1. ¿Tuku lu tlawaputunaw putum xlakskujnin Dios chu tuku xlakata? (Kaʼakxilhti xmakni revista).

JESUCRISTO kamaxkilh uma limapakgsin kstalaninanin: «Kapitit chu kakamakgtayatit latamanin xliputum kachikinin xlakata kistalaninanin nawankgo» (Mat. 28:19). Putum xlakskujnin Dios tiku ni makgxtakgaw talakaskin liwana nakatsiniyaw la namakgantaxtiyaw taskujut nema kinkalakgayawakanitan (2 Tim. 4:5). Xlakata wa uma tuku tlakg xlakaskinka, lanka xtapalh chu talakaskin lakapala namakgantaxtiyaw. Xlikana, max tuwa namakgkatsiyaw lhuwa kilhtamaku nalimaxtuyaw chuna la akinin lakaskinaw.

2. ¿Tuku natlawa pi tuwa namakgkatsiyaw namakgantaxtiyaw taskujut nema kinkalakgayawakanitan?

² Wi atanu tuku lu xlakaskinka nema kinkamakglhtiyan lhuwa kilhtamaku. Max talakaskin naskujaw lhuwa hora xlakata namaxkiyaw tuku maklakaskin kifamiliajkan. O max wi atanu tuku lilakgaputsayaw kkifamiliajkan, tajatat, max linawa kata o max kgalhiyaw tajatat xla talipuwan. ¿La tlan natayaniyaw umakgolh talakgaputsit chu chuntiya namakgantaxtiyaw taskujut nema kinkalakgayawanitan Cristo?

3. ¿Tuku kinkamasiyaniyan xtachuwin Jesús nema wi kMateo 13:23?

³ Ni nataxlajwaniyaw komo talakgaputsit nema kgalhiyaw natlawa pi ni lu nakgalhiyaw kilhtamaku nalichuwinanaw Dios. Jesús xkatsi pi makgapitsi tlan lhuwa xlichuwinankgolh Dios pero makgapitsi nila chuna xtlawakgolh (kalikgalhtawakga Mateo 13:23). Jehová lanka xtapalh akxilha pi lu liskujaw natlawayaw xtaskujut (Heb. 6:10-12). Wa xlakata, max lakpuwanaw pi wi atanu tuku tlakg tlan natlawayaw xlakata tlakg naskujnaniyaw Jehová. Kʼuma artículo naʼakxilhaw tuku natlawayaw xlakata wa pulana nawiliyaw kkilatamatkan xtaskujut Dios, xataktujun  nalinaw kilatamatkan chu la tlakg tlan nalichuwinanaw chu namasiyayaw xtachuwin Dios. Pero pulana kalichuwinaw tuku kilhchanima liwana namakgantaxtiyaw taskujut nema kinkalakgayawanitan Cristo.

4. ¿Tuku kilhchanima liwana namakgantaxtiyaw taskujut nema kinkalakgayawakanitan?

⁴ Liwana namakgantaxtiyaw taskujut nema kinkalakgayawakanitan, kilhchanima lu naliskujaw xlakata ankgalhin nalichuwinanaw chu namasiyayaw xtachuwin Dios. Pero Jehová ni wa xlakaskinka akxilha la xlilhuwa kilhtamaku lichuwinanaw xtachuwin, wata xlakaskinka akxilha tuku xlakata chuna tlawayaw. Tapaxkit nema kakgalhiniyaw Jehová chu latamanin, natlawa pi putum kilhtamaku naliskujaw nalichuwinanaw Dios * (Mar. 12:30, 31; Col. 3:23). Uma kilhchanima tlakg nalimaxtuyaw kilitliwakgakan chu kinkilhtamakujkan. Komo akxilhaw pi akgtum lanka talakgalhaman nalichuwinanaw Dios, uma natlawa pi lhuwa latamanin nakalitachuwinanaw xtachuwin Dios.

5, 6. Kalichuwinanti akgtum li’akxilhtit la tlan pulana nawiliyaw kkilatamatkan la nalichuwinanaw Dios maski ni lhuwa kilhtamaku kgalhiyaw.

⁵ Kalilakpuwaw chatum kgawasa tiku lakgati tlakga guitarra, chu ankgalhin chuna tlawa akxni kgalhi kilhtamaku. Titaxtulh kilhtamaku maxkika taskujut niku stakan kape akxni sputa semana. Pero xlakata ni akchani xtumin, skuja lunes asta viernes k’akgtum pustan. Xlikana, lhuwa kilhtamaku skuja kpustan, pero tuku tlakg lakgati wa tatlakgni. Lakgati tlakg liwana natlakga guitarra xlakata wa liskujputun. Wa xlakata akxni kgalhi kilhtamaku maski kaj tsinu, tlakga xguitarra.

⁶ Nachuna, akinin max nila lhuwa kilhtamaku lichuwinanaw Dios chuna la lakaskinaw. Pero wa uma tuku xlikana paxkiyaw. Lu liskujaw xlakata nakalakgchan kxnakujkan latamanin tamakatsinin xla Tamapakgsin. Pero komo lhuwa tuku lilakgaputsayaw, max nakinkakgalhskinkanan la tlan wa pulana nawiliyaw kkilatamatkan taskujut nema kinkalakgayawakanitan.

7, 8. ¿La tlan nastalaniyaw xliʼakxilhtit Jesús akxni lichuwinanaw Dios?

⁷ Tayat nema xkgalhi Jesús akxni xlichuwinan Dios lu tlan li’akxilhtit kimpalakatakan. Tuku xla tlakg xlakaskinka x’akxilha wa nalichuwinan xTamapakgsin Dios (Juan 4:34, 35). Tlawalh akglhuwa ciento kilómetros xlakata nakalitachuwinan Dios lhuwa latamanin. Ankgalhin xkalitachuwinan Dios latamanin kxchikkan chu niku lhuwa xtawilakan. Putum kxlatamat chuna tlawalh.

⁸ Nachuna katlawaw la Cristo, ankgalhin kaputsaw la nalichuwinanaw Dios xanikuta niku natatakgsaw. Liwana lakpuwanitaw namakgxtakgaw tuku kgalhiyaw xlakata na’anaw lichuwinanaw Dios (Mar. 6:31-34; 1 Ped. 2:21). Makgapitsi natalan xalak congregación tlan precursores especiales, regulares o auxiliares nalitaxtukgo. Amakgapitsi katsinikgonit tanu tachuwin chu ankgonit latamakgo niku tlakg talakaskin tiku nalichuwinankgo Dios. Chu nachuna tiku lichuwinankgo Dios kcongregación na lhuwa liskujkgo xlakata tlan namakgantaxtikgo taskujut nema kinkalakgayawakanitan. Maski lhuwa tuku natitaxtuyaw, Jehová ni kinkaskiniyan tuku nila tlawayaw. Lakaskin pi nalipaxuwayaw taskujut nema kinkalakgayawanitan xlakata nalichuwinanaw «xalilakgatit xalakwan xalaksasti xla Dios tiku xapaxuwana» (1 Tim. 1:11; Deut. 30:11).

9. 1) ¿La pulana wililh kxlatamat Pablo nalichuwinan xTamapakgsin Dios maski xtalakaskin naskuja? 2) ¿Tuku lichuwinan Hechos 28:16, 30, 31 xlakata la x’akxilha Pablo nalichuwinan Dios?

⁹ Apóstol Pablo na kinkawilinin tlan li’akxilhtit. Akxni xlimakgtiy x’ama la misionero, xtalakaskin naskuja xlakata ni tlakg xkgalhi tumin chu xliskuja natlawa laktsu chiki xla xuwa. Pero uma ni wa tlakg xlakaskinka x’akxilha. Tlawalh uma taskujut xlakata tlan nakgalhi tuku namaklakaskin chu chuna tlan xlichuwinalh xatlan tamakatsinin kcorinto chu ni kxokgonikgolh tuku xla xmaklakaskin (2 Cor. 11:7). Maski xtalakaskin naskuja, chuntiya pulana wililh kxlatamat nalichuwinan Dios chu ankgalhin chuna xtlawa akgatunu sábado. Akxni tlakg tlan kitaxtunilh «limaxtulh putum xkilhtamaku xlakata nalichuwinan xtachuwin Dios, xkatachuwinan judíos xlakata nakalimasiyani pi Jesús wa Cristo» (Hech. 18:3-5, 2 Cor. 11:9). Alistalh, akxni xtamaknukanit kpulachin kRoma akgtiy kata, xkalitachuwinan Dios tiku xlakgapaxialhnankgo chu xtlawa cartas (kalikgalhtawakga Hechos 28:16, 30, 31). Liwana xlakpuwanit pi nitu xlaktlawalh la kskujnanima Dios. Tsokgli: «Wa lantla kkgalhiyaw yuma ntaskujut ntu nkinkalimaxkinitan xtalakgalhaman Dios, ni kxlajwananaw» (2 Cor. 4:1). Chuna la Pablo, tlan natlawayaw pi taskujut xlakata nalichuwinanaw xTamapakgsin Dios wa tlakg xlakaskinka nalitaxtu kkilatamatkan maski nakgalhiyaw atanu taskujut.

10, 11. ¿La tlan liwana namakgantaxtiyaw taskujut nema kinkalakgayawakanitan maski kgalhiyaw akgtum tajatat?

¹⁰ ¿Tuku tlan natlawayaw komo linawa kata o kgalhiyaw tajatat nema natlawa pi nialh lu la nalichuwinanaw Dios akgatunu chiki chuna la akinin lakaskinaw? Komo chuna tatakgsaw, wi atanu la tlan nalichuwinanaw Dios. Kstalaninanin Cristo xalak pulana siglo kalitachuwinankgolh Dios latamanin kaj xanikuta niku xtatakgskgo. Ankgalhin xlichuwinankgo niku xtekgskgo latamanin: akgatunu chiki, niku lhuwa xtitaxtukan chu niku xkatatanokglhkgo latamanin (Hech. 17:17; 20:20). ¿Chu komo akinin nila lhuwa tlawanaw? Tlan natawilayaw niku titaxtukgo latamanin chu nakatachuwinanaw. Na tlan nalichuwinanaw Dios kteléfono, kcarta chu niku katatanokglhaw latamanin. Lhuwa natalan tiku kgalhikgo tajatat lu paxuwakgo akxni chuna lichuwinankgo Dios.

 ¹¹ Wa xlakata tlan liwana namakgantaxtiyaw taskujut nema kinkalakgayawakanitan maski kgalhiyaw akgtum tajatat. Kalichuwinamparaw xliʼakxilhtit Pablo. Xla lichuwinalh: «Kkgalhi litliwakga nema putum kmatlani, xlakata tiku kimaxki litliwakga» (Filip. 4:13). Maklakaskilh ama litliwakga akxni xtatatla. Kawanilh natalan xalak Galacia: «Pus katsiyatit wixin mpi xaktatatlaj ktikalixakgatlin xatlan tamakatsinin xapulana» (Gál. 4:13). Nachuna, akxni tatatlayaw max tlan nakalitachuwinanaw xTamapakgsin Dios makuchinanin chu amakgapitsi tiku anta skujkgo. Lhuwa umakgolh latamanin skujmakgolh akxni anaw kxchikkan.

12. ¿Tuku kilhchanima pi kilakgastapukan kaj pulaktum tuku nalakglakan?

¹² Jesús lichuwinalh: «Xmakgskgot makni, wa lakgastapu. Chuna mpi lapi wa milakgastapu lu tlan xwa [o kaj pulaktum tuku lakglakan], xlipaks mimakni namakaxkgakganan» (Mat. 6:22). ¿Tuku kilhchanima uma tachuwin? Pi talakaskin xataktujun nalinaw kilatamatkan, o kaj pulaktum tuku nalilakgaputsayaw kkilatamatkan chu nitu nakinkalaktlawayan. Jesús kinkawilinin li’akxilhtit xlakata xla kajwatiya lilakgaputsalh nalichuwinan xTachuwin xTlat, chuna kamasiyanilh kstalaninanin pi kajwatiya nalilakgaputsakgo xTamapakgsin chu naskujnanikgo Jehová. Stalaniyaw xliʼakxilhtit Jesús, komo wa tlakg xlakaskinka akxilhaw kkilatamatkan “pulana naputsayaw xTamapakgsin Dios, chu xtalakaskin” (Mat. 6:33).

13. ¿Tuku nakinkamakgtayayan pi kaj xman wa nalilakgaputsayaw nalichuwinanaw Dios?

¹³ Pulaktum la tlan kajwatiya nalilakgaputsayaw  nalichuwinanaw Dios, wa ni lhuwa tuku nakgalhiyaw kkilatamatkan xlakata chuna tlakg nalimaxtuyaw kilhtamaku xlakata nakamakgtayayaw amakgapitsin nalakgapaskgo chu napaxkikgo Jehová. * Akgtum li’akxilhtit, ¿tlan nalakkaxwiliyaw kinkilhtamakujkan xla kintaskujutkan xlakata chuna tlan tlakg nalimaxtuyaw kilhtamaku nalichuwinanaw Dios akgatunu semana? ¿Tlan nialh lu nalimaxtuyaw kilhtamaku xlakata talakgastan o takgaman xlakata uma lu kinkamakglhtiyan kilhtamaku?

14. ¿Tuku tlawalh akgtum tamakgaxtokgat xlakata tlakg nakgalhikgo kilhtamaku nalichuwinankgo Dios?

¹⁴ Kaʼakxilhwi tuku tlawalh chatum kgolotsin xalak congregación wanikan Elías chu xpuskat. Xla lichuwinan: «Nila precursores xaklitaxtuyaw ama kilhtamaku, pero xtalakaskin wi tuku naktlawayaw. Wa xlakata wi tuku tsinu klakgpaliw kkilatamatkan xlakata tlakg naklichuwinanaw Dios. Akgtum li’akxilhtit, nialh lhuwa klaktlawaw tumin, nialh lhuwa kilhtamaku klimaxtuw talakgastan chu takgaman, kkatsiw pi uma lu xkinkamakglhtiyan kilhtamaku chu kskiw niku xakskujaw pi xlakgpalika hora la xakskujaw. Lu tlan kinkakitaxtunin xlakata tlan xakanaw lichuwinanaw Dios kakgotanun, xakkgalhiyaw tiku xakkamakgalhtawakgayaw asta xakanaw lichuwinanaw Dios x’itat semana makgtiy akgatunu papa’. Lu xaklipaxuwayaw».

15, 16. Chuna la wan 1 Timoteo 4:13, 15, ¿la tlan tlakg liwana nalichuwinanaw Dios chu namakgalhtawakgenanaw? (Na kaʼakxilhti recuadro « Tuku nakinkamakgtayayan tlakg liwana namakgantaxtiyaw taskujut nema kinkalakgayawakanitan»).

¹⁵ Atanu la tlan liwana namakgantaxtiyaw taskujut nema kinkalakgayawakanitan wa pi  tlakg liwana nakatsiniyaw la namakgalhtawakgenanaw. Makgapitsi tiku katsinikgo akgtum taskujut talakaskin tlakg nakamasiyanikan xlakata tlakg nakatsinikgo la natlawakgo. Nachuna akinin talakaskin pi chuntiya nakatsiniyaw xlakata tlan makgalhtawakgananin nalitaxtuyaw (Prov. 1:5; kalikgalhtawakga 1 Timoteo 4:13, 15).

¹⁶ ¿La tlan chuna natlawayaw? Talakaskin kuenta natlawayaw tuku kinkamasiyanikanan ktamakxtumit xla Xlatamat chu xtaskujut kstalanina Cristo. Anta kinkamasiyanikanan la tlakg tlan nalichuwinanaw Dios. Akgtum li’akxilhtit, tiku pulalin uma tamakxtumit kamaxki tastakyaw tiku matitaxtikgo xta’akgchuwinkan, kuenta katlawaw tastakyaw xlakata akinin nachuna nakinkamakgtayayan. Wa xlakata alistalh chuna katlawaw akxni nalichuwinanaw Dios. Atanu tuku tlan natlawayaw wa nawaniyaw tiku pulalin grupo niku tapakgsiyaw pi kakinkamakgtayan o akxtum kakinkatataxtun. Nachuna tlan nakawaniyaw amakgapitsi natalan tiku tlakg katsinikgoya la lichuwinankgo Dios, chatum precursor o superintendente de circuito. Putum tlan nakinkamakgtayayan nalimaklakaskinaw likgalhtawakga nema kgalhiyaw. Chuna tlakg nalipaxuwayaw akxni nalichuwinanaw Dios chu akxni namakgalhtawakgenanaw.

17. ¿La kinkakitaxtuniyan akxni liwana makgantaxtiyaw la lichuwinanaw Dios?

¹⁷ Akgtum lanka talakgalhaman pi Jehová kinkamaxkiyan talakaskin kskujnin nalitaxtuyaw (1 Cor. 3:9). Akxni kuenta tlawayaw «tuku tlakg xlakaskinka» chu kajwatiya nalilakgaputsayaw nalichuwinanaw Dios, xatapaxuwan tlawayaw (Filip. 1:10; Sal. 100:2). Akinin xlakskujnin Dios katsiyaw pi nakinkamaxkiyan litliwakga xlakata tlan namakgantaxtiyaw taskujut nema kinkalakgayawakanitan maski nakgalhiyaw taʼakglhuwit o wi tuku nila natlawayaw (2 Cor. 4:1, 7; 6:4). Maski lhuwa o ni lhuwa lichuwinanaw Dios, tuku tlakg xlakaskinka wa xliputum kinakujkan naskujnaniyaw xlakata uma nakinkamakgapaxuwayan (Gál. 6:4). Akxni liwana makgantaxtiyaw la lichuwinanaw Dios, limasiyaniyaw tapaxkit Jehová chu latamanin. ¿Tuku nakitaxtu alistalh? Biblia lichuwinan: «Komo chuna natlawaya nalakgtaxtuya wix chu nachuna tiku nakgaxmatnikgoyan» (1 Tim. 4:16).