AKXNI lu lakgaputsayaw lu nitlan kinkamamakgkatsiniyan xtachuna la xliw akgtum tsinka takuka (Prov. 12:25). ¿Minit kilhtamaku chuna makgkatsinita? ¿Makgkatsiya pi nialhla tayaniya? Komo chuna, ni miʼakstu chuna makgkatsiya. Makgapitsi akinin wi tiku kuenta tlawamaw, max nilh tiku lu xpaxkiyaw, max wi tuku nitlan kinkaʼakgspulan xlakata lalh tuku masputunan o max atanu tuku titaxtunitaw nema lu kinkamakgatlakgwanitan kkimaknikan, kkintalakapastaknikan chu tuku makgkatsiyaw. ¿Tuku nakinkamakgtayayan nialh lu nalakgaputsayaw? a

Xliʼakxilhtit mapakgsina David tlan nakinkamakgtayayan nakatsiyaw la namachokgoyaw chuna la lakgaputsayaw. Xla lhuwa tuku titaxtulh, chu asta kalipekua wililh xlatamat (1 Sam. 17:34, 35; 18:10, 11). ¿La machokgolh David tuku lu xlilakgaputsama? ¿Tuku tlan natlawayaw xlakata nastalaniyaw xliʼakxilhtit?

David pulaklhuwa taʼakglhuwit titaxtulh. Akgtum liʼakxilhtit, kaʼakxilhwi tuku lalh akxni xtsalanima mapakgsina Saúl xlakata xmakgniputun. Akxni David chu ksoldados kitaspitkgolh niku kitalatlawanankgolh, katsikgolh pi xtalamakgasitsinkan xkamakgkgalhankgonit tuku xkgalhikgo, klhkuyukanit xchikkan chu xkalinkanit xfamiliajkan. ¿Tuku tlawalh David? Biblia wan: «David chu ksoldados xatalipuwan tsukukgolh tasakgo. Lu tasakgolh pi asta nialh xkgalhikgo litliwakga xlakata tlan chuntiya natasakgo». Chu ni kajwatiya uma, ksoldados tiku xkalipawan «xaktalamakgniputunkgo» (1 Sam. 30:1-6). David pulaktutu lu tuwa taʼakglhuwit xtitaxtuma: xfamilia katuwa xwi, ksoldados xmakgniputunkgo chu mapakgsina Saúl xputsastalanima. ¿Lilakpuwana la xlakgaputsama David?

¿Pero tuku tlawalh? Lakapala «putsalh Jehová xDios xlakata tlan xkgalhilh litliwakga». ¿Chu la tlawalh? David xlismaninit xtlawani oración Jehová xlakata naskini tamakgtay chu xlilakpuwan tuku Dios xtlawanit makgasa xpalakata (1 Sam. 17:37; Sal. 18:2, 6). David na katsilh pi xmaklakaskin xtapulalit Jehová, wa xlakata kgalhskilh Dios tuku xlitlawat xwanit. Akxni Jehová kgalhtilh, lakapala wi tuku tlawalh. Chu Jehová sikulunatlawalh David chu ksoldados, chu kamaspitniparaka xfamiliajkan chu tuku xkatapakgsini (1 Sam. 30:7-9, 18, 19). ¿Akxilhti pulaktutu tuku tlawalh David? Tlawanilh oración Jehová xlakata kskinilh tamakgtay, lilakpuwa la Dios xlikatsininit makgasa chu tlawalh chuna la Jehová xwaninit. ¿La tlan nastalaniyaw xliʼakxilhtit David? Kaʼakxilhwi pulaktutu.

1. Katlawaw oración. Akxni natsukuyaw lakgaputsayaw, tlan natlawaniyaw oración Jehová xlakata nakinkamakgtayayan nakatsiyaw tuku natlawayaw. Komo natlawaniyaw Jehová akgtum lhman oración chu nawaniyaw putum tuku lu lilakgaputsayaw tlan namakgkatsiyaw. O na tlan natlawaniyaw ni lhman oración chu pistsu komo kajwatiya tlan chuna tlawayaw uma kilhtamaku. Makgatunu akxni skiniyaw tamakgtay Jehová, na limasiyamaw watiya talipaw nema xkgalhi David. Xla wa: «Jehová wa lanka kinchiwix, kilitliwakga, kilakgmaxtuna. KiDios wa kinchiwix, tiku klitatsekga» (Sal. 18:2). ¿Xlikana makgtayanan natlawaya oración? Chatum precursora tiku wanikan Kahlia wan: «Akxni ktlawanita oración tlan  kmakgkatsi. Oración kimakgtaya nachuna naklakpuwan la Jehová chu tlakg naklipawan». Xlikana pi oración akgtum lu stlan xtamaskiwin Jehová nema kinkamakgtayayan nialh lu nalakgaputsayaw.

2. Kalilakpuwaw. Akxni lilakpuwana tuku titaxtunita makgasa, ¿lakapastaka pulaktum tuku ni xtayani komo ni xmakgtayan Jehová? Akxni lilakpuwanaw la Jehová kamakgtayalh xlakskujnin xala makgasa, chu la kinkamakgtayanitan akinin, tlakg lipawanaw chu tlan makgkatsiyaw (Sal. 18:17-19). Chatum kgolotsin tiku wanikan Joshua wa: «Ktsokgwilinit oraciones nema Jehová kinkgalhtinit. Chu chuna tlan klakapastaka kilhtamaku akxni wi tuku kskinilh chu xla kimaxkilh tuku xakmaklakaskin». Liwana tasiya pi akxni lilakpuwanaw putum tuku Jehová tlawanit kimpalakatakan, tatliwakglhaw xlakata chuntiya namakgatlajayaw tuku lilakgaputsayaw.

3. Wi tuku katlawaw. Akxni nina laksakaw tuku natlawayaw, tlan naputsayaw tamakgtay kBiblia, xlakata wa tlakg xatlan tapulalit nema anan (Sal. 19:7, 11). Lhuwa akxilhkgonit pi akxni lakputsananikgo akgtum versículo, liwana akgatekgskgo la tlakg tlan nalilatamakgo. Jarrod, tiku kgolotsin litaxtu, wan: «Akxni tlakg klakputsanani akgtum versículo tlakg lhuwa tuku kkatsini. Chuna, kʼakgatekgsa tuku Jehová wan, xtachuwin chan asta kkinaku chu kliskuja xlakata naklikatsi chuna la xla lakgati». Akxni putsayaw xtapulalit Jehová anta kBiblia chu kgalhakgaxmataw xlimapakgsin, tlakg ni tuwa katimakgkatsiw nakgalhiyaw takaksni chu tapaxuwan akxni lu lakgaputsamaw.

David liwana xkatsi pi xlakata tlan xmachokgolh chuna la xlakgaputsa xmaklakaskin xtamakgtay Jehová. Chu lu xpaxtikatsini tamakgtay nema xla xmaxki chu asta wa: «Tlan ktawaka kʼakgtum patsaps xlakata xlitliwakga Dios». Chu wampa: «Dios xaxlikana wa tiku kimaxki litliwakga» (Sal. 18:29, 32). Max nalakpuwanaw pi kintaʼakglhuwitkan xtachuna la akgtum patsaps nema nila titaxtukan, pero xlakata xtamakgtay Jehová tlan natayaniyaw. Komo natlawaniyaw oración Jehová xlakata naskiniyaw xtamakgtay, nalilakpuwanaw putum tuku tlawanit kimpalakatakan chu natlawayaw tuku xla lakaskin, liwana nakatsiyaw pi xla nakinkamaxkiyan litliwakga chu liskgalala nema maklakaskinaw xlakata namachokgoyaw tuku lilakgaputsayaw.