1. ¿Tuku lakaskin Jehová pi katlawaw?

 PULAKTUM tuku lu kamakgapaxuwa tiku tamakgaxtokgkgonit wa akxni lakachin kskgatakan. Xlikana pi lu paxkikgo aktsu kskgatakan, pero ni lakaskinkgo pi putum kilhtamaku aktsu skgata kalitaxtulh. Chu asta komo ni kstakli lu xlilakgaputsakgolh. Xtachuna la uma, Jehová lu lipaxuwa akxni akxilha pi tsukuyaw lakgapasaw, pero ni lakaskin pi putum kilhtamaku chuna la «lakgskgatan» nalitaxtuyaw (1 Cor. 3:1). Wata lakaskin pi putum kstalaninanin Cristo «laklankata» kalitaxtuw (1 Cor. 14:20).

2. ¿Tuku takgalhskinin nakgalhtiyaw kʼuma artículo?

² Kʼuma artículo nakgalhtiyaw umakgolh takgalhskinin: ¿tuku kilhchanima pi chatum kstalanina Cristo lankata litaxtu?, ¿tuku kilitlawatkan xlakata xaʼakchan nalitaxtuyaw?, ¿tuku xlakata lu xlakaskinka nalimatliwakglhaw kintakanajlakan xapalha liwat? chu ¿tuku xlakata ni kiʼakstukan nakinkalipawankanan?

¿TUKU KILHCHANIMA PI CHATUM KSTALANINA CRISTO LANKATA LITAXTU?

3. ¿Tuku kilhchanima pi chatum kstalanina Cristo lankata litaxtu?

³ Anta kBiblia, akxni lichuwinankan pi chatum kstalanina Cristo lankata, ni kilhchanima pi lina kata. Tachuwin xagriego nema matitaxtikan «laklankata» na kakilhchanima «tiku tliwakga kgalhikgo xtakanajlakan» (1 Cor. 2:6). a Wa xlakata, laklankata o xaʼakchan litaxtuyaw akxni kintakanajlakan staka chu nialh chuna la laktsu kamanan litaxtuyaw. ¿Wamputun uma pi tiku xaʼakchan litaxtu nialh talakaskin wi tuku natlawa? Nichuna. Talakaskin chuntiya naliskuja (1 Tim. 4:15). Pero ¿tuku likatsiyaw pi chatum kstalanina Cristo xaʼakchan litaxtuya kxtakanajla, maski aku stakma o lina kata?

4. ¿La likatsikgo kstalaninanin Cristo tiku xaʼakchan litaxtukgo?

 ⁴ ¿La likatsikgo kstalaninanin Cristo tiku xaʼakchan litaxtukgo? Xlakan kgalhakgaxmatkgo putum xlimapakgsin Jehová, chu ni kajwatiya nema xlakan lakpuwankgo pi tlan nakakitaxtuni. Maski makglakgalhinanin chu tlawakgo tuku nitlan, limasiyakgo kxlatamatkan pi liskujmakgo xlakata nalakpuwankgo chuna la Jehová chu natlawakgo tuku xla lakaskin pi katlawakgolh kskujnin. Limasiyakgo xasasti tayat chu lu liskujkgo xlakata chuna la natitaxtu kilhtamaku, tlakg nalakpuwankgo chuna la Dios (Efes. 4:​22-24). Katsinikgonit nalaksakkgo tuku tlan xlakata kuenta tlawakgo xlimapakgsin chu xtastakyaw Jehová, chu wa xlakata ni maklakaskinkgo akgtum lanka lista niku wan tuku xlitlawatkan. Nachuna, akxni wi tuku laksakkgo natlawakgo, liskujkgo xlakata namakgantaxtikgo (1 Cor. 9:​26, 27).

5. ¿La likatsikgo kstalaninanin Cristo tiku nina xaʼakchan litaxtukgo? (Efesios 4:​14, 15).

⁵ Kstalaninanin Cristo tiku nina xaʼakchan litaxtukgo ni xtachuna tiku xaʼakchan litaxtukgoya, xlakan max lakapala nakanajlakgo xtaʼakgsaninkan «tiku kaʼakgskgawikgo amakgapitsin». Max nakanajlakgo tuku nitlan wankan xpalakata kskujnin Dios chu tuku wankgo apóstatas (kalikgalhtawakga Efesios 4:​14, 15). b Max kalakgkatsalakanikgo amakgapitsin, taʼakglhuwikgo, lakapala lisitsikgo tuku nitlan katlawanikan o max lakapala tlawakgo tuku nitlan kamatlawiputunkan (1 Cor. 3:3).

6. ¿Tuku liʼakxilhtit kinkamakgtayayan naʼakgatekgsaw la chatum kstalanina Cristo xaʼakchan litaxtu? (Na kaʼakxilhti dibujos).

⁶ Chuna la akxilhwi, Biblia masiya pi xlakata xaʼakchan nalitaxtuyaw talakaskin nastakaw chuna la staka chatum aktsu skgata. Chatum aktsu kgawasa lhuwa tuku ni katsi. Wa xlakata maklakaskin pi chatum tiku lankata nakuentajtlawa chu napulalin. Akgtum liʼakxilhtit, akxni chatum puskat chu aktsu xtsumat natitaxtukgo ktiji niku anan lhuwa putlaw, puskat makgachipa aktsu xtsumat. Chuna la nastaktilha aktsu tsumat, xatse namaxki talakaskin pi xʼakstu natitaxtu, pero namalakapastaka pi kuenta xlitlawat xlakata nitu naʼakgspula. Akxni tsumat lankata nawan, tlantiya xʼakstu natamakgtakgalha. Nachuna kitaxtu kxlatamatkan kstalaninanin Cristo: tiku nina xaʼakchan litaxtukgo maklakaskinkgo pi kstalaninanin Cristo tiku tliwakga kgalhikgo xtakanajlakan nakamakgtayakgo xlakata nitu nalaktlawa  xtakanajlakan chu tlan tuku nalaksakkgo. Pero kstalaninanin Cristo tiku xaʼakchan litaxtukgo, tlan xʼakstukan lilakpuwankgo tastakyaw xalak Biblia xlakata nakatsikgo tuku lakpuwan Jehová xpalakata tuku tlawaputunkgo chu chuna tlan tuku nalaksakkgo.

7. ¿Maklakaskinkgo tamakgtay kstalaninanin Cristo tiku xaʼakchan litaxtukgo?

⁷ ¿Wamputun uma pi kstalaninanin Cristo tiku xaʼakchan litaxtukgo nialh maklakaskinkgo pi wi tiku nakamakgtaya? Nichuna. Min kilhtamaku na talakaskin naskinkgo tamakgtay. Chatum kstalanina Cristo tiku nina xaʼakchan litaxtu lakaskin pi amakgapitsin kalaksakkgolh tuku natlawa o kawanikgolh tuku xlitlawat, pero chatum kstalanina Cristo tiku xa’akchan litaxtu, maski kaskini xtastakyawkan natalan tiku tlakg katsikgoya, liwana katsi pi wa nalin «xtakuka nema lakgaya» (Gál. 6:5).

8. ¿Tuku xlakata wanaw pi ni putum kstalaninanin Cristo tiku xaʼakchan litaxtukgo xlakxtumkan?

⁸ Chuna la tiku laklankata ni lakxtum tasiyakgo, kstalaninanin Cristo tiku xa’akchan litaxtukgo ni xputumkan kgalhikgo watiya xatlan tayat. Akgtum liʼakxilhtit, makgapitsin litalakgapaskgo xlakata lakgskgalalan, wi tiku ni pekuankgo, wi tiku xatapaxuwan mastakgo tuku kgalhikgo chu wilakgo tiku kaʼakgatekgsnikgo tuku makgkatsikgo amakgapitsin. Nachuna, max chatiy kstalaninanin Cristo tiku xaʼakchan litaxtukgo ni lakxtum tuku katilaksakkgolh xlakata tanu tanu la wi xtalakapastaknikan, pero ni lakatsalamakgo tuku wan Biblia. Wa xlakata, ni xlilat pi chatum nawan pi nitlan tuku laksakli achatum, wata akxtum naliskujkgo xlakata akxtum naskujnanikgo Dios kcongregación (Rom. 14:10; 1 Cor. 1:10).

¿TUKU KILITLAWATKAN XLAKATA XAʼAKCHAN NALITAXTUYAW?

9. ¿Tuku xlakata wanaw pi chatum kstalanina Cristo nila xaʼakchan litaxtu kaj xlakata titaxtuma kilhtamaku?

⁹ Chuna la titaxtu kilhtamaku, chatum aktsu kgawasa staktilha, pero chatum kstalanina Cristo nila xaʼakchan katilitaxtulh kaj xlakata titaxtuma kilhtamaku. Akgtum liʼakxilhtit, natalan xalak Corinto makgamakglhtinankgolh xatlan tamakatsinin, tamunukgolh, makglhtinankgolh espíritu santo chu lhuwa tuku apóstol Pablo kamasiyanilh (Hech. 18:​8-11). Pero akxni xtitaxtunita kilhtamaku lata xtamunukgonit, lhuwa tiku chuntiya la lakgskgatan xlitaxtukgo (1 Cor. 3:2). ¿Tuku kilitlawatkan xlakata nichuna nakinkaʼakgspulayan?

10. ¿Tuku kilitlawatkan xlakata xaʼakchan nalitaxtuyaw? (Judas 20).

¹⁰ Xlakata xaʼakchan nalitaxtuyaw, pulana talakaskin pi chuna natlawaputunaw. Tiku litaxtuputunkgo chuna la laktsu kamanan tiku nitu katsikgo nikxni katistakli xtakanajlakan (Prov. 1:22). Ni litaxtuputunaw chuna la makgapitsi tiku, maski laklankata, nitu lakgatayaputunkgo chu lakaskinkgo pi xnatlatnikan chuntiya kalaksakkgolh tuku xlitlawatkan. Wata kiʼakstukan kuenta tlawaputunaw chuna la stakma kintakanajlakan (kalikgalhtawakga Judas 20). Komo wix makgkatsiya pi nina xaʼakchan litaxtuya kmintakanajla, kaskini Jehová pi kamakgtayan chuna “natlawaputuna chu kamaxkin litliwakga xlakata chuna natlawaya” (Filip. 2:13).

11. ¿La kinkamakgtayayan Jehová xlakata xaʼakchan nalitaxtuyaw? (Efesios 4:​11-13).

¹¹ Jehová ni kinkaskiniyan pi kiʼakstukan naliskujaw xlakata xaʼakchan nalitaxtuyaw. Wata kinkalimakgtayayan lakgkgolotsin xalak congregación, tiku litaxtukgo chuna la mapuchwayaninanin chu makgalhtawakgenanin tiku kinkamakgtayakgoyan xlakata xaʼakchan nalitaxtuyaw «xtachuna la Cristo» (kalikgalhtawakga Efesios 4:​11-13). Na kinkamaxkiyan xʼespíritu santo, nema kinkamakgtayayan nakgalhiyaw «xtalakapastakni Cristo» (1 Cor. 2:​14-16). Nachuna, matsokgninalh maktati Evangelios, nema kinkamakgtayayan liwana nakatsiyaw tuku tlawalh Jesús akxni kilatamachi kKatiyatni. Komo naliskujaw nalakpuwanaw, nachuwinanaw chu natlawayaw chuna la Jesús, xaʼakchan nalitaxtuyaw.

 ¿TUKU XLAKATA LU XLAKASKINKA XAPALHA LIWAT?

12. ¿Tuku kilhchanima «tuku pulana katsiniw xpalakata Cristo»?

¹² Xlakata chuntiya nastakaw chu xaʼakchan nalitaxtuyaw, ni kajwatiya talakaskin nakatsiyaw «tuku pulana katsiniw xpalakata Cristo». Makgapitsi umakgolh lu xlakaskinka tamasiy wa pi nakgalhiyaw takanajla, nitlan nalimakgkatsiyaw kintalakgalhinkan, natamunuyaw chu nakanajlayaw pi naʼanan talakastakwanat (Heb. 6:​1, 2). Putum xaxlikana kstalaninanin Cristo xlikatsinitkan umakgolh tamasiy. Wa xlakata, apóstol Pedro kalitachuwinalh uma lhuwa latamanin kPentecostés (Hech. 2:​32-35, 38). Xlakata kstalaninanin Cristo nalitaxtuyaw, lu xlakaskinka namakgamakglhtinanaw umakgolh tamasiy. Asta Pablo wa pi tiku ni kanajla pi naʼanan talakastakwanat, lakgmakgama takanajla (1 Cor. 15:​12-14). Pero ni kajwatiya talakaskin nakatsiyaw umakgolh xapulana tamasiy.

13. ¿Tuku kilitlawatkan xlakata nalitamakgtayayaw xapalha liwat nema lichuwinan Hebreos 5:14? (Na kaʼakxilhti dibujos).

¹³ Atanu tuku na kgalhiyaw wa xapalha liwat. Uma liwat ni kajwatiya kilhchanima xlimapakgsin Jehová, wata na kilhchanima xtastakyaw, nema kinkamakgtayayan naʼakgatekgsaw tuku lakpuwan. Xlakata nalitamakgtayayaw uma, talakaskin nalikgalhtawakgayaw Biblia, nalilakpuwanaw tuku likgalhtawakgayaw chu naliskujaw xlakata namakgantaxtiyaw tuku katsiniyaw. Uma nakinkamakgtayayan nalaksakaw tuku makgapaxuwa Jehová (kalikgalhtawakga Hebreos 5:14). c

14. ¿La kamakgtayalh apóstol Pablo kstalaninanin Cristo xalak Corinto?

¹⁴ Kstalaninanin Cristo tiku nina xaʼakchan litaxtukgo, tuwa makgkatsikgo nalaksakkgo tuku tlan akxni ni tekgskgo akgtum limapakgsin kBiblia nema nakawani tuku xlitlawatkan. Akxni chuna titaxtukgo, makgapitsin max lakpuwankgo pi tlan natlawakgo tuku xlakan lakaskinkgo. Amakgapitsin max lakaskinkgo pi xwilika akgtum limapakgsin maski ni talakaskin. Akgtum liʼakxilhtit, kstalaninanin Cristo xalak Corinto skinikgolh apóstol Pablo pi xlakkaxwililh akgtum limapakgsin nema xkawanilh komo tlan o nitlan xwakgolh liwat nema xkamakamaxkikan tamakanitlaw o tatlawamakgxtu. Pablo ni kawanilh tuku xlitlawatkan xwanit, wata kalitachuwinalh pi xchatunukan “xkalakgchan nalaksakkgo” chuna la xkawanilh  xtalakapastaknikan. Kalitachuwinalh lhuwa tastakyaw xalak Biblia nema xʼama kamakgtaya nalaksakkgo tuku tlan xkamamakgkatsinilh chu ni xkama’akgchakgxnikgolh amakgapitsin (1 Cor. 8:​4, 7-9). Chuna xkamasiyanima namaklakaskinkgo xtalakapastaknikan chu ni xkgalhkgalhikgolh pi amakgapitsin xkawanikgolh tuku xlitlawatkan xwanit o ni xputsakgolh akgtum limapakgsin nema xkawanilh tuku natlawakgo.

15. ¿La kamakgtayalh apóstol Pablo kstalaninanin Cristo tiku hebreos xwankgonit xlakata chuntiya kstakli xtakanajlakan?

¹⁵ Wi atanu tuku kinkamasiyaniyan tuku Pablo katsokgnanilh kstalaninanin Cristo tiku hebreos xwankgonit. Makgapitsin nialh kstakmakgo kxtakanajlakan, chu wa xlakata kawanilh: «Amakgtum lakaskimparayatit leche chuna la lakgskgatan chu ni wa palha liwat» (Heb. 5:12). Xlakan ni kuenta xtlawakgonit tuku xasasti xkamasiyanima Jehová kcongregación (Prov. 4:18). Akgtum liʼakxilhtit, lhuwa kstalaninanin Cristo tiku judíos xwankgonit, xlakpuwankgo pi chuntiya xlitamakgantaxtit xwanit xLimapakgsin Moisés maski xtitaxtunita 30 kata lata xninit Cristo, chu lata uma kilhtamaku nialh xtalakaskinit namakgantaxtikan uma Limapakgsin (Rom. 10:4; Tito 1:10). Xlikana pi xkgalhikgonita kilhtamaku xlakata naʼakgatekgskgo tuku xtalakgpalinit. Wa xlakata, Pablo xkamakgtayaputun namakgamakglhtinankgo tlakg xatuwa tamasiy nema xkalitachuwinama kxcarta. Uma xapalha liwat wa tuku xmaklakaskinkgo umakgolh kstalaninanin Cristo xlakata xʼakgatekgskgolh pi chuna la xkakninanimakgo Jehová tlakg tlan xwanit nixawa xapulana, chu na xkamakgtayalh ni napekuankgo chu chuntiya xlichuwinankgolh Dios maski judíos xkaputsastalanikgolh (Heb. 10:​19-23).

¿TUKU XLAKATA NI KIʼAKSTUKAN NAKINKALIPAWANKANAN?

16. Maski xaʼakchan litaxtuyawa, ¿tuku talakaskin chuntiya natlawayaw?

¹⁶ Ni kajwatiya talakaskin nastakaw chu xaʼakchan nawanaw, wata talakaskin lu naliskujaw xlakata xa’ankgalhin xaʼakchan nalitaxtuyaw. Wa xlakata ni kiʼakstukan kakinkalipawankan (1 Cor. 10:12). Lu xlakaskinka pi ankgalhin akstu nakinkalakputsananikanan xlakata nakatsiyaw komo chuntiya stakma kintakanajlakan (2 Cor. 13:5).

17. ¿Tuku kinkamasiyaniyan tuku katsokgnanilh Pablo colosenses?

¹⁷ Ktatsokgni nema Pablo kamalakgachanilh colosenses na lichuwinan pi lu xlakaskinka nastakaw xlakata xaʼakchan nalitaxtuyaw. Maski umakgolh kstalaninanin Cristo xaʼakchan xlitaxtukgoya, na  kawanilh pi kuenta xtlawakgolh xlakata ni xmastakgolh talakaskin pi xtapuwan uma kakilhtamaku xkaʼakgskgawilh (Col. 2:​6-10). Chu Epafras, tiku liwana xkalakgapasa natalan xalak uma congregación, ankgalhin xtlawa oración xpalakatakan “xlakata tliwakga takanajla xkgalhikgolh” (Col. 4:12). ¿Tuku kinkamasiyaniyan uma? Pi Pablo chu Epafras liwana xkatsikgo pi xlakata chuntiya xa’akchan nalitaxtuyaw, talakaskin lu naliskujaw chu maklakaskinaw xtamakgtay Jehová. Xlakan xlakaskinkgo pi colosenses chuntiya xa’akchan xkgalhikgolh xtakanajlakan maski xtitaxtumakgo tuku tuwa.

18. ¿Tuku max xʼakgspulalh chatum kstalanina Cristo tiku xaʼakchan litaxtu? (Na kaʼakxilhti dibujo).

¹⁸ Pablo kawanilh hebreos pi chatum kstalanina Cristo tiku xa’akchan litaxtu tlan xmakgatsankgalh chuna la talalin Jehová chu nialhla xtalalimpa. Komo xnaku nialh xkgalhakgaxmatputulh Jehová, lu xtamakgatlinilh chu nialhpara tsinu nitlan xlimakgkatsilh xtalakgalhin, chu uma xtlawalh pi Jehová nila xtapatilh. Pero lu tlan pi hebreos nichuna xtitaxtumakgo (Heb. 6:​4-9). ¿Tuku la akxni tiku nialh skujnanimakgo Jehová o tiku katamakxtukanit kcongregación lakgtaspitparakgo Jehová? Xlakata taktujukgo chu nitlan limakgkatsikgo tuku nitlan tlawakgolh, limasiyakgo pi ni likatsikgo chuna la latamanin tiku Pablo xkalichuwinama. Pero akxni lakgtaspitkgo Jehová, maklakaskinkgo tamakgtay nema xla masta (Ezeq. 34:​15, 16). Wa xlakata, max lakgkgolotsin naskinikgo chatum tala tiku tliwakga kgalhi xtakanajla pi kakamakgtayalh xlakata tlan natalalimparakgo Jehová.

19. ¿Tuku chuntiya kiliskujatkan natlawayaw?

¹⁹ Komo wix liskujpat nastaka xlakata xaʼakchan nalitaxtuya, chuntiya kaliskujti xlakata chuna natlawaya. Chuntiya kalimatliwakglhti mintakanajla xapalha liwat chu kaliskujti xlakata chali chali tlakg nalakpuwana chuna la Jehová. Chu komo wix xa’akchan kstalanina Cristo litaxtuyata, katlawa putum tuku matlaniya xlakata putum kilhtamaku xa’akchan nalitaxtuya.