1. ¿Tuku kilhchanima paraíso xaʼespiritual, chu tuku kililakkaxwilitkan natlawayaw?

 LA UKU, anan kKatiyatni akgtum paraíso niku lamakgo lhuwa latamanin chu lhuwa tuku tlan tlawamakgo. Millones latamanin tiku anta wilakgo kgalhikgo xaxlikana takaksni chu liwana lakkaxwilikgonit pi nikxni katimakgxtakgkgolh. Nachuna, lakaskinkgo pi amakgapitsin latamanin kamakgtapakgsikgolh kʼuma paraíso. ¿Tuku lichuwinamaw? ¡Lichuwinamaw paraíso xaʼespiritual! a

2. ¿Tuku xlakata lu kaks kinkamalakawaniyan pi lakkaxwilikanit paraíso xaʼespiritual?

² Maski tuwa namakgkatsiyaw nakanajlayaw, Jehová lakkaxwilinit paraíso xaʼespiritual xlakgstipan uma kakilhtamaku niku anan lhuwa tasitsi, tuku nitlan chu tuku kalipekua wili kilatamatkan (1 Juan 5:19; Apoc. 12:12). Xla liwana katsi tuku nitlan kinkatlawaniputunan xkakilhtamaku Satanás. Xlakata Jehová lu kinkapaxkiyan, kinkalinan niku tlan namatliwakglhaw kintakanajlakan. Xtachuwin wan pi paraíso xaʼespiritual xtachuna la akgtum putatsekgni chu xtachuna la «akgtum jardín nema liwana munuwilikan» (Is. 4:6; 58:11). Xlakata Jehová kasikulunatlawa tiku lamakgo kʼuma paraíso, lu paxuwakgo chu nitu lipekuankgo kʼuma xaʼawatiya kilhtamaku nema lu tuwa (Is. 54:14; 2 Tim. 3:1).

3. ¿Tuku kilhtamaku xapulana kgantaxtulh tuku lichuwinan Isaías capítulo 65?

³ Anta kʼIsaías capítulo 65, Jehová lichuwinalh la xʼama wan latamat kparaíso xaʼespiritual. Umakgolh tachuwin xapulana kgantaxtulh kkata 537 akxni nina xmin Jesús. Ama kilhtamaku, judíos tiku makgxtakgkgolh xtalakgalhinkan taxtukgocha kBabilonia chu taspitkgolh kxkachikinkan. Xlakata Jehová kasikulunatlawalh  chu kamakgtayalh, lakkaxtlawaparakgolh Jerusalén, nema xmasputukanit, chu akgtum lu stlan kachikin litaxtupa. Nachuna, lakkaxtlawaparakgolh templo xlakata tlan xkakninaniparakgolh Jehová anta (Is. 51:11; Zac. 8:3).

4. ¿La kgantaxtunit kkinkilhtamakujkan tuku wan Isaías capítulo 65?

⁴ Tuku lichuwinalh Isaías na kgantaxtuma kkinkilhtamakujkan. Tsukulh kgantaxtu kkata 1919, akxni xlakskujnin Jehová kalakgmaxtuka kxaLanka Babilonia. Lata ama kilhtamaku, paraíso xaʼespiritual talakgatuminit kxlikalanka Katiyatni. Tiku xlichuwinankgo xTamapakgsin Dios xatapaxuwan tsukukgolh malakatsukikgo congregaciones. Lhuwa lakchixkuwin chu lakpuskatin tiku xapulana lakluku xwankgonit chu xtlawakgo talakgxtumit nema ni xlitatlawat, matliwakglhkgonit xtakanajlakan chu lilhakganankgonit «xasasti tayat nema litlawaka xtalakaskin Dios» (Efes. 4:24). Xlikana pi umakgolh tasikulunalin nema lichuwinalh Isaías na nakgantaxtu kxasasti kakilhtamaku. Pero la uku, lipaxuwamanawa tasikulunalin. Kalichuwinaw la litamakgtayayaw paraíso xaʼespiritual chu tuku xlakata nikxni kilimakgxtakgatkan.

TASIKULUNALIN NEMA KGALHIKAN KPARAÍSO XAʼESPIRITUAL

5. Chuna la wan Isaías 65:​13, ¿tuku tasikulunalin kgalhiyaw xlakata makgtapakgsiyaw kparaíso xaʼespiritual?

⁵ Tlan makgkatsiyaw chu kgalhiyaw litliwakga. Isaías lichuwinan tuku litalakgpali xlatamatkan tiku lamakgo kparaíso xaʼespiritual chu tiku ni anta lamakgo (kalikgalhtawakga Isaías 65:13). Jehová kinkamaxkiyan putum tuku maklakaskinaw kkintakanajlakan. Kgalhiyaw xʼespíritu santo, xTachuwin chu lhuwa tuku matliwakglha kintakanajlakan, chu uma lu kinkamakgapaxuwayan (katamalakxtupi Apocalipsis 22:17). Pero tiku ni makgtapakgsikgo kparaíso xaʼespiritual ni kgalhikgo uma. Xlakan titaxtukgo “tatsinkstat”, “takgalhputit” chu “tamamaxanit”. Ni kgalhikgo tuku maklakaskinkgo kxtakanajlakan (Amós 8:11).

6. ¿Tuku liwat lichuwinankan kJoel 2:​21-24, tuku kilhchanima chu la litamakgtayayaw?

⁶ Palakachuwina Joel lichuwinalh pi Jehová xʼama kamaxki xkachikin liwat nema tlakg xmaklakaskinkgolh, chuna la talhtsi, vino chu aceite xla oliva (Joel 2:​21-24). Uma xkilhchanima pi Jehová xʼama kamaxki xkachikin putum tuku xmaklakaskinkgolh, chu na anta xmakgtanuma tuku xkamatliwakglhnilh xtakanajlakan. ¿Chu la kinkamaxkiyan Jehová tuku maklakaskinaw kkinkilhtamakujkan? Kinkamaxkiyan Biblia, kilikgalhtawakgakan, kisitiojkan xla internet, tamakxtumit chu asambleas. Putum uma kinkamakgtayayan xlakata tlan namakgkatsiyaw chu nakgalhiyaw litliwakga.

7. ¿Tuku xlakata tlan makgkatsi kinakujkan? (Isaías 65:14).

⁷ Lu paxuwayaw. Kstalaninanin Cristo lu paxtikatsiniyaw Dios putum tuku tlawanit kimpalakatakan, chu wa xlakata paxuwayaw (kalikgalhtawakga Isaías 65:14). ¿Tuku xlakata lu “tlan makgkatsi kinakujkan”? Xlakata tekgsnitaw kxTachuwin Dios tuku xaxlikana chu tamalaknun nema lu kinkamatliwakglhan. Nachuna, xpalakata xtamakamastan Jesús, kgalhiyaw akgtum lu stlan takgalhkgalhin. ¡Lu paxuwayaw akxni kalitachuwinanaw kinatalankan putum uma! (Sal. 34:8; 133:​1-3).

8. ¿Tuku pulaktiy litalakgapasa paraíso xaʼespiritual?

⁸ Pulaktiy tuku litalakgapasa paraíso xaʼespiritual wa pi anta, xkachikin Jehová makxtum wilakgolh chu lapaxkikgo. Uma tapaxkit nema «tlawa pi latamanin makxtum nalakgo», kinkamakgtayayan nakatsiyaw la nawan latamat kxasasti kakilhtamaku. Anta, tlakg naʼanan tapaxkit chu tlakg makxtum natawilayaw nixawa la uku (Col. 3:14). Chatum tala puskat kinkawaniyan tuku makgkatsilh akxni kalakgapasli xtatayananin Jehová: «Akit ni xakkgalhi tapaxuwan,  nipara anta kkifamilia. Xapulana akxni kakxilhli la lalimasiyanikan tapaxkit wa akxni kkalakgapasli xtatayananin Jehová». Putum tiku kgalhiputun tapaxuwan chu tlan makgkatsiputun, talakaskin namakgtapakgsi kparaíso xaʼespiritual. Maski katuwa tuku nawankgo latamanin xalak uma kakilhtamaku kimpalakatakan, kxlakatin Jehová chu kxlakatinkan tiku kakninanikgo tlan tuku tlawamaw (Is. 65:15).

9. ¿Tuku natlawanikan putum tuku kamakgapatinan xlakskujnin Jehová? (Isaías 65:​16, 17).

⁹ Skaya makgkatsiyaw chu nitu lilakgaputsayaw. Isaías 65:14 wan pi tiku ni makgtapakgsiputunkgo kparaíso xaʼespiritual “lu nalipuwankgo xlakata nitlan natawila xnakujkan chu natasakgo xlakata nitlan namakgkatsikgo”. ¿Pero tuku nakakitaxtuni kskujnin Dios? ¿Tuku natlawanikan putum tuku kamakgapatinanit? Jehová malaknu: «Tuku xlilakgaputsakan makgasa nialh katilakapastakka; kilakgastapu nialh katiʼakxilhli» (kalikgalhtawakga Isaías 65:​16, 17). Jehová natlawa pi taʼakglhuwit nalakgsputa chu chuna la natitaxtu kilhtamaku, kskujnin nialh katilakapastakkgolh tuku nitlan titaxtukgonit chu nialh katililipuwankgolh.

10. ¿Tuku xlakata akgtum tasikulunalin akxtum katatawilakan natalan? (Na kaʼakxilhti dibujo).

¹⁰ Akxni anaw kkintamakxtumitkan, skaya makgkatsiyaw chu nitu lilakgaputsayaw. Akxni anta wilaw, ni wa lilakpuwanaw tuku nitlan anan kʼuma kakilhtamaku. ¿Tuku tlan xtlawaw xlakata kʼuma paraíso xaʼespiritual ankgalhin skaya xmakgkatsiw? Kalimasiyaw tayat nema espíritu tlawa pi nakgalhiyaw, chuna la tapaxkit, tapaxuwan, takaksni, tlan likatsikan chu kgalhikan tsatata naku (Gál. 5:​22, 23). ¡Akgtum lanka tasikulunalin makgtapakgsikan kxkachikin Dios! Komo ni namakgxtakgaw paraíso xaʼespiritual, naʼakxilhaw la Dios namakgantaxti tamalaknun nema tlawalh akxni wa pi xʼama tlawa «xasasti akgapun chu xasasti katiyatni».

11. ¿La makgkatsiyaw xlakata makgtapakgsiyaw kparaíso xaʼespiritual? (Isaías 65:​18, 19).

¹¹ Paxtikatsiniyaw Jehová. Isaías lichuwinan tuku xlakata xlakskujnin Dios lu paxuwayaw. Paraíso xaʼespiritual niku wilaw wa Jehová malakatsukilh (kalikgalhtawakga Isaías 65:​18, 19). Wa xlakata xla kinkamaklakaskinan xlakata nakamakgpuwantiniyaw latamanin namakgxtakgkgo uma xalixkajni kakilhtamaku, nema ni kamasiyani xaxlikana xlakata Dios, chu nakamakgtayayaw namakgtapakgsikgo kparaíso xaʼespiritual. ¡Lu paxuwayaw xlakata lakgapasaw xaxlikana! Chu wa xlakata kalitachuwinamputunaw umakgolh tasikulunalin amakgapitsin latamanin (Jer. 31:12).

12. ¿La makgkatsiya akxni likgalhtawakgaya tuku wan Isaías 65:​20-24, chu tuku xlakata?

¹² Tiku wilaw kparaíso xaʼespiritual lu paxtikatsiniyaw  Jehová chu lu paxuwayaw xlakata kgalhiyaw takgalhkgalhin. ¡Kalilakpuwanti putum tuku naʼakxilha chu putum tuku natlawaya kxasasti kakilhtamaku! Biblia malaknu: «Anta ni katiʼanalh lakgskgatan tiku kaj ni makgas nalatamakgo nipara lakgkgolon katinikgolh akxni nina makgatsikgo nawan xkilhtamakujkan». Chu na wan pi latamanin «natlawakgo chiki chu anta natawilakgo; nachankgo uvas chu nawakgo xtawakat». Chu «ni kaj katilitlakgwantamakgankgolh xtaskujutkan» xlakata Jehová nakasikulunatlawa. Dios kamalaknuni pi lu nalipaxuwakgo xlatamatkan, nitu katilipekuankgolh chu tlan namakgkatsikgo. Dios wan pi “asta akxni xlakan nina kilhʼanikgo”, xla nakatsiya tuku maklakaskinkgo chu nakamaxki putum «tuku maklakaskinkgo» (Is. 65:​20-24; Sal. 145:16).

13. Chuna la wan Isaías 65:​25, ¿tuku talakgpalit tlawakgonit makgapitsi latamanin xlakata naskujnanikgo Jehová?

¹³ Kgalhiyaw takaksni chu nitu lipekuanaw. Xlakata espíritu santo kamakgtayanit, lhuwa latamanin tiku xapulana lakluku xwankgonit lakgpalikgonit xlatamatkan (kalikgalhtawakga Isaías 65:25). Tlan nawanaw pi mamansujlikgonit xtayatkan (Rom. 12:2; Efes. 4:​22-24). Xlikana pi xlakskujnin Dios chuntiya makglakgalhinanin litaxtuyaw, chu wa xlakata min kilhtamaku tlawayaw tuku nitlan. Maski chuna, Jehová tlawanit akgtum stlan milagro xlakata tlawanit pi «putum latamanin» xalak tanu tanu kachikinin makxtum natawilakgo, nakgalhikgo takaksni chu nalalimasiyanikgo tapaxkit (Tito 2:11). ¡Kajwatiya Dios tiku kgalhi putum litliwakga tlan tlawa uma!

14. ¿La kgantaxtulh kxlatamat chatum tala tuku wan Isaías 65:25?

¹⁴ ¿Pero xlikana tlan nalakgpali la likatsi chatum lataman? Liʼakxilhtit nema nalichuwinanaw limasiya pi chuna. Chatum chixku tiku xkgalhi 20 kata lu xaluku xwanit chu xtlawa talakgxtumit nema ni xlitatlawat, chu makglhuwa xtamaknukanit kpulachin xlakata xtlawanit tuku nitlan, xkakgalhan putlaw chu atanu tuku lu nitlan xtlawa. Nachuna, katiwa tiku xtalatlawa. Akxni xlimakgtumku kgaxmatli tuku masiya Biblia chu tsukulh katatamakxtumi xtatayananin Jehová, akxilhli pi xtekgsnit tuku xmakgapaxuwalh kxlatamat: nakakninani Dios kparaíso xaʼespiritual. Akxni xtamununita, xlilakpuwan la xkgantaxtunit kxlatamat tuku wan Isaías 65:25. Maski xapulana lu xaluku xwanit chuna la tantum león, xamanso litaxtulh chuna la tantum borrego.

15. ¿Tuku xlakata kamakgtayaputunaw latamanin namakgtapakgsiputunkgo kparaíso xaʼespiritual, chu la natlawayaw?

¹⁵ Isaías 65:13 litsuku umakgolh tachuwin: «Wa uma tuku wan Malana Jehová Tiku lakgchan namapakgsinan». Chu versículo 25 liʼakgasputa umakgolh tachuwin: «Wan Jehová». Tuku Jehová malaknu ankgalhin kgantaxtu (Is. 55:​10, 11). Paraíso xaʼespiritual xlikana wi; tuku Jehová lichuwinalh xpalakata uma paraíso kgantaxtunit. Xla tlawanit pi tiku kakninanikgo makxtum natawilakgo, nitu nalipekuankgo chu nakgalhikgo takaksni maski lamakgo kʼakgtum kakilhtamaku niku lama tuku nitlan (Sal. 72:7). Xlakata lhuwa tuku lipaxuwayaw akinin, lu kamakgtayaputunaw lhuwa latamanin xlakata na namakgtapakgsikgo kʼuma familia. ¿La natlawayaw? Lu naliskujaw xlakata nakamakgtayayaw latamanin kstalaninanin Jesús nalitaxtukgo (Mat. 28:​19, 20).

¿TUKU NATLAWAYAW XLAKATA LATAMANIN NAMAKGTAPAKGSIPUTUNKGO KPARAÍSO XAʼESPIRITUAL?

16. ¿Tuku tlawa pi latamanin namakgtapakgsiputunkgo kparaíso xaʼespiritual?

¹⁶ Kimputumkan wi tuku tlan natlawayaw xlakata paraíso xaʼespiritual tlakg lilakgatit nawan chu tlakg lhuwa latamanin namakgtapakgsiputunkgo anta. ¿La natlawayaw? Nastalaniyaw xliʼakxilhtit Jehová. Xla ni xafuerza  tlawa pi latamanin natalakatsuwinikgo, wata kalimasiyani tapaxkit xlakata natalakatsuwiniputunkgo (Jer. 31:3; Juan 6:44). Latamanin tiku kgalhikgo akgtum tlan naku chu tsukukgo lakgapaskgo Jehová, tlakg lakgapasputunkgo xlakata akxilhkgo pi kgalhi laktlan tayat. ¿Tuku tayat tlan nalimasiyayaw akinin xlakata latamanin na namakgtapakgsiputunkgo kparaíso xaʼespiritual?

17. ¿Tuku tlan natlawayaw xlakata latamanin namakgtapakgsiputunkgo kparaíso xaʼespiritual?

¹⁷ Pulaktum tuku tlan natlawayaw xlakata latamanin namakgtapakgsiputunkgo kparaíso xaʼespiritual wa pi nakalimasiyaniyaw tapaxkit kinatalankan chu tlan nakalikatsiniyaw. Lakaskinaw pi latamanin tiku naʼankgo kkintamakxtumitkan na nawankgo chuna la wankgolh tiku kilakgolh ktamakxtumit kxamakgan Corinto: «Dios xlikana katawilan» (1 Cor. 14:​24, 25; Zac. 8:23). Wa xlakata lu xlakaskinka nastalaniyaw uma tastakyaw: «Ni kalatakgalhitit taʼakglhuwit» (1 Tes. 5:13).

18. ¿Tuku akxilhkgo latamanin nema natlawa pi natalakatsuwiniputunkgo xkachikin Jehová?

¹⁸ Na talakaskin naliskujaw nakaʼakxilhaw kinatalankan chuna la kaʼakxilha Jehová. Wa xlakata, wa tlakg kuenta tlawayaw xalaktlan tayat nema kgalhikgo chu ni wa ni xalaktlan xtayatkan, nema kxasasti kakilhtamaku nialh katikgalhikgolh. Tapaxkit nakinkamakgtayayan nalakkaxtlawayaw putum taʼakglhuwit nema nakgalhiyaw komo putum kilhtamaku nastalaniyaw uma tastakyaw: «Tlan kalikatsitit chu kalalakgalhamantit chu lu kalatapatiputuntit chatunu chatunu» (Efes. 4:32). Putum tiku lakaskinkgo pi chuna kakalikatsinika namakgtapakgsiputunkgo kparaíso xaʼespiritual. b

 KATAMAKGXTAKGWI KPARAÍSO XAʼESPIRITUAL

19. 1) ¿Tuku wankgonit makgapitsi latamanin tiku taspitkgolh kparaíso xaʼespiritual? (Kaʼakxilhti recuadro « Xʼankgonit, pero taspitparakgolh»). 2) ¿Tuku talakaskin lu naliskujaw? (Na kaʼakxilhti dibujo).

¹⁹ ¡Akgtum lanka talakgalhaman pi makgtapakgsiyaw kparaíso xaʼespiritual! La uku tlakg lilakgatit chu tlakg lhuwa tiku skujnanimakgo Jehová anta. Ankgalhin kapaxtikatsiniw Dios xlakata malakatsukilh uma paraíso. Putum tiku paxuwaputunkgo, kgalhiputunkgo litliwakga, skaya makgkatsiputunkgo chu nitu lipekuamputunkgo xlimakgtapakgsitkan kʼuma paraíso chu nikxni xlimakgxtakgatkan. Pero kuenta katlawaw, xlakata Satanás lu liskujma nakinkaʼakgskgawiyan chu tlawaputun pi natamakgatliniyaw uma paraíso (1 Ped. 5:8; Apoc. 12:9). Ni kamastaw talakaskin pi chuna natlawa. Lu kaliskujwi xlakata paraíso xaʼespiritual chuntiya lilakgatit natasiya, nitu nalixkajwan chu naʼanan takaksni.