1. ¿Tuku makgkatsikgo makgapitsi natalan akxni ankgo lichuwinankgo Dios? (Na kaʼakxilhti dibujo).

 XLAKSKUJNIN Jehová lichuwinanaw xtachuwin xlakata paxkiyaw chu lakaskinaw pi latamanin kalakgapaskgolh. Lhuwa natalan lu lakgatikgo lichuwinankgo Dios, pero amakgapitsin tuwa makgkatsikgo nalipaxuwakgo. ¿Tuku xlakata? Makgapitsi maxanankgo chu lakpuwankgo pi nitlan makgalhtawakgenanin litaxtukgo. Amakgapitsin max nitlan makgkatsikgo na’ankgo kalakgapaxialhnankgo latamanin komo ni kawanikanit pi kaʼankgolh kxchikkan. Wi tiku pekuankgo akxni lilakpuwankgo pi max ni katikamakgamakglhtinanka. Chu amakgapitsin kamasiyanikanit pi ni nakgalhtinankgo akxni wi tiku nitlan tuku kawanima. Putum umakgolh natalan lu paxkikgo Jehová, pero lu tuwa makgkatsikgo nakalinikgo xalaktlan tamakatsinin tiku ni kalakgapaskgo. Chu xlakata liwana katsikgo pi uma taskujut lu xlakaskinka, ankgalhin ankgo lichuwinankgo Jehová. ¡Chu xla lu paxuwa akxni akxilha pi tlawakgo uma taskujut!

2. ¿Tuku xlakata ni militaxlajwanit komo makgkatsiya pi ni lipaxuwaya akxni lichuwinana Dios?

² ¿Chu wix? ¿Tuwa makgkatsiya nalipaxuwaya akxni pina lichuwinana Dios? Komo min kilhtamaku chuna akgspulayan, ni kataxlajwani. Max chuna makgkatsiya xlakata taktujuya. Max ni lakaskina pi kaj wix kuenta natlawanikana chu niti tataʼakglhuwiputuna. Nachuna, niti lakgati pi nitlan nalikatsinikan, liwaka komo wix kaj kamakgtayaputuna amakgapitsin. MinTlat xalak akgapun liwana akgatekgsa tuku tuwa titaxtuya, chu makgtayaputunan (Is. 41:13). Kʼuma artículo nalichuwinanaw pulakkitsis tuku nakinkamakgtayayan nialh chuna namakgkatsiyaw chu tlakg nalipaxuwayaw akxni nalichuwinanaw Dios.

 XTACHUWIN DIOS NAMATLIWAKGLHAN

3. ¿Tuku matliwakglhli Jeremías xlakata namasta xtamakatsinin Dios?

³ Chuna la titaxtunit kilhtamaku, xtamakatsinin Dios ankgalhin kamatliwakglhnit xlakskujnin xlakata namakgantaxtikgo xatuwa taskujut nema xla kalakgayawa. Kalichuwinaw palakachuwina Jeremías. Akxni Jehová wanilh pi xmastalh xtamakatsinin, xla tuwa makgkatsilh chuna natlawa, chu wa: «Akit ni kkatsini kchuwinan, xlakata kajku kgawasa akit» (Jer. 1:6). ¿Tuku makgtayalh nialh chuna xmakgkatsilh? Xtachuwin Dios lu matliwakglhli. Xla wa: «Pero xtachuwin litaxtulh xtachuna la lhkuyat […] nema xtalakgachinunit kkilukut; chu nialhla kmachokgolh» (Jer. 20:​8, 9). Latamanin tiku Jeremías x’ama kalitachuwinan Dios ni xkgaxmatputunkgo, pero wa uma tamakatsinin tuku matliwakglhli xlakata namakgantaxti taskujut nema xlakgayawakanit.

4. ¿Tuku kitaxtu akxni likgalhtawakgayaw xTachuwin Dios chu lilakpuwanaw? (Colosenses 1:​9, 10).

⁴ Kstalaninanin Cristo na lu kinkamatliwakglhan xTachuwin Dios. Akxni apóstol Pablo katsokgnanilh kstalaninanin Cristo xalak Colosas, kawanilh pi xatakgatsin takatsin x’ama kamakgpuwantini nalatamakgo «chuna la lakaskin Jehová» chu natlawakgo «tuku tlan» (kalikgalhtawakga Colosenses 1:​9, 10). Chu pulaktum tuku tlan tlawayaw wa akxni lichuwinanaw xalaktlan tamakatsinin. Chuna la akxilhaw, akxni lichuwinanaw xTachuwin Dios chu lilakpuwanaw, tlakg kanajlaniyaw Jehová chu tlakg liwana akgatekgsaw tuku xlakata lu xlakaskinka nakalitachuwinanaw latamanin tamakatsinin xla Tamapakgsin.

5. ¿Tuku tlan natlawayaw xlakata tlakg nalitamakgtayayaw Biblia?

⁵ Xlakata tlakg nalitamakgtayaya xTachuwin Dios, talakaskin ni kajwatiya nalikgalhtawakgaya chu kaj lakapala nalilakpuwana. Akgtum li’akxilhtit, ¿tuku tlan xtlawa komo xtekgsti akgtum texto xalak Biblia nema ni katsiya tuku wamputun? Tlan nalimaklakaskina Índice de las publicaciones Watch Tower o Liputsan xla xtatayananin Jehová xlakata nalakputsananiya tuku kilhchanima o la nalilatapaya akgtum versículo. Komo tlakg nalimaxtuya kilhtamaku nakgalhtawakgaya, tlakg nalipawana xTachuwin Dios (1 Tes. 5:21). Chu uma namakgtayayan tlakg nalipaxuwaya nalichuwinana tuku katsinipat.

LIWANA KALAKKAXWILI TUKU NALICHUWINANA

6. ¿Tuku xlakata liwana kililakkaxwilitkan tuku nakawaniyaw latamanin akxni nakatachuwinanaw?

⁶ Komo liwana nalakkaxwiliya tuku nawana akxni nalichuwinana Dios, tlakg ni tuwa  katimakgkatsi nakatachuwinana latamanin. Akxni Jesús nina xkamalakgacha xtamakgalhtawakgen xlakata na’ankgo lichuwinankgo Dios, pulana kawanilh tuku xlitlawatkan xwanit (Luc. 10:​1-11). Chu xlakata makgantaxtikgolh tuku kawanilh Jesús, lu lipaxuwakgolh tuku tlan kakitaxtunilh (Luc. 10:17).

7. ¿Tuku tlan xtlawaw xlakata tlan xlakkaxwiliw tuku nakawaniyaw latamanin? (Na kaʼakxilhti dibujo).

⁷ ¿Tuku tlan xtlawaw xlakata liwana xlakkaxwiliw tuku nakawaniyaw latamanin? Tlan xlilakpuwaw tuku tachuwin xmaklakaskiw xlakata namasiyayaw xaxlikana. Na tlan xlilakpuwaw pulaktiy o pulaktutu tuku max xkinkakgalhtikgon latamanin chu tuku tlan xkawaniw akinin. Komo chuna natlawayaw, nakinkamakgtayayan ni lu nalakgaputsayaw chu xatapaxuwan nakatachuwinanaw.

8. ¿Tuku xlakata wanaw pi kstalaninanin Cristo xtachuna xalu xla tiyat?

⁸ Apóstol Pablo limaklakaskilh akgtum li’akxilhtit nema limasiya tuku talakgatay kgalhiyaw akxni lichuwinanaw Dios. Xla wa pi litaxtuyaw «chuna la xalu xla tiyat» chu kgalhiyaw «tuku lhuwa xtapalh» (2 Cor. 4:7). Pero ¿tuku kilhchanima uma tuku lhuwa xtapalh? Wa akxni lichuwinanaw tamakatsinin xla Tamapakgsin, akgtum taskujut nema kalakgmaxtu latamanin (2 Cor. 4:1). ¿Chu tuku kilhchanima xalu xla tiyat? Wa kakilhchanima xlakskujnin Dios tiku lichuwinankgo xalaktlan tamakatsinin. Kxkilhtamaku apóstol Pablo, stananin xmaklakaskinkgo xalu nema xlitatlawanit tiyat xlakata nalinkgo tuku lhuwa xtapalh chuna la liwat, vino o tumin. La uku, Jehová na kinkalakgayawanitan tuku lu lhuwa xtapalh: nalinaw xalaktlan tamakatsinin. Xlakata Jehová nakinkamakgtayayan, nakgalhiyaw litliwakga nema maklakaskinaw xlakata tlan namakgantaxtiyaw uma taskujut.

KASKINI DIOS KAMAKGTAYAN NI NAPEKUANA

9. ¿La tlan namakgatlajayaw tapekua? (Na kaʼakxilhti dibujo).

⁹ Max namin kilhtamaku napekuanaw akxni nalilakpuwanaw pi latamanin ni kintikamakgamakglhtinankgon o nitlan kintikalikatsinikgon. ¿Tuku tlan natlawayaw xlakata nialh napekuanaw? Kalilakpuwaw oración nema tlawakgolh apóstoles akxni kawanika pi nialh xlichuwinankgolh Dios. Xlakan ni mastakgolh talakaskin pi tapekua xkamakgatlajalh, wata skinikgolh Jehová pi xkamakgtayalh «ni xatapekua nalichuwinankgo»  xtachuwin. Chu xla tunkun kakgalhtilh (Hech. 4:​18, 29, 31). Akxni namakgkatsiyaw pi pekuanaw, na kaskiniw Jehová pi kakinkamakgtayan tlakg nakapaxkiyaw kintalatamankan xlakata ni napekuanaw nakalitachuwinanaw xalaktlan tamakatsinin.

10. ¿Tuku tamakgtay kgalhiyaw xlakata namakgantaxtiyaw tuku kinkalakgayawanitan Jehová? (Isaías 43:​10-12).

¹⁰ Jehová kinkalaksaknitan xlakata xtatayananin nalitaxtuyaw (kalikgalhtawakga Isaías 43:​10-12). Chu kinkamalaknuniyan pi nakinkamakgtayayan ni napekuanaw. Kalichuwinaw pulaktati la kinkamakgtayayan. Pulana, Jesús kinkatawilan akxni lichuwinanaw xalaktlan tamakatsinin (Mat. 28:​18-20). Xlipulaktiy, Jehová kalakgayawanit ángeles nakinkamakgtayakgoyan (Apoc. 14:6). Xlipulaktutu, Jehová kinkamaxkiyan x’espíritu santo, nema kinkamakgtayayan nalakapastakaw tuku katsininitaw (Juan 14:​25, 26). Chu xlipulaktati, Jehová kinkalimakgtayayan kinatalankan xlakata makxtum naskujnaniyaw. Xlakata Jehová chu kinatalankan kinkamakgtayakgoyan, tlan nialh napekuanaw.

KAKAPUTSA NIKU NAKAMANOKGLHUYA LATAMANIN CHU WA KA’AKXILHTI TUKU TLAN KITAXTU

11. ¿Tuku tlan xtlawa xlakata tlakg lhuwa latamanin nakatachuwinana? (Na kaʼakxilhti dibujo).

¹¹ ¿Litaxlajwaniya akxni ni kamanokglhuya latamanin kxchikkan? Komo chuna akgspulayan, kalilakpuwanti: «¿Niku ankgonit latamanin uma kilhtamaku? ¿Ankgonit skujkgo o ankgonit tamawanankgo?» (Hech. 16:13). Komo niti wilakgo kxchikkan, max tlakg tlan nawan nalichuwinana Dios kkatijin. Chatum tala tiku wanikan Joshua, wan: «Lu tlan kinkitaxtuninit naklichuwinan Dios kmercados, klaklanka pustan chu niku kamakikan putlaw». Joshua chu xpuskat, Bridget, katekgskgonit latamanin kxchikkan akxni ankgo kaputsakgo kakgotanun chu domingos akxni tastununita (Efes. 5:​15, 16).

12. ¿Tuku nakinkamakgtayayan nakatsiyaw tuku kanajlakgo latamanin chu tuku lilakgaputsakgo?

¹² Komo tasiya pi latamanin ni katsiputunkgo tuku kalitachuwinanaw, kalakputsaw tuku nakinkamakgtayayan nakatsiyaw tuku kanajlakgo chu tuku lilakgaputsakgo. Joshua chu Bridget limaklakaskinkgo takgalhskinin nema min kxmakni tratados. Akgtum li’akxilhtit, akxni  mastakgo tratado ¿La akxilha Biblia?, kawanikgo latamanin: «Makgapitsi latamanin kanajlakgo pi Biblia wa xTachuwin Dios, chu makgapitsi ni kanajlakgo. Chu wix, ¿tuku lakpuwana?». Akxni chuna tlawakgo, tlakg lhuwa latamanin katachuwinankgo.

13. Maski latamanin ni kinkakgaxmatniputunkgoyan, ¿tuku xlakata ni kililakpuwanatkan pi nitlan kinkakitaxtuniman? (Proverbios 27:11).

¹³ Komo latamanin ni kinkakgaxmatniputunkgoyan ni kalakpuwaw pi nitlan kinkakitaxtuniman. ¿Tuku xlakata? Xlakata tuku tlakg xtapalh li’akxilhkgo Jehová chu Jesús wa pi namakgantaxtiyaw tuku kinkaskinikgoyan: nalichuwinanaw xalaktlan tamakatsinin (Hech. 10:42). Wa xlakata, ni lu kalilakgaputsaw komo ni lhuwa latamanin katachuwinanaw o komo ni makgamakglhtinamputunkgo tuku kamasiyaniyaw. Wata kapaxuwaw xlakata katsiyaw pi makgapaxuwamaw kinTlatkan xalak akgapun (kalikgalhtawakga Proverbios 27:11).

14. ¿La makgkatsiyaw akxni chatum tala tekgsa tiku makgamakglhtinan xaxlikana, chu tuku xlakata?

¹⁴ Na tlan napaxuwayaw akxni amakgapitsin natalan tekgskgo tiku makgamakglhtinan xalaktlan tamakatsinin. Revista Makatsinina lichuwinanit pi kintaskujutkan xtachuna la putsamaw chatum aktsu kgawasa tiku tsankganit. Lhuwa tiku putsamakgo uma aktsu kgawasa, chu lakalhuwa niku ankgo putsakgo. Akxni tekgskan, ni kajwatiya paxuwa tiku tekgsli, wata putum tiku xputsamakgo paxuwakgo. Xtachuna la uma, kimputumkan liskujaw xlakata nakatekgsaw tiku kstalaninanin Cristo nalitaxtukgo. Taskujut nema tlawayaw kimputumkan, lu xlakaskinka. Chu kimputumkan paxuwayaw akxni chatum lataman tsuku an ktamakxtumit.

TAPAXKIT WA TUKU NAKINKAMAKGPUWANTINIYAN

15. ¿Tuku nakinkamakgtayayan tlakg nalipaxuwayaw akxni naʼanaw lichuwinanaw Dios? (Mateo 22:​37-39; na kaʼakxilhti dibujo).

¹⁵ Komo wa nalilakpuwanaw tapaxkit nema kgalhiniyaw Jehová chu nema kakgalhiniyaw kintalatamankan, tlakg nalipaxuwayaw akxni na’anaw lichuwinanaw Dios (kalikgalhtawakga Mateo 22:​37-39). Kalilakpuwanti la lipaxuwa Jehová akxni kinka’akxilhan pi anaw lichuwinanaw xtachuwin, chu la paxuwakgo latamanin akxni tsukuyaw kalimakgalhtawakgeyaw Biblia. Chu ankgalhin kalakapastakti pi tiku makgamakglhtinankgo tamakatsinin nema kaliniyaw tlan nalakgtaxtukgo (Juan 6:40; 1 Tim. 4:16).

16. ¿Tuku tlan natlawayaw xlakata nalipaxuwayaw akxni nalichuwinanaw Dios maski nila taxtuyaw kkinchikkan? Kalichuwinanti akgtum liʼakxilhtit.

 ¹⁶ ¿Chu tuku tlan natlawaya komo nila taxtuya kminchik? Wa kalilakpuwanti tuku tlan tlawaya xlakata nakalimasiyaniya tapaxkit Jehová chu kintalatamankan. Kpandemia xla COVID- 19, Samuel chu Dania nila xtaxtukgo kxchikkan. Maski chuna, ankgalhin xlichuwinankgo Dios kteléfono, xtlawakgo cartas chu xlimaklakaskinkgo Zoom xlakata nakamakgalhtawakgekgo latamanin. Nachuna, Samuel xkalitachuwinan Dios latamanin anta niku xmakuchimaka xlakata cáncer. Xla wan: «Ta’akglhuwit lu maxlajwaninan, tlawa pi lu nalakgaputsayaw chu maxlajwani kintakanajlakan. Wa xlakata maklakaskinaw tapaxuwan nema kinkaliminiyan akxni skujnaniyaw Jehová». Akxni uma tamakgaxtokgat xtitaxtumakgo tuku lu tuwa, Dania tamakgwasli, akgtutu papa’ nila takilh chu akgchaxan papa’ maklakaskilh silla de ruedas. Xla wan: «Xaktlawa putum tuku xakmatlani. Xaklitachuwinan Dios chatum enfermera tiku xmin kinkuentajtlawa chu stananin tiku xminkgo kkinchik. Na xaktachuwinan kteléfono chatum puskat tiku kskuja k’akgtum empresa niku stakan tuku maklakaskinkgo makuchinanin». Xlikana pi Samuel chu Dania nila lhuwa tuku xtlawakgo, pero lu xpaxuwakgo xlakata xtlawakgo putum tuku xmatlanikgo.

17. ¿La kilimaklakaskinatkan tuku lichuwinaw kʼuma artículo xlakata tlakg tlan nakinkakitaxtuniyan?

¹⁷ Tlakg tlan nakinkakitaxtuniyan komo naliskujaw natlawayaw putum tuku lichuwinaw k’uma artículo. Pulakatunu tuku lichuwinaw xtachuna la tuku lakgmakanaw kiliwatkan. Akxni lakgmakankan liwat putum tuku limakgamikan chu nitu kitsankga, liwat lu kgama taxtuyacha. Komo lu naliskujaw natlawayaw putum tuku lichuwinaw, nakinkamakgtayayan tlakg tlan namakgkatsiyaw chu tlakg nalipaxuwayaw akxni nalichuwinanaw Dios.