Klakachilh kkata 1955, kinatlatni kgalhikgolh kgalhtutu lakgkgawasan chu akit tiku tlakg xaʼaktsujku. Kstakli lakatsu kcosta sur xalak Finlandia, nema la uku lilakgapaskan kachikin xalak Vantaa.

Kintse tamunulh chu xtatayana Jehová litaxtulh akxni akit nina xaklakachin. Pero kintlat ni lakgatilh chu ni xmaxki talakaskin xkinkalitachuwinan Biblia chu xkinkalin ktamakxtumit. Wa xlakata akxni kintlat ni xtawila, kintse xkinkalitachuwinanan Jehová.

Lata aktsujku xakkwanit klaksali naktataya Jehová. Akgtum liʼakxilhtit, akxni xakkgalhi akgtujun kata kimakgalhtawakgena lu sitsilh xlakata ni kwaputulh verilättyjä (nema xtachuna la maktum tulankachaw nema tlawakan kFinlandia chu pulakmanukan kgalhni). Xafuerza xkimakgalhpitsima xlakata nakinkilhmanu, pero akit kmakalasli chu kmamakganilh tenedor.

Akxni xakkgalhi 12 kata, kintlat nilh. Lata ama kilhtamaku tlan ktsukulh kkan ktamakxtumit. Natalan lu kililakgaputsakgolh, chu uma kimakgtayalh xlakata kstakli kintakanajla. Ankgalhin ktsukulh klikgalhtawakga Biblia chu ktsukulh klakputsanani kilikgalhtawakgakan. Chu uma lu kimakgtayalh xlakata tlan xaktamunulh akxni xakkgalhi 14 kata, 8 xla agosto kata 1969.

Akxni nina makgas xakmasputunit kintakgalhtawakga kʼescuela, ktsukulh skujnani Jehová chuna la precursor regular. Ni akglhuwa semanas titaxtulh, kkalh latama Pielavesi, akgtum aktsu kachikin  nema wi lakatsu kxʼitat Finlandia, xlakata xakmakgtayanalh nalichuwinankan Dios.

Anta kPielavesi, klakgapasli Sirkka, tiku alistalh kimpuskat litaxtulh. Tuku lu klakgatilh wa pi xla xtaktuju chu tliwakga xwanit xtakanajla, xla ni xlakaskin pi amakgapitsin xlakaskinka xliʼakxilhkgolh. Chu ni xlakaskinka xliʼakxilha nakgalhi tuku lhuwa xtapalh. Kinchatiykan tlakg xakskujnaniputunaw Jehová chu liwana xaklakkaxwilinitaw naktlawayaw putum tuku xkinkalakgayawakan. Ktamakgaxtokgwi 23 xla marzo kkata 1974. Ni klakpuwaw nakkanaw paxialhnanaw xlakata aku xaktamakgaxtokgnitaw, wata kkaw makgtayananaw kKarttula, niku tlakg xtalakaskin tiku xlichuwinankgolh Dios.

Lata akxni ktamakgaxtokgwi, Jehová ankgalhin kinkalimasiyaninitan pi nakinkamaxkiyan putum tuku kmaklakaskinaw komo wa pulana nakwiliyaw xTamapakgsin kkilatamatkan (Mat. 6:33). Akgtum liʼakxilhtit, anta kKarttula, ni xakkgalhiyaw akgtum putlaw. Xakmaklakaskinaw bicicleta xlakata wi niku xakkaw. Pero akxni lu xlonkgnan nila niku xakkanaw. Nachuna, xlakata lu lakalhuwa niku xakkanaw lichuwinanaw Dios, xakmaklakaskinaw akgtum putlaw, pero ni xakkgalhiyaw tumin xlakata tlan xaktamawaw.

Akgtum kilhtamaku, kintala kgawasa milh kinkgalakgapaxialhnanan chu kinkawanin pi xkinkamaxkiman xputlaw. Nitu kxokgoniw, chu nipara seguro kxokgow. Kajwatiya xtalakaskin xakmujuniw gasolina. ¡Xakkgalhiyawa akgtum putlaw!

Jehová liwana kinkalimasiyanin pi xʼama kinkamaxkiyan putum tuku xakkamaw maklakaskinaw. Kajwatiya xtalakaskin pulana xakwiliw xTamapakgsin kkilatamatkan.

Kkata 1978, akxni kkilaw kʼEscuela xla Precursor, Raimo Kuokkanen, a chatum tiku xmakgalhtawakgenan kʼuma escuela kinkamakgpuwantinin pi xakmalakgatsamaw maktum solicitud xlakata xakʼaw kʼEscuela de Galaad. Wa xlakata ktsukuw katsiniyaw inglés xlakata tlan xakmakgatsiw tuku xtaskini. Pero ni kmalakgachaw solicitud, xlakata kkata 1980 kinkawanikan pi xakkaw makgtayananaw ksucursal xalak Finlandia. Uma kilhtamaku, betelitas nila xʼankgo kʼGalaad. Xakskujnaniputunaw Jehová niku xla xkinkawanin chu ni anta niku akinin xaklakaskinaw. Wa xlakata kmakglhtinaw uma invitación. Pero chuntiya xakkatsinimaw inglés xlakata tlan xakmalakgatsamaw solicitud  komo xmilh kilhtamaku xkinkawanikan pi tlan xakkaw kʼGalaad.

Ni akglhuwa kata titaxtulh, Lakgkgolotsin tiku Pulalinankgo lakkaxwilikgolh pi betelitas tlan xʼankgolh kʼGalaad. Wa xlakata tunkun kmalakgachaw kisolicitudkan. Akinin lu xakpaxuwayaw chuna la xakskujnanimaw Jehová kBetel, pero komo xakmakgatsiw tuku xtalakaskin, xakkamputunaw makgtayananaw niku tlakg xtalakaskin tamakgtay. Kinkawanikan pi xakkaw kclase número 79 de Galaad, chu kmasputuw uma escuela septiembre kata 1985. ¿Chu niku kinkamalakgachakan? ¡Anta kColombia!

Akxni kchaw kColombia, kinkamalakgachakan nakskujaw ksucursal. Lu kliskujli xlakata tlan xakmakgantaxtilh taskujut nema xkilakgayawakanit, pero titaxtulh akgtum kata klakpuwa pi xtalakaskin xlakgpalika kintaskujut. Kajwatiya uma kilhtamaku akxni kskilh pi xlakgpalika kintaskujut. Wa xlakata kinkamalakgachakan chuna la misioneros anta kNeiva, kkachikin Huila.

Akit ankgalhin lu klipaxuwanit naklichuwinan Dios. Anta kFinlandia, akxni nina xaktamakgaxtokga chu precursor xakwanit, xmin kilhtamaku lu tsisa xaktsuku lichuwinan Dios chu katsisni xakmasputu. Chu akxni aku xaktamakgaxtokgnitaw, Sirkka chu akit tantaku xaklichuwinanaw Dios. Akxni tlakg lakgamakgat xakkanaw lichuwinanaw, xmin kilhtamaku xaklhtatayaw kkinputlawkan. Uma xkinkamakgtayayan tlakg lakapala xakchaw niku xakkamaw chu tlakg sokg xaktsukuyaw lichuwinanaw Dios.

Xlakata tlakg klimaxtuparaw kilhtamaku naklichuwinanaw Dios kmakgkatsiparaw tapaxuwan nema xakkgalhiyaw xapulana. Kcongregación niku xakmakgtayanamaw tsukulh staka chu natalan xalak Colombia lu tlan xlikatsikgo, xkinkapaxkikgoyan chu lu xkinkapaxtikatsinikgoyan xlakata putum tuku xaktlawayaw xpalakatakan.

Lakatsu kNeiva xʼanankgo laktsu kachikinin niku ni xʼanan nipara chatum xtatayana Jehová. Pero lu kalipekua xwanit, chu chatum tiku ni xala anta nila xʼan, xlakata xʼanankgo guerrilleros o latamanin tiku xtalalakatawakakgo mapakgsinanin. Wa xlakata, ¿la xʼamaka kalitachuwinankan tuku xaxlikana umakgolh latamanin? Kajwatiya uma tuku xaklilakpuwan. Ktsukulh tlawani oración Jehová xlakata chatum lataman tiku xala anta xwanit chu xlama kNeiva xTatayana Jehová xlitaxtulh. Na xakskini pi akxni tamununita xwa uma tala kstakli xtakanajla chu xtaspitpa kxkachikin xlakata tlan xlichuwinalh xtachuwin. Xaklakpuwan pi uma wa tuku tlakg tlan xwanit; pero Jehová wi tuku tlakg tlan xlakpuwanit natlawa.

Ni lhuwa kilhtamaku titaxtulh, ktsukulh limakgalhtawakge Biblia chatum kgawasa tiku xwanikan Fernando González, tiku xlama kʼAlgeciras, akgtum aktsu kachikin niku ni xʼanankgo xtatayananin Jehová. Xla akgatunu semana xʼan skuja kNeiva, nema 50 kilómetros xlilakgamakgat xwi. Xla ankgalhin liwana xlakkaxwili tuku xakkamaw likgalhtawakgayaw, chu tunkun tsukulh an kputuminika tamakxtumit. Nachuna, lata xapulana semana nema ktsukuw kgalhtawakgayaw, xla tsukulh kamamakxtumi latamanin xalak xkachikin chu xkalitachuwinan tuku xkatsinima.

Fernando tamunulh enero kata 1990, akxni kajku akgchaxan papaʼ xtitaxtunit lata xtsukunit kgalhtawakga, chu tunkun precursor regular litaxtulh.  Uma kilhtamaku, sucursal tlan tsukulh kamalakgacha precursores especiales kʼAlgeciras chu nitu xkatlawanikan xlakata xwija chatum xtatayana Jehová anta. Chu febrero kata 1992 lakkaxwilika akgtum congregación anta.

Pero Fernando ni anta tamakgxtakgli kʼAlgeciras. Akxni tamakgaxtokgli, xla chu xpuskat, Olga, ankgolh makgtayanankgo kʼatanu aktsu kachikin niku ni xʼanankgo xtatayananin Jehová: kSan Vicente del Caguán. Anta na makgtayanankgolh nalakkaxwilikan akgtum congregación. Chu kkata 2002, Fernando superintendente de circuito litaxtulh, chu chuntiya liskujmakgo uma asta la uku.

Uma tuku ktitaxtuw kimasiyanilh pi lu xlakaskinka liwana nawaniyaw Jehová la lakaskinaw kakgantaxtulh tuku kinkalakgayawanitan. Xla tlan natlawa tuku akinin nila tlawayaw. Kalakapastakwi pi Jehová wa xMalana tachanan (Mat. 9:38).

Kkata 1990, superintendente kilimaxtuka chu xapulana circuito nema klakgapaxialhnaw xwi kBogotá, niku xtapakgsi país. Sirkka chu akit ni lu xlakaskinka klitaxtuyaw chu ni kkatsiniyaw tlawayaw tuku kaks malakawaninan. Nachuna, ni xaklismaninitaw naklatamayaw kʼakgtum lanka kachikin. Wa xlakata xakpekuanaw tsinu chu xaklilakpuwanaw komo tlan xakkamaw makgantaxtiyaw taskujut nema xkinkalakgayawakanitan. Pero Jehová ankgalhin makgantaxtilh tuku talhkatawilanit kFilipenses 2:​13, niku wan: «Dios kamatliwakglhan kaj xlakata xtalakaskin, chu tlawa pi natlawaputunatit chu kamaxkiyan litliwakga xlakata chuna natlawayatit».

Titaxtulh kilhtamaku kinkamalakgachakan kʼatanu circuito nema xwi kMedellín, kkachikin nema kkalitachuwinan xapulana. Kʼuma kachikin latamanin lu xlismanikgonit naʼakxilhkgo pi xlatalatlawakan kkatijinin chu nialh xpekuankgo. Klakapastaka akgtum kilhtamaku akxni xaklimakgalhtawakgenama Biblia chu kkilhtin tsukuka latalakan. Akit atsinu ni ktamacha kkatutsu xlakata lu xakpekuama, pero tiku xaklimakgalhtawakgema Biblia nipara tsinu xpekuama chu chuntiya xlikgalhtawakgama tuku xakakxilhmaw. Akxni masputulh, kiwanilh pi xʼama taxtu puntsu. Akxni taspitli, xkalimin chatiy laktsu kamanan, chu xtasiya pi nipara tsinu xlakgaputsama chu kiwanilh: «Kakintapati, pero kkakitiyalh kinkamanan».

Ni kajwatiya uma tuku lu kinkamakgapekuan. Akgtum kilhtamaku akxni xaklichuwinamaw Dios kʼakgatunu chiki, kimpuskat kilakgmilh chu snapapa xtasiya xlakata xpekuanit. Kiwanilh pi chatum chixku xlimakgapankgananit xlakata xmakgniputun, chu akit na lu kpekualh. Pero alistalh kkatsiw pi uma chixku ni wa xmakgniputun kimpuskat, wata chatum chixku tiku xtitaxtuma kxpaxtun.

Chuna la titaxtulh kilhtamaku, tsinu tsinu klismaniw pi lu xlamakgnikan kʼuma kachikin. Lu kaks xaklilakawanaw pi natalan xtayanikgo putum uma chu atanu tuku lu nitlan xtitaxtukgo. Uma kinkamakgtayan nakakxilhaw pi komo Jehová xkamakgtayama umakgolh natalan, na xʼama kinkamakgtayayan. Ankgalhin ktlawaw tuku xkinkawanikgoyan lakgkgolotsin xalak congregación, lu kuenta xaktlawayaw akxni xaklatapuliyaw chu xaklipawanaw pi Jehová xʼama kinkakuentajtlawayan.

Xlikana pi ni putum tuku xla kʼuma kachikin kalipekua xwili kilatamatkan. Akgtum liʼakxilhtit, klakapastaka pi akxni xaklakgapaxialhnamaw akgtum  familia, kkgaxmatwi pi kkilhtin chatiy lakpuskatin xlakilhnimakgo. Akit ni xaktalakaxtuputun xlakata nakkatsi tuku xlitaʼakglhuwimakgo, pero puskat tiku xaklakgapaxialhnamaw kinkawanin pi xaktalakaxtuw. ¡Akxni ktalakaxtuw kakxilhwi pi tantiy cotorros xkakgalhwantastimakgo lakpuskatin!

Kkata 1997, makgalhtawakgena kilimaxtuka kʼEscuela Niku Kamasiyanikan Lakgkgolotsin chu Ministeriales. b Akit lu xaklakgati xakkan kʼumakgolh escuelas, pero nikxni klakpuwa pi xʼama min kilhtamaku akit xakkama masiya kʼakgtum escuela.

Alistalh, superintendente de distrito klitaxtulh. Pero akxni nialh anankgolh superintendentes de distrito, superintendente de circuito kilimaxtuparaka. Liwakaya 30 kata makgalhtawakgena klitaxtu kʼescuelas niku masiyakan xlakata Dios chu superintendente viajante klitaxtu. Kʼumakgolh taskujut nema kilakgayawakanit lhuwa tasikulunalin kmakglhtinanit, pero ni ankgalhin tlan kinkitaxtuninit. ¿Tuku xlakata chuna kwan?

Min kilhtamaku ni klakapuwan. Uma kimakgtayanit naktayani tuku tuwa ktitaxtunit, pero na minit kilhtamaku ni klakapuwanit nakkawani amakgapitsin xlakata wi tuku nalakkaxtlawakgo kcongregaciones. Akgtum liʼakxilhtit, xmin kilhtamaku xatasitsi xakkawani makgapitsi natalan pi xpaxkinankgolh chu xkaʼakgatekgsnikgolh amakgapitsin. Pero uma kilhtamaku akit ni xaktlawama tuku xakkawanima pi xtlawakgolh (Rom. 7:​21-23).

Minit kilhtamaku lu klitaxlajwaninit tuku nitlan ktlawa (Rom. 7:24). Akgtum kilhtamaku lu nitlan xakmakgkatsi chu kwanilh Jehová kʼakgtum oración pi tlakg tlan xwa komo nialh misionero xaklitaxtulh chu xaktaspitli kFinlandia. Pero uma kilhtamaku, kʼakgtum tamakxtumit kkgaxmatli tuku kimalakpuwanilh pi xtalakaskin chuntiya xakliskujli tuku xkilakgayawakanit chu chuntiya xakliskujli nakkgalhi laktlan tayat. Ankgalhin naklakapastaka la Jehová kgalhtilh kiʼoración. Na lu kpaxtikatsini xlakata kilimasiyaninit tapaxkit chu kimakgtayanit naklakgpali nixatlan kintayat.

Sirkka chu akit lu kpaxtikatsiniyaw Jehová xlakata kinkamaxkinitan talakaskin nakskujnaniyaw putum kilhtamaku. Na lu kpaxtikatsini xlakata kimaxkinit akgtum lanka tamaskiwin, chatum puskat tiku kimpaxki chu kimakgtayanit putum umakgolh kata.

Nialh makgas nakmakgatsi 70 kata, wa xlakata nialh makgalhtawakgena ktilitaxtulh kʼescuelas niku masiyakan xlakata Dios, chu nialh superintendente viajante ktilitaxtulh, pero uma ni kimakgalipuwan. ¿Tuku xlakata? Xlakata liwana kkatsi pi ni talakaskin nakgalhiyaw xalaklanka talakgatay xlakata namaxkiyaw kakni Jehová. Tuku tlakg xlakaskinka wa pi akxni naskujnaniyaw, nalimasiyayaw pi nila putum tlan tlawayaw chu chuntiya namalankiyaw xlakata paxkiyaw chu paxtikatsiniyaw (Miq. 6:8; Mar. 12:​32-34).

Kxliputuminika kilatamat klipaxuwanit lhuwa taskujut nema kilakgayawakanit. Pero akxni klilakpuwan umakgolh taskujut kʼakgatekgsa pi ni kimaxkika xlakata tlakg tlan xaktlawa o xlakata lu skgalala akit nixawa amakgapitsin. Jehová kilimasiyaninit talakgalhaman nema ni kinkalakgchanan, maski wi tuku nitlan ktlawa. Komo xla ni xkintimakgtayalh nila xaktimakgantaxtilh putum tuku kilakgayawaka. Tlan nakwan pi xlitliwakga Dios kimatliwakglhnit akxni ktaxlajwani (2 Cor. 12:9).