1. ¿La xtalakkaxtawilanit xkachikin Jehová kxapulana siglo?

 AKXNI Jehová kalakgayawa taskujut xlakskujnin, ni lakaskin pi kaj akglakgwa natlawakgo (1 Cor. 14:33). Akgtum liʼakxilhtit, xla lakaskin pi kxlikalanka Katiyatni kalichuwinanka xalaktlan tamakatsinin (Mat. 24:14). Chu lakgayawanit Jesús napulalin uma taskujut. Chu Jesús liwana lakkaxwilinit la natlawakan uma taskujut. Kxapulana siglo, anta kJerusalén xwi akgtum grupo niku xmakgtapakgsikgo apóstoles chu lakgkgolotsin xalak uma kachikin, wa xlaksakkgo tuku natlawakan chu alistalh xkamakatsinikgo congregaciones tuku xlitlawatkan xwanit (Hech. 15:2; 16:4). Xkalaksakkan lakgkgolotsin xlakata napulalinkgo akgatunu congregaciones chu xlakata xkamakatsinikgolh natalan tuku xlitlawatkan xwanit (Hech. 14:23). Xlakata natalan xkgalhakgaxmatnankgo, «congregaciones chuntiya tlakg tatliwakglhkgolh xtakanajlakan chu chali chali talhuwitilhakgolh» (Hech. 16:5).

2. ¿La kapulalinit Jehová xkachikin lata kkata 1919 chu la kamatliwakglhninit xtakanajlakan?

² Kkinkilhtamakujkan, Jehová chuntiya lakkaxwilima xkachikin. Kkata 1919, Jesús tsukulh kamaklakaskin ni lhuwa lakchixkuwin tiku xkalilaksakkanit espíritu santo xlakata xlakkaxwilikgolh la nalichuwinankan Dios chu xkamaxkikgolh tuku nakamatliwakglhni xtakanajlakan kstalaninanin Cristo (Luc. 12:42). a Chu liwana tasiya pi Jehová sikulunatlawa xtaskujutkan tiku xatalaksakni (Is. 60:22; 65:​13, 14).

3, 4. 1) Kalichuwinanti akgtum liʼakxilhtit nema limasiya tuku tlan kitaxtu xlakata liwana talakkaxtawilanit xkachikin Jehová. 2) ¿Tuku naʼakxilhaw kʼuma artículo?

 ³ Komo xkachikin Dios ni liwana xtalakkaxtawilalh, nila xmakgantaxtiw taskujut nema kinkalakgayawanitan Jesús (Mat. 28:​19, 20). Akgtum liʼakxilhtit, komo kkincongregacionkan ni xlakkaxwilika niku nalichuwinanaw Dios, kaj akglakgwa niku xʼaw lichuwinanaw chu max kaj lakatum niku xʼaw chu nila xkalitachuwinaw Dios putum latamanin. Kalilakpuwanti atanu tuku lu tlan kitaxtunit xlakata xkachikin Dios liwana talakkaxtawilanit.

⁴ La uku, Jesús lakkaxwilinit xkachikin Dios chuna la xkalakkaxwilinit kstalaninanin akxni xlama unu kKatiyatni. Kʼuma artículo, nalichuwinanaw xliʼakxilhtit Jesús chu naʼakxilhaw la xkachikin Dios xala uku stalanima xliʼakxilhtit. Na naʼakxilhaw tuku tlan natlawayaw xlakata nalimasiyayaw pi lipawanaw xkachikin Jehová.

XKACHIKIN JEHOVÁ STALANI XLIʼAKXILHTIT JESÚS

5. ¿La stalani xliʼakxilhtit Jesús xkachikin Jehová? (Juan 8:28).

⁵ Putum tuku xtlawa Jesús chu xlichuwinan wa xTlat xmasiyaninit. Xtachuna la uma, putum xtastakyaw chu xtamasiy xkachikin Jehová, takilhtiyanit kxTachuwin Dios (kalikgalhtawakga Juan 8:28; 2 Tim. 3:​16, 17). Nachuna, ankgalhin kinkamalakapastakayan pi kalikgalhtawakgaw Biblia chu kalilatamaw tuku katsinimaw. ¿La litamakgtayayaw akxni stalaniyaw uma tastakyaw?

6. ¿Tuku lu tlan kitaxtu akxni likgalhtawakgayaw Biblia?

⁶ Akxni likgalhtawakgayaw Biblia chu maklakaskinaw kilikgalhtawakgakan xlakata tlakg naʼakgatekgsaw, lu litamakgtayayaw. Akgtum liʼakxilhtit, kinkamakgtayayan natamalakxtumiyaw tuku masiya Biblia chu tastakyaw nema masta xkachikin Jehová. Akxni akxilhaw pi umakgolh tastakyaw anta takilhtiyanit kBiblia, tlakg lipawanaw xkachikin Jehová (Rom. 12:2).

7. ¿Tuku tamakatsinin lichuwinalh Jesús, chu tuku tlawa xkachikin Jehová xlakata nastalani xliʼakxilhtit?

⁷ Jesús lichuwinalh «xatlan tamakatsinin xla xTamapakgsin Dios» (Luc. 4:​43, 44). Chu kalimapakgsilh kstalaninanin pi nachuna xtlawakgolh (Luc. 9:​1, 2; 10:​8, 9). Kkinkilhtamakujkan, putum tiku makgtapakgsikgo kxkachikin Jehová, maski tanu tanu kachikin niku lamakgo o tanu tanu tuku lakgayakgo, lichuwinankgo tamakatsinin xla xTamapakgsin Dios.

8. ¿Tuku talakgalhaman kgalhiyaw?

⁸ Akgtum lanka talakgalhaman nakaliniyaw latamanin xatlan tamakatsinin xla xTamapakgsin Dios. Ni putum kgalhikgo uma talakgalhaman. Akgtum liʼakxilhtit, akxni Jesús xlama kKatiyatni, ni mastalh talakaskin pi demonios xlichuwinankgolh xpalakata (Luc. 4:41). Kkinkilhtamakujkan, xlakata chatum lataman tlan naʼan kalitachuwinan Dios xtatayananin Jehová, pulana talakaskin wi tuku namakgatsi. ¿La limasiyayaw pi xtapalh liʼakxilhaw nalichuwinanaw Dios? Nalakputsayaw la tlakg nakalitachuwinanaw Dios latamanin. Chuna la Jesús, na lakaskinaw pi xaxlikana kalakgchalh xnakujkan latamanin chu tlakg kakatsiputunkgolh (Mat. 13:​3, 23; 1 Cor. 3:6).

9. ¿Tuku tlawanit xkachikin Jehová xlakata namasiya xtukuwani?

⁹ Jesús masiyalh xtukuwani Dios. Kʼakgtum oración nema tlawanilh xTlat xalak akgapun, Jesús wa: «Akit kkamasiyaninit mintukuwani» (Juan 17:26). Xkachikin Jehová stalani xliʼakxilhtit Jesús chu tlawa putum tuku matlani xlakata latamanin nakatsikgo tuku wanikan Dios. Pulaktum tuku lu maklakaskin xlakata chuna natlawa, wa Traducción del Nuevo Mundo, nema tlawakanit xamaktuminika o maski ni xamaktuminika, kliwaka 270 tanu tanu tachuwin. Kʼuma traducción wiliparakanit xtukuwani Dios niku xmin xapulana. Apéndices A4 chu A5 tlakg lichuwinan tuku xlakata wiliparakanit xtukuwani Dios. Chu kʼapéndice C, nema min kBiblia  de estudio, lichuwinan tipalhuwa tuku limasiya pi xtukuwani Dios 237 xlimakglit xliminat kTatsokgni xaGriego.

10. ¿Tuku kinkamasiyaniyan xliʼakxilhtit chatum puskat xalak Myanmar?

¹⁰ Xtachuna la Jesús, lakaskinaw pi lhuwa latamanin kalakgapaskgolh xtukuwani Dios. Anta Myanmar, chatum tala puskat masiyanilh chatum puskat tiku kgalhi 67 kata pi Dios wanikan Jehová. Puskat lu paxuwalh, chu wa: «Xlimakgtumku kkgaxmatma xtukuwani Dios. [...] Kimasiyaninita tuku tlakg xlakaskinka nema ni xakkatsi». Xliʼakxilhtit uma puskat kinkamasiyaniyan pi akxni latamanin lakgapaskgo xtukuwani Dios, kalakgpalini xlatamatkan.

CHUNTIYA KALIMASIYAW PI LIPAWANAW XKACHIKIN JEHOVÁ

11. ¿La nalimasiyakgo lakgkgolotsin pi lipawankgo xkachikin Dios? (Na kaʼakxilhti dibujos).

¹¹ ¿La nalimasiyakgo lakgkgolotsin pi lipawankgo xkachikin Jehová? Pulaktum wa pi liwana nalikgalhtawakgakgo tastakyaw nema kamalakgachani xkachikin Jehová chu lu naliskujkgo xlakata tlan namakgantaxtikgo. Akgtum liʼakxilhtit, ni kajwatiya makglhtinankgo tastakyaw xlakata la xlitamatitaxtit tamakxtumit chu la natlawakan oración ktamakxtumit, na kawanikan la nakakuentajtlawakgo kskujnin Jehová. Akxni lakgkgolotsin makgantaxtikgo tuku kaskini xkachikin Jehová, natalan makgkatsikgo pi Jehová kapaxki chu kakuentajtlawama.

12. 1) ¿Tuku xlakata kilikgalhakgaxmatatkan tuku kinkawanikgoyan tiku kinkapulalinkgoyan? (Hebreos 13:​7, 17). 2) ¿Tuku xlakata wa tlakg kuenta kilitlawatkan tuku tlan tlawakgo tiku kinkapulalinkgoyan?

¹² Akxni lakgkgolotsin kinkawanikgoyan tuku kilitlawatkan, talakaskin xatapaxuwan nakakgalhakgaxmataw. Akxni chuna tlawayaw, xlakan tlakg ni tuwa makgkatsikgo namakgantaxtikgo tuku kalakgayawakanit. Biblia kinkawaniyan pi kakakgalhakgaxmatwi tiku kinkapulalinkgoyan (kalikgalhtawakga Hebreos 13:​7, 17). Min kilhtamaku, uma tuwa tamakgkatsi xlakata lakgkgolotsin makglakgalhinanin. Pero kalakapastakwi pi kintalamakgasitsinkan lakaskinkgo pi wa tlakg kuenta katlawaw tuku nitlan tlawakgo nixawa tuku tlan tlawakgo. ¿Tuku xlakata chuna wanaw? Xlakata komo natsukuyaw kalakpuwaniyaw tuku nitlan lakgkgolotsin, max nialh katilipawaw xkachikin Dios, chu wa uma tuku kintalamakgasitsinkan lakaskinkgo. Pero ¿tuku tlan natlawayaw xlakata nakatsiyaw tuku taʼakgsanin maklakaskinkgo chu nalakgmakganaw?

NITU KATLAWALH PI NATAʼAKGSKGAWIYAW

13. ¿Tuku wankgo kintalamakgasitsinkan pi tlawa xkachikin Dios?

¹³ Kintalamakgasitsinkan kinkamalakpuwaniputunkgoyan pi tuku xatlan tlawa xkachikin Dios ni xlikana xatlan. Akgtum liʼakxilhtit, Biblia masiya pi Jehová lakaskin pi kskujnin nitu nalixkajwanankgo kxmaknikan, kxtayatkan chu kxtakanajlakan. Na wan pi kaxatikawa tiku lin xalixkajni latamat chu ni makgxtakga tuku nitlan tlawama, talakaskin natamakxtukan kcongregación (1 Cor. 5:​11-13; 6:​9, 10). Xlakata akinin makgantaxtiyaw uma limapakgsin, kintalamakgasitsinkan kinkalimawakakgoyan pi malakatsaliyaw chu ni xlilat tuku tlawayaw, chu wankgo pi tlakg xlakaskinka kinkaliʼakxilhkanan nixawa amakgapitsin.

14. ¿Niku minacha taʼakgsanin nema wankan xpalakata xkachikin Jehová?

¹⁴ Kalakapastakwi tiku kinkatlawaniputunan tuku nitlan. Satanás, «xtlat taʼakgsanin», wa tiku malakgatumi taʼakgsanin xpalakata xkachikin Jehová (Juan 8:44; Gén. 3:​1-5). Kxapulana siglo chuna tlawalh, chu wa xlakata ni kaks kinkamalakawaniyan pi la uku kamaklakaskin makgapitsi latamanin xlakata namalakgatumi umakgolh taʼakgsanin.

15. ¿Tuku nitlan katlawanika Jesús chu kstalaninanin?

 ¹⁵ Maski Jesús, xKgawasa Dios, ni xkgalhi talakgalhin chu xtlawa milagros, Satanás kamaklakaskilh makgapitsi latamanin xlakata xmalakgatumikgolh taʼakgsanin xpalakata. Akgtum liʼakxilhtit, xpulalinanin takanajla xkawanikgo latamanin pi Jesús xkatamakxtu demonios xlakata xkgalhi xtamakgtay «xmapakgsinakan demonios» (Mar. 3:22). Alistalh, akxni lakputsananika Jesús, xpulalinanin takanajla limawakakgolh pi lixkajni xlichuwinanit Dios chu tlawakgolh pi latamanin kskinkgolh pi xmakgnika (Mat. 27:20). Titaxtulh kilhtamaku, akxni kstalaninanin Cristo tsukukgolh lichuwinankgo Dios, xtalamakgasitsinkan «tlawakgolh pi latamanin xalak atanu kachikinin lu xkasitsinikgolh» chu xkaputsastalanikgolh (Hech. 14:​2, 19). Akxni revista La Atalaya 1 xla diciembre kata 1998 lichuwinalh tuku wan Hechos 14:​2, wa pi xtalamakgasitsinkan kstalaninanin Cristo ni kajwatiya ni makgamakglhtinankgolh tamakatsinin nema xlichuwinamakgo, wata «malakgatumikgolh ta’akgsanin» xlakata latamanin xalak atanu kachikinin ni xkaʼakxilhputunkgolh kstalaninanin Cristo.

16. ¿Tuku kilitlawatkan komo nakgaxmataw pi lichuwinamaka tuku ni xaxlikana?

¹⁶ Satanás putum kilhtamaku akgsaninanit, chu la uku chuntiya «kaʼakgskgawima putum tiku lamakgolh kkatiyatni» (Apoc. 12:9). Wa xlakata, komo nakgaxmataw pi nitlan lichuwinamaka xkachikin Dios o nitlan kalichuwinamaka natalan tiku pulalinankgo, kalakapastakwi tuku tlawakgolh xtalamakgasitsin Dios kxkilhtamaku Jesús chu kstalaninanin. Chuna la xwanit Biblia pi xʼama la, latamanin kaputsastalanimakgo xtatayananin Jehová chu lichuwinamakgo tuku ni xaxlikana xpalakatakan (Mat. 5:​11, 12). Kintalamakgasitsinkan ni kintikaʼakgskgawikgon komo nalakapastakaw niku  minacha umakgolh taʼakgsanin chu lakapala nalakgmakganaw. ¿Tuku kilitlawatkan xlakata ni nakinkaʼakgskgawikanan?

17. ¿Tuku kilitlawatkan komo nakinkamalakgachanikanan ni xaxlikana tamakatsinin? (2 Timoteo 1:13; na kaʼakxilhti recuadro « ¿Lakgchin ni xaxlikana tamakatsinin? ¿Tuku militlawat?»).

¹⁷ Kalakgmakgaw tuku ni xaxlikana. Apóstol Pablo liwana wa tuku kilitlawatkan komo nakinkamalakgachanikanan ni xaxlikana tamakatsinin. Wanilh Timoteo tuku xlitlawatkan xwanit natalan: «Nipara kakgaxmatkgolh cuentos» (1 Tim. 1:​3, 4). Chu maxkilh uma tastakyaw Timoteo: «Kalakgmakganti cuentos nema ni maxkikgo kakni Dios» (1 Tim. 4:7). Kawiliw akgtum liʼakxilhtit: komo chatum aktsu kgawasa wi tuku natekgsa kkatutsu, max nasaka chu natsuku tsutsu; pero chatum tiku lankata nichuna katitlawalh xlakata katsi niku xma chu akgatekgsa pi komo chuna natlawa max nalitatatla. Xtachuna la uma, akinin lakgmakganaw putum ni xaxlikana tamakatsinin chu kajwatiya kgaxmataw «tachuwin nema makgtayanankgo» (kalikgalhtawakga 2 Timoteo 1:13).

18. ¿La tlan nalimasiyayaw pi lipawanaw xkachikin Jehová?

¹⁸ Kʼuma artículo, akxilhnitaw pulaktutu chuna la xkachikin Dios stalani xliʼakxilhtit Jesús, pero ni kajwatiya uma tuku tlawa. Chuna la wix nalikgalhtawakgatilhaya Biblia, max naʼakxilha atanu tuku xkachikin Jehová tlawa xlakata nastalani xliʼakxilhtit Jesús. Chuntiya kakamakgtaya minatalan nalipawankgo xkachikin Jehová. Chuntiya kaskujnani Jehová chu ni kamasta talakaskin pi wi tuku natlawa pi natamakgatliniya xkachikin nema maklakaskin xlakata namakgantaxti xtalakaskin (Sal. 37:28). ¿Ni xlikana pi akgtum lanka talakgalhaman pi skujnanimaw Jehová kxkachikin, niku lapaxkikan chu ni lamakgxtakgkan? ¡Lanka talakgalhaman kaliʼakxilhwi uma!