Winston, kakilalitachuwinaw la tsuku putsaya Dios.

Kstakli kQueensland (Australia) kʼakgtum familia niku ni xkanajlanikan Dios. Xlakata anta xaklamaw kʼakgtum granja nema lakgamakgat xwi, wa xlakata ni lu xakkatachuwinan tiku ni xalak kifamilia. Akxni xakkgalhi akgkutiy kata ktsukulh putsa Dios. Ktlawanilh oración xlakata nakimakgtaya naklakgapasa xaxlikana. Titaxtulh kilhtamaku kmakgxtakgli niku xakwi chu ktekgsli taskujut anta kʼAdelaida (Australia Meridional). Akxni xakkgalhi puxamatum kata, kkilalh kSydney, chu anta klakgapasli Pam. Xla kilitachuwinalh xlakata israelismo británico, akgtum takanajla nema wan pi laktsu kachikinin británicos kilhtsukukgonitancha ktribus xalak Israel xala makgasa. Xlakan wankgo pi uma tribus wa akgkaw tribus nema xmakgtapakgsikgo ktamapakgsin xalak norte chu kachilinka ksiglo akgtsayan akxni nina xmin Cristo. Akxni ktaspitli kʼAdelaida, klitachuwinalh xlakata uma chatum kincompañero tiku xaktaskuja tiku xtsukunit katalikgalhtawakga Biblia xtatayananin Jehová. Akxni ktsukuw chuwinanaw, klichuwinaw tuku xkanajlakgo xtatayananin Jehová, kkatsilh pi xaktekgsma xtakgalhtin kiʼoración nema xaktlawanit akxni aktsujku xakwanit. Ktsukulh katsini tuku xaxlikana xlakata kiMalakatsukina chu xTamapakgsin. ¡Xaktekgsnit «lu xastlan perla»! (Mat. 13:45, 46).

Pam, wix nachuna tsuku putsaya uma «lu xastlan perla» akxni kajku kstakpat. ¿La tekgsti?

Kstakli kʼakgtum familia niku xkanajlanikan Dios, kachikin xwanikan Coffs Harbour (Nueva Gales del Sur). Kinatlatni chu kintata chu kinana xkanajlakgo tuku xmasiya takanajla xla israelismo británico. Xaʼaktsujku kintala chu xapuxku, kinatapuxnimatni chu akit kinkamasiyanikan pi Dios tlakg xkamakgtaya tiku xkilhtsukukgonitancha  kkachikin británicos. Maski chuna, ni liwana xakkatsi komo xlikana xwanit tuku xkimasiyanikanit chu xakmakgkatsi pi makgat xakwilanilh Dios. Akxni xakkgalhi akgkutati kata kkilalh kʼakglhuwa pusikulan la xla anglicanos, bautistas chu xla adventistas del séptimo día. Pero ni kimakgtayakgolh naklakgapasa Dios.

Alistalh, kifamilia ankgolh latamakgo kSydney, niku klakgapasli Winston xlakata xla anta xlama. Chuna la xla lichuwinalh, akxni xaklikgalhchuwinanaw xlakata takanajla, xla tsukulh katalikgalhtawakga Biblia xtatayananin Jehová. Alistalh, cartas nema xkimalakgachani lhuwa textos xalak Biblia xtsokgwili. Tlan nakwan pi pulana xaklilakgaputsa chu asta xaksitsi. Pero tsinu tsinu kkatsinilh pi uma xaxlikana xwanit.

Kkata 1962 kalh latama kʼAdelaida xlakata lakatsu naktawila niku xwi Winston. Xla xkatachuwinanita akgtum tamakgaxtokgat tiku xtatayananin Jehová xlakata tlan anta xaktamakgxtakgli. Wa Thomas chu Janice Sloman, tiku xliskujkgonit la misioneros kPapúa Nueva Guinea. Akit kajku akgkutsayan kata xakkgalhi chu lu tlan kilikatsinikgolh; chu kimakgtayakgolh tlakg naktalakatsuwini Jehová. Wa xlakata na ktsukulh likgalhtawakga xTachuwin Dios chu kaj ni makgas titaxtulh kkatsilh pi xaktekgsnit xaxlikana. Akxni xaktamakgaxtokgnitawa, Winston chu akit lu xatapaxuwan ktsukuw skujnaniyaw Jehová. Lhuwa tuku tuwa ktitaxtunitaw, pero putum tuku ktitaxtunitaw tlawanit pi tlakg lanka xtapalh nakliʼakxilhaw perla nema ktekgsnitaw.

Winston, kakilalitachuwinaw la makgkatsi tuku titaxtu akxni tsuku skujnaniya Jehová.

Akxni nina makgas la xaktamakgaxtokgnitaw, Jehová kinkamalakinin xapulana «lanka malakcha» xlakata tlakg nakskujnaniyaw (1 Cor. 16:9). Uma malakcha kinkamasiyanin tala Jack Porter, tiku superintendente de circuito xlitaxtu kcongregación niku xaktapakgsiyaw. La uku Jack chu akit lakxtum kskujmaw kcomité xla sucursal kʼAustralasia. Ama kilhtamaku xla chu xpuskat, Roslyn, kinkamakgpuwantinikgon xlakata precursores regulares naklitaxtuyaw, akgtum taskujut nema akgkitsis kata klipaxuwaw. Akit xakkgalhi puxamanajatsa kata akxni kinkawanikan pi nakliskujaw la superintendente de circuito anta kʼislas xalak Pacífico sur, nema xkuentajtlawa sucursal xla Fiyi. Klakgapaxialhnaw islas xla Kiribati, Nauru, Niue, Samoa, Samoa Norteamericana, Tokelau, Tonga, Tuvalu chu Vanuatu.

Ama kilhtamaku, latamanin xalak makgapitsi islas nema tlakg lakgamakgat xwilakgolh xlakpuwankgo pi xtatayananin Jehová nitlan xlikatsikgo, wa xlakata xtalakaskin kuenta naktlawayaw chu ni kaj akglakgwa xaklatamaw (Mat. 10:16). Laktsu congregaciones xwankgonit chu makgapitsi nila xkinkamaxkikgoyan niku naktawilayaw. Wa xlakata xakkakgalhskinaw latamanin tiku anta xlamakgolh komo tlan xaktamakgxtakgwi kxchikkan. Ankgalhin lu tlan kinkalikatsinikgon.

Winston, wix lu lakgatiya taskujut xla traducción. ¿Tuku xlakata tsuku lakgatiya?

Ama kilhtamaku, natalan xalak Tonga ni lhuwa xkgalhikgo tratados chu folletos ktachuwin tongano, akgtum tachuwin polinesio. Xlakata nakkalitakgalhtawakgayaw Biblia latamanin xaklimaklakaskinaw libro La verdad que lleva a vida eterna kxa’inglés. Wa xlakata, akxni kilakgolh k’akgtum escuela lakgkgolotsin xalak congregación, kgalhtutu ama lakgkgolotsin tiku xkatsinikgo inglés lakkaxwilikgolh pi x’amakgolh matitaxtikgo ktongano uma libro. Pam wa tsokgwililh kmáquina akxni xmatitaxtikanita ktachuwin tongano chu alistalh kmalakgachaw ksucursal xla Estados Unidos xlakata na imprimirlikan. Akgtsayan semana klitlawaw uma taskujut. Maski uma traducción ni lu tlan xwanit, kamakgtayalh lhuwa latamanin tiku xchuwinankgo tongano nalakgapaskgo xaxlikana. Pam chu akit ni traductores klitaxtuyaw, pero uma tuku ktlawaw lu kinkamakgtayan xlakata naklakgatiyaw traducción.

Pam, ¿xtachuna xwanit islas anta k’Australia?

Nixtachuna xwanit. Kaj xanikuta niku xakanaw x’anan lhuwa kuxta, lu klhkaknan, xmonkganan, nachuna x’anan tsiya, lhuwa tajatat chu  lakgachunin ni lhuwa xakkgalhiyaw tuku nakwayaw. Pero akxni ksputa kilhtamaku, xakjaxaw chu xakakxilhaw pupunu akxni xaktawilayaw k’aktsu chiki nema xlitatlawanit paja chu ni xkgalhi xmakni. Katsisni akxni xtasiya papa’, xakakxilhaw xmastilenkg palmeras chu la xtasiya papa’ kpupunu. Akxni chuna xaktlawayaw lhuwa tuku xkinkamalakpuwaniyan chu xaktlawayaw oración chu chuna xkinkamakgtayayan naklakgmakganaw nixatlan talakapastakni.

Lu xaklakgatiyaw laktsu kamanan. Lu xkgamanankgo chu lu xpaxuwakgo chu kaks xlilakawankgo akxni xkaʼakxilhkgo tiku lakglhmumokgon. Akxni kkilaw k’isla xla Niue, chatum aktsu kgawasa tsukulh makxpaxama Winston chu wanilh: «Klakgati mimakchixit». Aktsu kgawasa nikxni x’akxilhnit chatum tiku lu xmakxpachixin chu ni xkatsi la xwankan.

Lu nitlan xaklimakgkatsiyaw xakakxilhaw pi latamanin lu xtalimaxkgekgo. Lu stlan la xtasiyakgo islas, pero ni x’anan makuchinanin chu ni lu x’anan chuchut nema wakan. Pero natalan ni xtasiya pi xlilakgaputsakgo. Xpaxuwakgo xlakata lakatsu xkatawilakgo xfamiliajkan, xlakata xkgalhikgo niku xkakninanikgo Jehová chu xkgalhikgo talakgalhaman nakakninanikgo. Xli’akxilhtitkan kinkamakgtayan kajwatiya naklilakgaputsayaw tuku tlakg xlakaskinka chu ni lhuwa tuku nakkgalhiyaw.

Pam, lakgachunin xtalakaskin pi wix naputsaya chuchut chu tanu tanu niku natlawaya mi liwat. ¿La xtlawaya?

Kpaxtikatsini kintlat xlakata kimasiyanilh la malhkuyukan xlakata anta naktlawa kiliwat chu ni lhuwa tuku nakmaklakaskin. Akxni kkilaw kKiribati, ktamakgxtakgwi k’akgtum chiki xla paja, chu katutsu xma xatapakglhni coral chu xmakni xlitatlawanit matluklh. Xlakata naktlawa kiliwat, kkawaxli xlakata anta nakwili kilhkuyat xlakata nakmapasi xakmaklakaskin xkgoxkga coco. Chu xakan putsa chuchut, kalh kpozo chu anta ktayalh niku xyakgolh makgapitsi lakpuskatin. Xlakata namakutukan chuchut xmaklakaskinkan kgantum kiwi nema atsinu ni xkgatsi akgtiy metro chu xlikinkachikanit kgantum tasiw, xtachuna la tuku liskitinankan. Pero ni xkgalhi anzuelo wata xkgalhi akgtum lata. Akxni chatum puskat xlakgchan namakutu xchuchut xmakgoso xkiwi chu lakapala xmatsuwi xmakan xlakata lata lakapala xtajucha kchuchut chu xtatsamalh. Ni tuwa xtasiya asta akxni kilakgchalh. Makglhuwa kmakgosolh kiwi pero kajwatiya kxkgalhni chuchut xkitawaka. Putum tsukukgolh kililitsinkgo chu akxni nialh litsinkgolh chatum kimasiyanilh la tlawakan. Tiku anta xlamakgolh k’islas ankgalhin xkinkamakgtayakgoyan chu tlan xkinkalikatsinikgoyan.

Lu xlakgatiyatit taskujut nema xtlawapatit anta k’islas. Kakilalitachuwinaw tuku tlakg lakapastakatit.

Winston: Titaxtulh tsinu kilhtamaku nak’akgatekgsniyaw makgapitsi talismanin nema anta x’anan. Akgtum li’akxilhtit, akxni natalan xkinkamalaknunikgoyan liwat, xkinkamaxkikgoyan putum tuku xkgalhikgo. Pulana, ni xakkatsiyaw pi nakkamakgxtakgniyaw tsinu. Wa xlakata putum xakwayaw. Pero akxni klakgapaswi xtalismaninkan, ktsukuw makgxtakgaw liwat nema xlakan xwakgolh. Maski lakgachunin nitlan tuku xaktlawayaw, natalan lu xkinka’akgatekgsnikgoyan. Lu xlipaxuwakgo akxni xkinka’akxilhkgoyan xlakata xli’akgchaxan papa’ xakkalakgtaspitparakgoyaw. Ama kilhtamaku, kaj xman akinin xtatayananin Jehová makxtum xakkatalayaw.

Nachuna lu tlan kitaxtulh xlakata kkalakgapaxialhnaw latamanin klaktsu kachikinin. Lhuwa latamanin xlakpuwankgo pi uma natalan x’akstukan xmalakatsukikgonit xtakanajlakan. Wa xlakata akxni chatum xtatayana Jehová tiku xalak alakatanu kachikin xkalakgapaxialhnan, latamanin x’akgatekgskgo pi uma takanajla xwi xlikalanka kkatiyatni chu kaks xlilakawankgo.

Pam: Pulaktum tuku tlakg klakapastaka wa tuku lalh kKiribati, niku xwi akgtum aktsu congregación. Tala Itinikai Matera, tiku kaj x’akstu kgolotsin xlitaxtu kcongregación, putum xtlawa tuku xmatlani xlakata nakinkakuentajtlawayan. Akgtum kilhtamaku limilh akgtum canasta chu xtajuma akgtum kgalhwat. Chu kinkawanin: «Uma  milakan». Ama kilhtamaku xkgalhwat xtilan lanka xtapalh xakli’akxilhaw. Uma tuku tlawalh lu tlan kinkamamakgkatsinin.

Pam, titaxtulh kilhtamaku nilh miskgata akxni nina xlakachin. ¿Tuku makgtayan xlakata natayaniya?

Kkata 1973, akxni xaklamaw kPacífico sur kkatsilh pi xakama kgalhi kiskgata. Wa xlakata ktaspitwi k’Australia, chu akgtati papa’ alistalh nilh kiskgata. Uma lu makgalipuwa Winston. Kintalipuwan lakatsuku tsukulh tapanu, pero nikxni lakgsputli asta akxni klikgalhtawakgaw revista La Atalaya 15 xla abril kata 2009. Ksección «Preguntas de los lectores» niku xwan: «Si una criatura muere en el vientre materno, ¿volverá a la vida en la resurrección?». Uma revista xlichuwinan pi Jehová katsi la natlawa chu putum tuku tlawa xa’akgstitum. Xla nalakkaxtlawa putum tuku nitlan kinkatlawaninitan uma nixatlan kakilhtamaku, xla lakgayawanit xKgawasa «xlakata nalakxtlawa tuku tlawanit Akgskgawini» (1 Juan 3:8). Artículo na kinkamakgtayan tlakg lanka xtapalh nakli’akxilhaw xastlan perla nema kgalhiyaw putum xlakskujnin Jehová. ¿Tuku xkinkakitaxtunin komo ni xkgalhiw takgalhkgalhin xla Tamapakgsin?

Akxni nilh kiskgatakan, ktsukuparaw skujniyaw Jehová putum kilhtamaku. Makgapitsi papa’ kskujwi kBetel xla Australia chu alistalh ktsukuparaw liskujaw la superintendente de circuito. Chu kkata 1981, akxni akgtati kata xaklakskujmaw k’aktsu kachikin xla Nueva Gales del Sur chu kSydney, kinkawanikan pi tlan nakanaw ksucursal xla Australia, chuna la uku wanikan, chu asta la uku antaku klaskujmaw.

Winston, ¿lakpuwana pi tuku titaxtu k’islas xalak Pacífico sur makgtayayan namakgantaxtiya mintaskujut xlakata makgtapakgsiya kcomité xla sucursal k’Australasia?

Chuna. Pulana, Australia xkuentajtlawa taskujut kSamoa chu kSamoa Norteamericana. Alistalh, sucursal xla Nueva Zelanda chu Australia akxtum katlawaka. Chu la uku sucursal xla Australasia kuentajtlawa Australia, islas xalak Cook, Niue, Nueva Zelanda, Samoa, Samoa Norteamericana, Timor Oriental, Tokelau chu Tonga. Kkgalhinit talakgalhaman xlakata nakkalakgapaxialhnan uma kachikinin la komo representante xalak sucursal. Akxtum kkataskuja natalan xalak uma islas lu kimakgtayanit la uku xlakata kkamakgtaya la uku lata kwi kBetel.

Xaʼawatiya tuku tlan nakkawaniyan xlakata tuku ktitaxtunitaw, Pam chu akit kakxilhnitaw pi ni kaj xman wa tiku laklankata putsakgo Dios. Kamanan nachuna tekgsputunkgo uma «lu xastlan perla», asta maski tiku xtalilakgapasnikan ni lakgatikgo (2 Rey. 5:2, 3; 2 Crón. 34:1-3). Xlikana, Jehová chatum Dios xapaxkina chu lakaskin pi putum kamanan chu tiku linkgoya kata nalakgtaxtukgo.

Akxni Pam chu akit ktsukuw putsayaw Dios liwakaya 50 kata, ni xaklakpuwanaw la xʼama kinkakitaxtuniyan. Xlikana pi xTamapakgsin Dios xtachuna la akgtum perla nema lhuwa xtapalh. Chu liwana klakpuwanitaw pi nakuentajtlawayaw xliputum kilitliwakgakan.