1. ¿Tuku liwana katsiyaw?

 XLAKSKUJNIN Jehová katsiyaw pi xla kinkapaxkiyan chu lakaskin pi tlan kakinkakitaxtunin (Rom. 8:35-39). Na liwana katsiyaw pi akxni kgalhakgaxmataw tastakyaw xalak Biblia tlan kinkakitaxtuniyan (Is. 48:17, 18). Pero ¿tuku natlawayaw komo kaj xalan nakinkalakgchinan tuku nitlan?

2. ¿Tuku max tuwa nakinkalakgchinan chu tuku max lilakpuwanaw?

² Putum kskujnin Jehová kinkalakgchinan tuku nitlan. Akgtum liʼakxilhtit, max chatum tiku xalak kifamiliajkan natlawa o nawan tuku nitlan nakinkamamakgkatsiniyan. Max kgalhiyaw akgtum tajatat nema ni kinkamaxkiyan talakaskin tlakg naskujnaniyaw Jehová. Max patinamaw xlakata wi tuku masputunalh. O max kinkaputsastalanimakan xlakata kintakanajlakan. Akxni titaxtuyaw umakgolh tuku nitlan, max lakpuwanaw: «¿Tuku xlakata chuna kiʼakgspulama? ¿Wi tuku nitlan ktlawanit? ¿Wamputun uma pi Jehová nialh kisikulunatlawama?». Komo minit kilhtamaku chuna makgkatsinita, ni kataxlajwani. Lhuwa kskujnin Jehová tiku ni makgxtakgkgolh nachuna titaxtukgolh (Sal. 22:1, 2; Hab. 1:2, 3).

3. ¿Tuku kinkamasiyaniyan Salmo 34:19?

³ (Kalikgalhtawakga Salmo 34:19). Kʼuma versículo lichuwinankan pulaktiy tuku lu xlakaskinka: 1) tiku xaʼakgstitum titaxtukgo tuku tuwa chu 2) Jehová kamakgtaya natayanikgo. Pulaktum la kinkamakgtayayan Jehová natayaniyaw tuku tuwa, wa pi ni nalakpuwanaw pi akinin nitu kintikaʼakgspulan kʼuma kakilhtamaku. Xlikana pi Jehová kinkawaniyan pi  napaxuwayaw komo naskujniyaw, pero uma ni wamputun pi ni katikgalhiw taʼakglhuwit la uku (Is. 66:14). Xla lakaskin pi kalilakpuwaw tuku kinkamalaknuninitan, latamat nema ni kgalhi xlisputni (2 Cor. 4:16-18). Chu xlakata nina chin uma kilhtamaku, Jehová kinkamakgtayayan natayaniyaw chali chali (Lam. 3:22-24).

4. ¿Tuku nalichuwinanaw kʼuma artículo?

⁴ Kʼuma artículo, nalichuwinanaw makgapitsi xliʼakxilhtitkan kskujnin Jehová xalamakgasa chu xala uku. Chuna la naʼakxilhaw, max kaj lakapala nakinkalakgchinan taʼakglhuwit. Pero komo lipawanaw Jehová, xla ankgalhin nakinkamakgtayayan (Sal. 55:22). Chuna la nalichuwinantilhayaw umakgolh liʼakxilhtit, kalakpuwanti: «¿Tuku xaktlawalh komo akit chuna xaktitaxtulh? ¿La kimakgtaya uma liʼakxilhtit tlakg naklipawan Jehová? ¿Tuku kimasiyani?».

5. ¿Tuku nitlan tlawanilh Labán Jacob? (Kaʼakxilhti xmakni revista).

⁵ Xlakskujnin Jehová xalamakgasa titaxtukgolh tuku nitlan nema nikxni xlakpuwankgonit pi chuna natitaxtukgo. Kalilakpuwaw Jacob. Xtlat limapakgsilh pi xtatamakgaxtokgli chatum xtsumat Labán, chatum tiku xalak xfamilia xwanit tiku na xkakninani Jehová. Chu wanilh pi Jehová xʼama sikulunatlawa (Gén. 28:1-4). Jacob tlawalh tuku xlilat xwanit: makgxtakgli Canaán chu alh asta niku xlama Labán, tiku xkgalhi chatiy xlaktsuman, Lea chu Raquel. Jacob lakgatilh tiku tlakg xaʼaktsujku xwanit, Raquel. Xlakata xtatamakgaxtokgli, xatapaxuwan taskujli Labán akgtujun kata (Gén. 29:18). Pero nichuna kitaxtulh la Jacob xlakpuwan. Labán akgskgawilh chu tamamakgaxtokgli Lea, xtsumat tiku tlakg lankata xwanit. Akgtum semana alistalh, maxkilh talakaskin pi xtatamakgaxtokgli Raquel, pero wanilh pi xtaskujpa aʼakgtujun kata (Gén. 29:25-27). Chu ni kajwatiya uma. Labán nitlan likatsinilh Jacob kxtaskujut. ¡Ni lakatitum maxkilh xtaskgaw akgpuxam kata! (Gén. 31:41, 42).

6. ¿Tuku atanu tuwa titaxtulh Jacob?

⁶ Jacob titaxtupa atanu tuku nitlan. Xkgalhi akgtum lanka familia, pero ni putum xkamanan tlan xlatalalin. Asta stamakgankgolh José xlakata skujni xlitaxtulh. Nachuna chatiy xkamanan Jacob, Simeón chu Leví, maxkajwanikgolh xtukuwani xfamilia chu xtukuwani Jehová. Chu Raquel, xpuskat tiku tlakg xpaxki, nilh akxni malakachinilh xlichatiy xkgawasa. Alistalh, xlakata analh akgtum lanka tatsinksni, Jacob alh latama kʼEgipto akxni xlina kata (Gén. 34:30; 35:16-19; 37:28; 45:9-11, 28).

7. ¿La limasiyalh Jehová pi Jacob xmakgapaxuwa?

⁷ Maski titaxtulh umakgolh tuku nitlan, Jacob nikxni makgatsankgalh takanajla nema xkgalhini Jehová chu xtamalaknun. Chu Jehová liwana limasiyalh pi Jacob lu xmakgapaxuwa. Akgtum liʼakxilhtit, maski Labán makglhuwa akgskgawilh, Jacob lhuwa tuku maʼakgstokgwililh xlakata Jehová ksikulunatlawama. Chu max Jacob lu paxtikatsinilh Dios akxni tatanokglhpa José, tiku xlakpuwan pi xninita. Jacob tayanilh putum uma tuku tuwa xlakata lu tlan xtalalin Jehová (Gén. 30:43; 32:9, 10; 46:28-30). Akinin na tlan natayaniyaw putum tuku nitlan nakinkalakgchinan komo lu tlan talalinaw Jehová.

8. ¿Tuku lu xtlawaputun mapakgsina David?

⁸ Mapakgsina David nila tlawalh putum tuku xtlawaputun xlakata naskujnani Jehová. Akgtum liʼakxilhtit, xla lu xtlawaputun xtemplo Dios. Akxni litachuwinalh uma palakachuwina Natán, xla wanilh: «Katlawa tuku lakpuwana kminaku, xlakata xaxlikana  Dios makgtayaman» (1 Crón. 17:1, 2). ¡David max lu paxuwalh akxni kgaxmatli uma! Max lakapala tsukulh lakkaxwili la natlawa uma lanka taskujut.

9. ¿Tuku tlawalh David akxni ni kgantaxtulh tuku xlakpuwanit?

⁹ Pero ni lhuwa kilhtamaku titaxtulh, xpalakachuwina Jehová liminilh nixatlan tamakatsin. Watiya uma katsisni, Jehová wanilh Natán pi David ni wa tiku xʼama tlawa templo, wata chatum xkgawasa tiku xʼama tlawa (1 Crón. 17:3, 4, 11, 12). ¿Tuku tlawalh David akxni kgaxmatli uma tamakatsinin? Lakgpalilh tuku xlakkaxwilinit natlawa. Mastokgli tumin chu putum tuku xʼama tamaklakaskin xlakata xkgawasa, Salomón, xtlawalh uma templo (1 Crón. 29:1-5).

10. ¿La sikulunatlawalh Jehová David?

¹⁰ Akxni Jehová nina xmakatsini David pi ni wa tiku xʼama tlawa templo, tatlawalh akgtum talakkaxlan: malaknunilh pi chatum tiku xalak xfamilia xʼama mapakgsinan putum kilhtamaku (2 Sam. 7:16). Kxasasti kakilhtamaku, akxni mapakgsinama nawan Cristo Akgtum Mil Kata, David max lu napaxuwa akxni nakatsi pi Mapakgsina kxfamilia mincha. Uma liʼakxilhtit kinkamasiyaniyan pi maski nila tlawayaw putum tuku tlawaputunaw xlakata naskujnaniyaw Jehová, kiDioskan tlan nakinkalisikulunatlawayan tuku ni xkgalhkgalhimaw.

11. ¿Tuku tasikulunalin makglhtinankgolh kstalaninanin Cristo maski Tamapakgsin ni chilh akxni xkgalhkgalhimakgo? (Hechos 6:7).

¹¹ Kstalaninanin Cristo tiku xlamakgo kxapulana siglo titaxtukgolh tuku tuwa nema ni xkgalhkgalhimakgo. Akgtum liʼakxilhtit, xkgalhkgalhimakgo pi xchilh xTamapakgsin Dios, pero ni xkatsikgo tuku kilhtamaku chuna xʼama la (Hech. 1:6, 7). Wa xlakata, ¿tuku tlawakgolh? Chuntiya lichuwinankgolh Dios. Akxni akxilhkgolh pi xatlan tamakatsinin xlichuwinamaka klakalhuwa kachikinin, katsikgolh pi Jehová ksikulunatlawama xtaskujutkan (kalikgalhtawakga Hechos 6:7).

12. ¿Tuku tlawakgolh kstalaninanin Cristo kxapulana siglo akxni analh akgtum tatsinksni?

¹² Kxapulana siglo analh akgtum lanka tatsinksni «kxlikalanka katiyatni» (Hech. 11:28). Xlakata uma, kstalaninanin Cristo na titaxtukgolh tuku tuwa. Max natlatni lu xlilakgaputsamakgo la xʼamakgo kamaxkikgo xfamiliajkan tuku xmaklakaskinkgo. Chu lakgkgawasan chu laktsuman tiku xlakpuwankgonit tlakg naskujnanikgo Jehová, max xlilakpuwankgo komo tlakg tlan xwa pi alistalh xtlawakgolh uma. Maski chuna, kstalaninanin Cristo ni talakgachokgokgolh. Chuntiya tlawakgolh tuku xmatlanikgo xlakata nalichuwinankgo Dios chu xatapaxuwan katatapapitsikgolh natalan xalak Judea tuku xkgalhikgo (Hech. 11:29, 30).

13. ¿Tuku tasikulunalin makgamakglhtinankgolh kstalaninanin Cristo akxni analh tatsinksni?

¹³ ¿Tuku tasikulunalin makgamakglhtinankgolh kstalaninanin Cristo akxni xtitaxtumakgo tuku tuwa? Tiku kamaxkika tuku xmaklakaskinkgo akxilhkgolh pi Jehová xkasikulunatlawama (Mat. 6:31-33). Chu uma max tlawalh pi tlakg tlan xkatalalinkgolh natalan tiku kamakgtayakgolh. Nachuna, tiku xatapaxuwan mastakgolh tuku xkgalhikgo lu tlan makgkatsikgolh (Hech. 20:35). Chu Jehová kasikulunatlawalh xlakata wi tuku tlawakgolh kʼuma xatuwa kilhtamaku.

14. ¿Tuku kaʼakgspulalh Bernabé chu apóstol Pablo, chu tuku kitaxtulh? (Hechos 14:21, 22).

¹⁴ Kstalaninanin Cristo tiku latamakgolh kxapulana siglo lu kaputsastalanika, chu milh kilhtamaku nipara tsinu xlakpuwankgo pi chuna xʼama kaʼakgspula. Kalichuwinaw tuku kaʼakgspulalh Bernabé chu apóstol Pablo akxni  xlichuwinamakgo Dios kListra. Xapulana, latamanin lu xatapaxuwan kamakgamakglhtinankgolh chu kakgaxmatnikgolh. Pero alistalh makgapitsi xtalamakgasitsinkan tlawakgolh pi latamanin lu ksitsikgolh, chu makgapitsin aktalamikgolh Pablo chu lakpuwankgolh pi xninita (Hech. 14:19). Pero Bernabé chu Pablo ankgolh alakatanu kachikin chu chuntiya lichuwinankgolh Dios. ¿Tuku kitaxtulh? Kamakgtayakgolh «lhuwa latamanin xlakata tamakgalhtawakgen xlitaxtukgolh» chu kalimatliwakglhkgolh natalan tuku kawanikgolh chu tuku tlawakgolh (kalikgalhtawakga Hechos 14:21, 22). Bernabé chu Pablo ni taxlajwanikgolh maski kaputsastalanika, chu uma kamakgtayalh lhuwa latamanin. Komo akinin na ni nataxlajwaniyaw chu chuntiya natlawayaw taskujut nema Jehová kinkalakgayawanitan, namakglhtinanaw lhuwa tasikulunalin.

15. ¿Tuku kinkamasiyaniyan xliʼakxilhtit tala Alexander Macmillan?

¹⁵ Akxni nina xchan kata 1914, xlakskujnin Jehová lhuwa tuku xlakpuwankgo pi xʼama la. Chatum tiku chuna akgspulalh wa tala Alexander Macmillan. Xtachuna la amakgapitsin natalan, xla xlakpuwan pi nialh makgas xʼamaka linkan kʼakgapun. Kʼakgtum taʼakgchuwin nema mastalh septiembre kkata 1914, wa: «Uma max xaʼawatiya taʼakgchuwin nema kmastama». Pero nichuna kitaxtulh. Alistalh, xla tsokgwililh: «Makgapitsi akinin max kmalakatsaliw xlakata xaklakpuwanaw pi tunkun xʼamaka kinkalinkanan kʼakgapun». Chu wampa: «Tuku kilitlawatkan xwanit wa pi chuntiya xakskujnaniw Dios». Chu wa uma tuku tlawalh. Xatapaxuwan lichuwinalh Dios, kamakgpuwantinilh natalan tiku xkatamaknukanit kpulachin xlakata xtakanajlakan chu ankgalhin xʼan ktamakxtumit maski lu xlina kata. Liwana limaklakaskilh xkilhtamaku. ¿La litamakgtayalh uma? Wa uma tuku tsokgwililh kkata 1966, akxni nina xniy: «Kintakanajla chuntiya tliwakglh wi asta la uku». Xlikana pi lu tlan liʼakxilhtit kinkawilinin, liwaka komo makgasa kgalhkgalhimaw pi uma kakilhtamaku kamasputuka (Heb. 13:7).

16. ¿Tuku kaj xalakapala kalakgchilh tala Jennings chu xpuskat? (Santiago 4:14).

¹⁶ Lhuwa kskujnin Jehová kaj xalan kalakgchin xatuwa tajatat. Akgtum liʼakxilhtit, Herbert Jennings lichuwinan anta kxbiografía pi xla chu xpuskat misioneros xlitaxtukgo chu lu xatapaxuwan xmakgtayanamakgo kʼGhana. b Pero alistalh, wanika pi xkgalhi akgtum tajatat. Tala Jennings lichuwinan pi uma tuku xtitaxtumakgo ni xkgalhkgalhimakgo pi chuna xkaʼakgspulalh, chuna la wan Santiago 4:14 (kalikgalhtawakga). Tala tsokgwililh: «Maski tuwa kmakgkatsiw, xakkatsiyaw pi nila xaklakgpaliyaw uma. Kmakgxtakgwi Ghana chu lhuwa kiʼamigoskan tiku xakkgalhiyaw anta, chu ktaspitwi kCanadá xlakata tlan xakkalh kpumakuchin». Jehová kamakgtayalh tala Jennings chu xpuskat xlakata chuntiya kskujnanikgolh maski tuwa tuku xtitaxtumakgo.

17. ¿La kamakgtayanit amakgapitsin natalan xliʼakxilhtit tala Jennings?

¹⁷ Tuku lichuwinalh tala Jennings kxbiografía lu kamakgtayalh amakgapitsin. Chatum tala puskat tsokgwililh: «Ni anan atanu artículo nema lakgchanit kinaku […]. Akxni kkatsilh la tala Jennings makgxtakgli taskujut nema xlakgaya xlakata nakuchun, kimakgtayalh ni lu naklilakgaputsa tuku xaktitaxtuma». Chu chatum tala chixku tsokgwililh: «Akit liwaka akgkaw  kata kgolotsin xalak congregación klitaxtulh. Pero alistalh talakaskilh nakmakgxtakga tuku xkilakgayawakanit xlakata makuchinanin kiwanikgolh pi xakkgalhi akgtum tajatat xla talakgaputsit. Lu nitlan xaklimakgkatsi, wa xlakata ni xakkalikgalhtawakgaputun biografías […]. Pero xliʼakxilhtit tala Jennings lu kimatliwakglhli». Uma kinkamalakapastakayan pi akxni tayaniyaw tuku tuwa kinkalakgchinan, kamakgpuwantiniyaw amakgapitsin. Wa xlakata, maski ni kgalhiyaw latamat nema akinin xlakpuwanitaw chu kaj xalan nakinkalakgchinan tuku ni xlakpuwanaw, kiliʼakxilhtitkan tlan nakamakgtaya amakgapitsin (1 Ped. 5:9).

18. ¿Tuku kinkamasiyaniyan xliʼakxilhtit chatum tala xalak Nigeria tiku ninita xchixku? (Kaʼakxilhti dibujos nema limasiya tuku titaxtukgolh uma tala chu aktsu xtsumat).

¹⁸ Pandemia xla COVID-19 lu kamakgapatinanit kskujnin Jehová. Akgtum liʼakxilhtit, chatum tala xalak Nigeria chu aktsu xtsumat ni lhuwa liwat xkgalhikgo chu na ni xkgalhikgo tumin. Akgtum kilhtamaku, akxni kaj patum taza arroz xkgalhikgo, xtsumat kgalhskilh tuku xʼamakgo wakgo alistalh. Tala wanilh aktsu xtsumat pi nialh xkgalhikgo liwat chu nipara tumin, pero xʼamakgo stalanikgo xliʼakxilhtit puskat xalak Sarepta. Xʼamakgo kaxtlawakgo xaʼawatiya xliwatkan chu xʼamakgo lipawankgo Jehová (1 Rey. 17:8-16). Akxni nina xkaxtlawakgo xliwatkan uma kilhtamaku, natalan kalinikgolh despensa niku xtajuma liwat nema xkaʼakchanilh akgtiy semana. Uma kilhtamaku akxilhli pi Jehová xkgaxmatnit tuku xla wanilh aktsu xtsumat. Uma liwana limasiya pi komo nalipawanaw Jehová, tuku nitlan nema kaj xalan kinkalakgchinan tlan nakinkamakgtayayan tlakg natalakatsuwiniyaw Jehová (1 Ped. 5:6, 7).

19. ¿Tuku nitlan titaxtulh Alexéi Yershov?

¹⁹ Akglhuwata kata, lhuwa natalan titaxtumakgo tuku tuwa nema ni xlakpuwankgo  pi chuna xʼama la: taputsastalanit. Kalichuwinaw tuku titaxtulh chatum tala xalak Rusia, Alexéi Yershov. Akxni tamunulh, kkata 1994, xtatayananin Jehová xalak xkachikin xkamaxkikan talakaskin natlawakgo tuku xla xtakanajlakan. Pero alistalh lhuwa tuku talakgpalilh kRusia. Kkata 2020, makgapitsi policías tanukgolh kxchik tala Yershov, putsanankgolh chu linkgolh makgapitsi tuku xtapakgsini tala. Makgapitsi papaʼ alistalh, mapakgsinanin wankgolh pi tala xlitanut xwanit kpulachin xlakata tuku xtlawanit. Chu tuku tlakg nitlan, wa pi tuku xlimawakamaka, anta xʼakxilhkanit kvideos nema xgrabarlinit tiku liwakaya akgtum kata xlimakgalhtawakgema Biblia. ¡Lu nitlan tuku tlawanika!

20. ¿Tuku tlawanit tala Yershov xlakata tlakg tlan natalalin Jehová?

²⁰ ¿Tuku lu tlan kitaxtuninit tala Yershov maski lhuwa tuku nitlan titaxtulh? La uku tlakg tlan talalin Jehová. Xla wan: «Kimpuskat chu akit ankgalhin akxtum ktlawayaw oración. Kkatsi pi nila xaktayanilh uma komo ni wa Jehová xkimakgtayalh». Chu wampara: «Takgalhtawakga xalak Biblia kimakgtaya ni naktaxlajwani. Klilakpuwan xliʼakxilhtitkan kskujnin Jehová xalamakgasa. Biblia lichuwinan lhuwa liʼakxilhtit nema limasiya pi lu xlakaskinka ni lakapala tuku natlawayaw chu nalipawanaw Jehová».

21. ¿Tuku katsiniw kʼuma artículo?

²¹ ¿Tuku katsiniw kʼuma artículo? Pi maski kaj lakapala wi tuku nakinkalakgchinan kkilatamatkan, Jehová ankgalhin nakinkamakgtayayan komo nalipawanaw. Chuna la wan texto niku takilhtiya uma artículo, «lhuwa taʼakglhuwit kgalhi tiku xaʼakgstitum, pero Jehová lakgmaxtu» (Sal. 34:19). Wa xlakata, ni kajwatiya kuenta katlawaw tuku tuwa titaxtuyaw, wata kalilakpuwaw xlitliwakga Jehová nema nakinkalimakgtayayan. Komo chuna natlawayaw, tlan nawanaw chuna la wa apóstol Pablo: «Putum tlan ktlawa xlakata Dios kimaxki litliwakga» (Filip. 4:13).