Lu nitlan, pero akxni tlakg ktsukulh kstaka nialh ktsukulh paxki Jehová. Xaklakpuwan pi kincompañeros xalak escuela tlan xtlawakgo putum tuku xlakaskinkgo chu akit nachuna xaktlawaputun. Xaklakpuwan pi xlimapakgsin kinatlatni chu xlimapakgsin Biblia lu tuwa xmakgantaxtikan chu akgtum takuka xakliʼakxilha tuku xla kintakanajla. Maski nikxni klakpuwa pi Jehová ni xlama, xakmakgkatsi pi wi tuku xkintsankgani xlakata kintakanajla.

Xaklichuwinanku Dios, pero nialh lhuwa kilhtamaku xakkan lichuwinan, xlakata ni xkatsika tuku xaktlawama. Akxni xakkan lichuwinan Dios ni xaklakkaxwili tuku xakkama lichuwinan, wa xlakata tuwa xakmakgkatsi wi tiku naktachuwinan. Uma tlawalh pi ni xakkgalhilh tiku xaklakgapaxialhnalh chu tiku xaklimakgalhtawakgelh Biblia. Chu ni xaklipaxuwa xaklichuwinan Dios. Nachuna, uma tlawalh pi nitlan tuku xaklakpuwa xlakata la lichuwinankan Dios. Xaklakpuwan: «¡Nitu litaxtu tlawakan uma akgatunu semana chu akgatunu papaʼ!».

Akxni xakkgalhi 17 kata, xaktaxtuputuna kkinchik, wa xlakata kkalh latama kʼAustralia. Kinatlatni  lu xkililakgaputsakgo, pero xkilipawankgo chu xlakpuwankgo pi anta chuntiya xakkama skujnani Jehová chu xakkama liskuja xlakata kintakanajla.

Anta kʼAustralia lu nitlan la xwi kintakanajla, lakgachunin ni xakkan ktamakxtumit chu akxtum xakkatala lakgkgawasan tiku, xtachuna la akit, akgtum kilhtamaku xʼankgo ktamakxtumit chu atanu kilhtamaku xʼankgo wakgo kuchu chu xʼankgo tantlikgo. Klakpuwan pi xakwi kxkachikin Jehová, pero nachuna xaktanuma kkakilhtamaku chu xakmakgkatsi pi nila niku tlan xakmakgtapakgsi.

Makgapitsi kata alistalh klakgapasli chatum tala puskat tiku, maski xla ni xkatsi, wi tuku lu xlakaskinka kimasiyanilh. Kimasiyanilh pi lu xlakaskinka naklilakpuwan tuku tlakg xlakaskinka xwanit kkilatamat. Akxtum xakkatawi kgalhkitsis natalan lakpuskatin tiku ni xmakgaxtokgkgo chu kkawaniw superintendente de circuito chu xpuskat, Tamara, pi xtamakgxtakgkgolh akgtum semana niku akinin xakwilaw. Akxni tala wi tuku xtlawa kcongregación, Tamara akxtum xkinkatatawilayan chu akxtum xaklitsinaw. Uma lu xaklakgati. Ni xaklakpuwan pi chatum tala tiku lu tliwakga xkgalhi xtakanajla tlan talalinkan.

Tamara lu xpaxki xaxlikana. Lu xlakgati lichuwinan Dios chu uma xtlawa pi amakgapitsin nachuna xmakgkatsikgolh. Xtasiya pi lu xpaxuwa xlakata xmaxkima Jehová tuku tlakg tlan xkgalhi, chu akit ni xakpaxuwa xlakata ni lhuwa la xakskujnanima Jehová. Lu kimakgtayalh chuna la xlikatsi chu xlakata lu xpaxuwa. Xliʼakxilhtit wi tuku lu xlakaskinka kimalakapastaknilh: Jehová lakaskin pi «xatapaxuwan» naskujnaniyaw chu pixlanka nalimasiyayaw pi paxuwayaw (Sal. 100:2).

Akit na xakpaxuwaputun chuna la Tamara, pero xtalakaskin pi wi tuku xaklakgpalilh. Talakaskilh lhuwa kilhtamaku, pero alistalh wi tuku tsinu tsinu ktsukulh ktlawa. Ktsukulh lakkaxwili tuku xakkama kalitachuwinan latamanin akxni xaklichuwinalh Dios. Chu lakgachunin precursora auxiliar xaklitaxtu. Uma kimakgtayalh ni lu nakpekuan chu tlan xakkatachuwinalh latamanin. Xlakata tlakg xakmaklakaskin Biblia, tlakg xakpaxuwa. Ni makgas  kilhtamaku klakkaxwililh precursora auxiliar naklitaxtu akgatunu papaʼ.

Kiʼamigos ktsukulh kalimaxtu tiku tanu tanu xkatakan xkgalhikgo chu tliwakga xwankgonit xtakanajlakan chu tiku lu xpaxuwakgo chuna la kskujnanikgo Jehová. Xatlan xliʼakxilhtitkan kimakgtayalh liwana nakakxilha tuku tlakg xlakaskinka xakliʼakxilha kkilatamat chu tlakg liwana naklakputsanani Biblia. Tlakg xaklipaxuwa chuna la xaklichuwinan Dios chu alistalh precursora regular klitaxtulh. Xlimakgtumku lu xakpaxuwa chu tlan xakmakgkatsi kcongregación.

Akgtum kata alistalh, klakgapasli Alex, chatum lu tlan tala chu tiku lu tlan xlikatsi, tiku xpaxki Jehová chu xlakgati xlichuwinan Dios. Xla siervo ministerial xlitaxtu chu akgchaxan kata lata precursor xlitaxtu. Na xʼanit lichuwinan Dios kMalaui makgapitsi papaʼ, niku tlakg xtalakaskin tiku nalichuwinankgo Dios. Anta akxtum xkatawi makgapitsi misioneros tiku wilinikgolh lu xatlan liʼakxilhtit chu maʼakgpuwantinikgolh chuntiya pulana naputsa xTamapakgsin Dios.

Kkata 2003, Alex chu akit ktamakgaxtokgwi, chu kinchatiykan akxtum chuntiya kskujnaniw Jehová putum kilhtamaku. Lhuwa tuku lu xlakaskinka kkatsininitaw chu Jehová pulaklhuwa la kinkasikulunatlawanitan.

Kkata 2009, kinkawanikan pi xakkaw kTimor Oriental chuna la misioneros, akgtum aktsu kachikin lakatsu kʼIndonesia. Lu kaks klilakawaw, xakpaxuwamaw, pero nachuna xakpekuamaw. Akgkitsis papaʼ alistalh kchaw kDili, xcapital uma país.

Xlakaskinka wi tuku xasasti xakkatsiniw: talismanin nema xʼanan anta, tachuwin, liwat chu chuna la xlatamakgo latamanin. Akxni xaklichuwinanaw Dios, xakkatekgsaw latamanin tiku lu lakglimaxkgenin xwankgonit, ni xʼankgonit kʼescuela chu lu nitlan xkalikatsinikanit. Chu xakkalakgapasaw makgapitsin tiku nitlan la xwilakgolh chu nitlan  xmakgkatsikgo xpalakata xʼanan guerra chu xkatlawanikanit tuku nitlan. *

¡Tlan xkinkakitaxtuniyan la xaklichuwinanaw Dios! Akgtum liʼakxilhtit, akgtum kilhtamaku ktekgsli chatum aktsu tsumat tiku xkgalhi 13 kata chu xwanikan María, tiku lu xlipuwama. * Nina akglhuwa kata xtse xninit chu xtlat nikxni xtawila kxchik. Xtachuna la lakkamanan tiku xkgalhikgo watiya kata nema xkgalhi María, xla ni xkatsi tuku xʼama tlawa kxlatamat. Klakapastaka akgtum kilhtamaku akxni lu xtasama chu kiwanilh la xmakgkatsi. Pero akit ni xakʼakgatekgsni xlakata nina liwana xakchuwinan xtachuwin. Wa xlakata ktlawanilh oración Jehová chu kskinilh pi xkimakgtayalh nakmakgpuwantini chu ktsukulh likgalhtawakgani textos xalak Biblia nema xmakgoxamixilh. Makgapitsi kata nema titaxtukgolh, kakxilhli la xaxlikana lakgpalinilh xtalakapastakni María, chuna la xtasiya chu putuminika xlatamat. Tamunulh chu la uku kalimakgalhtawakge Biblia latamanin. Kgalhi akgtum lanka familia xaʼespiritual chu makgkatsi pi paxkikan.

Xlikana pi Jehová lu sikulunatlawanit taskujut kTimor Oriental. Lhuwa kinatalankan tamunukgonit kʼumakgolh 10 kata. La uku, lhuwa precursores litaxtukgo, siervos ministeriales chu lakgkgolotsin. Amakgapitsi skujkgo kʼOficina Remota de Traducción chu makgtayanankgo akxni kamatitaxtikan kilikgalhtawakgakan ktachuwin nema chuwinankan anta. Lu xaklipaxuwa xakkakgaxmatni akxni xkilhtlikgo ktamakxtumit, akxni xakakxilha la xlitsinkgo chu akxni xakakxilha la kstaktilhama xtakanajlakan.

Latamat anta kTimor Oriental ni xtachuna la kʼAustralia, pero ni anan atanu niku tlakg xakpaxuwalh. Xmin kilhtamaku xakkanaw klaktsu putlaw niku xtanumakgolh lhuwa latamanin tiku xʼankgonit tamawakgo xaskawawa o xaskakni skiti chu lhuwa verduras. Makgapitsi kilhtamaku, xaklimakgalhtawakgenanaw Biblia klaktsu chiki niku lu klhkaknan, piso xatiyat xwanit chu xʼanan lhuwa xtilan nema xlaputlakga. Maski lhuwa tuku ktitaxtuw, makglhuwa klakpuwa: «¡Lu klipaxuwa pi unu kwi!».

Akxni klilakpuwan putum tuku ktitaxtulh makgasa, lu kkapaxtikatsini kinatlatni pi lu liskujkgolh xlakata nakimasiyanikgo xlakata Jehová chu ankgalhin kimakgtayakgolh, asta maski lu tuwa tuku ktitaxtulh akxni aku xakstakma. Tachuwin nema tatsokgtawilatnit kProverbios 22:6 kgantaxtunit kkimpalakata. Kintse chu kintlat lu lipaxuwakgo tuku ktlawanitaw Alex chu akit; lu lipaxuwakgo akxni akxilhkgo la kinkamaklakaskinan Jehová. Lata kkata 2016 kkalakgapaxialhnanaw congregaciones nema tapakgsinikgo sucursal xalak Australasia chuna la viajantes.

Nila kkanajla pi akgtum takuka xakliʼakxilha chuna la xaklichuwinan Dios xlakata la uku lu klakgati klichuwinan. Kakxilhnit pi xlikana kpaxuwa xlakata xliputum kinaku kskujnani Jehová maski naktitaxtu lhuwa taʼakglhuwit kkilatamat. Umakgolh 18 kata chuna la akxtum kskujnanimaw Jehová, Alex chu akit, lu klipaxuwanitaw. La uku kakxilha pi lu xlikana tuku David wanilh Jehová, akxni wa: «Putum tiku nalitatsekgkgoyan napaxuwakgo; ankgalhin pixlanka nalimasiyakgo pi xlikana paxuwakgo [...], chu tiku paxkikgo mintukuwani xlikana napaxuwakgo xlakata kamakgtayaya» (Sal. 5:11).