¿Tuku xlakata akxni x’amaja ni Jesús wa xtachuwin David nema likgalhtawakgayaw kSalmo 22:1?

Chuna la wan Mateo 27:46, akxni x’amaja ni, Jesús wa: «KiDios, kiDios, ¿tuku xlakata kiʼakgxtakgmakganita?». Akxni chuna wa, Jesús makgantaxtilh tuku David xwanit pi xʼama la anta kSalmo 22:1 (Mar. 15:34). Jesús ni wa umakgolh tachuwin xlakata xlipuwama o xlakata nialh xkgalhi takanajla. Liwana xʼakgatekgsa tuku xlakata xʼama ni chu xatapaxuwan chuna xtlawaputun (Mat. 16:21; 20:28). Na xkatsi pi Jehová xlimakglhtit xwanit xtamakgtay xlakata tlan xmakgnika (Job 1:10). Chuna Jehová mastalh talakaskin pi Jesús xlimasiyalh pi nikxni xʼama makgatsankganani asta maski lu xmapatinika akxni xmakgnika (Mar. 14:35, 36).

Komo chuna, ¿tuku xwamputun Jesús akxni wa umakgolh tachuwin? Nila liwana wanaw tuku xlakata, pero kalichuwinaw makgapitsi tuku xlakata max chuna wa. *

Akxni Jesús wa umakgolh tachuwin, max xlichuwinama pi Jehová nitu xʼama tlawa xlakata ni xmakgnika. Xtalakaskin pi Jesús kxokgolh talakgmaxtut chu Jehová ni xmakgtayalh. Xla chatum lataman xwanit chu xtalakaskin «xnilh xpalakatakan putum latamanin» (Heb. 2:9).

Max Jesús wa kaj ni lhuwa tachuwin nema min kSalmo 22 xlakata latamanin xlakapastakkgolh putuminika salmo.  Amacha kilhtamaku, judíos xlismanikgo katsinikgo tuku xwankgo salmos. Wa xlakata, komo xkamalakapastakakan akgtum versículo, uma xtlawa pi xlakapastakkgolh putuminika salmo. Komo wa uma tuku xtlawaputun Jesús, xkamakgtayaputun xtamakgalhtawakgen judíos xlakapastakkgolh makgapitsi salmo nema xlichuwinankgo la xʼama ni (Sal. 22:7, 8, 15, 16, 18, 24). Nachuna, xaʼawatiya tuku lichuwinan uma salmo, litachuwinan pi xlimapakgsin Jehová xʼama tlajanan chu xʼama “talakgatumi kxliputum katiyatni” (Sal. 22:27-31).

Akxni wa xtachuwin David, Jesús max xlimasiyaputun pi xla ni xlin kuenta. Akxni nina xmakgnikan, Jesús patilh xlakata limawakaka pi xlakawanima Dios akxni lakatsalaka limapakgsin chuna la lakputsananika (Mat. 26:65, 66). Kaj lakapala lakputsananika, katsisni xwanit chu lakatsalaka limapakgsin nema xlakkaxwilikanit umacha kilhtamaku (Mat. 26:59; Mar. 14:56-59). Akxni wa umakgolh tachuwin, Jesús max xlichuwinama pi nitu xtlawanit xlakata chuna namalakgaxokgekan.

Jesús max xkamalakapastakniputun pi komo David, tiku xtsokgwilinit uma salmo, xpatinama ni xkilhchanima pi Jehová xlakgmakganit. Ni xwamputun pi David nialh xkgalhi takanajla, xlakata akxni xtlawanit uma takgalhskinin, wa pi xlipawan pi Dios tlan xkalakgmaxtu xlakskujnin tiku ni xmakgxtakgkgolh, chu Jehová chuntiya sikulunatlawalh (Sal. 22:23, 24, 27). Xtachuna la uma, xlakata Jesús, «xKgawasa David», xpatinama kkgantum kiwi, ni xkilhchanima pi Jehová xlakgmakganit (Mat. 21:9).

Nachuna max Jesús xlichuwinama pi lu xkatsani pi Jehová xmakglhtilh xtamakgtay xlakata nalimasiya pi ni makgatsankganani. Lata akxni Adán chu Eva makglakgalhinankgolh, xtalakaskin pi Jesús xpatinalh chu xnilh. Pero uma ni wa tuku Jehová xlakaskin pi xkgantaxtulh lata xapulana. Jesús nitu xtlawanit tuku nitlan, pero xtalakaskin pi xpatinalh chu xnilh xlakata nakgalhti xtaʼakgsanin Satanás, chu xlakata naxokgo chu namakglhtinampara tuku xmakgatsankgakgonit latamanin (Mar. 8:31; 1 Ped. 2:21-24). Uma kajwatiya chuna xkgantaxtulh komo xlimakgtumku kxlatamat Jehová xmakglhtilh xtamakgtay.

Atanu tuku xlakata Jesús max chuna wa, wa xlakata xkamakgtayaputun xtamakgalhtawakgen kaj wa nalilakpuwankgo tuku xlakata Jehová mastalh talakaskin pi chuna xmakgnika. * Jesús xkatsi pi komo xmakgnika chuna la tiku nitlan likatsi kkgantum kiwi x’ama kamaʼakgchakgxni lhuwa latamanin (1 Cor. 1:23). Komo kajwatiya xlilakpuwankgolh tuku xlakata chuna nilh, xtamakgalhtawakgen x’amakgo akgatekgskgo tuku xlikana xkilhchanima uma tuku xtlawama (Gál. 3:13, 14). Chu ni x’amakgo akxilha chuna la komo tiku xtawanit tuku nitlan, wata chuna la xlakgmaxtunakan xliʼakxilhkgolh.

Kaxatukawa tuku xlakata Jesús wa umakgolh tachuwin, liwana xkatsi pi akxni xnilh kkgantum kiwi xʼama makgantaxti xtalakaskin Jehová. Akxni wa umakgolh tachuwin, wampa: «¡Kgantaxtunit!» (Juan 19:30; Luc. 22:37). Chuna, talakaskilh pi Jehová xmakglhtilh xtamakgtay kaj tsinu kilhtamaku xlakata tlan xmakgantaxtilh putum tuku xminit tlawa kKatiyatni. Uma tlawalh pi tlan xkgantaxtulh putum tuku xtatsokgnit xpalakata «kxLimapakgsin Moisés chu kxtatsokgnikan Palakachuwinanin chu kSalmos» (Luc. 24:44).