1, 2. 1) ¿Tuku likatsiyaw pi tlan nalilhakgananaw xasasti tayat? 2) ¿Tuku xalaksasti tayat tekgsaw kColosenses 3:10-14?

TACHUWIN «xasasti tayat» makgtiy tekgsaw kTraducción del Nuevo Mundo de las Santas Escrituras (Efes. 4:24; Col. 3:10). Kilhchanima tayat «nema tlawaka chuna la xtalakaskin Dios». ¿Tlan nalilhakgananaw uma xasasti tayat? Tlan, xlakata Jehová kinkatlawan chuna la xla. Wa xlakata tlan namakglhkatiyaw xtayat (Gén. 1:26, 27; Efes. 5:1).

² Xlikana pi kimputumkan kgalhiyaw talakgalhin xlakata xkamanan Adán chu Eva akinin, wa xlakata tlawaputunaw tuku nitlan. Nachuna, tuku lama kkakilhtamaku max na natlawaputunaw. Pero tlan lakwan tayat nakgalhiyaw xlakata xtapaxkit Jehová nema kinkamakgtayayan. Xlakata tlan chuna natlawayaw, kʼuma artículo naʼakxilhaw makgapitsi tayat nema Pablo lichuwinalh kBiblia (kalikgalhtawakga Colosenses 3:10-14). Na naʼakxilhaw la nalimasiyayaw akxni nalichuwinanaw Dios.

3. ¿Tuku litasiya pi lilhakgananitaw xasasti tayat?

³ Akxni kinkamakgpuwantinikan pi nalilhakgananaw xasasti tayat,  Pablo lichuwinalh pulaktum tuku lu xlakaskinka wa xlakata ni nalaksakpaxkinanaw. Anta kColosenses 3:11 wa: «Ni’anan ntapapitsit mpala akgmakgat chixkuwin, su wa nti luwa judío; mpala circuncidarlanit nchatum su ni circuncidarlanit; chu nti mpala kaj xamini, su wanti xalaktuntusnu; chu wa nti nkaj xatastan ktaskujut, su wa nti ni xatastan». * Ni chatum tiku xalak congregación tlakg xlakaskinka nalitaxtuputun xlakata la tasiya, niku minitancha o kaj xlakata taskujut nema kgalhi. ¿Tuku xlakata ni chuna xlilakapastakat? Xlakata xaxlikana kstalaninanin Cristo «kaj chatum lataman litaxtu», wamputun pi makxtum wilakgolh (Gál. 3:28).

4. 1) ¿La nalalikatsinikgo xlakskujnin Dios? 2) ¿Tuku max tuwa natlawa pi kstalaninanin Cristo nila makxtum katitawilaw?

⁴ Akxni lilhakgananaw xasasti tayat, kamaxkiyaw kakni putum latamanin maski tanu la tasiyakgo o tanu taskujut lakgayakgo (Rom. 2:11). Kʼalakatanu kachikinin max tuwa makgkatsikgo chuna natlawakgo. Akgtum liʼakxilhtit, makgasa mapakgsina xalak Sudáfrica kamapapitsilh latamanin chuna la xtasiyakgo. Latamanin tiku lakglhmumokgon lakatuma niku xwilakgolh, tiku lakgsitsekgan lakatanu niku xwilakgo chu xalaksmalalan lakatanu niku xwilakgolh. Makgapitsi xtatayananin Jehová antaku lamakgolh. Pero Lakgkgolotsin tiku Pulalinankgo xTatayananin Jehová xkamakgpuwantiniputunkgoy natalan pi kstalanikgolh tastakyaw xla 2 Corintios 6:13, niku wan: «Chalhuwa kakapaxkitit». Wa xlakata, octubre kata 2013 tawilalh akgtum programa xlakata natalan tlakg xlalakgapaskgolh. ¿Tuku xkilhchanima?

5, 6. 1) ¿Tuku tatlawalh kʼakgtum país xlakata tlakg nalatalalin natalan? (Kaʼakxilhti xapulana dibujo). 2) ¿Tuku kitaxtuma?

⁵ Uma programa xkilhchanima pi natalanin xalak akgtiy congregaciones nema tanu xtachuwinkan chu tanu tanu la xtasiyakgo akxtum xtawilakgolh akxni ksputa semana. Xlichuwinankgo Dios chu akxtum xʼankgo ktamakxtumit chu xʼankgo latawayankgo kxchikkan. Akglhuwa congregaciones chuna tlawakgolh. Sucursal makgamakglhtinalh lu laktlan tachuwin xpalakatakan latamanin tiku ni xtatayananin Jehová. Akgtum liʼakxilhtit, tiku pulalin akgtum takanajla wa: «Akit ni xtatayana Jehová, pero mintaskujutkan liwana talakkaxtawilanit chu akxtum wilatit maski tanu tanu la tasiyayatit». ¿La kakitaxtunilh natalanin xlakata uma programa?

⁶ Xapulana, chatum tala puskat wanikan Noma chu chuwinan tachuwin xhosa ni xkawaniputun pi kaʼankgolh kxchik natalan tiku lakglhmumokgon xalak congregación inglés. Pero akxni akxtum kalitachuwinalh Dios chu akxni xkatawi kxchik lichuwinalh: «¡Chuna likatsikgo la akinin! ¡Chu ni laktlankajwa!». Wa xlakata, akxni kxcongregación kamakgamakglhtinalh natalan tiku chuwinankgo inglés, kaxtlawalh liwat chu katawayalh makgapitsin. Chatum tiku kilalh kgolotsin xwanit chu lhmumokgo xwanit. Xla wa: «Kaks kimalakawanilh pi tawi kʼakgtum caja xla plástico nema lu aktsu xwanit». Uma programa chuntiya tatlawama. Wa xlakata lhuwa natalan kgalhikgo xalaksasti amigos chu chuntiyaku lakapastakkgonit pi nakalakgapaskgo amakgapitsi natalan tiku tanu tanu la tasiyakgo chu tiku tanu xtalismaninkan.

7. ¿Tuku xlakata chuntiya nalimasiyayaw talakgalhaman?

⁷ Xlakata lamaw kxkakilhtamaku Satanás, chuntiyaku napatinanaw xlakata ni anan taskujut, anan tajatat, taputsastalanit, o xlakata tuku nitlan lay, takgalhan chu atanu taʼakglhuwit. Talakaskin pi lu xlikana nakalakgalhamanaw xlakata nalamakgtayayaw chatunu  amakgapitsin. Tlan likatsikan nakinkamakgtayayan xalakgalhamana nawanaw (Efes. 4:32). Umakgolh xalaksasti tayat nakinkamakgtayayan xlakata namakglhkatiyaw Dios chu nakamakgtsiyajaw amakgapitsin (2 Cor. 1:3, 4).

8. ¿Tuku nakitaxtu komo tlan nakalikatsiniyaw chu nakalakgalhamanaw putum xalak congregación? Kawili akgtum liʼakxilhtit.

⁸ Max kincongregacionkan minkgonit natalan tiku xalak tanu país o tiku ni lhuwa tumin kgalhikgo. ¿La nakalimasiyaniyaw pi kalakgalhamanaw? Kiʼamigoskan nakalimaxtuyaw chu nakamamakgkatsiniyaw pi xlakaskinka litaxtukgo kcongregación (1 Cor. 12:22, 25). Kaʼakxilhwi xliʼakxilhtit Dannykarl, tiku xalak Filipinas chu alh latama kJapón. Anta kxtaskujut, ni lu tlan xlikatsinikan la amakgapitsin tiku xalak Japón. Pero akgtum kilhtamaku kilalh ktamakxtumit xla xtatayananin Jehová. Xla lakapastaka: «Xputumkan xalak Japón xwankgonit. Pero xatapaxuwan kimakgamakglhtinankgolh, la komo xlikana xkilakgapaskgo». Natalan tlan likatsinikgolh, chu uma makgtayalh xʼamigo Dios nawan. Tamunulh chu la uku kgolotsin litaxtu. Amakgapitsi lakgkgolotsin lichuwinankgo pi xla chu xpuskat Jennifer, lu makgtayanankgo kcongregación. Wankgo: «Uma tamakgaxtokgat liskujmakgolh la precursores chu xataktujun linkgo xlatamatkan chu lu tlan liʼakxilhtit xlakata pulana wilikgo xTamapakgsin Dios» (Luc. 12:31).

9, 10. ¿Tuku tasikulunalin makglhtinankgonit natalan xlakata talakgalhaman nema masiyakgo akxni lichuwinankgo Dios?

⁹ Akxni lichuwinanaw Dios kinkamaxkiyan talakaskin pi nakatlawaniyaw «wa ntu ntlan [...] xlipaks amakgapitsin» (Gál. 6:10). Lhuwa xtatayananin Jehová katsinimakgolh xasasti tachuwin xlakata kalakgalhamankgo tiku xalak atanu país (1 Cor. 9:23). Uma lu tlan kitaxtunit. Akgtum liʼakxilhtit, chatum precursora xalak Australia wanikan Tiffany xmakgtayanamputun kʼakgtum congregación niku chuwinankan suajili xalak kachikin Brisbane. Maski lu tuwa makgkatsilh nakatsini uma tachuwin, makgkatsi pi lipaxuwalh kxlatamat. Wan: «Tiku xlikana lipaxuwaputun akxni lichuwinan Dios, kamakgtayanalh kʼakgtum congregación niku tanu tachuwin chuwinankan. Xtachuna la komo napaxialhnana chu ni nataxtuya kminkachikin. Chu tlan nalipaxuwaya la lu tlan latalalin natalan xlikalanka katiyatni».

¹⁰ Na kalichuwinaw akgtum familia xalak Japón. Xatsumat tiku wanikan Sakiko, lichuwinan: «Kata 1990, lhuwa xakkatakgsaw latamanin xalak Brasil akxni xaklichuwinanaw Dios. Akxni xakkalikgalhtawakganiyaw Biblia ktachuwin portugués textos la komo Revelación o Apocalipsis 21:3, 4 o Salmo 37:10, 11, 29, kuenta xtlawakgo  chu lakgachunin asta xtasakgo». Pero xlakata talakgalhaman nema xkgalhikgo uma familia kamakgtayalh wi tuku natlawakgo. Sakiko lichuwinan: «Akxni kakxilhwi pi lu xlakgapasputunkgo Jehová, kimputumkan xakkatsiniputunaw portugués». Titaxtulh kilhtamaku, makgtayanankgolh pi xtawilalh akgtum congregación ktachuwin portugués. Chuna la titaxtunit kata, kamakgtayakgonit xlakskujnin Jehová nawankgo tiku xalak atanu país. Sakiko wa: «Lu kliskujwi xlakata nakatsiniyaw uma tachuwin, pero lu tlan kinkakitaxtunin. Lu kpaxtikatsiniyaw Jehová» (kalikgalhtawakga Hechos 10:34, 35).

11, 12. 1) ¿Tuku xlakata nalilhakgananaw xasasti tayat? 2) ¿Tuku nakinkamakgtayayan chuntiya nataktujuyaw?

¹¹ Xlakata lilhakgananaw xasasti tayat wa pi Jehová nalimaxkiyaw kakni chu ni wa lakchixkuwin. Kalakapastakwi pi chatum ángel lakgalhinalh xlakata tlankajwanalh (katamalakxtupi Ezequiel 28:17). Akinin tuwa makgkatsiyaw ni natlankajwananaw xlakata makglakgalhinanaw. Maski chuna, tlan kgalhiyaw tayat xla tataktujut. ¿La natlawayaw?

¹² Talakaskin pi nalimaxtuyaw kilhtamaku xlakata nalikgalhtawakgayaw Biblia chali chali chu nalilakpuwanaw (Deut. 17:18-20). Tuku nakinkamakgtayayan wa nalilakpuwanaw xtamasiy Jesús chu xli’akxilhtit xlakata tataktujut (Mat. 20:28). Xla lu xtaktuju asta kachakgenilh xtantunkan xʼapóstoles (Juan 13:12-17). Nachuna naskiniyaw Dios pi kakinkamaxkin xʼespíritu xlakata ni natlankajwananaw (Gál. 6:3, 4; Filip. 2:3).

13. ¿Tuku tasikulunalin namakglhtinanaw komo nataktujuyaw?

¹³ (Kalikgalhtawakga Proverbios 22:4). Jehová lakaskin pi putum kskujnin xtaktujukgolh. Komo chuna natlawayaw lhuwa tasikulunalin namakglhtinanaw. Akgtum liʼakxilhtit, natlawayaw pi naʼanan takaksni kcongregación chu makxtum natawilayaw. Nachuna, Jehová nakinkamaxkiyan talakgalhaman nema ni kinkamininiyan. Apóstol Pedro wa: «Nkakgalhitit ntasmalhwan nalalakgachixkuwiyatit nchatunu amakgapitsin sampi [kalakgmakgan] Dios wan nti ntlanka katsikgoy na maxkikgoy lipaxtikatsinit wa nti xalaksmalhwan» (1 Ped. 5:5).

14. ¿Tiku lu tlan liʼakxilhtit xlakata ni lakapala sitsikan chu tasmalhwan?

¹⁴ La uku, wilakgolh tiku wankgo pi tiku xakakswa chu ni lakapala sitsi wamputun pi ni lakgtliwakgan. Pero ni chuna. Umakgolh lakswan tayat wa kinkamaxkiyan Jehová, tiku tlakg tliwakga xlikalanka kakilhtamaku. Wa tiku lu tlan liʼakxilhtit xlakata ni lakapala sitsikan chu tasmalhwan (2 Ped. 3:9). Anta liʼakxilhaw la maklakaskilh x’ángeles akxni kakgalhtilh xlakata takgalhskinin nema tlawanikgolh Abrahán chu Lot (Gén. 18:22-33; 19:18-21). Chu nachuna akxilhaw pi ni lakapala katasitsilh kachikin Israel liwaka 1,500 kata (Ezeq. 33:11).

15. ¿Tuku liʼakxilhtit kinkamaxkin Jesús?

¹⁵ Jesús «luwa xasmalhwan [xwanit]» (Mat. 11:29). Ni lakapala ksitsi akxni xlakgalhinankgo xlimakgalhtawakget. Akxni xlama kKatiyatni, tayanilh pi xtalamakgasitsin tiku xpulalinkgo takanajla nitlan xlichuwinankgolh chu xliyawakgolh taʼakgsanin. Nachuna limasiyalh tasmalhwan chu ni lakapala ksitsi asta akxni nilh. Akxni xpatinama kkgantum kiwi, skinilh Jehová pi xkatapatilh tiku xmakgnimakgolh. Wa: «Ni katsikgo ntu ntlawakgo» (Luc. 23:34). Chuna la akxilhwi, Jesús limasiyalh pi ni lakapala ksitsi chu lu xasmalhwa xwanit maski tuwa tuku titaxtulh. ¡Lu tlan liʼakxilhtit  kinkamaxkin! (Kalikgalhtawakga 1 Pedro 2:21-23).

16. ¿La tlan nalimasiyayaw tasmalhwan chu ni lakapala nasitsiyaw?

¹⁶ ¿La tlan nalimasiyayaw tasmalhwan chu ni lakapala nasitsiyaw? Pulaktum wa pi nakatapatiyaw amakgapitsin. Pablo katsokgnanilh kstalaninanin Cristo: «Kalapaxuwanalipinitit, chu na nalamatsankgenaniyatit chatunu amakgapitsin lapi wi nti lamakgasitsiyatit; xtachuna lantla nkamatsankgenin Cristo, na chuna wixin nkatlawatit» (Col. 3:13). Xlikana pi lu xasmalhwan nawanaw chu ni lakapala nasitsiyaw xlakata tlan nakgalhakgaxmataw uma tastakyaw. Akxni chuna natlawayaw makxtum natawila congregación.

17. ¿Tuku xlakata lu xlakaskinka tasmalhwan chu ni lakapala sitsikan?

¹⁷ Jehová kinkawaniyan pi kalilhakganaw tasmalhwan chu ni lakapala kasitsiw. Umakgolh tayat lu xlakaskinka komo latamaputunaw kxasasti katiyatni (Mat. 5:5; Sant. 1:21). Pero tuku tlakg xlakaskinka wa pi komo chuna natlawayaw, namalankiyaw Jehová chu nakamakgtayayaw latamanin nakgalhakgaxmatkgo tuku masiya Biblia (Gál. 6:1; 2 Tim. 2:24, 25).

18. ¿Tuku tatalakxtumi tapaxkit chu ni nalaksakpaxkinanaw?

¹⁸ Putum tayat nema akxilhnitaw kʼuma artículo putum tatalakxtumi tapaxkit. Akgtum liʼakxilhtit, Santiago kastakyawalh xnatalan xlakata tlakg tlan xkalikatsinimakgo tiku xkgalhikgo tumin chu nixawa limaxkgenin. Kawanilh pi ni xkgalhakgaxmatmakgolh xlimapakgsin Dios niku xwan: «Napaxkiyatit nti lakatsu litawila lantlata wixin akstu paxkikana». Chu alistalh wampa: «Mpala pi stokgopitsiyatit nchixkuwin, talakgalhin makgapatanuyatit» (Sant. 2:8, 9). Komo paxkiyaw kintalakatsukan, niti katilaksakpaxkiw maski lhuwa kgalhtawakgalh, o xlakata la tasiya chu xlakata xtaskujut. Ni kaj kalimasiyaw pi paxkinanaw wata kilikgalhitkan uma tayat kkilatamatkan.

19. ¿Tuku xlakata lu xlakaskinka nalilhakgananaw tapaxkit?

¹⁹ Tapaxkit, «pati chu tlan likatsi» chu «ni tlankajwa» (1 Cor. 13:4). Wa xlakata talakaskin pi ni lakapala nasitsiyaw, tlan nalikatsiyaw chu nataktujuyaw xlakata chuntiya nakaliniyaw latamanin xasasti tamakatsinin xla Tamapakgsin (Mat. 28:19). Umakgolh tayat na kinkamakgtayayan pi putum tlan nakatalalinaw natalan xalak congregación. Komo kimputumkan nalimasiyayaw tapaxkit, natalan tlakg makxtum natawilakgo chu namaxkikgo kakni Jehová. Nachuna lhuwa latamanin nakatsiputunkgo tuku xaxlikana. Wa xlakata, chuna la lichuwinan Biblia xla xasasti tayat limasputu uma tachuwin: «Nawa ntu ntlakg xlakaskinka, mpi nalakgalhiniyatit ntapaxkit, sampi wa yuma ntu lakatanks makxtum tlawanan» (Col. 3:14).

20. 1) ¿Tuku nakinkakgalhskinkanan chu tuku xlakata? 2) ¿Tuku xatapaxuwan kgalhkgalhimaw?

²⁰ Kimputumkan kakinkakgalhskinkan: «¿Tuku tlakg naktlawa xlakata naklakgmakgan xamakgan tayat?». Talakaskin pi natasaskiniyaw Jehová pi kakinkamakgtayan xlakata namapanuyaw nixatlan talakapastakni chu nixatlan tatlaw nema natlawa pi ni namakglhtinanaw xTamapakgsin Jehová (Gál. 5:19-21). Nachuna nakinkakgalhskinkanan: «¿Chuntiya klakgpalima kintapuwan xlakata nakmakgapaxuwa Jehová?». Xlakata makglakgalhinanin akinin, chuntiya naliskujaw nakgalhiyaw xatlan tayat (Efes. 4:23, 24). ¡Lu tlan nawan latamat akxni putum latamanin nialh katimakglakgalhinankgolh chu putum kilhtamaku nakgalhikgo xatlan tayat!