144 ni talakgpali takgatekgsni nema lichuwinan Biblia. Pero salmos tlakg liwana lichuwinan nema lhuwa kilhtamaku xkgalhkgalhimakgo xlakskujnin Jehová: pi Dios nakamasputu tiku nitlan likatsikgo, nalimin takaksni chu tlan nakakitaxtuni putum kilhtamaku tiku akgstitum likatsikgo (Sal. 37:10, 11).