1. ¿Tuku xlakata mastayaw kintakgalhtinkan ktamakxtumit?

 ¿TUKU xlakata anaw ktamakxtumit? Pulaktum tuku xlakata wa pi malankiputunaw Jehová (Sal. 26:12; 111:1). Nachuna, ktamakxtumit tlan lamakgpuwantiniyaw kinchatunukan k’uma xakatuwa kilhtamaku (1 Tes. 5:11). Wa xlakata, akxni mastayaw kintakgalhtinkan malankiyaw Jehová chu kama’akgpuwantiniyaw kinatalankan.

2. ¿Tuku kilhtamaku tlan namastayaw kintakgalhtinkan?

² Akgatunu semana tlan mastayaw kintakgalhtinkan ktamakxtumit. Akgtum liʼakxilhtit, ksputat semana tlan mastayaw kintakgalhtinkan akxni likgalhtawakgakan Makatsinina. Chu ktamakxtumit nema tlawakan kxitat semana tlan mastayaw kintakgalhtinkan ksección «Kaputsaw kBiblia tuku lhuwa xtapalh», «Takgalhtawakga nema takilhtinit kBiblia kcongregación» chu atanu niku skinkan pi kamastaw kintakgalhtinkan.

3. 1) ¿Tuku max tuwa namakgkatsiyaw akxni namastayaw kintakgalhtinkan? 2) ¿La kinkamakgtayayan Hebreos 10:24, 25?

³ Kimputumkan malankiputunaw Jehová chu kalimakgtayaputunaw kintakgalhtinkan kinatalankan. Pero max anan tuku tuwa namakgkatsiyaw: max lu pekuanaw chu ni mastaputunaw kintakgalhtinkan, o max makglhuwa nachaxaw kimakankan pero ni makglhuwa nakinkamaxkikanan talakaskin namastayaw kintakgalhtinkan. Kcarta nema Pablo katsokgnanilh hebreos, tekgsaw pulaktum tuku lu nakinkamakgtayayan. Akxni xlichuwinama tuku xlakata lu xlakaskinka tamakxtumit, Pablo lichuwinalh tuku kuenta kilitlawatkan: «Kalamatliwakglhwi» (kalikgalhtawakga Hebreos 10:24, 25). Komo ankgalhin nalilakpuwanaw pi kintakgalhtinkan tlan nakamatliwakglha  amakgapitsin maski ni lhuwa tuku nawanaw, nialh lu katipekuaw namastayaw. Chu maski ni makglhuwa nakinkawanikanan pi kamastaw kintakgalhtinkan, nalipaxuwayaw pi amakgapitsin na tlan namastakgo (1 Ped. 3:8).

4. ¿Tuku pulaktutu nalichuwinanaw k’uma artículo?

⁴ K’uma artículo pulana nalichuwinanaw la tlan nalamatliwakglhaw kinchatunukan komo makgtapakgsiyaw k’akgtum aktsu congregación, niku ni lhuwa natalan anankgo chu tlan makglhuwa namastayaw kintakgalhtinkan. Alistalh na’akxilhaw la tlan nalamatliwakglhaw k’akgtum xalanka congregación, niku anankgo natalan tiku na mastaputunkgo xtakgalhtinkan. Chu xa’awatiya, nalichuwinanaw la xliwanat kintakgalhtinkan xlakata nakamakgtaya amakgapitsin.

5. ¿Tuku tlan natlawayaw xlakata tlan nalamatliwakglhaw komo makgtapakgsiyaw kʼakgtum aktsu congregación?

⁵ K’akgtum grupo o k’akgtum aktsu congregación, ni anankgo lhuwa natalan tiku mastakgo xtakgalhtinkan. Min kilhtamaku, tala tiku pulalima tamakxtumit talakaskin nakgalhkgalhi tsinu xlakata wi tiku nachaxa xmakan. Akxni chuna la, tlawa pi tamakxtumit tlakg namakgapala chu uma ni makgtayayanan. ¿Tuku natlawayaw komo kkincongregacionkan chuna la? Skgalalh katawilaw xlakata tlakg makglhuwa namastayaw kintakgalhtinkan. Chuna tlan nakamakgpuwantiniyaw amakgapitsin nachuna natlawakgo.

6, 7. ¿Tuku tlan natlawaya xlakata nialh lu napekuana?

⁶ Lhuwa natalan lu pekuankgo maski kaj lilakpuwankgo namastakgo xtakgalhtinkan. Komo wix chuna akgspulayan, ¿tuku tlan natlawaya? Kalakputsa tuku namakgtayayan nialh lu napekuana chu nakalimakgtayaya mintakgalhtin amakgapitsin.

⁷ Pulaktum tuku namakgtayayan wa pi nalikgalhtawakgaya tastakyaw nema taxtunit krevista Makatsinina. b Revista lichuwinan pi liwana kalakkaxwiliw tuku naʼakxilhkan ktamakxtumit (Prov. 21:5). Akxni liwana naʼakgatekgsa tuku nataʼakxilha, tlakg ni tuwa katimakgkatsi namastaya mintakgalhtin. Atanu tuku tlan natlawaya wa pi ni lhuwa tuku nakgalhtinana (Prov. 15:23; 17:27). Komo ni lhuwa tuku nawana, ni lu katipekuanti. Nachuna, natalan ni tuwa katiʼakgatekgskgolh mintakgalhtin komo ni lhuwa tuku nawana. Komo akxni namastaya mintakgalhtin nawana tuku akgatekgsnita, natalan naʼakxilhkgo pi liwana lakkaxwilinita mintakgalhtin chu katsiya tuku lichuwinamaka.

8. ¿Tuku lakpuwan Jehová akxni akxilha pi tlawayaw putum tuku matlaniyaw?

⁸ Komo tlawanitata tuku lichuwinaw pero chuntiya pekuana xlakata namastaya mintakgalhtin, kalakapastakti pi Jehová xtapalh liʼakxilha putum tuku tlawaya xlakata nakgalhtinana ktamakxtumit (Luc. 21:1-4). Jehová ni lakaskin natlawaya tuku wix nialh matlaniya (Filip. 4:5). Wa xlakata kalilakpuwanti tuku tlan natlawaya, kaliskujti chu kaskini Jehová pi kamakgtayan ni lu napekuana. Max xapulana, tlan namastaya kaj aktsu mintakgalhtin.

9. ¿Tuku max nakinkaʼakgspulayan komo makgtapakgsiyaw kʼakgtum xalanka congregación?

⁹ Komo kmincongregación anankgo lhuwa publicadores, max tuku wix akgspulayan wa pi makglhuwa chaxa mimakan pero ni maxkikana takgalhtin, xlakata wilakgo lhuwa natalan tiku na mastaputunkgo xtakgalhtinkan. Kalichuwinaw Danielle, chatum tala tiku lu lakgati masta  xtakgalhtin ktamakxtumit. c Xla lu xlakaskinka liʼakxilha xlakata katsi pi chuna kakninanima Jehová, kalimatliwakglha amakgapitsin chu na makgtaya nalakapastaka tuku masiya Biblia. Pero akxni tsukulh makgtayanan kʼakgtum tlakg xalanka congregación, nialh makglhuwa xmaxkikan xtakgalhtin, asta xmin kilhtamaku nialhpara makgtum xlakgchan. Xla lichuwinan: «Ni xakkatsi tuku naktlawa. Xakmakgkatsi pi xkimakglhtikanit akgtum talakgalhaman. Akxni makglhuwa chaxa mimakan, chu ni maxkikana takgalhtin, max natsukuya lakpuwana pi tala kaj ni maxkiputunan».

10. ¿Tuku tlan natlawaya xlakata tlan namastaya mintakgalhtin?

¹⁰ ¿Minit kilhtamaku makgkatsinita chuna la Danielle? Komo chuna akgspulanitan, max lakpuwanita pi tlakg tlan nialh nachaxa mimakan chu kajwatiya nakgaxpata. Pero nichuna kalakpuwanti. ¿Tuku tlan xtlawa xlakata tlan namastaya mintakgalhtin? Ni kajwatiya kʼakgtum párrafo kalakkaxwili tuku nakgalhtinana. Chuna, komo ni namaxkikana takgalhtin kʼakgtum párrafo, max tlan nakgalhtinana kʼatanu párrafo. Akxni lakalhtitpat Makatsinina, kalilakpuwanti la akgatunu párrafo kinkamakgtayayan tlakg naʼakgatekgsaw tuku talichuwinama kputuminika artículo. Komo chuna natlawaya, wi tuku tlan nakgalhtinana. Atanu tuku tlan natlawaya wa pi nalakkaxwiliya nakgalhtinana kpárrafos nema tlakg tuwa tuku lichuwinan (1 Cor. 2:10). Kʼumakgolh párrafos niti lu chaxa xmakan xlakata tlakg tuwa tuku lichuwinan. Pero komo tlawanitata tuku lichuwinaw, chu chuntiya ni maxkikana mintakgalhtin, ¿tuku atanu tlan xtlawa? Akxni nina tsuku tamakxtumit, tlan natachuwinana tala tiku napulalin takgalhtawakga xla Makatsinina chu nawaniya tuku párrafo kgalhtinamputuna.

11. Chuna la wan Filipenses 2:4, ¿tuku tlan natlawayaw?

¹¹ (Kalikgalhtawakga Filipenses 2:4). Dios malakpuwanilh apóstol Pablo xlakata xkamakgpuwantinilh kstalaninanin Cristo xlilakpuwankgolh tuku tlan xkakitaxtunilh amakgapitsin. ¿La tlan namakgantaxtiyaw uma tastakyaw ktamakxtumit? Nalakapastakaw pi amakgapitsin na mastaputunkgo xtakgalhtinkan.

12. ¿Tuku tlan natlawayaw xlakata kinatalankan tlakg nalitamakgtayakgo tamakxtumit? (Na kaʼakxilhti dibujo).

 ¹² Kalichuwinaw pulaktum tuku nakinkamakgtayayan naʼakgatekgsaw uma. Akxni wix katachuwinana miʼamigos ni kajwatiya wix chuwinana, wata mastaya talakaskin pi na nachuwinankgo, ¿ni xlikana? Nachuna kitaxtu kkintamakxtumitkan. Katsiyaw pi pulaktum tuku kamakgpuwantini kinatalankan wa akxni mastakgo xtakgalhtinkan, wa xlakata kamaxkiputunaw talakaskin pi putum kamastakgolh xtakgalhtinkan (1 Cor. 10:24). Kaʼakxilhwi tuku tlan natlawayaw xlakata tlakg lhuwa natalan namastakgo xtakgalhtinkan.

13. ¿Tuku tlan natlawayaw xlakata tlakg lhuwa natalan namastakgo xtakgalhtinkan?

¹³ Atanu tuku tlan natlawayaw, wa pi ni laklhman namastayaw kintakgalhtinkan. Chuna amakgapitsin kinatalankan na namastakgo xtakgalhtinkan. Lakgkgolotsin chu amakgapitsin natalan tiku lhuwata kata la kgalhtawakgamakgo, tlakg chuna xlitlawatkan. Pero ni kajwatiya ni laklhman tuku nakgalhtinanaw, na ni pulaklhuwa tuku nalichuwinanaw. Komo wix nalichuwinana putuminika tuku lichuwinan párrafo, amakgapitsin nialh anan tuku katilichuwinankgolh. Kalilakpuwaw uma párrafo, pulaktiy tuku lichuwinan: pi kintakgalhtinkan ni laklhman xliwanat chu ni pulaklhuwa tuku nalichuwinanaw. Komo wix tiku pulana nawanikana pi kakgalhtinanti, kaj pulaktum tuku kalichuwinanti.

14. ¿Tuku xlakata kuenta kilitlawatkan la xlimakglhuwa nachaxaw kimakankan? (Na kaʼakxilhti dibujos).

¹⁴ Kuenta katlawaw la xlimakglhuwa chaxaw kimakankan xlakata namastayaw kintakgalhtinkan. Komo lu makglhuwa nachaxaw kimakankan, max tala tiku pulalima takgalhtawakga nakinkamaxkiyan takgalhtin maski amakgapitsin natalan nina mastakgo xtakgalhtinkan. Nachuna, max amakgapitsin natalan nialh katichaxputunkgolh xmakankan xlakata nalakpuwankgo pi xtakgalhtinkan ni lu tlan (Ecl. 3:7).

15. 1) ¿Tuku ni kilitlawatkan komo ni nakinkamaxkikanan kintakgalhtinkan? 2) ¿Tuku kuenta xlitlawat tala tiku pulalima takgalhtawakga? (Kaʼakxilhti recuadro « ¿La milimatitaxtit takgalhtawakga?»).

 ¹⁵ Akxni lhuwa natalan mastaputunkgo xtakgalhtinkan, max nila makglhuwa katimastaw kintakgalhtinkan chuna la lakaskinaw. Asta max nasputa tamakxtumit chu nipara makgtum katimastaw kintakgalhtinkan. Uma xlikana pi nitlan kinkamamakgkatsiniyan, pero ni xlilat nalisitsiyaw (Ecl. 7:9).

16. ¿Tuku tlan natlawayaw xlakata nakamakgpuwantiniyaw tiku mastakgolh xtakgalhtinkan?

¹⁶ Maski nila makglhuwa namastaya mintakgalhtin chuna la wix lakaskina, ankgalhin kuenta katlawa tuku kgalhtinankgo amakgapitsin chu kakawani pi lu tlan takgalhtin mastakgolh. Tuku lu tlan nakawaniya natalan max lu nakamakgpuwantini xtachuna la takgalhtin nema xmastaputuna (Prov. 10:21). Akxni kawaniyaw amakgapitsin pi lu tlan takgalhtin mastakgolh, na lu kamakgpuwantiniyaw.

17. 1) ¿Tuku tlan natlawakgo natlatni? 2) Chuna la tasiya kvideo, ¿tuku pulaktati kilitlawatkan xlakata nalakkaxwiliyaw kintakgalhtinkan? (Na kaʼakxilhti nota).

¹⁷ ¿Tuku atanu tlan natlawayaw xlakata tlan nalamatliwakglhaw ktamakxtumit? Komo kgalhiya laktsu kamanan, tlan nakamakgtayaya nalakkaxwilikgo xtakgalhtinkan chuna la matlanikgo (Mat. 21:16). Min kilhtamaku, ktamakxtumit lichuwinankan tuku xlakan nina akgatekgskgo, chuna la taʼakglhuwit nema  anan ktamakgaxtokgat o chuna la nalilatamakan xtastakyaw Biblia. Maski chuna, max anan akgtum o akgtiy párrafos niku laktsu kamanan tlan namastakgo xtakgalhtinkan. Na tlan nakamakgtayaya minkamanan naʼakgatekgskgo pi ni ankgalhin katikamaxkika xtakgalhtinkan maski nachaxkgo xmakankan. Komo chuna natlawaya, minkamanan ni katililipuwankgolh akxni amakgapitsin nakamaxkikan takgalhtin maski xlakan na xchaxkgonit xmakankan (1 Tim. 6:18). d

18. ¿Tuku ni kilitlawatkan akxni mastayaw kintakgalhtinkan? (Proverbios 27:2).

¹⁸ Kimputumkan tlan namastayaw kintakgalhtinkan xlakata nalimalankiyaw Jehová chu nakalimatliwakglhaw kinatalankan (Prov. 25:11). Maski namin kilhtamaku tlan nalichuwinanaw tuku akinin titaxtunitaw, ni xlilat lu lhuwa nalichuwinanaw kimpalakatakan (Kalikgalhtawakga Proverbios 27:2; 2 Cor. 10:18). Wata wa nalichuwinanaw Jehová, xTachuwin chu putuminika xkachikin (Apoc. 4:11). Pero komo kʼakgtum párrafo kinkaskinikanan pi kalichuwinaw tuku akinin titaxtunitaw, tlan chuna natlawayaw. Kpárrafo nema stala nalichuwinanaw akgtum liʼakxilhtit.

19. 1) ¿Tuku tlan nakitaxtu komo akxni namastayaw kintakgalhtinkan nakalilakpuwanaw amakgapitsin? (Romanos 1:11, 12). 2) ¿Tuku xlakata wix lu lakgatiya mastaya mintakgalhtin?

¹⁹ Maski ni anan akgtum limapakgsin niku wan la namastayaw kintakgalhtinkan ktamakxtumit, kimputumkan tlan naliskujaw xlakata kintakgalhtinkan nakamatliwakglha amakgapitsin. Kmakgapitsi congregaciones talakaskin pi natalan lu naliskujkgo xlakata tlakg makglhuwa namastakgo xtakgalhtinkan. Chu kʼamakgapitsi congregaciones talakaskin pi natalan nalipaxuwakgo maski ni makglhuwa namastakgo xtakgalhtinkan chu nalipaxuwakgo pi amakgapitsin na nakgalhtinankgo. Komo ktamakxtumit nakalilakpuwanaw amakgapitsin, kimputumkan tlan nalamatliwakglhaw (kalikgalhtawakga Romanos 1:11, 12).