1, 2. ¿Tuku xlakata Jesús lu xlakgaputsama?

AKXNI awatiya xlama unu kkatiyatni, Jesús wi tuku xlilakgaputsama. Pulana, xkatsi pi kaj atsinu xtsankga xlakata xtalamakgasitsin xmapatinikgolh asta xmakgnikgolh. Pero xwi atanu tuku xlilakgaputsama. Xmakgapaxuwaputun xTlat xlakata lu xpaxki. Chu xkatsi pi komo ni xmakgxtakgli xTlat akxni tuwa tuku xtitaxtuma, uma xtlawalh pi xtamalankilh xtukuwani Dios. Nachuna, xkapaxki latamanin chu xkatsi pi xlakata akinin tlan xlatamaw putum kilhtamaku xtalakaskin pi xla ni xmakgxtakgli Jehová.

² Maski lhuwa tuku xlilakgaputsama, xla chuntiya xkgalhi takaksni. Nina makgas xtitaxtunit xkawaninit xʼapóstoles: «Kintakaksni kkamaxkiyan» (Juan 14:27). Xkgalhi «xtakaksni Dios», uma kilhchanima takaksni nema makgkatsi tiku lipaxuwa la tlan talalin Jehová. Wa uma tuku xmakgkatsi Jesús kxtalakapastakni chu kxnaku (Filip. 4:6, 7).

3. ¿Tuku nalichuwinanaw kʼuma artículo?

³ Akinin ni kintikaʼakgspulan talakgaputsit nema titaxtulh Jesús. Pero putum akinin kstalaninanin natitaxtuyaw taʼakglhuwit (Mat. 16:24, 25; Juan 15:20). Chu chuna la xla, max namin kilhtamaku wi tuku lu tuwa nalilakgaputsayaw. ¿La natlawayaw xlakata ni ankgalhin wa nalilakgaputsayaw taʼakglhuwit nema kgalhiyaw chu nema natlawa pi nialh nakgalhiyaw takaksni? Naʼakxilhaw pulaktutu tuku tlawalh Jesús akxni xlichuwinama Dios unu kKatiyatni chu la tlan nastalaniyaw xliʼakxilhtit akxni natitaxtuyaw tuku tuwa.

4. Chuna la wan 1 Tesalonicenses 5:17, kawili akgtum liʼakxilhtit nema masiya pi Jesús makglhuwa tlawalh oración akxni awatiya kilhtamaku xlama unu kKatiyatni.

⁴ (Kalikgalhtawakga 1 Tesalonicenses 5:17). Akxni awatiya xlama, Jesús makglhuwa tlawalh oración. Akxni kamasiyanilh kstalaninanin la nalakapastakkgo xlinin, tlawalh akgtum oración akxni nina xkamatitaxtini kaxtalanchu chu atanu tlawapa akxni nina xmatitaxti vino (1 Cor. 11:23-25). Nachuna katatlawalh akgtum oración akxni nina xtaxtukgo niku tlawakgolh xTaway kiMalanakan (Juan 17:1-26). Akxni chankgolh ksipi xla Olivos, makglhuwa tlawalh oración (Mat. 26:36-39, 42, 44). Chu awatiya tuku tlawalh Jesús akxni nina xniy wa akgtum oración (Luc. 23:46). Chuna la akxilhaw, Jesús ankgalhin tlawanilh oración Jehová xlakata putum tuku titaxtulh.

5. ¿Tuku xlakata pekuankgolh xʼapóstoles Jesús?

⁵ Pulaktum tuku xlakata Jesús tayanilh wa pi ankgalhin tlawanilh oración xTlat xlakata naskini xtamakgtay. Pero ama katsisni xʼapóstoles nichuna tlawakgolh, wa xlakata pekuankgolh akxni tsukuka kaputsananikan (Mat. 26:40, 41, 43, 45, 56). ¿Tuku katsiniyaw? Pi ni katimakgxtakgwi Jehová komo ankgalhin natlawayaw oración, chuna la tlawalh Jesús. Pero, ¿tuku tlan naskinaw?

6. ¿Tuku xlakata nakinkamakgtayayan takanajla xlakata tlan nakgalhiyaw takaksni?

⁶ Tlan naskiniyaw Jehová pi tlakg kakinkamaxkin takanajla (Luc. 17:5; Juan 14:1). Maklakaskinaw xlakata Satanás nakinkaputsananiyan putum kstalaninanin Jesús (Luc. 22:31). Takanajla nakinkamakgtayayan nakgalhiyaw takaksni maski tanu tanu taʼakglhuwit natitaxtuyaw. ¿Tuku xlakata? Xlakata akxni  tlawanitawa putum tuku matlaniyaw, natlawa pi wa namakgxtakgniyaw Jehová kintalakgaputsitkan. Xlakata katsiyaw pi xla tlakg tlan nalakkaxtlawa nixawa akinin chu uma natlawa pi kkintalakapastaknikan chu kkinakujkan nakgalhiyaw takaksni (1 Ped. 5:6, 7).

7. ¿Tuku kinkamasiyaniyan tuku lichuwinan Robert?

⁷ Oración nakinkamakgtayayan nakgalhiyaw takaksni kkintalakapastaknikan chu kkinakujkan maski lhuwa tuku natitaxtuyaw. Kaʼakxilhwi xliʼakxilhtit Robert, tiku kgalhi liwaka 80 kata chu kgolotsin litaxtu congregación chu ni makgxtakga Jehová. Xla lichuwinan la tlawa xlakata nakgalhi takaksni: «Chuna la titaxtunit kilatamat, tastakyaw nema wi kFilipenses 4:6, 7, kimakgtayanit tlan naktayani lhuwa taʼakglhuwit. Kkgalhinit talakgaputsit xlakata nikkgalhi tumin, chu milh kilhtamaku nialh kgolotsin klitaxtulh». Chu wampara: «Ktlawani oración Dios akxni wi tuku ktsuku lilakgaputsa. Klakpuwan pi akxni ankgalhin chu xliputum kinaku ktlawa oración, tlakg lhuwa takaksni kkgalhi».

8. Chuna la wan Juan 8:29, ¿tuku atanu tlawalh pi Jesús xkgalhilh takaksni?

⁸ (Kalikgalhtawakga Juan 8:29). Jesús xkgalhi takaksni akxni putsastalanika. ¿Tuku xlakata? Xlakata xkatsi pi xmakgapaxuwama xTlat. Kgalhakgaxmatninalh asta akxni tuwa tuku xtitaxtuma. Xlakata xpaxki Jehová, liwana xlakpuwanit pi naskujnani putum kxlatamat. Akxni nina xmin kKatiyatni, «taskujli xTlat» (Prov. 8:30). Chu akxni milh unu kKatiyatni xatapaxuwan masiyalh xaxlikana  xlakata xTlat (Mat. 6:9; Juan 5:17). Uma lu makgapaxuwalh (Juan 4:34-36).

9. ¿La kinkamakgtayayan nakgalhiyaw takaksni akxni lichuwinanaw Dios?

⁹ Stalaniyaw xliʼakxilhtit Jesús akxni kgalhakgaxmataw Jehová chu akxni “putum kilhtamaku tlawayaw xtaskujut Malana” (1 Cor. 15:58). Kstalanina Cristo tiku «putum xkilhtamaku» lichuwinan Dios tanu la akxilha xtaʼakglhuwit (Hech. 18:5). Pulaktum wa pi latamanin tiku kalitachuwinanaw Dios tlakg lhuwa kgalhikgo taʼakglhuwit nixawa akinin. Pero, akxni tsukukgo paxkikgo Jehová chu katsinikgo xtachuwin, tlakg tlan tawilakgo kxlatamatkan chu kgalhikgo tapaxuwan. Akxni chuna titaxtuyaw, tlakg lipawanaw pi Dios nakinkakuentajtlawayan. Chu uma nakinkamakgtayayan nakgalhiyaw takaksni kkinakujkan chu kkintalakapastaknikan. Wa uma tuku titaxtuma chatum tala puskat tiku makgkatsi pi nitu litaxtu chu kgalhi tajatat xla talipuwan. Xla lichuwinan: «Akxni ankgalhin klichuwinan Dios tlan kmakgkatsi chu kkgalhi tapaxuwan. Klakpuwan pi chuna kmakgkatsi xlakata akxni tlakg lakatsu ktawilani Jehová».

10. ¿Tuku katsiniyaw xlakata tuku lichuwinan Brenda?

¹⁰ Na kaʼakxilhwi xliʼakxilhtit chatum tala puskat wanikan Brenda. Xla chu xtsumat kgalhikgo akgtum lu tuwa tajatat nema wanikan esclerosis múltiple. Brenda wi kʼakgtum silla de ruedas chu ni kgalhi litliwakga. Akxni tlan makgkatsi lichuwinan Dios akgatunu chiki, pero tlakg limaklakaskin carta xlakata nalichuwinan Dios. Xla lichuwinan: «Akxni kʼakgatekgsli pi kʼuma kakilhtamaku ni xakama paksa, kajwatiya ktsukulh lilakgaputsa naklichuwinan Dios. Akxni klichuwinan Dios tlawa pi nialh naklakapastaka kintajatat. Kajwatiya klilakgaputsa nakkamakgtaya latamanin tiku kkalitachuwinan Dios. Chu ankgalhin kimalakapastaka takgalhkgalhin nema kkgalhi».

11-13. 1) ¿La limasiyakgolh xʼapóstoles Jesús chu amakgapitsi kstalaninanin pi xaxlikana xʼamigos xlitaxtunikgo? 2) ¿La makgtayakgolh Jesús xʼamigos?

¹¹ Akxni Jesús xlichuwinama xtachuwin xTlat, lhuwa tuku titaxtulh. Pero xʼapóstoles limasiyanikgolh pi xlikana xʼamigos xlitaxtukgo, chuna la lichuwinan Proverbios 18:24, niku wan: «Chatum amigo tiku tlakg tlan talalipina nixawa mintala». Jesús lanka xtapalh xkaʼakxilha. Kalakapastakwi pi ama kilhtamaku xnatalan ni xkanajlanikgo (Juan 7:3-5). Milh kilhtamaku tiku xalak xfamilia lakpuwankgolh pi kaj xʼakgwitima (Mar. 3:21). Pero xʼapóstoles nichuna likatsikgolh. Katsisni akxni nina xniy, Jesús kawanilh: «Wixin nikxni kimakgxtakgnitantit maski ktitaxtunit tuku lu tuwa» (Luc. 22:28).

¹² Milh kilhtamaku nitlan mamakgkatsinikgolh. Pero ni wa kuenta tlawalh xtalakgalhinkan, wata wa xtakanajlakan nema xkgalhikgo (Mat. 26:40; Mar. 10:13, 14; Juan 6:66-69). Awatiya tsisni akxni akxtum xkatawi, kawanilh: «Kiʼamigos kkalimapakuwinitan, xlakata kkamasiyaninitan putum tuku kinTlat lichuwinanit» (Juan 15:15). Xlikana pi xʼamigos lu matliwakglhkgolh. Lu lipaxuwalh tamakgtay nema maxkika akxni xlichuwinama xtachuwin xTlat (Luc. 10:17, 21).

¹³ Jesús nachuna xkgalhi atanu xʼamigos chu amigas nema pulaklhuwa la makgtayakgolh akxni xlichuwinan Dios. Makgapitsi xmaxkikgo talakaskin natawila kxchikkan xlakata anta nawayan (Luc. 10:38-42; Juan 12:1, 2). Amakgapitsi xtalapulakgo chu xmaklakaskinkgo xtuminkan xlakata namakgtayakgo (Luc. 8:3). ¿Tuku xlakata Jesús xkgalhi  lakwan amigos? Xlakata xla nachuna tlan amigo xlitaxtu. Wi tuku tlawalh xpalakatakan chu nikxni kaskinilh tuku nila xtlawakgo. Maski xla ni xkgalhi talakgalhin pero xʼamigos xkgalhikgo talakgalhin, kapaxtikatsinilh tuku tlawakgolh xpalakata. Chu xlikana makgtayakgolh chuntiya nakgalhi takaksni.

14, 15. 1) ¿La tlan nakgalhiyaw laktlan amigos? 2) ¿La nakinkamakgtayakgoyan?

¹⁴ Xatlan amigos nakinkamakgtayakgoyan ni namakgxtakgaw Jehová. Chu xlakata nakgalhiyaw laktlan amigos, talakaskin pi akinin na tlan amigo nalitaxtuyaw (Mat. 7:12). Akgtum liʼakxilhtit, Biblia wan pi nakamakgtayakgoyaw amakgapitsin pero tlakg nakamakgtayayaw tiku titaxtumakgolh tuku tuwa (Efes. 4:28). Kalilakpuwaw natalan xalak congregación tiku maklakaskinkgo tamakgtay. ¿Wi chatum tiku lichuwinan Dios chu nila taxtu kxchik? Max tlan naʼanaw tamawaniyaw tuku maklakaskin. O max tlan nakatamawaniyaw liwat tiku ni kgalhikgo tumin. ¿Tlan maklakaskinaw sitio jw.org^® chu JW Library^®? Komo chuna, tlan nakamakgtayayaw natalan xlakata na tlan namaklakaskinkgo. Komo nakamakgtayayaw amakgapitsin, max lu napaxuwayaw (Hech. 20:35).

¹⁵ Amigos nema nakgalhiyaw nakinkamakgtayakgoyan akxni nakgalhiyaw taʼakglhuwit chu nakinkamakgtayakgoyan nakgalhiyaw takaksni. Chuna la Elihú kgaxmatnilh Job akxni wanilh la xmakgkatsi, kiʼamigoskan nakinkakgaxmatnikgoyan akxni nakalixakgatliyaw tuku lilakgaputsayaw (Job 32:4). Xlikana, ni nalakpuwanaw pi xlakan nalaksakkgo tuku kilitlawatkan, pero nalimasiyayaw liskgalala  komo nakakgaxmatniyaw tastakyaw xalak Biblia nema nakinkamaxkikgoyan (Prov. 15:22). Chu akxni natitaxtuyaw tuku tuwa, kalitaxtuw la mapakgsina David, tiku ni lanka xmakgkatsikan chu makglhtinalh tamakgtay nema maxkikgolh xʼamigos (2 Sam. 17:27-29). Xlikana, amigos tiku chuna likatsikgo litaxtukgo la akgtum tamaskiwin xla Jehová (Sant. 1:17).

16. Chuna la wan Filipenses 4:6, 7, ¿la tlan nakgalhiyaw takaksni? Kalichuwinanti.

¹⁶ (Kalikgalhtawakga Filipenses 4:6, 7). ¿Tuku xlakata kinkawaniyan Jehová pi tlan nakgalhiyaw takaksni nema xla masta «xpalakata Cristo Jesús»? Xlakata nakgalhiyaw takaksni kkintalakapastaknikan chu kkinakujkan, lu xlakaskinka pi naʼakgatekgsaw la makgtanuma Jesús kxtalakaskin Dios chu lu xlakaskinka nakgalhiniyaw takanajla. Akgtum liʼakxilhtit, katsiyaw pi kinkatapatikanan kintalakgalhinkan xlakata xtamakamastan Jesús chu uma tlan limakgkatsiyaw (1 Juan 2:12). Nachuna, katsiyaw pi Jesús wa Mapakgsina kxTamapakgsin Dios chu nalakkaxtlawa putum tuku Satanás chu xkakilhtamaku tlawakgonit, uma lu matliwakglha kintakgalhkgalhinkan (Is. 65:17; 1 Juan 3:8; Rev. 21:3, 4). Nachuna, xlakata katsiyaw pi Jesús kinkamakgtayaman kʼuma xatuwa taskujut nema kinkalakgayawanitan tlawa pi ni napekuanaw (Mat. 28:19, 20). ¿Nixlikana pi takgalhkgalhin, ni pekuankan chu tlan makgkatsikan lu xlakaskinka xlakata nakgalhiyaw takaksni?

17. 1) ¿La tlan chuntiya nakgalhi takaksni kstalanina Cristo? 2) Chuna la wan Juan 16:33, ¿tuku tlan nakinkakitaxtuniyan?

¹⁷ Wa xlakata, ¿tuku natlawayaw xlakata chuntiya nakgalhiyaw takaksni akxni tuwa tuku natitaxtuyaw? Nastalaniyaw xliʼakxilhtit Jesús. Pulana, ankgalhin natlawayaw oración. Xlipulaktiy, nakgalhakgaxmataw Jehová chu xtapaxuwan kalichuwinaw Dios maski tuwa tuku natitaxtuyaw. Chu xlipulaktutu, kamakglhtinaw tamakgtay nema kinkamaxkikgoyan kiʼamigoskan. Chuna, xtakaksni Dios nakuentajtlawa kintalakapastaknikan chu kinakujkan. Chu chuna la Jesús, tlan natayaniyaw putum taputsan (kalikgalhtawakga Juan 16:33).