XLAKATA anan lhuwa tuku lilakgaputsayaw kʼuma «xaʼawatiya kilhtamaku», putum xlakskujnin Jehová lakaskinaw pi xkgalhiw tayat xla takgalhkgalhin (2 Tim. 3:1-5). Latamanin xalak kakilhtamaku xʼakstukan lapaxkikgo, ni mastakgo talakaskin pi wi tuku nakatalakkaxlakan chu ni machokgokgo tuku nitlan tlawaputunkgo. Umakgolh latamanin ni kgalhikgo tayat xla takgalhkgalhin. Wa xlakata, akinin kstalaninanin Cristo tlan nakinkakgalhskinkanan: «¿Kimpasanit uma nixatlan tayat xalak kakilhtamaku? ¿Tuku kilhchanima kgalhkgalhinankan? ¿Tuku kilitlawat xlakata nakkgalhi uma lu xatlan tayat?».

Anta kBiblia, kgalhkgalhinankan ni kajwatiya kilhchanima wi tuku namakgxtakga maski tuwa. Kilhchanima natayaniya pero ni namakgatsankgaya takgalhkgalhin. Akxni xakgalhkgalhinanin akinin, ni kajwatiya lilakgaputsayaw tuku akinin maklakaskinaw, wata na kalilakgaputsayaw amakgapitsin maski tiku nitlan kinkalikatsinikgoyan. Ni lakpuwanaw pi uma lataman ni katitalakgpalilh wata kgalhkgalhiyaw. Wa xlakata ni kaks lilakawanaw akxni xTachuwin Dios wan pi tapaxkit limin takgalhkgalhin (1 Cor. 13:4). * Uma tayat na makgtanuma «xtatlaw espíritu» (Gál. 5:22, 23). Pero, ¿tuku talakaskin xlakata xakgalhkgalhina nawanaw?

Xlakata xakgalhkgalhinanin nawanaw, talakaskin naskiniyaw Jehová pi kakinkalimakgtayan xʼespíritu nema kamaxki putum tiku lipawankgo (Luc. 11:13). Pero maski xʼespíritu lu makgtayanan, na wi tuku kilitlawatkan chu naliskujaw tuku skinaw kʼoración (Sal. 86:10, 11). Talakaskin pi chali chali naliskujaw xlakata xakgalhkgalhinanin nawanaw chu chuna uma tayat natawila kkinakujkan. Maski chuna, max wi atanu tuku natlawayaw xlakata ankgalhin nakgalhiyaw uma tayat. ¿Tuku tlan natlawaya?

Tlan nakgalhiyaw uma tayat komo naʼakxilhaw xliʼakxilhtit Jesús. Akxni apóstol Pablo lichuwinalh xlakata «xasasti [tayat]», nema na makgtanuma «kgalhkgalhinankan», kawanilh kstalaninanin Cristo: «Ntatanksni ntu mastay Dios, kamalanalh kminakujkan» (Col. 3:10, 12, 15). Xlakata uma takaksni «namalanan» kkinakujkan, talakaskin nastalaniyaw xliʼakxilhtit xtakanajla Jesús xlakata Dios nalakkaxtlawa tuku titaxtumaw akxni chuna natalakaskin. Komo nastalaniyaw xliʼakxilhtit Cristo, nitu katitlawalh pi namakgatsankgayaw takgalhkgalhin, maski kalalh tuku nala (Juan 14:27; 16:33).

Maski lu lakaskinaw pi kachilh xasasti kakilhtamaku nema Dios kinkamalaknuninitan, tlakg katsiniyaw kgalhkgalhinanaw akxni lilakpuwanaw takgalhkgalhin nema xla kinkakgalhiniyan.  Biblia kinkawaniyan: «Jehová ni mamakgapali tuku wan pi nalimin, chuna la makgapitsi latamanin lakpuwankgo pi tamakgapalima, pero kakgalhkgalhiyan xlakata lakaskin pi nipara chatum kalakgsputli; wata, lakaskin pi putum kamakgxtakgkgolh tuku nitlan tlawamakgo» (2 Ped. 3:9). ¿Ni xlikana pi akxni lilakpuwanaw takgalhkgalhin nema kgalhi Jehová kinkamakgpuwantiniyan xakgalhkgalhinanin nawanaw? (Rom. 2:4). Kaʼakxilhwi niku natalakaskin pi nalimasiyayaw takgalhkgalhin.

Lhuwa tuku titaxtuyaw nema tuwa tlawa pi nalimasiyayaw takgalhkgalhin. Akgtum liʼakxilhtit, komo lakpuwanaw pi wi tuku xlakaskinka nawanaw, nalimasiyayaw takgalhkgalhin akxni ni nachuwinanaw akxni wi tiku chuwinama (Sant. 1:19). Max na natalakaskin nalimasiyayaw takgalhkgalhin akxni amakgapitsi natalan tlawakgo tuku akinin ni lakgatiyaw. Ni lakapala tuku natlawayaw, wata kalakapastakwi takgalhkgalhin nema kinkalimasiyanikgoyan Jehová chu Jesús akxni tlawayaw tuku ni lakgatikgo. Xlakan ni wa akxilhkgo tuku nitlan tlawayaw. Wata akxilhkgo tuku tlan tlawayaw chu la liskujmaw xlakata nakgalhiyaw xatlan tayat (1 Tim. 1:16; 1 Ped. 3:12).

Nachuna kinkaliʼakxilhkanan komo xakgalhkgalhinanin akinin akxni wi tiku kinkalimawakayan taʼakgsanin. Akxni chuna la, max lakapala nasitsiyaw chu nawanaw pi ni xlikana. Pero xTachuwin Dios kinkawaniyan tuku kilitlawatkan: «Tlakg tlan tiku kgalhkgalhinan nixawa tiku tlankajwa. Ni lakapala kasitsi, xlakata tiku lakapala sitsi wa tuku tlawakgo tiku xalak tontos» (Ecl. 7:8, 9). Chuna, maski kinkalimawakamakan tuku nixaxlikana, talakaskin pi pulana nalilakpuwanaw tuku nakgalhtinanaw. Wa uma tuku tlawalh Jesús akxni likgalhkgamananka (Mat. 11:19).

Talakaskin pi natlatni xakgalhkgalhinanin nawankgo akxni nakastakyawakgo xkamanankan xlakata tuku nitlan tlawamakgo. Kalilakpuwaw tuku titaxtulh chatum tala tiku makgtapakgsi kBetel xla Escandinavia tiku wanikan Mattias. Akxni kgawasaku xwanit, ankgalhin xlikgalhkgamanankan kʼescuela xlakata xtakanajla. Xapulana, xnatlatni nixkatsikgo tuku xtitaxtuma. Pero tayanikgolh tuku titaxtulh xkgawasakan, xlakata uma tlawalh pi xkgawasakan nialh xkanajla tuku xaxlikana. Gillis tiku xatlat lakapastaka: «Lu xtalakaskin pi xakgalhkgalhinanin xakwaw». Mattias xtlawa takgalhskinin la uma: «¿Tiku Dios? ¿Chu komo Biblia ni wa xTachuwin? ¿Tuku likatsiyaw pi wa Dios tiku kinkawaniyan pi katlawaw uma?». Nachuna xwani xtlat: «¿Tuku xlakata kilawaniyaw tuku kilitlawat xlakata akit ni kkanajla tuku wixin kanajlayatit?».

Gillis lichuwinan: «Xmin kilhtamaku kinkgawasakan lu ksitsi pero ni akinin xkinkasitsiniyan wa xlisitsi tuku xakkanajlayaw, xlakata xwan pi wa xlin kuenta xlakata lu nitlan xkitaxtuninit». ¿Tuku tlawalh Gillis? «Makglhuwa chu lhuwa kilhtamaku xaktachuwinan. Ankgalhin xakkgaxmatni chu lakgachunin xaktlawani takgalhskinin xlakata liwana nakʼakgatekgsni tuku xmakgkatsi chu tuku xlakpuwan. Milh kilhtamaku, wi tuku kwanilh xlakata xlilakpuwa chu alistalh  xaktachuwinampa. Chu lakgachunin xakwani pi naklilakpuwan tuku xkiwani. Xlakata ankgalhin xakchuwinanaw, Mattias tsukulh akgatekgsa chu makgamakglhtinalh tuku masiyayaw xlakata talakgmaxtut, xlakata wa Jehová lakgchan namapakgsinan chu tapaxkit nema kinkakgalhiniyan Dios. Lhuwa kilhtamaku talakaskilh chu milh kilhtamaku tuwa kmakgkatsiw pero tapaxkit nema xkgalhini Jehová tsinu tsinu tsukulh staka. Akit chu kimpuskat lu klipaxuwayaw pi xlakata klimasiyaniw takgalhkgalhin Mattias akxni kgawasaku xwanit, la uku lu tlan tuku kitaxtulh chu tuku xaxlikana lakgchalh xnaku».

Akxni Gillis chu xpuskat xputsamakgolh la namakgtayakgo xkgawasakan xlipawankgo pi Jehová xʼama kamakgtaya. Xla lichuwinan: «Makglhuwa kwanilh Mattias pi xtse chu akit lu xakpaxkiyaw wa xlakata xakskiniyaw Jehová pi xmakgtayalh naʼakgatekgsa tuku xaxlikana». Lu paxtikatsininankgo umakgolh natlatni pi limasiyanikgolh takgalhkgalhin xkgawasakan.

Xaxlikana kstalaninanin Cristo nachuna xlimasiyatkan takgalhkgalhin akxni kakuentajtlawakgo xfamiliajkan o xʼamigoskan tiku max kgalhikgo xasnun tajatat. Kaʼakxilhwi tuku titaxtulh Ellen, * tiku na anta lama kʼEscandinavia.

Liwaka akgtsayan kata xchixku Ellen makgtiy kgalhilh tajatat kxʼakskitit nema tlawanit pi nialh nalimasiya talakgalhaman, tapaxuwan chu nitu namakgkatsi. Uma tuku titaxtuma Ellen lu makgatlakgwan. Xla lichuwinan: «Lu talakaskin naklimasiya takgalhkgalhin chu lhuwa oración naktlawa». Chu wampara: «Texto nema tlakg klakgati chu lu tlan kimamakgkatsini wa Filipenses 4:13, niku wan: “Kkgalhi litliwakga nema putum kmatlani, xlakata tiku kimaxki litliwakga”». Kpaxtikatsinilh uma litliwakga, Ellen ni taxlajwani chuntiya limasiya takgalhkgalhin chu liwana katsi pi Jehová chuntiya namakgtaya (Sal. 62:5, 6).

Xlikana wa tiku tlakg xatlan liʼakxilhtit xlakata kgalhkgalhinankan wa Jehová (2 Ped. 3:15). Anta kBiblia tekgsaw lhuwa liʼakxilhtit niku Jehová limasiyalh takgalhkgalhin (Neh. 9:30; Is. 30:18). Akgtum liʼakxilhtit, kaʼakxilhwi tuku tlawalh akxni Abrahán wanilh pi ni xmasputulh Sodoma. Ni wanilh pi nitlan tuku xwanima wata liwana kgaxmatnilh akxni Abrahán xwanima tuku xlilakgaputsa. Alistalh, limasiyanilh pi liwana xkgaxmatninit akxni makglhuwa wanilh tuku xlilakgaputsama chu xla wanilh pi ni xʼama masputu Sodoma komo xtekgsli anta kgalhakaw lakchixkuwin tiku xaʼakgstitum (Gén. 18:22-33). ¡Lu lanka liʼakxilhtit xla takgalhkgalhin chu xlakata machokgokan tuku nitlan tlawaputunkan!

Chuna la akxilhnitaw, tayat xla takgalhkgalhin lu xlakaskinka xlakata nalilhakgananaw xasasti tayat nema putum kstalaninanin Cristo kilikgalhitkan. Komo naliskujaw xlakata nakgalhiyaw uma lu xlakaskinka tayat, namaxkiyaw kakni Jehová chu nalitaxtuyaw «la tiku kgalhikgo takanajla chu xlakata kgalhkgalhinankgo makglhtinankgo tuku wankanit namastakan» (Heb. 6:10-12).