ARTÍCULO NEMA NATALIKGALHTAWAKGA 19
Kalipawaw pi Jehová nalimin xasasti kakilhtamaku
«Akxni [Jehová] wi tuku wan, ¿nichuna tlawa?» (NÚM. 23:19).
TAKILHTLIN 142 Ni kamakgxtakgwi kintakgalhkgalhinkan
TUKU NATALICHUWINAN a
1, 2. ¿Tuku tlan natlawayaw la uku xlakata Jehová nina limin xasasti kakilhtamaku?
LU PAXTIKATSINIYAW Jehová xlakata malaknunit pi namapanu uma kakilhtamaku chu nalimin akgtum xasasti kakilhtamaku (2 Ped. 3:13). Maski ni katsiyaw tuku kilhtamaku nachin, tuku akxilhaw limasiya pi nialh makgas tsankga nakgantaxtu (Mat. 24:32-34, 36; Hech. 1:7).
2 Putum akinin kiliskujatkan xlakata namatliwakglhaw takanajla nema kgalhiniyaw uma tamalaknun, maski makgasata skujnanimaw Jehová. ¿Tuku xlakata? Komo ni kuenta natlawayaw, kintakanajlakan nataxlajwani. Apóstol Pablo wa pi akgtum «talakgalhin» nema lakapala kinkamakgatlajayan, wa akxni taxlajwani kintakanajlakan (Heb. 12:1). Xlakata ni chuna nakinkaʼakgspulayan, talakaskin nalilakpuwanaw tuku limasiya pi Jehová nialh makgas nalimin xasasti kakilhtamaku (Heb. 11:1).
3. ¿Tuku nalichuwinanaw kʼuma artículo?
3 Kʼuma artículo nalichuwinanaw pulaktutu tuku nakinkamakgtayayan nalipawanaw pi Jehová nalimin xasasti kakilhtamaku: 1) nalilakpuwanaw talakgmaxtut, 2) nalilakpuwanaw xlitliwakga Jehová chu 3) lu naliskujaw la kakninaniyaw Dios. Alistalh naʼakxilhaw pi tuku Jehová wanilh palakachuwina Habacuc na matliwakglha kintakanajlakan. Pero pulana kalichuwinaw tuku xlakata talakaskin pi la uku lu nakanajlayaw pi Jehová nalimin xasasti kakilhtamaku.
AKXNI TALAKASKIN TLIWAKGA NAKGALHIYAW KINTAKANAJLAKAN
4. ¿Tuku kilhtamaku natalakaskin nalimasiyayaw pi kgalhiyaw tliwakga takanajla?
4 Chali chali kililaksakatkan tuku nalimasiya pi tliwakga kgalhiyaw kintakanajlakan. Akgtum liʼakxilhtit, laksakaw tiku nakatalalinaw, tuku nalilakgastananaw o asta niku nakichan kintakgalhtawakgakan. Na lhuwa tuku kililaksakatkan xlakata tamakgaxtokgat, kamanan chu xlakata taskujut. Tlan nalilakpuwanaw: «¿Tuku limasiya tuku klaksaka? ¿Klimasiya pi kkanajla pi uma kakilhtamaku nialh makgas namasputukan chu Dios nalimin xasasti kakilhtamaku? ¿O klaksaka tuku xtachuna laksakkgo tiku kajwatiya lipaxuwaputunkgo xlatamatkan la uku?» (Mat. 6:19, 20; Luc. 12:16-21). Komo chuntiya nakanajlayaw pi xasasti kakilhtamaku lakatsu wi, nalaksakaw tuku tlan.
5, 6. ¿Tuku xlakata talakaskin tliwakga nakgalhiyaw kintakanajlakan akxni titaxtuyaw taputsan? Kawili akgtum liʼakxilhtit.
5 Atanu kilhtamaku akxni talakaskin pi nakgalhiyaw tliwakga takanajla, wa akxni kinkaputsastalanikanan, akxni kgalhiyaw akgtum tajatat o akxni titaxtuyaw atanu tuku lu kinkamakgalipuwanan. Max xapulana natayaniyaw uma taputsan. Pero komo makgas makgapalama, natalakaskin nakgalhiyaw tliwakga takanajla xlakata natayaniyaw chu chuntiya xatapaxuwan naskujniyaw Jehová (Rom. 12:12; 1 Ped. 1:6, 7).
6 Akxni titaxtumaw akgtum taputsan max nalakpuwanaw pi Jehová nikxni katilimilh xasasti kakilhtamaku. ¿Wamputun uma pi taxlajwanima kintakanajlakan? Max nichuna. Kalilakpuwaw uma: akxni lipekua lhkaknan max asta lakpuwanaw pi nialh katisenalh. Pero ankgalhin senampara. Xtachuna la uma, akxni taxlajwaninitaw, max natsukuyaw lakpuwanaw pi xasasti kakilhtamaku nikxni katichilh. Pero komo tliwakga wi kintakanajlakan, liwana katsiyaw pi xtamalaknun Jehová nakgantaxtu (Sal. 94:3, 14, 15; Heb. 6:17-19). Komo nalipawanaw uma, nakinkamakgtayayan chuntiya pulana nawiliyaw kkilatamatkan takaknin nema maxkiyaw Jehová.
7. ¿Tuku tapuwan ni kilimastatkan talakaskin nakinkapasayan?
7 Na talakaskin nakgalhiyaw akgtum tliwakga takanajla xlakata nalichuwinanaw Dios. Akxni katachuwinanaw latamanin chu kawaniyaw pi Dios nialh makgas nalimin xasasti kakilhtamaku, lhuwa tiku ni kanajlakgo pi uma xlikana nakgantaxtu (Mat. 24:14; Ezeq. 33:32). Pero ni kamastaw talakaskin pi uma tapuwan nakinkapasayan. Xlakata nichuna nakinkaʼakgspulayan, talakaskin chuntiya namatliwakglhaw kintakanajlakan. Kalichuwinaw pulaktutu tuku nakinkamakgtayayan chuna natlawayaw.
KALILAKPUWAW TALAKGMAXTUT
8, 9. ¿La matliwakglha kintakanajlakan akxni lilakpuwanaw talakgmaxtut?
8 Pulaktum la tlan namatliwakglhaw kintakanajlakan wa pi nalilakpuwanaw talakgmaxtut. Talakgmaxtut limasiya pi xtamalaknun Dios nakgantaxtu. Lu xlakaskinka pi nalimaxtuyaw kilhtamaku nalilakpuwanaw putum tuku Jehová tlawalh xlakata xmastalh talakgmaxtut chu tuku xlakata chuna tlawalh. Uma nakinkamakgtayayan tlakg nalipawanaw pi Jehová nalimin xasasti kakilhtamaku niku nakgalhiyaw latamat nema nikxni sputa. ¿Tuku xlakata chuna wanaw?
9 Kalilakpuwaw putum tuku Jehová tlawalh xlakata xmastalh talakgmaxtut. Jehová xatapaxuwan makamilh xapuxku xKgawasa, tiku tlakg tlan xtalalin, xlakata xlatamalh kKatiyatni chuna la chatum chixku tiku ni xkgalhi talakgalhin. Akxni Jesús xlama unu kKatiyatni lhuwa tuku patilh, titaxtulh lhuwa tuku tuwa chu lu patinalh akxni makgnika. Xlikana pi Jehová lu lhuwa xtapalh xokgolh. Xlakata xla xapaxkina, ni xmastalh talakaskin pi xKgawasa xpatilh putum tuku titaxtulh kaj xlakata puntsu xkinkamaxkin latamat (Juan 3:16; 1 Ped. 1:18, 19). Pero xlakata Jehová lu lhuwa xtapalh xokgolh talakgmaxtut, nakinkamaxkiyan latamat nema nikxni sputa kxasasti kakilhtamaku.
KALILAKPUWAW XLITLIWAKGA JEHOVÁ
10. Chuna la wan Efesios 3:20, ¿tuku tlan natlawa Jehová?
10 Atanu la tlan namatliwakglhaw kintakanajlakan wa pi nalilakpuwanaw xlitliwakga Jehová. Xla kgalhi litliwakga xlakata natlawa putum tuku malaknu. Xlikana pi max chatum lataman nalakpuwan pi nitila katikgalhilh latamat nema nikxni sputa kʼakgtum xasasti kakilhtamaku. Pero makglhuwa, Jehová kinkamalaknuniyan tuku akinin lakpuwanaw pi nila chuna katilalh, xla tlan chuna natlawa xlakata kgalhi Putum litliwakga (Job 42:2; Mar. 10:27). Wa xlakata ni kaks kinkamalakawaniyan pi xla kinkamalaknuniyan tuku nila kanajlakan (kalikgalhtawakga Efesios 3:20).
11. Kalichuwinanti akgtum xtamalaknun Jehová nema kaks malakawaniyan (kaʼakxilhti recuadro « Makgapitsi tamalaknun nema Jehová makgantaxtilh»).
11 Kalilakpuwaw makgapitsi tamalaknun nema Jehová katlawanilh kskujnin xalamakgasa chu nema xtasiya pi nila xʼama kgantaxtu. Kawanilh Abrahán chu Sara pi xʼamakgo kgalhikgo chatum aktsu kgawasa maski xlinkgoya kata (Gén. 17:15-17). Na liwana wanilh Abrahán pi xkamanan xʼamakgo latamakgo ktiyat xalak Canaán. Pero akglhuwa kata, xkamanan Abrahán, israelitas, skujnin litaxtukgolh kʼEgipto. Wa xlakata max xlakpuwankgo pi uma tamalaknun nikxni xʼama kgantaxtu. Pero uma kgantaxtulh. Nachuna, lhuwa kata alistalh, Jehová wanilh Elisabet, tiku xlina kata, pi xʼama kgalhi chatum aktsu kgawasa. Na liwana wanilh María, chatum tsumat, pi xʼama malakachini xKgawasa. Uma xʼama makgantaxti tamalaknun nema Jehová xtlawanita akglhuwata mil kata kjardín xaʼEdén (Gén. 3:15).
12. ¿Tuku wan Josué 23:14 chu Isaías 55:10, 11 xlakata xlitliwakga Jehová?
12 Akxni lilakpuwanaw putum xtamalaknun Jehová chu la makgantaxtilh, akxilhaw pi xla lu kgalhi litliwakga. Uma tlawa pi tlakg nakanajlayaw pi xla nalimin xasasti kakilhtamaku (kalikgalhtawakga Josué 23:14; Isaías 55:10, 11). Chu uma tlawa pi tlakg tlan nakamakgtayayaw amakgapitsin naʼakgatekgskgo pi tamalaknun xla xasasti kakilhtamaku ni kaj akgtum cuento. Wa uma tuku wan Jehová xlakata xasasti akgapun chu xasasti katiyatni: «Umakgolh tachuwin tlan lipawankan chu xaxlikana» (Apoc. 21:1, 5).
LU KALISKUJWI LA KAKNINANIYAW DIOS
TAMAKXTUMIT
¿La namakgtayayan uma namatliwakglha mintakanajla? (Kaʼakxilhti párrafo 13).
13. ¿La kinkamakgtayayan tamakxtumit namatliwakglhaw kintakanajlakan?
13 Xlipulaktutu tuku nakinkamakgtayayan namatliwakglhaw kintakanajlakan, wa pi lu kuenta natlawayaw tuku makgtanuma ktakaknin nema maxkiyaw Jehová. Kalilakpuwaw la xlilhuwa kinkamakgtayayan tamakxtumit. Anna, b tiku akglhuwata kata skujnanima Jehová putum kilhtamaku, wan: «Tamakxtumit lu matliwakglha kintakanajla. Asta maski tiku akgchuwinama ni lu tlan makgalhtawakgena o ni wan tuku xasasti, ankgalhin wi tuku lichuwinankan nema kimakgtaya tlakg liwana nakʼakgatekgsa pulaktum tuku masiya Biblia, chu uma matliwakglha kintakanajla». Ktamakxtumit na kgaxmataw xtakgalhtinkan kinatalankan nema matliwakglha kintakanajlakan (Rom. 1:11, 12; 10:17).
LICHUWINANKAN DIOS
¿La namakgtayayan uma namatliwakglha mintakanajla? (Kaʼakxilhti párrafo 14).
14. ¿La tatliwakglha kintakanajlakan akxni lichuwinanaw Dios?
14 Akxni lichuwinanaw Dios, na tatliwakglha kintakanajlakan (Heb. 10:23). Barbara, tiku liwakaya 70 kata xtatayana Jehová litaxtu, wan: «Akxni klichuwinan Dios, ankgalhin tatliwakglha kintakanajla. Kakxilha pi akxni tlakg klichuwinan Jehová chu tuku xla malaknunit, tlakg tatliwakglha kintakanajla».
AKSTU KGALHTAWAKGAKAN
¿La namakgtayayan uma namatliwakglha mintakanajla? (Kaʼakxilhti párrafo 15).
15. ¿La matliwakglha kintakanajlakan akxni kiʼakstukan kgalhtawakgayaw? (Na kaʼakxilhti dibujos).
15 Kalichuwinaw atanu tuku matliwakglha kintakanajlakan: akxni kiʼakstukan kgalhtawakgayaw. Susan wan pi lakkaxwilinit tuku kilhtamaku nakgalhtawakga. Xla wan: «Akgatunu domingo klikgalhtawakga Makatsinina nema naʼakxilhkan semana nema aku mima; lunes chu martes, klikgalhtawakga tuku naʼakxilhkan ktamakxtumit xʼitat semana, chu amakgapitsi kilhtamaku wi tuku klakputsanani akxni kiʼakstu kkgalhtawakga». Xlakata Susan liwana lakkaxwilinit tuku kilhtamaku nakgalhtawakga, lu matliwakglhnit xtakanajla. Chu Irene, tiku akglhuwata kata makgtayanama niku pulalinkan kintaskujutkan, lu matliwakglhnit xtakanajla xlakata likgalhtawakga tuku Biblia xwanit pi xʼama la. Xla wan: «Lu kaks lilakawan akxni kakxilha la kgantaxtu putum tuku Jehová xwanit pi nala». c
«XLIKANA NAKGANTAXTU»
16. ¿Tuku xlakata wanaw pi tuku Jehová wanilh Habacuc na kinkamakgpuwantiniyan la uku? (Hebreos 10:36, 37).
16 Makgapitsi kskujnin Jehová akglhuwata kata kgalhkgalhimakgo pi kamasputuka uma xalixkajni kakilhtamaku. Max wi tiku nalakpuwan pi lisputni lu makgapalama. Jehová liwana akgatekgsa tuku makgkatsikgo kskujnin. Wa xlakata wanilh palakachuwina Habacuc: «Tuku akxilhti nakgantaxtu akxni lakkaxwilikanit, chu chuntiya nalakapala xlakata nakgantaxtu, ni kintikaʼakgskgawin. Maski xtamakgapalilh, skgalalh katawila, xlakata xlikana nakgantaxtu» (Hab. 2:3). ¿Kajwatiya Habacuc wanika umakgolh tachuwin, o na kinkamakgpuwantiniyan la uku? Jehová tlawalh pi Pablo xkawanilh umakgolh tachuwin kstalaninanin Cristo tiku xkgalhkgalhimakgo kamilh xasasti kakilhtamaku (kalikgalhtawakga Hebreos 10:36, 37). Maski lakpuwanaw pi Jehová makgapalama, kalakapastakwi pi tuku malaknunit «xlikana nakgantaxtu. ¡Ni katitamakgapalilh!».
17. ¿La makgantaxtilh chatum tala puskat tastakyaw nema Jehová maxkilh Habacuc?
17 Lhuwa kstalaninanin Cristo, tlawakgonit chuna la wan Jehová, pi skgalalh natawilakgo maski lhuwata kata titaxtunit. Kalichuwinaw tala Louise, tiku tsukulh skujnani Jehová kkata 1939. Xla wan: «Nikxni klakpuwa pi xakkama makgatsi 18 kata kʼuma kakilhtamaku xlakata xaklakpuwan pi Armagedón xʼamaja min. Pero nichuna lalh. Tuku kimakgtayalh naktayani putum umakgolh kata, wa pi xaklikgalhtawakga tuku titaxtukgolh tiku lu xkgalhkgalhinankgo, chuna la Noé, Abrahán, José chu amakgapitsi kskujnin Jehová tiku lu kgalhkgalhikgolh xlakata xmakgamakglhtinankgolh tuku Jehová xkamalaknuninit. Xlakata skgalalh kwi, kimakgtayanit chuntiya naklakapastaka pi xasasti kakilhtamaku lu lakatsu wi. Chu wa uma tuku na kamakgtayanit amakgapitsin». Xlikana pi tiku lhuwata kata skujnanimakgo Jehová nachuna lakpuwankgo la Louise.
18. ¿La kinkamakgtayayan tamalakatsukin nakanajlayaw pi Jehová nalimin xasasti kakilhtamaku?
18 Xlikana pi Jehová nina limin xasasti kakilhtamaku, pero kalilakpuwaw tuku anan la uku: staku, kiwi, animales chu latamanin. Maski uma ni putum kilhtamaku ananit, la uku nitila nawan pi ni anankgo. La uku anankgo xlakata Jehová kamalakatsukinit (Gén. 1:1, 26, 27). Chuna la katlawanit putum uma, Jehová namakgantaxti xtamalaknun pi nalimin xasasti kakilhtamaku. Putum kilhtamaku nalatamayaw chu nialh katitatatlaw. Akxni nalakgchan kilhtamaku nema Jehová laklhkawilinit, nalimin xasasti kakilhtamaku (Is. 65:17; Apoc. 21:3, 4).
19. ¿La tlan namatliwakglhaw kintakanajlakan?
19 Xlakata nina chin xasasti kakilhtamaku, katlawaw putum tuku matlaniyaw xlakata namatliwakglhaw kintakanajlakan. Kalilakpuwaw talakgmaxtut chu xlitliwakga Jehová, chu lu kaliskujwi tuku makgtanuma ktakaknin nema maxkiyaw Jehová. Komo natlawayaw putum uma, na nalitaxtuyaw chuna la «tiku makglhtinankgolh tuku Dios malaknulh xlakata kanajlakgolh chu kgalhkgalhinankgolh» (Heb. 6:11, 12; Rom. 5:5).
TAKILHTLIN 139 ¿Akxilhkana kxasasti kakilhtamaku?
a La uku, lhuwa latamanin ni kanajlakgo pi Jehová nalimin xasasti kakilhtamaku nema malaknunit. Lakpuwankgo pi uma kaj akgtum cuento. Pero akinin katsiyaw pi putum tuku Jehová malaknu, xlikana nakgantaxtu. Maski katsiyaw uma, talakaskin namatliwakglhaw takanajla nema kgalhiniyaw xtamalaknun, chu kʼuma artículo naʼakxilhaw la natlawayaw.
b Makgapitsi tukuwani kalakgpalikanit.
c Anta kʼÍndice de las publicaciones Watch Tower, niku wan «Profecía» tlan natekgsa lhuwa artículos nema lichuwinan tuku Biblia xwanit pi xʼama la. Akgtum liʼakxilhtit, kalikgalhtawakga artículo «Lo que Jehová predice se cumple sin falta», nema min krevista La Atalaya 1 xla enero kata 2008.
