Natalan xalak congregación naʼakxilhkgo pi komo uma chixku lakxtlawalh xtamakgaxtokgat, akxni tatamakgaxtokgpara atanu puskat uma tamakgaxtokgat tlan wi kxlakatin Dios. Xlakata naʼakgatekgsaw tuku xlakata chuna lakpuwankgo, kalichuwinaw tuku wa Jesús xlakata lakxtlawakan tamakgaxtokgat chu tamakgaxtokgparakan.

Anta kMateo 19:9, Jesús lichuwinalh pulaktum tuku xlakata tlan nalakxtlawakan akgtum tamakgaxtokgat. Anta wan: «Komo chatum chixku lakxtlawa xtamakgaxtokgat, pero xpuskat nitu tlawanit talakgxtumit nema ni xlitatlawat, chu natatamakgaxtokga atanu, akgskgawima tiku tamakgaxtokga». Tuku wa Jesús kinkamasiyaniyan 1) pi akxni chatum tlawa talakgxtumit nema ni xlitatlawat kajwatiya chuna tlan nalakxtlawakan tamakgaxtokgat chu 2) pi akxni chatum chixku lakxtlawa xtamakgaxtokgat chu ni wa xpalakata tuku wan Biblia chu atanu tiku tatamakgaxtokga, akgskgawima xpuskat. a

¿Kilhchanima xtachuwin Jesús pi komo chatum chixku tlawa talakgxtumit nema ni xlitatlawat chu lakxtlawa xtamakgaxtokgat tlan natamakgaxtokgpara? Nichuna. Akxni xapuskat o xachixku tlawa talakgxtumit nema ni xlitatlawat, tiku akgskgawika tlan nalaksaka komo natapati o ni tiku tamakgaxtokga. Komo ni natapati chu nalakxtlawakgo xtamakgaxtokgatkan kxlakatin mapakgsinanin, xchatiykan tlan wi tiku natatamakgaxtokgparakgo akxni liwana xapakgonit xtamakgaxtokgatkan.

Pero, max tiku akgskgawika ni lakxtlawaputun xtamakgaxtokgat chu wan pi tapatiputun xchixku. Pero ¿chu komo tiku tlawalh talakgxtumit nema ni xlitatlawat nalakgmakgan tuku nawani xpuskat chu chuntiya nalakxtlawa xtamakgaxtokgat? Xlakata xpuskat tapatinamputun chu ni lakxtlawaputun xtamakgaxtokgat, xachixku nila atanu tiku katitamakgaxtokgli. Komo xla ni lakgpali tuku tlawaputun chu lakatsala tuku wan Biblia chu atanu tiku natatamakgaxtokga maski nichuna xlitlawat, amakgtum akgskgawipara xpuskat. Lakgkgolotsin xalak congregación natlawaparakgo atanu comité judicial xlakata naʼakxilhkgo uma talakgalhin (1 Cor. 5:1, 2; 6:9, 10).

Komo chatum chixku natamakgaxtokgpara chu lakatsala xtastakyaw Biblia, ¿la akxilha congregación uma xasasti tamakgaxtokgat chu xtamakgaxtokgat nema xkgalhi xapulana? Chuna la masiya Biblia, ¿nina laklanit xapulana tamakgaxtokgat? Tiku akgskgawika, ¿tlanku nalaksaka komo natapati tiku xchixku xwanit? ¿Congregación xliʼakxilhli pi xasasti tamakgaxtokgat tlawama talakgxtumit nema ni xlitatlawat?

Asta la uku, congregación xlakpuwankgo pi xasasti tamakgaxtokgat tlawama talakgxtumit nema ni xlitatlawat xlakata tiku akgskgawika lamajku, nitu tamakgaxtokgma chu ni wa tiku tlawama talakgxtumit nema ni xlitatlawat. Pero akxni Jesús lichuwinalh xlakata lakxtlawakan tamakgaxtokgat  chu tamakgaxtokgparakan, ni lichuwinalh tiku akgskgawikan. Wata lichuwinalh, pi chixku tiku lakxtlawa xtamakgaxtokgat chu lakatsala tuku wan Biblia chu atanu tiku tatamakgaxtokga akgskgawima xpuskat. Uma wamputun pi, lakxtlawakan tamakgaxtokgat chu atanu tiku tatamakgaxtokgkan, lakxtlawa xapulana tamakgaxtokgat chu chuna la wa Jesús xtachuna akgskgawikan tiku xtamakgaxtokgkan.

Akxni wi tiku lakxtlawa xtamakgaxtokgat chu atanu tiku tatamakgaxtokga, tiku akgskgawika nialhla laksaka komo natapati o ni. Wa xlakata tiku akgskgawika nialh lilakgaputsa uma. Nachuna, maski tiku akgskgawika alistalh nani, natamakgaxtokgpara o xtlawalh talakgxtumit nema ni xlitatlawat, uma ni talakgpali chuna la congregación naʼakxilha xasasti tamakgaxtokgat. b

Kxapulana liʼakxilhtit nema lichuwinawa, xachixku akgskgawilh xpuskat chu uma tlawalh pi xlakxtlawakgolh xtamakgaxtokgatkan. Pero ¿tuku xlalh komo xachixku ni xtlawalh talakgxtumit nema ni xlitatlawat pero xlakxtlawalh xtamakgaxtokgat chu amakgtum xtamakgaxtokgpa? ¿O tuku xlalh komo xachixku ni xtlawalh talakgxtumit nema ni xlitatlawat akxni nina xlakxtlawa xtamakgaxtokgat, pero chuna tlawalh akxni xlakxtlawanita xtamakgaxtokgat chu alistalh atanu tiku tatamakgxtokga maski xpuskat xtapatiputun? Umakgolh liʼakxilhtit, masiya pi akxni lakxtlawakan tamakgaxtokgat chu tamakgaxtokgparakan xtachuna akgskgawikan tiku tamakgaxtokgkan chu uma lakxtlawa xapulana tamakgaxtokgat. Xasasti tamakgaxtokgat kxlakatin mapakgsinanin talhkatawilanit. Revista La Atalaya 15 xla febrero kata 1980, página 30, lichuwinalh pi uma lataman kgalhi xasasti tamakgaxtokgat «chu nila namasputu xlakata nalakgtaspita xapulana xpuskat; xapulana tamakgaxtokgat sputli xlakata lakxtlawakgolh xtamakgaxtokgatkan, wi tiku akgskgawinalh chu achatum tamakgaxtokgpa».

Uma xasasti taʼakgatekgsni ni tlawa pi ni xlakaskinka naliʼakxilhkan tamakgaxtokgat o akxni wi tiku akgskgawi xpuskat ni wamputun pi uma ni akgtum lanka talakgalhin. Komo chatum chixku lakxtlawa xtamakgaxtokgat pero ni wa xlakata tuku wan Biblia chu atanu tiku tatamakgaxtokga maski nichuna xlitlawat, lakgkgolotsin natlawakgo akgtum comité judicial xlakata uma chixku akgskgawima xpuskat. (Komo xasasti xpuskat kstalanina Cristo, na xlitatlawanit akgtum comité judicial xlakata na lin kuenta xlakata chixku akgskgawima xpuskat). Maski xasasti tamakgaxtokgat liʼakxilhkan pi niti akgskgawimakgo, akglhuwa kata xachixku nila katimakgatsilh tuku taskin xlakata wi tuku nalakgataya kcongregación. Natalakaskin nakgalhkgalhikan pi latamanin nialh nalichuwinankgo tuku nitlan tlawalh. Nachuna, lakgkgolotsin kuenta xlitlawatkan tuku titaxtuma kxlatamat xapulana xpuskat tiku akgskgawilh, chu xalaktsujku xkamanan tiku kaʼakgxtakgwililh (Mal. 2:14-16).

Kstalaninanin Cristo xasanto akxilhaw tamakgaxtokgat chuna la Jehová akxilha, wa xlakata ni lakxtlawayaw tamakgaxtokgat chu ni atanu tiku tamakgaxtokgaw, liwaka komo Biblia ni wan pi tlan lakxtlawakan (Ecl. 5:4, 5; Heb. 13:4).